WINEWEUDO TINENA 4
4
I Peturu ka i Yohane i arono Pobitaraa Agama
4:1-22
1Tempono i Peturu ka i Yohane kontongaado mepau a mia hadio, borono domehawe ndi ondae sando mpesomba ka petewawado anu mpodagai Raha-Do Ue Ala saru to Saduki. 2Mia atuudo ntekuda ntu'u hangano mompaguru ira mia hadio ka mempaleleo, nine ndi Ondae i Yesu hinao pewangua inso i olodo mia mate. 3Rinako ira ka pineweengako a laro mpohukua hawe tisomono, hangano wongiomo. 4Sine i olodo mia anu merongeo pompaguru atuu hadio anu gagi mpompe'ala-ala, ranta porokodo bara'ura gagi lima nsowu mia tama.
5Tisomono luwuno petewawado to Yahudi saru mia memota'u ka anu mpoto'ori Taura menteriso i Yerusale 6saru Sando Mpesomba Langkai i Hanasi ka i Kayapa, i Yohane ka i Alesande ka luwuno mia susua anu tewinso inuledo Sando Mpesomba Langkai. 7Ka i'amba i Peturu ka i Yohane winawa me'aro a nterisoa atuu ka mompu'u iramo pinaresaako pesikeno andio, ”Pabawano isemake ke a neeno isemake ipoweweu kanatuu?” 8Sumangkiomo i Peturu, bukeakoomo Penaa Mempori, ”Hei luwuno petewawa bawaa ka mia memota'u, 9tewala kanandio-andio omami asalakono pinaresa hangano aasa poweweu moiko a mia mahaki ka asalakono pinau a mpabawano isema ipinokotompa mia atuu, 10ka imento'oriomo luwumiu ka luwuno bawaa Isaraeli, nine a nee-Do i Yesu Kerisituu, to Nasare, anu pinasomiumo a ngkeu pinotamba, sine anu Dowangu Iramo Ue Ala inso i olodo mia mate – nine hangano Ondaemo i Yesu atuu ka ipentade madoo mia andio i aromiu kanandio-andio. 11#Pud. 118:22 Ondaemo i Yesu
watu anu tinadido anu mpowangu raha – onaemo omiumo isa'a –,
sine gagi Iramo watu empehino siuno.
12Ka nahina tekaduduia maupo ndi sema sangkadio ndi Ondae, hangano i totono langi andio nahina nee susua anu wineeako a mia anu mokongkadudui kita.”
13Mansado mengkitao anu teriso atuu mosiado i Peturu ka i Yohane ka domento'orio, nine orua ira atuu mia anu komba hinao sikolado, mengkohali-hali iramo; ka domento'orio orua ira atuu anu tumonda Ira i Yesu. 14Sine hangano domengkitao mia anu pinokotompa atuu mentade i horido orua tinena atuu, nahi dompokompompau hapa-hapa sumangki ira. 15Ka mansado mentena ira tinena atuu ka dobintao terisoa, nteriso iramo, 16ka dompotae, ”Kana'umpeke kita mbio ira mia andio? Hangano mengkaaomo a luwuno palilino i Yerusale, nine mompokohina iramo anu tedoa kinohali-haliako ka nahi kita mpokohapuo. 17Sine ka si kotele-teleleno mongkona atuu i olodo mia hadio, laluopo tompokodoito ira ka umonto ira, ka si dopepau mbo'u maupo saru isema a nee atuu.” 18Ka mansado tinena mewinso, domempauako ira ka siimo ntu'u dompepau ke mompaguru mbo'u a nee-Do i Yesu. 19Sine dosangki ira i Peturu ka i Yohane, ”Moiko imempakosio omiumiu isuake anu mentee i aro-Do Ue Ala: metenunu ndi omiu ke metenunu ndi Ondae Ue Ala. 20Hangano komba kami komino ka nahi kipepau mongkona hapa anu kinitamami ka anu kirongeomo.” 21Komoko-mokorano dompokodoito ira tinena atuu, sine poko'ariano dopotola ira koa, hangano anu menteriso nahi dompohawe sala humuku ira nde medoito ira a mia hadio anu me'unde-undeo nee-Do Ue Ala hangano anu gagiomo. 22Hangano mia anu pinokotompaako kinohali-haliako atuu toreaomo pato pulu nta'u tinuwuno.
Pekakaido bawaa
4:23-31
23Mansado pinotola lumako iramo i Peturu ka i Yohane a wali-walido, ka do'amba tumutuluako ira luwuakoano anu pinaudo petewawado sando mpesomba ka mia memota'u ndi ondae. 24#Pel. 20:11; Neh. 9:6; Pud. 146:6 Tempono domerongeo wali-walido mongkona atuu, mpebooli iramo mperonga-ronga ndi Ondae Ue Ala, dompotae, ”Oo Ue, Omiumo anu mokogagio langi ka tolino, tahi ka luwuno ihino. 25#Pud. 2:1-2 Ka hangano Penaa Mempori mesala a ntetenaa-Miu i Daudi, amamami, mepau Komiumo:
Tembio ka domemarisu luwuno tongku,
tembio luwuno suku tongku ka dompompewowolo anu nahina tuduno?
26Mokoleno wawontolino mpepatinda
ka anu langkai potorodo mpepumpu
umewai Ira i Ue ka Anu Inurapi-Do.
27 #
Mat. 27:1-2; Mrk. 15:1; Luk. 23:1, 7-11; Yoh. 18:28-29 Hangano menteeano mpepumpu iramo a laro ngkota andio i Herode ka i Pontiu Pilatu saru luwuno tongku ka suku tongku Isaraeli umewai Ira i Yesu, Tetenaa-Miu anu mempori, anu inurapi-Miu, 28ka weweuo luwuakoano anu se'eluomo Ipakonsiakono pabawa ka po'ehe-Miu. 29Ka kanandio-andio, oo Ue, Ikitaomo kana'umpe dompokodoito kami ka Ipokomosia iramo tetenaa-Miu ka domempaleleo pau-Miu. 30Itandeomo kae-Miu mompokotompa mia, ka Ipokohina iramo petondoni ka anu mengkinohali-haliako a nee-Do i Yesu, Tetenaa-Miu anu mempori.” 31Ka tempono kontongaado mpekakai, leluomo po'iangado mpepumpu atuu ka mebukeako ira luwu Penaa Mempori, ka i'amba memosia iramo mempaleleo pau-Do Ue Ala.
Mongkona tuwudo bawaa
4:32-37
32 #
Tin. 2:44-45
Kanatuumo tepumpudo mia anu mpompe'ala-ala iramo atuu, mpe'asa aroa ira ka mpesintuwu, ka nahina maupo te'asa mia anu motae, nine ba hapa anu hina ndi onae ipe'umbuo asa-asano, onaemo arataa morokoado. 33Ka saru pabawa anu langkai luwuno tinena mpesakosii mongkona pewangu-Do Ue Yesu ka luwudo mentuwu a laro mare'eno pompehohawa. 34Hangano nahina maupo te'asa mia anu hinao makurano i olodo; hangano luwuno mia anu hinao witano ke raha, me'asao arataado atuu, ka olino anu inasa atuu domewawao 35ka domenaao a mpuu karudo tinena; ka i'amba tinia-tia a sompo mia menunu saru kinereno.
36Kanandio koa mbo'u i Yusupu, anu domeneeakono tinena i Baranaba, pengkonaano ana pontarero, aasa to Lewi inso i Sipuru. 37I'asao lereno, ka i'amba wawao doino atuu ka inaao a mpuu karudo tinena.
Currently Selected:
WINEWEUDO TINENA 4: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
