WINEWEUDO TINENA 27
27
I Paulu sumomba lumako i Roma
27:1-13
1Mansano pinakosi, nine kami mpesumomba melako i Italia, onaemo ka ipineweengako i Paulu ka ba opia ira pe'asa torungkuno a aasa sorodadu anu langkai pangkano anu meneeako i Yuliusu inso a nsorodadudo Datu. 2Mpe'ula kami a aasa kapala inso i Adaramitiu anu ta melungka lumako a luwuno tiima i asa ngkeu wiwi ntahi Asia, ka ki'amba mpelungka. I Arisatariku, aasa to Makedonia inso i Tesalonika, merongaakami. 3Tisomono ntetoro kami i Sidoni. I Yuliusu me'aroa ndi Paulu ka i'eheakono tepohaweako ira sambe-sambe'eno, ka dompokosompoo kinereno. 4Hangano itotowo kami angi mpesumomba kami inso i tu'ai mentondao wiwi ntahi Sipuru. 5Ka mansano kimpetotongao tahi i arono Kilikia ka Pampilia, mehawe kamimo i Mira, i wita Likia.
6I tu'ai sorodadu anu langkai pangkano mohaweakami kapala inso i Alesanderia anu ta sumomba lumako i Italia. Ilimba kami a ngkapala atuu. 7I larono ba opia oleo mensumomba, mingki-mingki nahi kintelako ka tedoa mapari kami me'umpedaakono Kinidu. Hangano kongkono angi nahi moiko, kimentondao wiwi ntahi Kereta lumaloo togo Salomone. 8Umarimami mpopemapari melaloo soono wita atuu, mehawe kamimo i asa po'ianga meneeako Tiima Tekosi, umpeda kota Lasea. 9Kontongaano atuu hadioomo tempo anu tetadi-tadi. Tempo puasa laloomo ka masukaraomo ba ipinotilaloako posumomba. Onaemo pu'uno ka ipopoto'oriako ira i Paulu, ipotae, 10”Pepaekompo, kukitao, nine posumombato ta mohawe masukaraa ka marugia langkai, komba butu a inula ka kapala, sine saru mbo'u penaato.” 11Sine sorodadu anu langkai pangkano atuu ipe'ala-ala irapo umuli ka tadulakono kapala sekonopo i Paulu. 12Hangano tiima atuu nahi moiko ba dompo'ia i tu'ai i larono tempo morini, ka hadioano inso ndi ondae anu mpemoikoopo ba dompotilalo mensumomba ka mpo'arahako mehaweo kota Penikisi ka dompo'ia i tu'ai i larono tempo morini. Kota Penikisi onaemo aasa tiimano togo Kereta, anu malua te'aro i koanano sumooano oleo ka i manggalino sumooano oleo. 13I tempo atuu angi mepuuri me'ara-arai inso i selata. Domengko'aro-aroa, nine tinoodo manasaomo ira mpokohaweo. Domempadiio laduno kapala, ka do'amba mensumomba mpewiwino ntu'u tumondao wiwi ntahi Kereta.
Kapala terare
27:14-44
14Sine nahi tehine umarino atuu metiiomo inso a ntogo atuu angi mokora, anu nineeako angi ”Manggalino Sabaano oleo.” 15Irumpao kapala atuu ka nahi poko'aropio angi inso i arono. Onaemo pu'uno ndio kamimo koa mpo'ia po'ineeo kapalamami iwawao bomba. 16Ka ki'amba memolomo hawe a wiwi ntahino aasa togo kodei meneeako Kauda, ka i tu'ai motungko ntu'u ka kimpoko'alao bangka kodeino kapala atuu. 17Ka mansano winuatakoomo bangka kodei atuu a ngkapala, domempokona ira parewa pontulungi onaemo mewewesiakono koloro kapala atuu. Ka hangano doito ba itesanda a one morempeano Siriti, dompotiio somba ka mpo'ineeo kapala atuu ka ikolonto-lontomo koa. 18Hangano tedoa mapari iwawa kami angi mokora, ka tisomono mpompu'u iramo mpontadi inulano kapala a ntahi. 19Ka a ngko'otolu oleono domentadiakono kaedo ondaedo parewano kapala. 20Mansano ba opia oleo tehineno moiko mata oleo maupo anano wula nahi tengkita, ka angi mokora anu mongkokongiri nahi penaa-naa mokodoito kami, poko'ariano tampulaomo luwuno pomperorohiamami mpokokaduduio koroimami.
21Ka hangano ba opia tehineno nahi dompongkaa, mentadeomo i Paulu i tonga-tongado ka ipotae, ”Pepaekompo, bakanaano itinonda patuduku, ka si tomensumomba inso i Kereta, manasa ntepekaria kita inso a masukaraa ka marugia andio! 22Sine kanandio-andio, a laro masukaraa mbo'u andio, kupatudu komiu, ka ikongko moroso aroamiu, hangano nahina maupo te'asa mia i olomiu anu ta mate, sangkadio kapala andio. 23Hangano hieno wongi aasa mala'eka inso ndi Ondae Ue Ala anu pinesombaiku gagi mia-Do, mentade i horiku, 24ka ipotae: Si doito, Paulu! Omue asalakono kohawe i arono Datu. Ka menteeano hangano pompehohawa-Do Ue Ala, luwuno mia anu mekongko saru omue a ngkapala andio ira ntekadudui hangano omue. 25Onaemo pu'uno impokorosoomo aroamiu, papaekompo! Hangano kupe'ala-ala Ira Ue Ala, nine luwuno manasa gagi kana anu pinokomengkaa ndi ongkue. 26Sine asalakono ka tompesandaakono kapala andio a aasa togo.”
27Wongi anu kohopulu ka opaa haweakoomo ka da kongkomami mpelonto-lonto a ntahi Andaria. Sine bara'ura ntonga wongi domerasao anu mpo'angga a ngkapala, nine me'umpeda iramo a ntuwu wita. 28Ka do'amba mpotiio watu ladu, ka mengkaa uwoi i tu'ai rua pulu ropa ondalono. Mansano melako mbo'u tedei i arono domeladuo mbo'u ka mengkaa hopulu ka olima ropa. 29Ka hangano doito, nine kami ntedupa a aasa watu merui, domentendeo opaa laduno i ulimano, ka mpope'osai kami ntu'u ka ironga meene. 30Sine anu mpo'angga a ngkapala me'ungkeakono ira mpolai inso a ngkapala. Domempotiio bangka kodei, ka kana ira mpopotii ba opia ladu i arono. 31Onaemo pu'uno i Paulu ka ipotaeako ira sorodadu anu langkai pangkano ka sorodaduno, ”Tewala nahi dompo'ia a ngkapala, nahi komiu ntekadudui.” 32Ka i'amba sorodadu atuudo me'otuhio ohono bangka kodei ka mpo'ineeo ka imolomo.
33Mansano tamo meene, i Paulu umoluako ira luwuno mia ka dompongkaa, ipotae, ”Hopulu ka opaa oleomo butu komiu mpesisikori, mpeteao mokoninggo ka nahi mpongkaa hapa-hapa. 34Onaemo pu'uno kupatudu komiu, ka impongkaa ari. Mongkona atuu mentudu a ntekaduduiamiu. Nahina maupo te'asa mia i olomiu ta tetadi maupo te'asa ngkeu wuu inso a uluno.”
35Umarino mepau kanandio, i'alao roti, ka i'unde-unde Ira Ue Ala i arodo luwudo, ka isiba-sibao, ka i'amba mompu'u mongkaa. 36Ka morosoomo aroado luwuno mia atuu, ka ondae mpongkaa ira koa mbo'u. 37Porokomami luwuno anu a ngkapala atuu rua etu ka pitu pulu ka onoo mia. 38Mansado memowohi mpongkaa, domentadio a ntahi gandu inula mokomonongkoo kapala atuu. 39Ka mansano mompu'u meene, domengkitao aasa kolono tahi anu melembo wiwino. Maupo nahi domento'orio tuwu wita atuu, domempakosio ka dompokotesandao kapala atuu i tu'ai. 40Dompotola ira ohono ladu, ka do'amba mebinta ira ladu atuudo ka itondu a ntahi. Kontongaano atuu dompowuluo luwuno ohono ulino, mempasao somba anu lalu langkai, ka ipuurio angi kapala atuu te'aro a wiwi ntahi. 41Sine mpolalo ira howuno one, ka terareomo kapala atuu. Arono tepaho ka nami pokompelelu ka ulimano terongka irumpao bomba langkai.
42I tempo atuu mpotoo sorodadu ira mpepate ira mia mentinorungku, ka si hina maupo te'asa mia anu molai sumowe. 43Sine sorodadu anu langkai pangkano atuu mingki kumaduduio i Paulu. Onaemo pu'uno ka i'onto ira kana tinoodo, ka meparenta, luwuno mia anu pande sumowe ka itese'elu mentoa a ntahi ka ipewuatako a ntuwu wita, 44ka mia mehano ka dompetonda lembui mesoweako dopi ke siba-sibano kapala. Kanandiomo dontekadudui luwu mpewuatako a ntuwu wita.
Currently Selected:
WINEWEUDO TINENA 27: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
