Lukas 9

Yesu mampantuyu sampulo: idua pasikolaNa

(Mat. 10:5-15, Mrk. 6:6b-13)

1Nai anto, Yesu manghàngo sampulo: idua pasikolaNa mukobu:. Na panghenginna‑ming kuasa mampasahu nasang dihata bulituku pang mampapàda: sainna tau, 2màli: Na pantuyu‑i lumao mampakareba mangaka ti Puang muparenta, pang mampumatalete: tau ung mipanaꞌ. 3Musua: ti Yesu moa teꞌ, “Hau kabaha-baha se aka i laling pammulaoangmu se, mènena doke:, pangànaang aka-aka, kinallo, seeng, pang pipasònoꞌ. 4Iaka-aka pòteng u nitarima se, leta:‑ko se i rasang to deaꞌ u mampalii: lipu: to. 5Hampoꞌ iaka ti lipu: ung dang mantarima‑ko se, tupai: ti ahu nai kokoꞌmu se miluhali pipakalehai moa teꞌ, ‘U masolànga se,’ pang palii: ti lipu: to.”

6Lumanna‑mi se mampakareba Kareba Belo: pai lipu:-lipu:, pang mampumatalete: tau ung si mipanaꞌ.

Mampatu: Herodes

(Mat. 14:1-12, Mrk. 6:14-29)

7To na sàding‑mo Herodes Antipas, ung miluhali ampu parenta i propinsi Galilea ti aka to, hang tintong‑i. Sàbaꞌ ara tau ung mangkonai: moa teꞌ Yohanes Pumpudoiꞌ tuho: pole. 8Pang ara ti ung mangkonai: teꞌ nabi Elia mingaro pole. Sintàna: kang ho mangkonai: moa teꞌ besa nai àlaꞌna nabi-nabi lùlung tuho: pole. 9Hampoꞌ musua: ti Herodes teꞌ, “Hang tongang‑i ti to, sàbaꞌ ku lempòki‑mo ti bakàna Yohanes. Isainnaa‑ra:da ti Tau ti? Sàbaꞌ boso:‑mo ti kareba ku sàding mampatu:‑I.” Jadiꞌ, mangokaꞌ dalang sikorai: Yesu.

Yesu mampakanne: lima sàbunna tau

(Mat. 14:13-21, Mrk. 6:30-44, Yoh. 6:1-14)

10Tòna sumule:‑mo to ung na pantuyu Yesu pang mampatidolu nasang aka ung na pukauꞌ‑mi se, Yesu mambahai:‑i se mao i pangalanna lipu: Betsaida, massaràki kalae: nai tau boso:. 11Hampoꞌ na ìsang tau boso:, na ulaꞌNa‑mi se. I anto, Yesu mantarima‑i se, pang mampumakàso: mao i dei: se mangaka ti Puang muparenta i pinanahanna tau, pang mampumatalete: ung si mipanaꞌ.

12Liung‑mo mulummu: sumòloꞌ kùlaꞌ, sampulo: idua pasikolaNa mao massilàha:‑ing Yesu teꞌ, “Kaoneang te karao: nai lipu:. Belo:‑da Ta suo:‑mi se sumule:, na lumai: se mangokaꞌ manne: pang puhengiang pai lipu:-lipu: dea‑raka pai kinete:.”

13Hampoꞌ Na sùmui teꞌ, “Dio‑mo se teng ti ung mampakanne:‑i se.”

Musuana‑mi ti pasikolaNa teꞌ, “Baꞌ lima‑i ti rotingki pang idua‑i ti urung e. Parallu naꞌ ki mao mampambalaꞌ‑ing se kinanne:?” 14Sàbaꞌ muane maang nikapang ara lima sàbunna.

Na pantuyunna‑mi Yesu ti pasikolaNa teꞌ, “Suo:‑i se mesong si sallaoang-laoang. Sallaoang màka: lima pulona tau.” 15PasikolaNa mampukauꞌ ti to, pang nasang tau mesong.

16Na alanna‑mi Yesu ti lima roti pang idua urung to, tumonga: pang musumbayang mukurusumangaꞌ. Na tòpe-tòpekèna‑mi pang Na àdo:‑ing pasikolaNa, na kàlaꞌ-kàlaꞌ‑ing tau boso:. 17Mannena‑mi se nasang deaꞌ boro. Ladu manne:, na kobu: pasikolaNa ti tàranna ung nianne:, sampulo: idua rota:.

Pangakuangna Petrus

(Mat. 16:13-20, Mrk. 8:27-30)

18Ara sangàlo, tempona Yesu musumbayang, dungkuꞌ nai pasikolaNa. Na kutikìna‑mi Yesu teꞌ, “Pangkonaina tau boso:, isai‑Kaꞌ ti te?”

19Na sùmui‑i se teꞌ, “Ara ung mangkonai:‑Ke Yohanes Pumpudoiꞌ. Ara ho ung mangkonai: nabi Elia, minguluꞌ pole. Sintàna: ho mangkonai: moa teꞌ besanna nai nabi lùlung ung tuho: pole.”

20Mingkutiki kang ho pole ti Yesu teꞌ, “Hampoꞌ dio se deꞌ? U Mi konai: se isai?”

Misùmunna‑mi ti Petrus teꞌ, “Datu: Pipasalamaꞌ ung na pantuyu Puang.”

21Na piapuꞌna‑ming Yesu mao i pasikolaNa moa teꞌ, “Hang mading‑mi tungka u patidolu se ti te mao i isai-sai pòteng.”

Yesu mampumakàso: kamaparriꞌangNaa pang kamateangNa

(Mat. 16:21-28, Mrk. 8:31~– 9:1)

22Na konai: ho teꞌ, “Anaka Tulino parallu mangola: boso: kamaparriꞌang pang na tumpaꞌ ung si matua:-tua:, kapala-kapala imang, pang ung si manarangna i aluku. Nipateia, hampoꞌ àlo ung kaitàlu nipatuhoa pole.”

23Nai anto, musua: mao i nasang tau ung one: i anto teꞌ, “Tau ung mio: mangulaꞌ‑Kaꞌ, parallu mampalii: kalinoangna, pang mangkoha: oròngangna àlo-àlo, pang tùrung mangulaꞌ‑Kaꞌ. 24Sàbaꞌ isai-sai ti ung mangkeboꞌi‑Kaꞌ mangking mampasalamaꞌ kalaena i lino tee, kahùlìngànga katuhoangna. Hampoꞌ isai-sai ti tau ung marìngang kahùlìngang katuhoangna sàbaꞌ Koi:, tau to mampasalamaꞌa katuhoangna. 25Aka ti maupaꞌna mao i tau, ìna nasang i lino tee na ampui, hampoꞌ kahùlìngang katuhoangna? 26Sàbaꞌ isai-sai ti ung madia: mangampu‑Kaꞌ pang mampudia: pipaturoKu, Anaka Tulino madiaa‑da ho mangampu tau to, tempona bùruꞌNaa sìnang kamalabiꞌangNa pang kamalabiꞌangna AmanNa sola: malaikaꞌ-malaikaꞌ ung malìsong. 27Hampoꞌ matantu te ung Ku pusua: matung e teꞌ Araa i àlaꞌmu se ung dang mangolaa‑kang kamateang i dang mangita‑mi Puang bùruꞌ i laling kamakuasaangNa.”

Kamalabiꞌangna Yesu nipupiita iaho mungku

(Mat. 17:1-8, Mrk. 9:2-8)

28Màka: ara sammingku nai anto, Yesu mambaha Petrus, Yohanes pang Yakobus làngang mao i mungku musumbayang. 29Tempona Yesu musumbayang, baliki ti rupanNa, pang pakeangNa mabusa: pasiang tungka. 30-31Mingèneꞌna‑mi ti idua tau ung malabiꞌ nihele, dea‑mo Musa pang Elia. Pang massilàha:‑ing Yesu mampatu: kamateangNa ung Na kannaꞌia i Yerusalem.

32Hampoꞌ tempona Yesu musumbayang, Petrus pang solana tituu:‑mo. Hang masai-sai‑i nai anto, makàso:‑i se pang mangita kamalabiꞌangna Yesu pang to idua tau ung tèdeꞌ sola:. 33Tòna mampaliia‑mo Yesu ti idua tau to, tipasua: ti Petrus mao i Yesu teꞌ, “O Tuang, belo: tungka ti inneta se. Jadiꞌ, eloꞌna‑mo ki mampatèdeꞌ itàlu rasang-rasang. Besa mampatu: Kinta:, besa mampatu: Musa pang besa mampatu: Elia.” (Petrus musua: mène: to, hang na ìsang‑i aka ti patuna ung na pusua:.)

34Tarrang maang musua: ti Petrus, bùruꞌ ti kahung mallilong‑i se nasang, màli: na minguluꞌ pang mampotoꞌ‑i se, mambùruꞌ‑ing mariaꞌ ti Petrus‑i se. 35Nisàdingna‑mi ti sua: nai kahung to moa teꞌ, “Dea‑mo te ti AnakàKu ung Ku patantu‑mo. Pisàdìngi‑ko se!”

36Tòna hari: hura: ti sua: to, na besa‑rai: ti Yesu. Na huni‑ing se to itàlu pasikolaNa ti aka dea to, hang na patidolu‑i se mao i isai-sai tempo to.

Yesu mampasahu dihata bulituku nai besa anaka muane ung bebe

(Mat. 17:14-21, Mrk. 9:14-29)

37I hingkoꞌna to, minguluꞌ‑i se nai mungku, pang tau boso: mao mintadoꞌ. 38Aranna‑mi besa muane nai àlaꞌna tau boso: to ung mikakoang moa teꞌ, “O Tungguru, pulemu‑kaꞌko! Besa‑iko ti anakàku, dea‑mo muane. Hele‑ingnaꞌko mai! 39Dihata bulituku nene mingkamaꞌ i kalaena anaka te. Hang nisàdaꞌ-sàdaꞌ‑i, mikei: pang tipakìdiꞌ-kìdiꞌ deaꞌ saho ti takona. Dihata bulituku to lupu mangkeneꞌ-keneꞌ‑i, pang hang mio:‑i malai. 40Ku palau‑mo mao i pasikolaTa ung leta: inne: mangking mampasahu, hampoꞌ hang na hela‑i se.”

41Musuana‑mi ti Yesu teꞌ, “E tau ung dang si mupatongang pang dang manuruꞌ, sangakaa kang masainna parallu Ku leta: i àlaꞌmu se pang sabaraꞌ matung? Baha‑i mai ti anakàmu!”

42Tòna nibaha mao i Yesu ti anaka to, dihata bulituku mampimmaiꞌ‑ing pang anaka to tipakìdiꞌ-kìdiꞌ. Hampoꞌ Yesu mampasahu dihata bulituku malai, pang anaka to matalete:. Na henginna‑ming pole amanna. 43aNasang tau i anto mimàha manghele kuasanna Puang ung lammuꞌ.

Ung kapindua Yesu mampupiìsang kamaparriꞌangNa

(Mat. 17:22-23, Mrk. 9:30-32)

43bTempona mimàha maang ti tau manghele nasang ung Na pukauꞌ, musua: ti Yesu mao i pasikolaNa moa teꞌ, 44“Pisàdìngi‑ko se belo:-belo: pang hau puhuta se ti suaKu tee, Hang masaii: hura: ti Anaka Tulino nipehea mao i kakuasaangna tulino.” 45Hampoꞌ hang na pahang‑i pasikolaNa ti patuna suaNa to. Kara-kara to tihuni mao i dei: se, mambùruꞌ‑ing hang na ìsang‑mi se. Hampoꞌ mariaꞌ-riaꞌ‑i se ho mampingkutik‑ing aka to mao i Dea.

Isai ti ung iaho i àlaꞌna pasikolaNa

(Mat. 18:1-5, Mrk. 9:33-40)

46Tempo to, mingaro ti kaseroang i àlaꞌna pasikolana Yesu mampatu: isai ti ung kamìnang iaho nai àlaꞌna‑i se.*#9:46 PasikolaNa mantangaꞌ pangkaꞌna tempona Yesu muparenta miluhali Datu:. 47Hampoꞌ na ìsang Yesu ti i laling pinanahanna‑i se. Deanna‑mo to, Na ala ti besa anaka pang Na patèdeꞌ mui osokòNa. 48MusuaNa‑mi mao i pasikolaNa moa teꞌ, “Isai-sai ti ung mantarima anaka mène: tee sàbaꞌ Koi:, tau to sibali mantarima‑Maꞌ. Pang isai-sai ti ung mantarima‑Kaꞌ, mantarima‑da ho Dea ung mampantuyu‑Maꞌ. Sàbaꞌ ung kamìnang i hoiꞌ i àlaꞌmu se, dea‑moda ti ung kamìnang iaho.”

49Musuana‑mi ti Yohanes moa teꞌ, “Tuang, ki mangita besa tau mampasahu dihata bulituku mangola: konaMu. Ki apuꞌna‑mi sàbaꞌ hang sampolaiangta‑i.”

50Hampoꞌ musua: ti Yesu moa teꞌ, “Hau apuꞌ se, sàbaꞌ isai-sai ti ung dang mangeba‑ko se, tau to solata dasse:.”

Besa lipu: i Samaria hang mio:‑i mantarima Yesu

51Tòna dùkuꞌ‑mo ti tempona Yesu nilanto‑ing mao i suruga, Na kìting i pinanahanNa ti lumao i Yerusalem. 52Nai anto, Na pantuyu ti pira-pira tau lumao dolung. Tau to lumai: se pang mintama i besa lipu: i Samaria mangking mampatokana angka-angkanna mao i kabùruꞌangna Yesu. 53Hampoꞌ tau i lipu: to hang mio:‑i se mantarima Yesu, sàbaꞌ mampatui:‑Da mao i Yerusalem. 54Tòna pasikolana Yesu, dea‑mo Yakobus pang Yohanes, massàding aka dea to, musua:‑i se moa teꞌ, “Tuang, Ta mio: naꞌ ki mampalau api nai langiꞌ mampatùtuꞌ tau to‑i se?”

55Hampoꞌ misaile: ti Yesu pang marràho‑i se. 56Lumanna‑mi se i lipu: sintàna:.

Tau ung si mangkapelai: mangulaꞌ Yesu

(Mat. 8:19-22)

57Tòna tarrang mampatùrung pammulaoangna‑i se ti Yesu sola: pasikolaNa, ara besa tau ung musua: mao i Yesu moa teꞌ, “Tungguru, ku mingulaꞌa‑ko iaka pòteng Ta lumaꞌi.”

58Hampoꞌ na sùmui Yesu moa teꞌ, “Serigala mangampu hàlo:, pang kudaꞌ mangampu sàrang, hampoꞌ Anaka Tulino hari: kaoneangNa maturu.”

59Musuana‑mi ti Yesu mao i tau sintàna: moa teꞌ, “Hàmo:, ulaꞌ‑Kaꞌ.”

Hampoꞌ musua: ti tau to moa teꞌ, “Tuang, patinai‑kangkaꞌko sumule: dolung mamparakai amangku.”

60Na sùmuinna‑mi Yesu moa teꞌ, “Eloꞌna‑da ti tau ung mate*#9:60 mate palleona, mate kapatongangang. mamparakai tau ung mate, hampoꞌ dio, nao: pang pakareba ti kadatuangna Puang.”

61Ara kang ho besa tau ung musua: moa teꞌ, “Tuang, ku mingulaꞌa‑ko, hampoꞌ patinai‑kangkaꞌ mupasabi dolung i tanandapoꞌku.”

62Hampoꞌ musua: ti Yesu mao i tau to moa teꞌ, “Tau ung marrara‑mo mupajeko, hampoꞌ misaile: mao i keboꞌ, hang sipatu:‑i mingkamaꞌ i kadatuangna Puang.”

Currently Selected:

Lukas 9: skx

Highlight

Copy