Matius 25
25
Rampeang lima anaka bahine ung tokana pang lima ung dang tokana
1“Tempona kabùruꞌangnaa Anaka Tulino, dea ti kadatuang suruga mènea rampeang sampulo: anaka bahine, ung mangala lampunna pang mao mantadoꞌi lopaka muane. 2I àlaꞌna anaka bahine to, lima ti ung dang kitangaꞌ belo: pang lima ti ung kitangaꞌ belo:. 3Dea ti lima ung dang kitangaꞌ belo: to, mambaha lampunna hampoꞌ hang mampatokana‑i minnaꞌ. 4Hampoꞌ lima ung kitangaꞌ belo: to, mambaha lampunna pang mampatokana ho minnaꞌ.
5Hang sahe:‑i bùruꞌ ti lopaka muane, jadiꞌ pakaleto‑mi se nasang pang maturu. 6Mulummu: hengi màli: nisàding‑i ti tau ung mikakoang teꞌ, ‘Mai‑moda ti lopaka muane! Tadoꞌi‑ko se!’
7Tèdeꞌna‑mi se nasang ti anaka bahine to pang mampabeloi: lampunna‑i se. 8Musuana‑mi se ti anaka bahine ung dang kitangaꞌ belo: to mao i ung si kitangaꞌ belo: teꞌ, ‘Innang‑ka sangkìdoꞌ ti minnaꞌmu se, sàbaꞌ podaꞌa‑moka ti lampungki.’
9Hampoꞌ na sùmui‑i se teꞌ, ‘Baꞌ, hang kànaꞌe: se sule: nasang. Nao: dosse: i pumpubaloko mambalaꞌ.’
10Tòna tarrang‑i se mao mambalaꞌ, bùruꞌ‑mo ti lopaka muane. Jadiꞌ, to anaka bahine ung si tokana, mintama sola: to lopaka muane i kaoneang pampukauꞌ kasilopàkang, pang nitanaꞌ ti baba:. 11Ha masai‑i nai anto, bùruꞌ ho ti anaka bahine sintàna: to, pang mikakoang teꞌ, ‘Tuang, Tuang, hungkai‑kangka!’
12Hampoꞌ na sùmui teꞌ, ‘Matantu te ung ku pusua: matung e teꞌ Hang ku ìsang‑ko dosse:!’ ”
13Na tampàkinna‑mi Yesu ti rampeangNa to mène: tee, “Deanna‑mo to, toka:-tokana‑ko se, sàbaꞌ ha u ìsang‑ko se ti àlona dea‑raka jaangna.”
Rampeang itàlu pangkoring
(Luk. 19:11-27)
14“Pang tempona kabùruꞌangnaa Anaka Tulino mène: ho rampeang tee. Ara besa tau ung kakarànga lumao i kaoneang ung karao:. Na hàngo ti pangkoringna, pang na hengi‑ing mangìsang kaaraangna. 15Pangkoringna to, na hengi‑ing seeng siulaꞌ pantang-pantang pahelanna mampake. Mao i besa, na hengi‑ing lima talenta*#25:15 talenta manturo: matìminna seeng. Besa talenta, nikapang 34 kilo matìminna. Ara talenta nai bulahang, peraꞌ, pang tembaga. Sua: Yunani i sua: 15 ha mangkonai:‑i nibabe nai aka ti talenta to, hampoꞌ nikapang nai peraꞌ. Makàso: moa teꞌ kianggaꞌna tungka. Besa talenta, araa 6.000 seeng peraꞌ, sibali sarona besa tau i laling 20 heaꞌna. seeng, besa na hengi‑ing idua talenta, pang besa kang ho na hengi‑ing besa talenta, màli: na kakarang.
16Tau ung mantarima lima talenta to, sàhe: na pake mampangokaꞌ‑ing piuhainna, pang mangkorai: lima kang ho. 17Mène:‑da ho to tau ung mantarima idua talenta to, na pake pang mangkorai:‑da ho piuhainna idua. 18Hampoꞌ to tau ung mantarima besa talenta to, lumao manghàlo: tampo:, màli: na huni‑i ti seengna tuangna i anto.
19Masai nai anto, sumule:‑mo ti tuang to, màli: na hàngo‑i ti pangkoringna to mangking mampinghare:‑ing seengna. 20Tau ung mantarima lima talenta to bùruꞌ mambaha sampulo:. Na konai: teꞌ, ‘Tuang, lima talenta ti u mi hengi‑ing mangìsang. Hele, lima kang ho ti piuhainna ung ku korai:.’
21Na konai: tuangna to teꞌ, ‘Taungku ung minumpu pang belo:, u mampukauꞌ‑mo ung belo:. U minumpu‑mo i laling kara-kara ung supi:‑i, deanna‑mo to, u ku hengiing mangìsang kara-kara ung lammuꞌ. Hàmo:, pola:‑ko i kahakaangku!’
22Bùruꞌna‑mi ho ti pangkoring ung mantarima idua talenta pang mangkonai: teꞌ, ‘Tuang, idua talenta ti u mi hengi‑ing mangìsang. Hele, idua kang ho ti piuhainna ung ku korai:.’
23Na konai: tuangna to teꞌ, ‘Taungku ung minumpu pang belo:, u mampukauꞌ‑mo ung belo:. U minumpu‑mo i laling kara-kara ung supi:‑i, deanna‑mo to, u ku hengiing mangìsang kara-kara ung lammuꞌ. Hàmo:, pola:‑ko i kahakaangku!’
24Bùruꞌna‑mida ho ti pangkoring ung mantarima besa talenta pang mangkonai: teꞌ, ‘Tuang, u ku ìsang teꞌ u tau ung makarraꞌ. U mangkìtiꞌ i kaoneang ung dang nu lamùngi, pang mangkobu: haseleꞌ i kaoneang ung dang nu sahuꞌi. 25Jadiꞌ, ku mariaꞌ‑ko pang ku lumao manghuni seengmu i laling tampo:. Hedi: ti seengmu Tuang.’
26Hampoꞌ na sùmui tuang to teꞌ, ‘E taungku ung kadetu pinanahanna pang lose, u ìsang naꞌ moa teꞌ ku mangkìtiꞌ i kaoneang ung dang ku lamùngi, pang mangkobu: haseleꞌ i kaoneang ung dang ku sahuꞌi? 27Ìna mène: to, àla: u hengi‑ingdo ti seengku to mao i tau ung hela mampupiuhai, mangking tempona ku bùruꞌ, hela ku tarima pole ti seengku to sìnang piuhainna.’
28Musuana‑mi ti tuang to mao i pangkoringna sintàna: teꞌ, ‘Ala‑ko se ti seeng to nai dea pang hengi‑ing mao i tau ung mangampu sampulo: talenta. 29Sàbaꞌ tau ung ara‑mo na ampu, nipakànaꞌia kang ho, urungang milàbi. Hampoꞌ dea ti tau ung mangampu sangkìdoꞌ‑i, niala hèraꞌa nai kalaena. 30Pang pangkoringku ung dang ara buaꞌna to, tibe‑ko se mao i sòhongna, i kamakarinnìngang. I anto mantalihuhua kumàraka pang sikùriki ti sisena.’ ”
Anaka Tulino mamparessaa tulino tempona katampàkangna lino
31“Ìna bùruꞌ‑mo ti Anaka Tulino i laling kamalabiꞌangNa, sipolai: nasang malaikaꞌ, mesònga‑Da i esòngang kadatuangNa ung malabiꞌ. 32Nasang tau nai nasang suku i lino nikobua i heleꞌNa, màli: Na pasisaràki: miluhali idua laoangna mène: pikuyaꞌ mampasisaraka domba pang bemmeꞌ. 33Tau ung Na pasikantereang‑ing domba nisuo: mukobu: mui konangNa, pang tau ung Na pasikantereang‑ing bemmeꞌ nisuo: mukobu: mui kairinNa.
34Ladu to, Datu: to musuaa mao i tau to‑i se ung mui konangNa teꞌ, ‘Hàmo: se ti dio se ung na pasakke AmangKu. Mintama‑ko se i kadatuang ung nipatokana‑mingko se songka: aranna lino. 35Sàbaꞌ tòna Ku burorang, u Mi pakanne: se, pang tòna Ku mangkahara, u Mi paenung se. Ku tau ung dang nu ìsang‑kang, hampoꞌ u Mi tarima i tammingmu se. 36Ku mituhangka, u Mi hengi‑ing se pakeang. Ku mipanaꞌ, u Mi parakai se. Ku nitarungkuꞌ, u Mi pubelai se.’
37Misùmunnaa‑mi ti tau ung tongang to‑i se teꞌ, ‘O Puang, i sangkanna ti ki ita‑Ko U burorang pang ki pakanne:, dea‑raka U mangkahara pang ki paenung? 38Pang i sangkanna ti ki ita‑Ko U tau ung dang ki ìsang‑kang, pang U ki tarima i tammingki, dea‑raka U mituhangka, pang U ki hengi‑ing pakeang? 39I sangkanna ti ki ita‑Ko U mipanaꞌ dea‑raka nitarungkuꞌ pang U ki pubelai?’
40Na sùmuia Datu: to teꞌ, ‘Matantu te ung Ku pusua: matung e teꞌ Tempona u mampukauꞌ se aka dea to, mao i besanna mantàdi:-tàdiKu ung kàle: i hoiꞌ tee, palleona u mampukauꞌ‑mo se mao i Koi:.’
41Ladu to, Datu: to musuaa ho mao i tau to‑i se ung mui kairinNa teꞌ, ‘Malai‑ko se nai heleꞌKu, dio se ung nitunna:! Mintama‑ko se i api ung dang ara podaꞌna, ung nipatokana‑ming Datuna dihata bulituku pang malaikaꞌ-malaikaꞌna. 42Sàbaꞌ tòna Ku burorang, hang Mi pakanne:‑ko se, pang tòna Ku mangkahara, hang Mi paenung‑ko se. 43Ku tau ung dang nu ìsang‑kang, hang Mi tarima‑ko se i tammingmu se. Ku mituhangka, hang Mi hengi‑ingko se pakeang. Ku mipanaꞌ pang nitarungkuꞌ, hang Mi parakai‑ko se.’
44Misùmunnaa‑mida ho ti tau to‑i se teꞌ, ‘O Puang, i sangkanna ti ki ita‑Ko U burorang, mangkahara, tau ung dang ki ìsang‑kang, mituhangka, mipanaꞌ, nitarungkuꞌ, pang hang ki pulemu‑Ko?’
45Na sùmuia Datu: to teꞌ, ‘Matantu te ung Ku pusua: matung e teꞌ Tempona hang mampukauꞌ‑ko se aka dea to, mao i besanna tau ung kàle: i hoiꞌ tee, palleona hang mampukauꞌ‑ko se mao i Koi:.’
46Pang tau te‑mi se ti ung lumaa i hukungang ung dang ara katampàkangna, hampoꞌ tau ung tongang‑i se lumaa mantarima katuhoang deaꞌ tùrungna.”
Currently Selected:
Matius 25: skx
Highlight
Share
Copy
Want to have your highlights saved across all your devices? Sign up or sign in
