WINEWEUDO TINENA 15
15
Terisoa i Yerusale
15:1-21
1 #
Ima. 12:3
Ba opia ira mia inso i Yudea mehawe i Antiokia ka mempaguru ira pepaekompo i tu'ai, ”Tewala nahi mentinindi montonda gau anu ipopo'umbuako ira i Musa, nahi komiu ntekadudui.” 2Sine do'ewaio ntu'u i Paulu ka i Baranaba pohawedo atuu. Poko'ariano pinakosi, i Paulu ka i Baranaba saru ba opia mia susua inso a bawaa atuu ka domelako a luwuno tinena ka penatua i Yerusale ka dontepopauakono mongkona atuu.
3Ondae domporonto ira bawaa hawe i bungkuno kota, ka do'amba mpelempa telalo i Pinisia ka Samaria, ka a luwuno po'ianga atuu dotutuluo mongkona tepidido mia anu nahi domento'ori Ira Ue Ala. Mongkona atuu tedoa mokomawongkoo aroado pepaekompo i tu'ai. 4Sahawedo i Yerusale domentotowo ira bawaa ka luwuno tinena ka penatua, ka do'amba tumutuluo luwuakoano anu wineweu-Do Ue Ala mesala ndi ondae. 5Sine ba opia ira mia inso a bawaado to Parisi, anu mpompe'ala-ala iramo, mehawe ka dompotae, ”Mia anu komba to Yahudi asalakono tinindi ka asalakono ka itondao songkano i Musa.”
6Ka menteriso iramo tinena ka penatua mempopauo mongkona atuu. 7#Tin. 10:1-43 Umarino ba opia tempo tehineno dompetobo-tobosi pinewowolo mongkona atuu, mentadeomo i Peturu ka ipotaeako ira, ”Hei pepaekompo, imento'orio, nine inso a pompu'uano Dobiniki akumo Ue Ala inso i olomiu, ka domporonge Lele mawongkoa luwuno tongku susua inso a wiwiku ka dompompe'ala-ala. 8#Tin. 2:4; 10:44 Ka Ondae Ue Ala anu tumo'orio aroano mia, Dopokomengkaaomo po'ehe-Do tumarima ira, hangano Dopoweeako ira koa mbo'u Penaa Mempori mengkena kana ndi ontae, 9ka nahina ntu'u Doponpesusua i oloto saru ondae, umari-Do mokomemporiako ira aroado hangano pompe'ala-ala. 10Tewala kanandio, tembio ka komiu me'ara-arahako Ira Ue Ala numaao a banga we'udo ana guru atuudo aasa pasanga, anu nahi pinokotembi, moiko uempu'uto maupo ontaeto? 11Tendeano, tompe'ala-alao, nine hangano pompehohawa-Do Ue Yesu Kerisituu kita mpohawe tekaduduia mengkena koa mbo'u kana ondae.”
12Ka mengkomino iramo luwu bawaa atuu, ka do'amba mperorongeako ira i Paulu ka i Baranaba dotutuluo luwuno petondoni ka anu kinohali-haliako wineweu-Do Ue Ala mesala ndi ondae i tonga-tongado tongku susua. 13Mansado umari mepau i Paulu ka i Baranaba, mepauomo i Yakobu, ”Hei pepaekompo, imperorongeakune: 14I tutuluomo i Simo, nine inso a pompu'uano Dopopokitao Ue Ala pompehohawa-Do a luwuno tongku susua, onaemo Dobinikio aasa bawaa inso i olodo pelangkaino nee-Do. 15Mongkona atuu menunuomo saru pinaudo nabi kana anu teburi:
16 #
Amo. 9:11-12
Umarino andio Aku koa mekule
ka wali wanguo laikano i Daudi anu tebangkuomo,
ka tebetano Aku wali wanguo ka mokorosoo,
17Ka dome'ungke ira luwu mia susua Ondae i Ue
ka luwuno tongku anu nahi domento'ori Ira Ue Ala, anu Kupauo bawaa-Ku
kanandiomo pau-Do i Ue anu weweuo luwuno andio,
18anu tino'oriomo inso a pompu'uano.
19Onaemo pu'uno ka kupotae, nine si topokonsusa ira tongku susua anu mpepokule ndi Ondae Ue Ala, 20#Pel. 34:15-17; Ima. 17:10-16; 18:6-23 sine asalakono ka tompoburi wunta ndi ondae, ka dome'olaiakono kaanga anu tesosa'aiakoomo lahumoa, pebelesua, bauno kondehora anu mate tetolonggeo ka inso a rea. 21Hangano inso a tempo i ndi'upua songkano i Musa pinalele a sompo-sompo kota, ka hawe kanandio-andio songka atuu binasa sompo-sompo oleo Saba a luwuno raha tepumpua.”
Sangki a nto Antiokia
15:22-34
22Onaemo ka domempakosio luwuno tinena ka penatua saru luwuno bawaa atuu ka dompobiniki inso i olodo ba te'opia mia anu ta tinena lumako i Antiokia meronga saru i Paulu ka i Baranaba, onaemo i Yudasi anu nineeako Barasaba ka i Silasi. Orua ira andio mia anu tinudu i olodo pepaekompo atuu. 23Ndi ondae pineweengako wunta anu ihino kanandio, ”Tabea inso a luwuno tinena ka penatua, inso a mpepaekompomiu hawe ndi omiu pepaekompo i Antiokia, Siria ka Kilikia anu me'inso a tongku susua. 24Kimerongeomo, nine hinao ba opia ira mia i olomami, anu nahi dompohawe pe'oliwi inso ndi omami, mpopokodanggara ka mpokobulalingoo aroamiu hangano pompagurudo. 25Onaemo pu'uno ka kimpo'asao aroamami mempakosiomo mpobiniki ka mpotena ba opia ira mia me'aiwa ndi omiu meronga saru i Baranaba ka i Paulu anu pinehohawamami, 26onaemo orua ira mia anu meweengakono tuwudo hangano nee-Do Ueto i Yesu Kerisituu. 27Ka kimentena iramo i Yuda ka i Silasi, anu ira pau wiwiakomiu ira mohaweo mbo'u pau anu teburi andio ndi omiu. 28Hangano pinakosi-Do Penaa Mempori ka kimempakosio, ka si mempinopotembiako hadioopo tinembi sekono anu kinere andio: 29asalakono ka ime'olaiakono kaanga anu pinesombaako a lahumoa, rea, bauno kondehora anu mate tetolonggeo ka pebelesua. Tewala impekariao koroimiu inso a luwuno andio, mpoweweu komiu moiko. Tompamo i ndi'ai, ka intekadudui.”
30Mansado metompa, i Yuda ka i Silasi melungka lumako i Antiokia. I tu'ai dopoboi ira luwu bawaa mpepumpu, ka do'amba meweengakono wunta atuu ndi ondae. 31Mansado mebasao wunta atuu, mpo'unde ira bawaa hangano ihino anu montarero. 32I Yuda ka i Silasi, anu onaemo nabi ira koa mbo'u, tehine dopatudu ira pepaekompo atuudo ka mokorosoako ira aroado. 33Ka tehi-tehine dopo'ia i tu'ai, dome'eheako iramo pepaekompo atuudo a laro sintuwu ka dopekule ndi ondae anu tumena ira. [34Sine iputusio i Silasi ta mo'ia i tu'ai.]
Teposisalado i Paulu ka i Baranaba
15:35-41
35I Paulu ka i Baranaba tehine dopo'ia i Antiokia. Ondae saru hadio mia susua mompaguru ka paleleo pau-Do i Ue. 36Sine ba opia tempo lembuino motaeomo i Paulu ndi Baranaba, ”Moikoomo topekule a mpepaekompoto a sompo kota a pompaleleato pau-Do i Ue, ka tokita ira ba kana'umpe teweweudo.” 37I Baranaba ineheno wawao mbo'u i Yohane anu nineeako i Marakusu; 38#Tin. 13:13 sine ipauo ntu'u i Paulu, nine nahi moiko mowawa mia anu binta iramo i Pampilia ka nahi behe metonda mo'angga merongaako ira. 39Onaemo pu'uno ka dotedoa teposisala, ranta ka dopensua ka i Baranaba wawao mbo'u i Marakusu walino sumomba lumako i Sipuru. 40Sine i Paulu binikio i Silasi, ka umarido mpeweengako ira pepaekompo atuudo a pompehohawa-Do i Ue 41melungkaomo sumompoo wita Siria ka Kilikia ka mokoroso ira bawaa i tu'ai.
Currently Selected:
WINEWEUDO TINENA 15: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
