Tegagia 25

Inuleno i Burahima inso ndi Ketura

25:1-6

1 # 1Taw. 1:32-33 I Burahima mo'ala mbo'u asa mia beineno, neeno i Ketura. 2Beine atuu me'anaakono i Simurani, i Yokisani, i Medani, i Midiani, i Isabaki ka i Suahi. 3I Yokisani hinao anano i Sieba ka i Dedani. Inuleno i Dedani, onaemo to Asuri, to Letusi ka to Leumi. 4Luwuno anano i Midiani onaemo i Epa, i Eperi, i Heno, i Abida ka i Elida'a. Onaemo atuu luwuno inuleno i Ketura. 5I Burahima weeakono luwu i Saki arataano, 6sine a luwuno anano anu hinaweno inso a luwuno beine mongurano, ipoweeako ira ihi ngkae. Ka i'amba tempono onae da tuwu, itena ira melako inso i arono i Saki, anano, i sabaano oleo, i Wita Sabaano oleo.

I Burahima mate ka kinaburu

25:7-11

7Tinuwuno i Burahima hawe asa etu pitu pulu ka olima nta'u, 8ka i'amba tampula penaano. Onae mate i tempono moputeomo wuuno, mota'u ka tende ntinuwu. Onae pinumpu a uempu'uno. 9Luwuno anano, i Saki ka i Sumaila, kumaburuo a laro ngkunepo Makapela, a lereno i Eperoni anano i Sohari, to Heti, lere anu po'iangano i sabaano oleo Mamere, 10#Teg. 23:3-16anu umariomo i'olio i Burahima inso a inuleno i Heti. I ra'aimo dokinaburu i Burahima ka i Sara, beineno. 11Mansano mate i Burahima, Ondae Ue Ala rumonsoo i Saki, anano. I Saki rodo mo'ia umpeda sumuru Lahai-Roi.

Inuleno i Sumaila

25:12-18

12Ndiomo inuleno i Sumaila, anano i Burahima, anu pine'anaakono i Hagari, beine to Masiri atuu, atano i Sara. 13#1Taw. 1:28-31Ndiomo needo anano i Sumaila, pinau montonda potudano domehina: i Nebaioti, ana akano i Sumaila, tudano i Kadari, i Adibe'eli, i Mibisami, 14i Misima, i Duma, i Masa, 15i Hadadi, i Tema, i Yeturi, i Napisi ka i Kedama. 16Onaemo atuu luwuno anano i Sumaila, ka onaemo atuu luwuno needo, montonda iniado ka montonda pekemaado, hopulu ka orua petewawa suku, singge mia saru sukuno. 17Tinuwuno i Sumaila, asa etu tolupulu ka opitu nta'u. Onae tampula penaano, mate ka pinumpu a uempu'uno. 18#Teg. 16:12Inuleno mpo'iangario wita inso i Hawila hawe i Siuri, anu po'iangano i sabaano oleo Masiri te'aro i Asuri. Ondae rodo mpo'ia ntepopo'aro saru luwuno pepaekompodo.

I Esau ka i Yako pine'anaako

25:19-28

19Ndiomo tutuluno inuleno i Saki, anano i Burahima. I Burahima hinao anano i Saki. 20Tinuwuno i Saki pato pulu nta'u, tempono i'alao i Ribeka, anano i Betueli, to Arami inso i Padana-Arami, pepaekompono beine i Laba, to Arami atuu, i'alao gagi beineno. 21I Saki mekakaiakono beineno ndi Ondae i Ue, hangano beineno atuu biita nahi pe'ana. Ondae i Ue uminduo pekakaino, onaemo ka imentia i Ribeka, beineno atuu. 22Sine anano a laro mpe'anakaano mambe ewa, ka ipotae, ”Tewala kanandio, tembio ka kupembasaio anu kanandio?” Ka i'amba lumako mesikeno ndi Ondae i Ue. 23#Rom. 9:12Pau-Do i Ue ndi onae,

”Orua tongku a laro mpe'anakaamu,

orua suku tongku ira mensua inso a laro mpe'anakaamu.

Suku tongku anu asa ta lalu moroso sekonopo anu susua,

ana anu te'aka ta gagi ata a ana anu uai.”

24Mansano haweakoomo tempono ta me'ana, lano ana indua anu kongko a laro mpe'anakaano. 25Anu amba-ambano meluarako, motaha-taha, asa ngkoroino kana lemba meloe anu mewulu. Onaemo pu'uno, ka inineeako i Esau.

26Umarino atuu meluarakoomo uaino; kaeno uminio tundono i Esau. Onaemo pu'uno, ka inineeako i Yako. Tinuwuno i Saki nomo pulu nta'u tempono dopine'anaako. 27Nana'ote orua atuu kolangka-langkaido: I Esau gagi asa mia anu pande mowemba, asa mia anu ineheno mo'ia i tonga mpada, sine i Yako onae asa mia anu modato peleluno, anu ineheno mo'ia a ngkema. 28I Saki mehohawao i Esau, hangano ineheno mongkaa bau pinongko'alano, sine i Ribeka mehohawao i Yako.

I Esau umasao te'akano

25:29-34

29I asa oleo i Yako tekonai hinao ninahuno, tempono i Esau hawe mompemokendo inso a mpada. 30Motae i Esau ndi Yako, ”Po'ineeomo kupongkaa tedei inso anu motaha-taha atuu, hangano mokendo aku.” Onaemo pu'uno ka inineeako i Edomi. 31Sine, motae i Yako, ”Asao ari tia te'akamu ndi ongkue.” 32Sumangki i Esau, ”Kitao, ongkue ilawu mate; hapa tuduno tia te'aka atuu ndi ongkue?” 33#Ibr. 12:16Motae i Yako, ”Pesumpa ari ndi ongkue.” Mesumpaomo i Esau ndi onae, ka i'asao tia te'akano ndi Yako. 34Ka i'amba i Yako moweeakono roti ka wua inahu motaha ninahuno atuu ndi Esau. Onae mongkaa ka mo'inu, ka i'amba mentade lumako. Kanatuumo i Esau nahi pelangkaio tia te'akano atuu.

Currently Selected:

Tegagia 25: XMZ

Highlight

Copy