Tegagia 16

I Hagari me'anaakono i Sumaila, anano i Burama

16:1-16

1I Sarai, beineno i Burama, nahina ana ipe'anaakono. Onae hinao asa mia atano beine meneeako i Hagari, to Masiri. 2Motaeomo i Sarai ndi Burama, ”Uto'orio, Ondae i Ue nahi Dopemoikoo kupe'ana. Pewowaliakonomo ataku atuu, bara'ura molalo onae aku mokompohawe ana.” I Burama merorongeakono pinauno i Sarai. 3I Sarai, beineno i Burama, umalao i Hagari, atano, to Masiri atuu ka iweeakono i Burama, tamano ka igagi beineno. Tempo atuu i Burama mo'iaomo i wita Kana'a, i larono hopulu nta'u. 4I Burama mewowaliakono i Hagari ka beine atuu mentia. Mansano tumo'orio i Hagari, nine onae mentia, ipe'uru-uruo ueno. 5Motae i Sarai ndi Burama, ”Pompokongkodei anu pinemarasaiku andio onaemo salamu. Lano ongkue weeakomu ataku, sine da iaopo ito'orio, nine onae mentia, ipe'uru-uru aku. Po'ineeomo Ondae i Ue gagi Puu Mpobitara i oloku ka omue.” 6Motae i Burama ndi Sarai, ”Onae atamu! Onae a laro mpabawamu. Weweuomo ndi onae hapa anu pinemoikomu.” Ka i'amba i Sarai mokonsiio i Hagari, ranta ka ipolai bintao. 7Mala'eka-Do i Ue tepohaweakono i Hagari umpeda mata uwoi a nsala lumako i Siuri, asa mata uwoi i pada one. 8Ipotae, ”Hagari, atano i Sarai, inso isuake omue ka isuake ba ulako?” Sumangki i Hagari, ”Ongkue molai bintao i Sarai, ueku.” 9Ka i'amba Mala'eka-Do i Ue motaeakono, ”Pekulemo a uemu, po'ineeomo upinokonsii i totono pabawano.” 10Mala'eka-Do i Ue motaeakono mbo'u, ”Aku weweuo inulemu tedoa hadio, ranta nahi pinokodoa hangano hadiono.” 11Motaeomo mbo'u Mala'eka-Do i Ue ndi onae, ”Omue kontongaamu mentia ka kome'anaako asa ana ntama. Konumeeakono i Sumaila, hangano Dorongeomo i Ue a laro tepokonsiimu. 12Onae ta gagi asa mia kana kalide mo'ila. Kaeno ta mo'ewai sompo mia ka kaeno sompo mia ta umewaio. Maupo isua ipo'ia i'ewaio luwu pepaekompono.” 13Ka i'amba i Hagari pauo nee-Do i Ue anu mepau Iramo ndi onae atuu, ”Omiumo Eli-Roi.” Hangano ipotae, ”Mentee ntu'uke i ndi'ai kukita Ira umari-Do kumita aku?” 14Onaemo pu'uno sumuru atuu nineeako Sumuru Lahai-Roi, anu po'iangano i olono Kadesi ka Beredi.

15 # Gal. 4:22 I Hagari me'anaakono asa ana ntama anano i Burama ka i Burama numeeakono nana'ote anu pine'anaakono i Hagari atuu i Sumaila. 16Tinuwuno i Burama halu pulu ka onoo nta'u, tempono i Hagari me'anaakono i Sumaila anano i Burama.

Currently Selected:

Tegagia 16: XMZ

Highlight

Copy