Lukas 8

Bahine ung si mandului Yesu

1Hang masai‑i nai anto, Yesu lumao pai lipu:-lipu: mampakareba Kareba Belo: mampatu: kadatuangna Puang. Dea ti sampulo: idua pasikolaNa mingulaꞌ. 2Mène: ho ti pira-pira bahine ung nipumatalete:‑mo nai dihata bulituku pang nai sai sintàna:. Tau to‑i se dea‑mo Maria tu Magdala, ung nisalokaꞌi‑mo nai pitu dihata bulituku, 3pang Yohana, singkoringna Kusa, dea‑mo pegawai ung mangatoroꞌ kamaꞌang i tamming kadatuangna Herodes, Susana, pang boso: kang ho bahine sintàna:. Bahine to‑i se, mangkoha: kalenanna aka ti ung na pandului‑ing se Yesu pang pasikolaNa.

Rampeang mampatu: sinahuꞌ

(Mat. 13:1-9, Mrk. 4:1-9)

4Tau nai lipu:-lipu: lupu teng bùruꞌ mao i Yesu. Pang tempona boso:‑mo tau mukobu:, Yesu mampatidolu rampeang mène: tee, 5“Ara besa tau ung lumao sumahuꞌ, massahuꞌ sinahuꞌna. Tempona sumahuꞌ, sinahuꞌ sintàna: toang i dalang, pang na ida-idaka tau sìnang na anne: kudaꞌ deaꞌ lòsoꞌ. 6Sintàna: toang i tampo: ung kihatu i hoiꞌna. Tempona milolo: ti sinahuꞌ to, pang mikehiꞌ‑mo ti kùlaꞌ, malaso sàbaꞌ makàdaꞌ ti tampona. 7Sintàna: kang ho toang i tampo: ung madàli makàrang, pang sa: baraꞌ-baraꞌna ti làmaka to, mangkàràngi deaꞌ mate. 8Pang sintàna: toang i tampo: ung malompo:, tuho: belo: pang mahoa:. Haseleꞌna miluhali sangatuꞌ lùpiꞌna.”

Tòna ladu mampatidolu rampeang to, Yesu mampikakoang‑ing moa teꞌ, “Isai ti ung kitalinga, na pisàdìngi‑i!”

Aka pùna mampake rampeang ti Yesu

(Mat. 13:10-17, Mrk. 4:10-12)

9Tau ung si mangulaꞌ‑Mi mampingkutik‑ing palleona rampeang to. 10SùmunNa mène: tee, “Aka ti ung dang niìsang‑kang nai dolung, u nihengi‑ming se tangaꞌ mangking mangìsang mangaka ti Puang muparenta, hampoꞌ mao i tau sintàna:, angkanna nipadeaꞌ i laling rampeang, mangking

‘na moi‑rika na ita‑i se,

hampoꞌ hang na ìsang‑i aka ti ung Ku pukauꞌ.

Na moi‑rika na sàding‑i se ti suaKu,

hampoꞌ hang na pahang‑i,’*#8:10 Yes. 6:9.

mène: ung na pupihuyang nabi Yesaya nai lùlung.”

Yesu mampumakàso: rampeang mampatu: sinahuꞌ

(Mat. 13:18-23, Mrk. 4:13-20)

11“Mène: tee ti rampeang to, Sinahuꞌ to, manturo: suana Puang. 12Sinahuꞌ ung toang i dalang, manturo: tau ung massàding suana Puang, hampoꞌ bùruꞌ ti Datuna dihata bulituku marrampaꞌi nai pinanahanna‑i se, mangking hang mupatongang‑i se pang hang nipasalamaꞌ‑i. 13Mène: ho ti sinahuꞌ ung toang i tampo: ung kihatu i hoiꞌna, manturo: tau ung massàding suana Puang pang haka:‑i se mantarima, hampoꞌ hang pàraꞌ‑i ti oaꞌna pang hang masai‑i mupatongang. Pang ìna bùruꞌ ti tempona nikakaꞌi, madàli‑i se mingkeboꞌ. 14Pang sinahuꞌ ung toang i tampo: ung madàli makàrang, manturo: tau ung massàding suana Puang, hampoꞌ mantangaꞌ teng katuhoang i lino tee, mangkapelai: sukiꞌ pang tuho: masannang. Nasang to sa: mangkàrang-kàrànginna suana Puang, pùna langko:. 15Hampoꞌ sinahuꞌ ung toang i tampo: ung malompo:, manturo: tau ung massàding suana Puang, pang na pailaling pinanaha ung mahulo: pang belo:. Minumpu‑i se deaꞌ hoa:.”

Rampeang pallita

(Mrk. 4:21-25)

16“Hari:‑da tau ung massohei pallita, màli: na patauꞌi‑i dea‑raka na àna: i hoiꞌna paturuang. Sangadinna, na patumenneng i kaoneang iaho, mangking pampanana na ita tau ung mintama. 17Sàbaꞌ hari:‑da aka nai Puang ung tihuni ung dang nipupiitaa, pang hari:‑da ung dang niìsang, dang niìsànga pang nipatumennènga.

18Deanna‑mo to, kuyaꞌ belo:-belo:‑ko se ti aka ung nu sàding‑mo se. Sàbaꞌ isai-sai ti ung ara‑mo na ampu, nipakànaꞌia kang ho. Hampoꞌ isai-sai ti ung mangampu sangkìdoꞌ‑i, niala hèraꞌa nai kalaena, aka ti ung na konai: ung ara i dea.”

Inanna pang mantàdi:-tàdina Yesu

(Mat. 12:46-50, Mrk. 3:31-35)

19Bùruꞌna‑mi ti inanna pang mantàdi:-tàdina Yesu, hampoꞌ hang hela‑i se mao i Yesu sàbaꞌ hang sangkìdoꞌna‑i ti tau. 20Aranna‑mi tau ung mampaìsàngi‑I moa teꞌ, “O Tungguru, inanTa pang mantàdi:-tàdiTa one:‑i se i sòhongna. Parallu‑i se mampampasiita‑ingKe.”

21Hampoꞌ Na sùmui moa teꞌ, “Tau ung mampisàdìngi suana Puang pang mantoroꞌi, dea‑mo to ti inangKu pang mantàdiKu.”

Yesu mampamanta pasaui mahara

(Mat. 8:23-27, Mrk. 4:35-41)

22Tempo to, ara sangàlo na millanto ti Yesu i lemmang sola: pasikolaNa, pang musua: moa teꞌ, “Ingke se i heteꞌna.” Lumanna‑mi se. 23Tarrang‑i se mulemmang, leto ti Yesu.

Bùruꞌna‑mi ti pasaui mahara i tasiki to. Jadiꞌ, balumba marrara‑mo massampoi lemmang, mambùruꞌ‑ing marria: lìli:. 24Na enangna‑mi se ti Yesu teꞌ, “O Tuang! O Tuang, ta masolang dasse: e!”

TèdeꞌNa‑mi pang marràho pasaui pang balumba to. Pasaui pang balumba to manta, pang tasiki miluhali mànaꞌ. 25MusuaNa‑mi moa teꞌ, “Aka dang nu Mi patongang se?”

PasikolaNa mimàha pang mariaꞌ. Silàha:-làhana‑mi se moa teꞌ, “Isai sitongangna ti Tau te? pùna hela‑Da mamparenta ho pasaui pang balumba?”

Yesu mampumatalete: tau ung na katama dihata bulituku

(Mat. 8:28-34, Mrk. 5:1-20)

26Na patùrungna‑mi se ti mulemmang deaꞌ i pangalanna tu Gerasa, i heteꞌna Galilea. 27Tòna minguluꞌ‑mi se nai lemmang ti Yesu, bùruꞌ ti besa muane ampu lipu: i anto ung na katama boso: dihata bulituku. Tau to masai‑mo hang mipakeang‑i pang hang leta:‑i one: i rasang. One:‑da teng pai liokoꞌ pukaburuꞌang. 28Tòna mangita‑mo Yesu, mikei: màli: na mukalimuntuꞌ tumunnuku i heleꞌNa pang na pilabui: ti musua: moa teꞌ, “E Yesu, Anakàna Puang ung Kamìnang Iaho, aka ti ung Nu pukauꞌa mao i kami? Ku mingkalemu tungka, hàni:‑kang U mi keneꞌ-keneꞌ.” 29Musua: mène: to sàbaꞌ Yesu mampasahu dihata bulituku nai kalaena. Ìnang hang mio:‑ida niatoroꞌ. Sàbaꞌ masai‑mo na katama dihata bulituku, pang pimmira-mira‑mo nipungu‑i rante ti kangkangna pang kokoꞌna, pang nikuyaꞌ, hampoꞌ na kàtu‑da teng maang, màli: na baha‑i dihata bulituku to‑i se mao i kaoneang ung tunini.

30Na kutikìna‑mi Yesu ti tau to teꞌ, “Isai ti konamu?”

Misùmu teꞌ, “Boso:,”*#8:30 Boso:. Sua: Yunani Legiun, palleona kamamesaang nai tantara Roma ung 6.000 bosona. Jadiꞌ, Boso:. sàbaꞌ boso: ti dihata bulituku ung mangkatama‑i. 31Dihata bulituku to‑i se mingkalemu tungka mao i Yesu mangking hang nipasahu‑i mao i Hàlo: ung kaladungna dang na lampiꞌ mata.*#8:31 Hàlo: to nikaonei: mantarungkuꞌ dihata bulituku deaꞌ Àlona Puang. Hele i UNY 9:1, 20:1, 3.

32Dungkuꞌ i kaoneang to, ara sampolaiang bahi ung boso: tarrang muokaꞌ manne: i matepaꞌna mungku. Dihata bulituku to‑i se mampalau tungka mao i Yesu mangking nisalokaꞌi mintama i bahi to.

Na sùmui Yesu ti pampalaunna‑i se moa teꞌ, “Nàmo: se!” 33Jadiꞌ, dihata bulituku to missòhong nai tau to, mintama i bahi to‑i se. Ràhanna‑mi se miruru: ti bahi to, pang tùrung sumampo mao i tasiki, deaꞌ mate pàhuꞌ.

34Dea to na ita‑mi se pikuyaꞌna bahi to, aka ti ung jadi, miruru:‑i se mao i lipu: pang i pangalanna mampinghare:‑ing mao i ampunna. 35Lumanna‑mi ti tau massabii kadadiang to. Bùruꞌ‑i se mao i Yesu, pang mangkabùruꞌi tau ung salokaꞌ‑mo nai dihata bulituku, one: mesong dungkuꞌ i kokoꞌna Yesu mampisàdìngi pipaturoNa. Tau to mipakeang‑mo, pang makàso:‑mo. Mariaꞌna‑mi se mao i Yesu. 36Tau ung mangita mata kadadiang to, mampatidolu mao i tau ung bùruꞌ to, mangaka ti tau to nipumatalete:. 37Mingkalemunna‑mi ti nasang ampu lipu: i pangalanna Gerasa mao i Yesu mangking malai, mampalii: lipuna‑i se, sàbaꞌ mariaꞌ‑i se tungka. Millantona‑mi i lemmang ti Yesu malai.

38Dea to tau ung salokaꞌ‑mo nai dihata bulituku mingkalemu mao i Yesu mangking Na patinai mingulaꞌ. Hampoꞌ Na apuꞌ pang Na ongi‑ing teꞌ, 39“Sumule:‑mo: mao i tanandapoꞌmu! Pang patidolu ti nasang aka ung na pukauꞌ‑mo Puang matung.” Lumanna‑mi i nasang lipu: Gerasa mampakareba aka ti ung na pukauꞌ‑mo Yesu mao i kalaena.

Yesu mampatuho: anakàna Yairus pang mampumatalete: besa bahine ung na leo: sai miraa:

(Mat. 9:18-26, Mrk. 5:21-43)

40Tòna mulemmang‑mo pole sumule: ti Yesu mao i Kapernaung, tau boso: haka: mantarima‑I, sàbaꞌ ìnang na ahong-ahong‑i se. 41Ha masai‑i nai anto, bùruꞌ ho ti besa tau, dea‑mo ketua jamaa i anto ung nikonai: Yairus. Mukalimuntuꞌna‑mi tumunnuku i heleꞌna Yesu, pang mingkalemu mangking lumao i rasangna, 42sàbaꞌ besa-besanna anakàna, dea‑mo bahine, ung sampulo:‑mo idua heaꞌna umuruꞌna, mène: ung matea.

Tarrang mammulao ti Yesu mao i rasangna Yairus, Yesu pang tau boso: ung mangulaꞌ‑I silìsi-lìsik‑ing. 43I lummu: dalang, ara besa bahine ung sampulo:‑mo idua heaꞌna masainna na leo: miraa: morai tùrung-tùrung. Nasang aka ung ara i dea lòsoꞌ‑mo na pake mao mupakuli:, hampoꞌ hari: mabàlina. 44Jadiꞌ, nai keboꞌ mao mandùkuꞌi Yesu pang mangerong ammerona kayaꞌNa. Pang tempo dea ho teng to, pàda: ti sainna.

45Mingkutikìna‑mi ti Yesu moa teꞌ, “Isai ti ung mangerong‑Kaꞌ?”

Hampoꞌ nasang tau missangkaꞌ. Musuana‑mi ti Petrus teꞌ, “O Tuang, tau boso: siummang-ummang i sidungkuꞌMu pang silìsik‑ing matung.”

46Hampoꞌ Na sùmui teꞌ, “Ara ung mangerong‑Kaꞌ. Ku ìsang sàbaꞌ ara kuasa ung missòhong nai kalaeKu.” 47Bahine to mangìsang‑mo moa teꞌ aka ti ung na pukauꞌ hang hela‑i nihuni‑ing, mambùruꞌ‑ing tumaradidi:. Lumanna‑mi mukalimuntuꞌ tumunnuku i heleꞌna Yesu, pang mampatidolu i heleꞌna tau boso: aka pu na erong‑I, pang mampatidolu mangaka ti pàdana sainna tempo to ho teng. 48Musuana‑mi ti Yesu mao i bahine to teꞌ, “O anàKu, kapatongangangmu mampasalamaꞌ‑mo:. Nàmo: sìnang kabeloang.”

49Tarrang maang musua:, bùruꞌ‑mo ti tau nai rasangna ketua jamaa pang musua: teꞌ, “Mate‑moda ti anakàta. Naii‑mi hura: ta massussa-sussai Tungguru.”

50Hampoꞌ to na sàding‑mo Yesu ti aka to, musua: mao i ketua jamaa teꞌ, “Hau mariaꞌ! Patongang pòteng pang anakàmu nipasalamaꞌa.”

51Tòna bùruꞌ‑mo ti Yesu i rasangna ketua jamaa, hang Na patinai‑i ti tau sintàna: i laling, sangadi Petrus, Yohanes, Yakobus pang tudolunna anaka to. 52Nasang tau i anto mantalihuhu: kumàraka. Musuana‑mi ti Yesu teꞌ, “Hau kumàraka se. Sàbaꞌ anaka tee hang mate‑ida, sangadinna letona‑da teng.” 53Hampoꞌ na patahai‑i se ti Yesu, sàbaꞌ na ìsang‑i se moa teꞌ anaka to mate‑moda.

54Nai anto, na tokaꞌ Yesu ti kangkangna anaka to pang Na pilabui: ti musua: moa teꞌ, “O anàKu, tèdeꞌ‑mo:!” 55Pinanahanna anaka to mangule:‑ing pang tempo to ho teng tèdeꞌ. Na pisuona‑ming Yesu nipakanne:. 56Tudolunna mimàha manghele. Hampoꞌ na piapuꞌ‑ing Yesu mao i dei: se ti mampatidolu aka to.

Currently Selected:

Lukas 8: skx

Highlight

Copy