Markus 9
9
1Musua: kang ti Yesu mao i dei: se mène: tee, “Matantu te ung Ku pusua: matung e teꞌ Araa i àlaꞌmu se ung dang mangolaa‑kang kamateang i dang mangita‑mi Puang bùruꞌ i laling kamakuasaangNa.”
Kuasanna Yesu nipupiita iaho mungku
(Mat. 17:1-13, Luk. 9:28-36)
2Ùnung àlona nai anto, Yesu mambahaꞌi Petrus, Yakobus pang Yohanes missaraka nai tau boso:, millanto mao i besa mungku ung iaho. Balikìna‑mi ti Yesu i heleꞌna‑i se, 3pang pakeangNa mabusa: tungka pasiang-siang. Moi pumpuase:, ha na lampiꞌ‑i ti mabusana. 4Mingèneꞌna‑mi ti Elia sola: Musa massilàha:‑ing Yesu. 5Tipasuana‑mi ti Petrus mao i Yesu moa teꞌ, “Belo: tungka ti inneta se Rabi. Jadiꞌ, eloꞌna‑mo ki mampatèdeꞌ itàlu rasang-rasang, besa mampatu: Kinta:, besa mampatu: Musa pang besa mampatu: Elia.” 6(Petrus musua: mène: to, hang na ìsang‑i aka ti patuna ung na pusua:, sàbaꞌ mariaꞌ‑i se tungka.)
7Bùruꞌna‑mi ti kahung mallilong‑i se nasang, pang nai kahung to nisàding ti sua: moa teꞌ, “Dea‑mo te ti AnakàKu ung Ku pulemu. Pisàdìngi‑ko se!” 8Misailena‑mi se, hampoꞌ ha nisàdaꞌ-sàdaꞌ‑i, hari: hura: tau sangadi Yesu mannang.
9Tòna sumòloꞌ‑mi se nai mungku to, mupasakiꞌ ti Yesu mao i dei: se, mangking ha na patidolu‑i se moi mao i besa teng tau aka ti ung ladu na ita‑i se, i dang tuho:‑mi pole nai kamateangNa ti Anaka Tulino. 10Na tokaꞌ‑i se to pasakiꞌ i langena:, hampoꞌ lupu na silàhai:‑i se aka ti ung na patu: sua: “tuho: pole nai kamateangNa.”
11Mingkutikìna‑mi se mao i Yesu moa teꞌ, “Aka pùna musua: ti ung si manarangna i alukùta moa teꞌ Elia parallu bùruꞌ pole dolung nai Datu: Pipasalamaꞌ?”*#9:11 Hele i Mal. 4:5-6.
12Na sùmui Yesu moa teꞌ, “Ìnang parallu‑da bùruꞌ dolung ti Elia mampatokana mintuꞌna. Hampoꞌ mangaka ti ung ara nironno: mampatu: Anaka Tulino moa teꞌ masussaa tungka pang nitumpaꞌa?*#9:12 Hele i Yes. 53:3. 13Hampoꞌ i latenna Ku pusua: matung moa teꞌ, Ung mène: Elia ìnang bùruꞌ‑moda*#9:13a Yesu musua: mampatu: Yohanes Pumpudoiꞌ. Hele i Mat. 17:12-13. pang na pukauꞌ‑mi se tau mao i dea mangulaꞌ pampuinahanna‑i se, mène: ung nironno: mampatu: Elia.”*#9:13b Ung kadetu nipukauꞌ mao i Elia nironno: i 1Dat. 19:2, 10.
Yesu mampasahu dihata bulituku nai besa anaka muane ung bebe
(Mat. 17:14-21, Luk. 9:37-43a)
14Tòna sumule:‑mi se ti Yesu, Petrus, Yakobus pang Yohanes mao i pasikolaNa sintàna:, mangita‑i se tau boso: mangkaropo pasikolaNa to, pang ung si manarangna i aluku tu Yahudi silàha: sitòkoꞌ‑i se. 15To na ita‑mi se tau boso: ti Yesu, mimàha‑i se nasang pang masàraꞌ lumao mantadoꞌi‑I. 16Mingkutikìna‑mi ti Yesu mao i dei: se moa teꞌ, “Aka ti sua: ung nu sitòkoꞌi se?”
17Na sùmuinNa‑mi besanna‑i se nai tau boso: moa teꞌ, “Ku baha mai ti anakàku Tungguru, sàbaꞌ na pintamai dihata bulituku ung mampabebe‑i. 18Pang ìna mingkamaꞌ‑mo ho ti dihata bulituku, na pimmaiꞌ‑ing ti kalaena mao i tampo: pang saho ti takona, sikùriki ti sisena, pang matòdoꞌ ti kalaena. Ku palau‑mo mao i pasikolaTa ung leta: inne: mangking na pasahu‑i se ti dihata bulituku to, hampoꞌ hang na hela‑i se.”
19Musuana‑mi ti Yesu mao i dei: se moa teꞌ, “E tau ung dang si mupatongang, sangakaa kang masainna parallu Ku leta: i àlaꞌmu se? Sangakaa kang masainna parallu Ku sabaraꞌ matung? Baha‑ko se mai ti anaka to!” 20Na bahanna‑mi se mao. To na ita‑mo dihata bulituku ti Yesu, sàhe: na kingking to anaka to, mambùruꞌ‑ing bongka, mingkaloleꞌ-loleꞌ i tampo:, pang saho ti takona. 21Mingkutikìna‑mi ti Yesu mao i amanna anaka to moa teꞌ, “Sangaka‑mo ti masainna na leo:‑i mène: tee?”
Na sùmuinNa‑mi moa teꞌ, “Nai supina. 22Pang nene‑mo na bongka mao i api dea‑raka mao i uhai sàbaꞌ dihata bulituku to, mangking mampatei‑i. Deanna‑mo to, pulemu‑kangka, ìna U hela‑do mampukauꞌ angkanna.”
23Na sùmui Yesu moa teꞌ, “Mangaka pu u moa teꞌ, ‘ìna U hela’? Nasang hela‑da mao i tau ung mupatongang.”
24Mikeina‑mi ti amanna anaka to moa teꞌ, “Ku mupatongang, hampoꞌ pulemu‑kaꞌ, moi hang kànaꞌ‑i ti kapatongangangku!”
25To na hele Yesu ti tau boso: sa: mai-mainna mapokong, Na pasahu ti dihata bulituku malai moa teꞌ, “O dihata bulituku, ung mampabebe pang mampapidaꞌ tau, palai‑ko nai anaka tee pang hau mampintamai‑i hura:!”
26Na santaꞌna‑mi dihata bulituku ti mangkingking anaka to, na pasianu mikei:, màli: na malai. Anaka to, heleangna mène:‑moda tau ung mate, dea pùna boso: tau ung mangkonai: teꞌ, “Mate‑moda.” 27Hampoꞌ na tokaꞌ Yesu ti kangkangna mampatèdeꞌ‑i, na ola:‑ing tèdeꞌ kalenanna pang belo:‑mo.
28Tòna one:‑mi se i rasang ti Yesu, missaraka nai tau boso:, mingkutikìna‑mi se ti pasikolaNa moa teꞌ, “Aka pu dang ki hela‑ka mampasahu dihata bulituku to?”
29Na sùmuinna‑mi Yesu moa teꞌ, “Dihata bulituku ung mène: to, hang hela‑ida nipasahu salalona i da ni musumbayang‑i.”
Ung kapindua Yesu mampupiìsang kamaparriꞌangNa
(Mat. 17:22-23, Luk. 9:43b-45)
30Yesu sola: pasikolaNa kakarang nai anto pang mangola: i Galilea, pang hang mio:‑i ti Yesu i na ìsang‑i tau ti pammulaoangNa, 31sàbaꞌ tarrang mampaturo: pasikolaNa. Musua: mao i pasikolaNa moa teꞌ, “Anaka Tulino nipeheaa mao i kakuasaangna tulino, pang na pateii: se. Ladu nipatei, tuhoa pole àlo ung kaitàlu.” 32Hampoꞌ hang na pahang‑i se ti patuna suaNa to, hampoꞌ mariaꞌ-riaꞌ‑i se ho mampingkutik‑ing mao i Yesu.
Isai ti ung iaho i àlaꞌna pasikolaNa
(Mat. 18:1-5, Luk. 9:46-48)
33Bùruꞌ‑mi se ti Yesu sola: pasikolaNa i Kapernaung. Tòna i tamming‑mo ti Yesu, mangkutikìNa‑mi pasikolaNa moa teꞌ, “Aka ti ung nu silàhai: se i dalang i langena:?” 34Hampoꞌ mimmànaꞌ‑i se, sàbaꞌ i pammulaoang i langena: masseroi‑i se isai ti ung kamìnang iaho nai àlaꞌna‑i se. 35Mesongna‑mi ti Yesu pang manghàngo‑i se. MusuaNa‑mi moa teꞌ, “Isai-sai ti ung mangkapelai: miluhali ung kamìnang iaho i heleꞌna Puang, tau to parallu làbi mampaihoiꞌ kalaena nai nasang solana.” 36Na alanna‑mi Yesu ti besa anaka pang Na paone: i lummuna‑i se, màli: Na ahing‑i ti anaka to pang musua: mao i dei: se moa teꞌ, 37“Isai-sai ti ung mantarima anaka mène: tee sàbaꞌ Koi:, tau to sibali mantarima‑Maꞌ. Pang isai-sai ti ung mantarima‑Kaꞌ, hang Koi:‑iko teng ti ung na tarima, hampoꞌ Dea ho to ung mampantuyu‑Maꞌ.”
Tau sintàna: mampasahu dihata bulituku
(Luk. 9:49-50)
38Musuana‑mi ti Yohanes mao i Yesu moa teꞌ, “Tungguru, ki mangita besa tau mampasahu dihata bulituku mangola: konaMu. Ki apuꞌna‑mi, sàbaꞌ ha sampolaiangta‑i.”
39Hampoꞌ na sùmui Yesu moa teꞌ, “Hau apuꞌ se, sàbaꞌ tau ung màli: ladu mampaara kalle-kalleang mampake konaKu, hang helai:‑da sàhe: mamburerei konaKu! 40Pang isai-sai ti ung dang mangeba‑ke se, tau to solata‑da. 41Isai-sai ti ung mampulemu‑ko se, moi mampaenung‑ko se teng sangenùngang uhai kehiꞌ mahulo: sàbaꞌ u taunna se Datu: Pipasalamaꞌ, matantu te ung Ku pusua: matung e teꞌ Ìnang mangkoraia‑da ho kamaupaꞌang.”
Nai iaka ti ung mampahùling tulino
(Mat. 18:6-9, Luk. 17:1-2)
42“Hampoꞌ isai-sai ti ung mampabùruꞌa marèneꞌ nai besanna tau tee‑i se ung nihele supi: ung mampatongang‑Kaꞌ, baꞌ nai none: na hukùnga Puang àlo i hunni ti tau to, belo: sule: ìna nipintaꞌi hatu ung lammuꞌ i barakona, màli: nitibe‑i mao i tasiki. 43Ìna mènena kangkangmu mampahùling‑ko, lengkeꞌi, sàbaꞌ belo:‑da sule: sammaliang‑i ti kangkangmu hampoꞌ mintama i katuhoang ung màle, nai none: kànaꞌ ti kangkangmu hampoꞌ u na baha mao i naraka, i laling api ung dang ara podaꞌna. [44I kaoneang dea to, hari: podaꞌnaa apinna, pang hari: matenaa ti otoꞌna tau.] 45Pang ìna mènena kokoꞌmu mampahùling‑ko, lengkeꞌi, sàbaꞌ belo:‑da sule: u kempang hampoꞌ mintama i katuhoang ung màle, nai none: kànaꞌ ti kokoꞌmu hampoꞌ u nitibe mao i naraka. [46I kaoneang dea to, hari: podaꞌnaa apinna, pang hari: matenaa ti otoꞌna tau.] 47Pang ìna mènena matammu mampahùling‑ko, kalèteke malai, sàbaꞌ belo:‑da sule: u kaloꞌ hampoꞌ mintama i kadatuangna Puang, nai none: kànaꞌ ti matammu hampoꞌ u nitibe mao i naraka. 48I kaoneang dea to, hari: podaꞌnaa apinna, pang hari: matenaa ti otoꞌna tau.*#9:48 Hele i Yes. 66:24. 49Sàbaꞌ nasang tau nisiaia api.*#9:49 api manturo: kamaparriꞌang. Jadiꞌ, nisiai api, palleona, mangola: kamaparriꞌang. 50Sia ìnang belo:‑da, hampoꞌ ìna hùling ti masianna, niakaa ti mampumasia pole? Parallu u lupu se masia, dea‑mo u lupu tuho: sikabeloi: besa na besa.”
Currently Selected:
Markus 9: skx
Highlight
Share
Copy
Want to have your highlights saved across all your devices? Sign up or sign in
