Matius 26

Yesu niaku: nipatei

(Mrk. 14:1-2, Luk. 22:1-2, Yoh. 11:45-53)

1Pang tòna mantampàki‑mo nasang pipaturoNa to ti Yesu, musua: mao i pasikolaNa teꞌ, 2“U ìsang se teꞌ idua kang àlona ti perayaang Paska nirara‑i. Tempo to, Anaka Tulino nipeheaa mangking nipai oròngang.”

3Tempo to, kapala-kapala imang pang ung si matua:-tuana tu Yahudi mukobu: i tammingna Kapala Imang ung nikonai: Kayapas. 4Massilàhai:‑i se mangokaꞌ dalang mantingkang mimbuni Yesu mangking nipatei. 5Hampoꞌ na konai:‑i se teꞌ, “Hau ta pukauꞌ se tempona tau muPaska, mampabùruꞌa kamarituang.”

Yesu nitoloi: hingkùrang

(Mrk. 14:3-9, Yoh. 12:1-8)

6Tòna one: i lipu: Betania ti Yesu, i rasangna Simon ung kisai balala dolu, 7bùruꞌ ti besa bahine mao i Dea. Bahine to mambaha besa pontu nai hatu pualam ung kilarana hingkùrang ung buudùkang màmiꞌ, ung masuliꞌ tungka balaꞌna. Hingkùrang to, na pantoloi:‑ing bakàna Yesu tòna tarrang maturu manne:.

8Mangita aka to, dea ti pasikolaNa lalaka pang musua:‑i se teꞌ, “Aka ti palleona pùna nipeang-peang mène: to? 9Belo:‑da sule: àla: nibalok‑i, nikorai: ti balaꞌna ung masuliꞌ, pang seengna nikàlaꞌ-kàlaꞌ‑ing mao i tau ung mase-mase!”

10Hampoꞌ Yesu, ung mangìsang tangaꞌna‑i se, musua: moa teꞌ, “Aka pu u sussai‑ko dosse: ti bahine tee? Sàbaꞌ mampukauꞌ‑da ung belo: mao i Koi:. 11Sàbaꞌ tau ung mase-mase, lupu ara i àlaꞌ-àlaꞌmu se. Hampoꞌ Koi:, hang lupua‑Kaꞌko sola: dio se. 12Sàbaꞌ mantoloi: hingkùrang to mao i kalaeKu, hang tempona‑miko Ku nikaburuꞌ, bahine tee dolu‑moda manghingkùràngi‑Kaꞌ. 13Matantu te ung Ku pusua: matung e teꞌ Iaka-aka pòteng i lino tee nikaonei: mampakareba Kareba Belo: nai Puang, aka ti ung na pukauꞌ bahine tee mao i Koi: nipatidolua ho, nibabe mangkalehai‑i.”

Yudas mambaloko Yesu

(Mrk. 14:10-11, Luk. 22:3-6)

14Lumanna‑mi ti Yudas tu Kariot, besanna nai sampulo: idua pasikolaNa, i kapala-kapala imang, 15mangkutiki‑i se teꞌ, “Aka ti ung nu hengiing‑naꞌ se mangking ku mampehea Yesu matung?” Jadiꞌ, na bayaꞌ‑i se itàlu pulona seeng peraꞌ. 16Na rara nai anto, Yudas mangokaꞌ kanàha: ung belo: mampehea Yesu.

Yesu manne: Paska sola: pasikolaNa

(Mrk. 14:12-21, Luk. 22:7-14, 21-23, Yoh. 13:21-30)

17Tòna àlo parara i perayaang Roti Dang Nipasumangkaꞌ, pasikolana Yesu mingkutiki mao i Dea moa teꞌ, “Iaka ti kaoneang ung Ta kapelai: ki mampatokana manne: Paska?”

18Na sùmui Yesu teꞌ, “Nao: se i Yerusalem i tau ung Ku konai: matung pang ongi‑ingko se teꞌ, ‘Pipasangna Tungguru mène: tee, Dungkuꞌ‑mo ti tempoKu. Ku kapelai: ti manne: Paska i rasangmu sola: pasikolaKu.’ ”

19Na pukauꞌna‑mi se pasikolaNa mène: ung na pantuyu‑ing Yesu pang mampasadia manne: Paska.

20Tòna hengi‑mo, Yesu maturu manne: sola: pasikolaNa. 21Tarrang‑i se manne:, musua: ti Yesu moa teꞌ, “Matantu te ung Ku pusua: matung e teꞌ Besa nai àlaꞌmu se mampeheaa‑Kaꞌ.”

22Makadainna‑mi tungka ti pinanahanna‑i se pang pantang mingkutiki teꞌ, “O Tuang, koi: naꞌ?”

23Na sùmui teꞌ, “Dea ti sipingkuꞌKu panganne: ti ung mampeheaa‑Kaꞌ. 24Anaka Tulino ìnang matea‑da mène: ung nironno: i Suraꞌna Puang mampatu:‑I, hampoꞌ masolang ti tau ung mampehea‑I. Làbi belo:‑da sule: mao i tau to àla: dang nikianak‑ing.”

25Musuana‑mi ti Yudas ung mampeheaI: to teꞌ, “O Rabi, koi: naꞌ?”

Na sùmui teꞌ, “Dio kalenanna ti ung mangkonai:.”

Pararanna ung nikonai: perjamuang

(Mrk. 14:22-26, Luk. 22:14-20, 1Kor. 11:23-25)

26Tòna tarrang‑i se manne:, Yesu mangala roti pang musumbayang mukurusumangaꞌ. Na tòpe-tòpekèna‑mi, màli: Na àdo:‑ing mao i pasikolaNa Na pasianu musua: teꞌ, “KalaeKu ti te. Ala pang anne:‑ko se.”

27Ladu nai anto, mangala ho enùngang anggoroꞌ pang musumbayang mukurusumangaꞌ, màli: Na àdo:‑ing mao i pasikolaNa Na pasianu musua: teꞌ, “Menung‑ko se nasang nai enùngang tee. 28Sàbaꞌ raaKu ti te, ung mampapàraꞌ pangàluꞌ ung màle, ung nibolang mao i boso: tau mangking dosanna‑i se nipantengkai:‑ing. 29Pang Ku pusua: matung teꞌ, Matantu hang Ku enùngi: hura: ti anggoroꞌ nai i latenna deaꞌ tempona Ku mangenung anggoroꞌ ung màle sola: dio se i laling kadatuangna AmangKu.”

30Mampuhontana‑mi se honta: pudi-pudiang, màli: na kakarang‑i se mao i Mungku Saitun.

Yesu mangongi‑ing Petrus teꞌ, “U Mi pissangkaꞌing”

(Mrk. 14:27-31, Luk. 22:31-34, Yoh. 13:36-38)

31Musuana‑mi ti Yesu mao i pasikolaNa teꞌ, “Hengi i latenna, u marèneꞌa se nasang sàbaꞌ Koi:. Sàbaꞌ i laling Suraꞌna Puang Na konai: teꞌ, ‘Ku mampatatànga pikuyaꞌ nipatei, mambùruꞌ‑ing domba-dombanna sisara-saraka.’*#26:31 Sak. 13:7. 32Hampoꞌ to Ku nipatuho:‑mo pole, Ku dolùnga deaꞌ i Galilea.”

33Hampoꞌ na sùmui Petrus teꞌ, “Moi lòsoꞌ‑i se marèneꞌ sàbaꞌ Kinta:, hampoꞌ koi: ìnang harai:‑ko.”

34Musuana‑mi ti Yesu teꞌ, “Matantu te ung Ku pusua: matung e teꞌ Hengi i latenna pòteng, hang moni‑mi ti manoko, u pintàlùnga‑mo Mi pissangkaꞌ‑ing.”

35Hampoꞌ Petrus massùmui teꞌ, “I parallu‑i moi ku nipatei‑ko ho, harai:‑ko ku musua: moi pimbesa teꞌ hang ku ìsang‑Kodo!” Pang nasang pasikolaNa sintàna: musua: ho mène: to.

Yesu musumbayang i Getsemani

(Mrk. 14:32-42, Luk. 22:39-46)

36Tòna deaꞌ‑mi se i kinete: ung nikonai: Getsemani, musua: ti Yesu mao i pasikolaNa*#26:36 Mangkonai: pasikolaNa, ha mintama‑i hura: ti Yudas, sàbaꞌ malai‑mo tempona manne: Paska. Hele i Yoh. 13:21-31. teꞌ, “Mesong‑mo:kang se inne:. Ku mao‑kang i antoo musumbayang.” 37Na bahaꞌinna‑mi ti Petrus pang nai iduanna anakàna Sebedeus mao sola:. Na rara‑mo maranaka pang masussa tungka. 38MusuaNa‑mi mao i dei: se moa teꞌ, “Masussa tungka ti pinanahangKu, mène: ung Ku matea‑mo teng. Inne:‑mo: se, pang toka:-tokana‑ko se i laling mampasola:‑Kaꞌ.”

39Mingkarao: sangkìdoꞌ, màli: na mukalimuntuꞌ tumunnuku deaꞌ i tampo: musumbayang. Na konai: moa teꞌ, “O AmangKu, i mading‑i, pakarao:‑ingNaꞌ ti enùngang*#26:39 enùngang. Nitassereꞌ manturo: kamaparriꞌang ung na olaa Yesu i laling mangkorai: hukungangna Puang mampatu: dosa-dosanna tulino. ung Ku heleꞌi tee. Hampoꞌ hau na mangulaꞌ pampuinahangKu, sangadinna pampuinahamMu‑ra:.”

40Ladu nai anto, sumule: mao i itàlu pasikolaNa to, Na kabùruꞌi tarrang leto. Na kutiki ti Petrus teꞌ, “Oꞌ, ha hela‑ko se naꞌ mimata sanjaang teng mampasola:‑Kaꞌ? 41Toka:-tokana‑ko se pang lupu musumbayang mangking ìna u nikakaꞌi se, hang marèneꞌ‑ko se. Mio:‑da ìnang ti pinanaha mampukauꞌ ung tongang, hampoꞌ malammaꞌ ti kalae:.”

42LumanNa‑mi pole musumbayang. Na konai: moa teꞌ, “O AmangKu, ìna parallu Ku tarima ti enùngang tee, pang hang hela‑i nipakarao:, pampuinahamMu‑ra: teng.”

43Ladu nai anto, sumule: pole mao i pasikolaNa to, pang Na kabùruꞌi leto‑i se ho pole, sàbaꞌ pakaleto‑i se tungka. 44Na palii: kang ho ti pasikolaNa to pang mao musumbayang ung kapintàlung, mampusua: sibali ung Na pusua: i langena:.

45Ladu to, sumuleNa‑mi mao i pasikolaNa pang Na konai: teꞌ, “U lupu se naꞌ millìhe pang leto? Hele! Tempona‑mo ti Anaka Tulino nipehea mao i tulino ung madosa. 46Tèdeꞌ‑mo: se! Hàme:‑mo se! Hele! Bùruꞌ‑mo ti tau ung mampehea‑Kaꞌ!”

Yesu nitingkang

(Mrk. 14:43-50, Luk. 22:47-53, Yoh. 18:1-11)

47Tòna tarrang maang musua: ti Yesu, bùruꞌ‑mo ti Yudas, besanna nai sampulo: idua pasikolaNa. Boso:‑i se tungka sipolai: mambaha sulampaka pang kayu pibalobo:, na pantuyu kapala-kapala imang pang ung si matua:-tuana tu Yahudi. 48Tau ung mambaloko Yesu mampaìsàngi pupidolung‑mo tau boso: moa teꞌ, “Tau ung ku udùnga dea‑mo to. Tingkang‑mo: se.”

49Jadiꞌ, tau to mindùkuꞌ sahe: i Yesu pang musua: teꞌ, “Salamaꞌ Rabi!” Na udungNa‑mi.*#26:49 Na udung mantoroꞌi kabiasaangna tu Yahudi.

50Hampoꞌ musua: ti Yesu teꞌ, “E Mantàdi:, dea‑mo naꞌ ti patumu pu u mai?”

Na tingkangna‑mi se tau boso: ti Yesu. 51Nai anto, besanna nai sipolaina Yesu mannonoko pisona. Na ae:‑ing mao i kaunangna Kapala Imang, urungang lumpong ti talinganna.

52Musuana‑mi ti Yesu teꞌ, “Pai kuma: pole ti pisomu! Sàbaꞌ nasang tau ung lupu mampake sulampaka, matea ho nai sulampaka. 53U moa naꞌ teꞌ hang hela‑Kaꞌ mampalau mao i AmangKu, pang Na pantuyu‑i sahe: ti masàbu-sàbu*#26:53 masàbu-sàbu. Sua: Yunani mitàra nai sampulo: idua legiun. Legiun dea‑mo kamamesaangna tantara Roma ung 6.000 bosona. Sampulo: idua legiun, palleona 72.000 tantara. malaikaꞌ mandului‑Kaꞌ? 54Hampoꞌ ìna Ku pukauꞌ mène: to, baꞌ nikannaꞌia naꞌ ti ung nironno: i Suraꞌna Puang moa teꞌ parallu‑da ìnang nipaara ti ung mène: te i latenna e?”

55Nai anto, musuana‑mi ti Yesu mao i tau boso: to teꞌ, “U Mi àna: se naꞌ gorombolang ti te? pu u mai se mambaha sulampaka pang pibalobo:, mai mantingkang‑Kaꞌ? Àlo-àlo Ku mesong mupaturo: i kaoneang Tamming Kabussùngang pang ha u tingkang‑Kaꞌ se. 56Hampoꞌ nasang tee nipaara mangking tikannaꞌ ti ung na ronno: nabi-nabi i Suraꞌna Puang.”

Ladu nai anto, nasang pasikolaNa malai mampalii:‑I.

Yesu i heleꞌna Ung si Nipiama: i tu Yahudi

(Mrk. 14:53-65, Luk. 22:54-55, 63-71, Yoh. 18:12-14, 19-24)

57Tau to‑i se ung mantingkang Yesu mambaha‑I mao i Kapala Imang ung nikonai: Kayapas. I anto mukobu:‑mo ti ung si manarangna i aluku pang ung si matua:-tuana tu Yahudi. 58Petrus mangulaꞌ tùrung Yesu nai karaona deaꞌ i pangàloangna Kapala Imang. Mintama i anto pang mesong sola: pumpukuyaꞌ manghele mangaka ti katampàkangna nasang to.

59Kapala-kapala imang pang nasang Ung si Nipiama: sintàna: mangokaꞌ tau ung sadia mampusua: passabiinna ung dang tongang ung hela miluhali katong mangking Yesu nipatei, 60hampoꞌ hari: katong ung na korai:‑i se, moi boso: tau mampusua: passabiinna ung dang tongang. Tampàkang, tèdeꞌ ti idua tau. 61Musua:‑i se teꞌ, “Tau tee mangkonai: moa teꞌ, ‘Ku hela‑ko ti marronnong Tamming Kabussùngangna Puang, pang i laling itàlu àlona hela Ku patèdeꞌ pole.’ ”

62Tèdeꞌna‑mi ti Kapala Imang pang mangkutiki Yesu teꞌ, “Hari: naꞌ sùmumMu ti ung nipantannaꞌ‑ingKo?” 63Hampoꞌ lupu teng mimmànaꞌ ti Yesu. Musuana‑mi ti Kapala Imang teꞌ, “I heleꞌna Puang ung tuho:, konai:‑ingnang ti katongangangna! U Datu: Pipasalamaꞌ naꞌ, dea‑mo Anakàna Puang?”

64Na sùmui Yesu teꞌ, “Mène: ti ung nu pusua:. Pang Ku pusua: matung teꞌ, Araa tempona u ita‑ko se ti Anaka Tulino mesong mui konangna Ung Makuasa muparenta, pang bùruꞌ mangola: kahung.”

65Na sàdingna‑i ti to, Kapala Imang masseu: kayaꞌna*#26:65 Kabiasaangna tu Yahudi masseu: kayaꞌ manturo: kaladungna kamasussaang. na pasianu musua: teꞌ, “Mampaihoiꞌ‑moDa Puang! Aka kang ti niparallui‑ing sabi? U sàding kalenanna‑mo se ti suaNa ung mampaihoiꞌ Puang. 66Mangaka dosse: ti pantangaꞌmu se?”

Na sùmui‑i se teꞌ, “Parallu‑Da nihukung mate!” 67Na tangkuduinna‑mi se ti silanna Yesu. Na potoꞌ‑i se ihanang ti matanNa, màli: na takuruꞌ‑I. Ara ho ti ung mampalepai:‑I, 68màli: na musua: teꞌ, “O Datu: Pipasalamaꞌ, konai: deꞌ isai ti ung mampanaꞌi‑Ko!”

Petrus mampissangkaꞌ‑ing Yesu

(Mrk. 14:66-72, Luk. 22:56-62, Yoh. 18:15-18, 25-27)

69Tempo to, one: i pangàloang ti Petrus mesong. Mindùkuꞌna‑mi ti besa bahine pangkoring pang musua: teꞌ, “Dio ho ti ung lupu sola: Yesu tu Galilea to.”

70Hampoꞌ missangkaꞌ ti Petrus i heleꞌna nasang tau i anto teꞌ, “Hang ku ìsang‑iko aka ti ung na patu: suamu.”

71Lumanna‑mi ti Petrus i bambangang. Na ita bahine pangkoring sintàna:, pang musua: mao i tau pai anto teꞌ, “Tau tee lupu sola: Yesu tu Nasareꞌ to.”

72Musumpanna‑mi pang missangkaꞌ ho teꞌ, “Hang ku ìsang‑iko ti Tau to.”

73Hang masai‑i nai anto, tau i anto mindùkuꞌ mao i Petrus pang musua:‑i se teꞌ, “Matantu u besanna‑do ho nai dei: se, ha umma‑i to, makàso: nai pintaba-tabaimu musua:, moa teꞌ u tu Galilea‑do.”

74Musumpanna‑mi ti Petrus mantunna: kalaena pang musua: teꞌ, “Hang ku ìsang‑iko ti Tau to!”

Moninna‑mi ti manoko. 75Na kalehainna‑mi Petrus aka ti ung ladu na pusua: Yesu moa teꞌ, “Hang moni‑mi ti manoko, u pintàlùnga‑mo Mi pissangkaꞌ‑ing.” Missòhongna‑mi ti Petrus pang sùsuꞌ kumàraka.

Currently Selected:

Matius 26: skx

Highlight

Copy