Lukas 10
10
Yesu mampantuyu pitu pulona pasikolaNa
(Mat. 11:20-24)
1Ladu nai anto, Puang Yesu mampirarai: pitu pulona*#10:1 pitu pulona. Ara ho teks lùlung ung mangkonai: pitu pulona idua. Mène: ho i sua: 17. tau nai àlaꞌna tau ung mangulaꞌ‑Mi. Na pantuyunna‑mi si idua-dua mampidolung‑ing mao i tumpuꞌ lipu: pang kaoneang ung Na aku: Na maꞌi. 2Na pusua: moa teꞌ, “Linamung ung kanikìtiꞌangna‑mo maranga‑da ìnang hampoꞌ sangkìdoꞌ‑i ti ung mangkìtiꞌ. Deanna‑mo to, palau‑ko se mao i Ampunna kinete:, mangking mampantuyu ho tau sintàna: mao mangkìtiꞌ i kineteNa.
3Nao: se, pang kalehai‑ko se moa teꞌ u Ku pantuyu se mène: anaka domba mao i àlaꞌ-àlaꞌna serigala. 4Hau mambaha se pangànaang aka-aka, seeng, dea‑raka sapatu. Hau tonto: se i lummu: dalang silàha: tau ung nu sikorai:‑ing.
5Ìna u mintamaa se i besa rasang, konai:‑kangko se dolung teꞌ, ‘Na kabeloang‑rangmo one: i tanandapoꞌ tee.’ 6Ìna i anto ara tau ung mantarima kabeloang, pupasalamaꞌmu se to letaa i anto. Ìna dang ara mantarima, pupasalamaꞌmu se to sumulea mao i dio se. 7Leta:‑ko se teng one: i besa rasang. Hau mingeliꞌ-eliꞌ se. Tarima‑ko se aka ti ung nipalennaꞌ‑ingko se i anto, sàbaꞌ tau ung mingkamaꞌ sipatu:‑da mantarima sarona.
8Ìna u bùruꞌ se i besa lipu: pang u nitarima belo: se i anto, anne:‑ko se aka teng ti ung nipalennaꞌ‑ingko se. 9Pumatalete:‑ko se ti tau ung si mipanaꞌ, pang pakareba mao i tau i anto moa teꞌ, ‘Na rara‑mo Puang ti muparenta i àlaꞌ-àlaꞌmu se.’ 10Hampoꞌ ìna u bùruꞌ se i besa lipu: pang hang nitarima‑ko se i anto, sòhong‑ko se mao i batantana pang konai:‑ko se moa teꞌ, 11‘Ahunna lipumu se ung millèkeꞌ i kokoꞌki, ki tupai: miluhali pipakalehai mao i dio se. Hampoꞌ ìsang‑ko se moa teꞌ, Katongangangna, na rara‑mo Puang ti muparenta!’ ” 12Pang musua: ho ti Yesu mao i dei: se moa teꞌ, “Ku pusua: matung teꞌ, Tempona nasang tau niparessaa, tu Sodom làbi marìngànga‑da ti hukungangna‑i se nai none: tau i lipu: to!
13Tu Korasim, u masolang dosse:! Pang tu Betsaida, u masolang dosse: ho! Àla: ung nipukauꞌ‑ida i Tirus pang i Sidon ti kalle-kalleang ung nipukauꞌ‑mo i àlaꞌ-àlaꞌmu se, manassa tau i anto masai‑moda mingkatobaꞌ nai dosa-dosanna‑i se pang mipake pakeang kamasussaang na pasianu mamparrauꞌi ahu dapoꞌ bakàna‑i se. 14Tempona nasang tau niparessaa, na moi ha mingkatobaꞌ‑i ti tu Tirus pang tu Sidon, làbi marìngànga‑da ti hukungangna‑i se nai dio se. 15Pang dio se tu Kapernaung, u konai: se naꞌ u nilantoing se deaꞌ i suruga? Hari:‑da! U niuluꞌa dosse: sule: mao i naraka!”
16Musuana‑mi ti Yesu mao i pitu pulona tau ung Na pantuyu to moa teꞌ, “Tau ung mampisàdìngi‑ko se, sibali mampisàdìngi‑Maꞌ. Tau ung mantumpaꞌ‑ko se, sibali mantumpaꞌ‑Maꞌ. Pang tau ung mantumpaꞌ‑Kaꞌ, mantumpaꞌ ho Dea ung mampantuyu‑Maꞌ.”
Sumulena pitu pulona pasikolaNa
(Mat. 11:25-27, 13:16-17)
17Tempona to pitu pulona tau sumule:, haka: tungka ti pinanahanna‑i se. Musua:‑i se moa teꞌ, “O Tuang, dihata bulituku pang, manuruꞌ mao i kami ìna ki parenta‑i se mangola: konaMu!”
18Na sùmui Yesu moa teꞌ, “Ku ita‑ko ti Datuna dihata bulituku marèneꞌ nai langiꞌ mène: salabia:. 19Kalehai‑ko se! U Ku hengi‑ming se kuasa mangking u hela se mangidaka talubammaꞌ pang aripang bahi pang mantalo nasang kuasanna dihata bulituku, pang hari: aka ung hela massolàngi‑ko se. 20Hampoꞌ na moi‑rika mène: to, hau haka: se teng sàbaꞌ dihata bulituku manuruꞌ mao i dio se, sangadinna làbi-làbi nai anto, parallu u haka: se ho sàbaꞌ konamu nironno: i suruga.”
21Tempo dea ho teng to, Yesu haka: tungka i laling Pinanaha Malìsong pang musumbayang moa teꞌ, “O Ama:, Ampunna langiꞌ pang lino, Ku mukurusumangaꞌ matung sàbaꞌ nasangna to U huni‑ing mao i tau ung mangàna: kalaena kitangaꞌ belo: pang manarang, hampoꞌ U pupiita mao i tau ung i hoiꞌ pinanaha. Dea‑moda to ti ung tongang Ama:. Sàbaꞌ mène:‑mo to ti ung mampumasannang pinanahamMu.”
22Ladu to, musua: ti Yesu moa teꞌ, “Nasang angkanna Ku na patongang‑ming AmangKu. Hari:‑da moi besa tau ung mangìsang isai ti Anaka sangadi Ama:. Pang hari: ho ung mangìsang Ama: sangadi Anaka, pang tau ung Na pirarai:. Anaka‑da teng ti ung mampupiìsang Ama: mao i dei: se.”
23Misailena‑mi ti Yesu mao i pitu pulona tau to, màli: na musua: mao i dei: se moa teꞌ, “Hang makàdaꞌ‑ida maupaꞌmu se sàbaꞌ u mangita‑mo se te ung nu ita se i latenna. 24Sàbaꞌ matantu te ung Ku pusua: matung e teꞌ Nai lùlung boso: nabi pang datu: mangkapelai: mangita ti ung nu ita se i latenna, hampoꞌ hang pakala‑i se mangita. Na kapelai:‑i se ti massàding aka ti ung nu sàding se i latenna, hampoꞌ hang pakala‑i se massàding.”
Rampeang tu Samaria ung belo: pinanahanna
25Ara pimbesa na tèdeꞌ ti besa ung manarangna i aluku tu Yahudi, mangkakaꞌi Yesu. Mingkutiki moa teꞌ, “Tungguru, aka ti ung parallu ku pukauꞌ mangking ku mangkorai: katuhoang ung màle?”
26Na sùmui Yesu moa teꞌ, “Aka ti ung nironno: i Suraꞌ Musa? Aka ti ung nu basa i anto?”
27Na sùmuinNa‑mi moa teꞌ, “ ‘Pulemu‑i ti Puang, dea‑mo Puangmu, nai nasang isinna pinanahammu sola: nasang kedomu,’ pang ‘Pulemu‑i ti solamu mène: u mampulemu kalaemu.’ ”
28Na konai: Yesu moa teꞌ, “Tongang ti sùmummu. Pukauꞌ ti to, pang u tuhoa‑do.”
29Hampoꞌ na kapelai: teng ti mangàna: kalaena tongang, pùna mingkutiki pole mao i Yesu moa teꞌ, “Baꞌ, isai ti solaku to?”
30Na sùmui Yesu moa teꞌ, “Ara besa tau, nai Yerusalem nau: mao i Yeriko. I lummu: dalang, na putuda:‑ing tau ung si pumanauang, na belàngi pang na balobo:‑i se deaꞌ sampiuꞌ mate, màli: na palii:‑i se.
31Aranna‑mi besa imang ung liung i anto. To na ita‑i ti tau to, na pilliaꞌ‑ing pang na patùrung ti pammulaoangna. 32Mène:‑da ho to besa tu Lewi ung mangola: i anto. Na dùkuꞌi pang na pumahele ti tau to, màli: na pilliaꞌ‑ingda ho pang tùrung mammulao.
33Hampoꞌ ara kang besa tau, dea‑mo tu Samaria, ung tarrang i laling besa pammulaoang pang mangola: i anto. To na ita‑i ti tau to, makadai ti pinanahanna sàbaꞌ na pulemu na hele. 34Na dùkuꞌinna‑mi, màli: na pakulii:‑i ti makoyong-koyongna mampake anggoroꞌ pang minnaꞌ saitun, màli: na babaꞌi‑i. Ladu to, na lanto‑ing i keledainna, màli: na baha‑i mao i besa rasang puhengiang ung nipupibayaꞌ. One: i anto na parakai. 35Àlo i hingkoꞌna‑mo, na bayaꞌ ti ampu rasang idua seeng peraꞌ. Na konai: moa teꞌ, ‘Parakai‑ida, pang ìna ara kang ho angkosoꞌ sintàna:, ku bayaꞌ‑ràngi i hunni ìna ku sumule:‑mo pole.’ ”
36Tòna ladu mupatidoluang ti Yesu mène: to, Na kutiki mao i ung manarangna i aluku to moa teꞌ, “Manuruꞌ pantangaꞌmu, ummanna nai itàlu tau to ti ung miluhali solana tau ung nipumanaui to?”
37Na sùmui moa teꞌ, “Tau ung mampupiita malemunna mao i tau to.”
Na konaina‑mi Yesu moa teꞌ, “Nàmo: pang pukauꞌ‑do ho ti ung mène: to!”
Marta pang Maria
38I laling pammulaoangna‑i se, Yesu pang pasikolaNa bùruꞌ i besa lipu:. I anto ara besa bahine ung nikonai: Marta manghàngo‑I mao i rasangna. 39Pang ara ho bahine mantàdina Marta ung nikonai: Maria. Maria tee mesong i sali sidungkuꞌ Puang Yesu mampisàdìngi pipaturoNa. 40Hampoꞌ Marta reroꞌ karitutu. Lumanna‑mi i Yesu pang musua: moa teꞌ, “Tuang, hari: naꞌ malemumMu mao i koi:? Dea ti Maria mampatatang‑kaꞌ teng na besa‑i mingkamaꞌ. Suo:‑ida mandului‑kaꞌ!”
41Na sùmui Puang Yesu moa teꞌ, “Marta, Marta, u mampusussa mantangaꞌ angkanna, 42pambàtiꞌ besa‑ida ti ung parallu. Maria mampirarai:‑mo ung kamìnang belo:, ung dang nialaa nai dea.”
Currently Selected:
Lukas 10: skx
Highlight
Share
Copy
Want to have your highlights saved across all your devices? Sign up or sign in
