Tegagia 27

I Yako rumontuakono pompopo'oo ronso tiano i Esau

27:1-40

1I Saki mota'uomo, ka matano morawu, onaemo kanami pongkita mbo'u. Ipoboio i Esau, ana akano, ka ipotaeakono, ”Anaku.” Sumangki i Esau, ”Ndio aku Ama.” 2Motaeomo i Saki, ”Kitao, mota'u akumo, nahi kuto'orio oleo mateaku. 3Kanandio-andio, alaomo parewa mpowembamu, kadu ana mpana ka wo'emu. Lakomo a mpada ka powembaakune te'asa kondehora. 4Nahuakunemo kaanga anu mo'ahi kana anu ineheku, umarino atuu wawaomo ndi ongkue ka kukaano, ka kuronsoko se'eluno napi kumate.”

5I Ribeka merorongeakono tempono i Saki mepau ndi Esau, anano. Mansano lumako i Esau a mpada mowemba te'asa kondehora ta wawaano mekule, 6motaeomo i Ribeka ndi Yako, anano, ”Kurongeomo amamu motaeakono i Esau, pepaekompomu, 7’Wawaakunemo asa kondehora winembamu ka nahuakunemo kaanga anu mo'ahi aku kumaano. Aku rumonsoko i aro-Do i Ue, se'eluno napi kumate.’ 8Kanandio-andio, anaku, perorongeakonomo pinauku kana anu kuparentaakomu. 9Lakomo a mpo'iangano asa bawaa bembe bimba, alaakune inso i ra'ai orua ana bembe anu moiko. Aku numahuo gagi kaanga anu mo'ahi tiado amamu, kana anu inehedo. 10Wawaomo atuu ndi ondae amamu ka dokaano, ka doronsoko, se'eluno napi domate.”

11Sine, motae i Yako ndi Ribeka, ineno, ”Ito'orio, i Esau pepaekompoku, onaemo asa mia anu mewulu mokapa, sekono ongkue, kuliku molori. 12Bara'ura ondae i ama ira rumare aku, ka dopotae kunggari-nggari ira. Bakanandio ongkueku moweweuakono totonaano koroiku ka komba ronso.” 13Sine ineno motaeakono, ”Po'ineeomo totonaa atuu ka itedonta a ngkoroiku, anaku. Perorongeakonomo koa pinauku, lakomo, alaakunemo bembe atuudo.” 14Ka i'amba lumako umalao ka iwawao ndi ineno. Umarino atuu ineno monahu kaanga anu mo'ahi kana anu ineheno amano. 15Ka i'amba i Ribeka umalao sangka moikono ntu'u i Esau, ana akano, sangka anu ninaano i raha, ka ipokonaakono i Yako, ana tompa susuno. 16Kulino ana bembe atuu iwaluakono a orua kaeno i Yako ka a we'uno anu molori. 17Ka i'amba meweengakono kaanga anu mo'ahi ka roti wineweuno a ngkaeno i Yako, anano.

18Mewinsoomo i Yako a mpo'iangano amano ka ipotae, ”Ama!” Sumangki amano, ”Tembio! Isemake omue, anaku?” 19Motae i Yako ndi amano, ”Ongkuemo i Esau, ana akamiu. Kuweweuomo, kana anu ipauakune. I'aiwamo mentoro ka ipongkaamo bauno pinongko'alaku anu ninahuku andio, ka ironso aku.” 20Motae i Saki ndi anano, ”Sarai ntu'u ka upompoko'ala, anaku?” Sumangki i Yako, ”Hangano Ondae i Ue, Ue Alamiu weweu aku mehasili.” 21Ka i'amba i Saki motaeakono i Yako, ”Aiwamo umpeda, ka kuperareko, anaku, ba omue koa andio anaku i Esau ke naahi.” 22I Yako aiwa umpeda ndi Saki, amano, anu rumareo ka ipotae, ”Suarano, suarano i Yako; sine kaeno, kaeno i Esau.” 23Onae nahi to'orio i Saki, hangano kaeno mewulu kana kaeno i Esau, pepaekompono. I Saki tamo rumonsoo, 24sine onae mesikeno mbo'u, ”Menteeke omue andio anaku Esau?” Sumangki i Yako, ”Humbee!” 25Ka i'amba motae i Saki, ”Poko'umpedaomo kaanga atuu ndi ongkue, aku mongkaa bau pinongko'alamu anaku, ka kuronsoko.” Ipoko'umpedao ndi amano, ka ipongkaa amano. Ipowawaakono mbo'u anggoro, ka ipo'inu amano. 26Motaeomo i Saki, amano, ndi onae, ”Aiwamo te'umpeda mbo'u, ka woo-woo akumo, anaku.” 27#Teg. 12:3; Ibr. 11:20I Yako aiwa lalu umpeda ka iwoo-wooo amano. Tempono i Saki woono sangkano i Yako, ironsoo, ipotae,

”Menteeano, woono anaku

onaemo kana woono pada anu rinonso-Do i Ue.

28Ondae Ue Ala Ira mompotiiakomu tontoru inso i langi

ka wita mewalo i tolino saru gandu

ka anggoro anu hadio ntu'u.

29Luwuno tongku ira ntepe'ata ndi omue,

luwuno suku tongku ira mpenggolontu mpesomba ndi omue;

gagimo ue a luwuno pepaekompomu,

luwuno anano inemu ira mpenggolontu mpesomba ndi omue.

Isema anu tumotonaako, onae tetotonaa,

ka isema anu rumonsoko, onae rinonso.”

30Mansano umari i Saki rumonsoo i Yako, ka da saraipo i Yako meluarako bintao i Saki, amano, mekuleomo i Esau, pepaekompono, inso mowemba. 31Onae mbo'u mompatinda kaanga mo'ahi, ka i'amba wawaakono amano. Ipotae ndi amano, ”Ama, ipewangumo ka ipongkaa bau winemba ninahuno anamiu, ka ironso aku.” 32Sine motae i Saki, amano, ndi onae, ”Isemake omue?” Sumangki i Esau, ”Ongkuemo anamiu i Esau, ana akamiu.” 33I Saki tedoa tededengke ka ipotae, ”Isemake onae, anu mowemba kondehora atuu ka anu wawaomo ndi ongkue? Kukaanomo luwu, se'eluno napi uhawe. Onae kuronsoomo ka onae ta kongkono gagi mia anu rinonso.” 34Umarino rumongeo i Esau pauno amano atuu, meraalikiomo meroku ntu'u a laro mahakino aroano ka ipotae ndi amano, ”Ironso aku ngkuda amaku!” 35Sumangki amano, ”Uaimu aiwaomo mompopo'oo ka rumontuo ronso ta tiamu.” 36#Teg. 25:29-34Motae i Esau, ”Kombake menteeomo neeno i Yako, hangano penduamo ipopo'oo aku. Tia te'akaku irontuomo, ka kanandio-andio irontuo mbo'u ronsoku atuu.” Ipotae mbo'u, ”Nde nahi ponaa ronso susuake tiaku?” 37Ka i'amba i Saki sumangkio i Esau, ”Menteeano onae kupokogagiomo pe'ueamu, ka luwuno pepaekompono kuweeakonomo gagi ata, ka kupoweeakonomo gandu ka anggoro. Ka i'amba tiamu, hapa mbo'u anu aku weweuo, anaku?” 38#Ibr. 12:17Motae i Esau ndi amano, ”Butu ronso anu asa atuuke kongko ndi omiu, Ama? Ironso akumo ngkuda Ama!” Mengeseomo i Esau saru suarano meroku. 39#Teg. 36:8; 2Mok. 8:20; Ibr. 11:20Sumangki i Saki, amano,

”Menteeano po'iangamu

ta olai inso a wita mewalo i tolino

ka olai inso a tontoru anu inso i langi i wawono.

40Omue kotuwu inso a mponaimu

ka omue kogagi atano uaimu.

Sine, lembuino ta gagi,

tewala omue meteahako ntu'u

kometadiakono pasanga atuu inso a bangawe'umu.”

I Yako molai inso ndi Esau a mpetenano i Ribeka

27:41–28:9

41I Esau monaa aroa ndi Yako hangano ronso anu iweeakono amano ndi Yako. Ipotae a ngkoroino onaeno, ”Oleo po'inomboako ira i ama, nami ta tehine mbo'u. Itempomo atuu i Yako, uaiku, aku mepateo.” 42Mansano pinauako i Ribeka pauno i Esau, ana akano atuu, onae montena mia moboio i Yako, ana tompa susuno. Ka i'amba motaeakono i Yako, ”I Esau pepaekompomu, montoo mombalo ta mepateko. 43Kanandio-andio, anaku, rongeomo pauku andio, pepatindamo ka polaimo i kota Harani, ndi Laba, pepaekompoku. 44Po'iamo saru onae i larono ba opia tempo ranta ka itemonto bamburuno pepaekompomu atuu 45ka tekudano pepaekompomu atuu moriniomo ndi omue, ka ikolupeo hapa anu uweweuomo ndi onae. Ka i'amba aku montena mia aiwa umalako inso i ra'ai. Tembio ka i'asalakono orua komiu tetadi inso ndi ongkue ia oleo anu mengkena?”

46 # Teg. 26:34-35 Ka i'amba i Ribeka motaeakono i Saki, ”Kute'osaakono tuwuku hangano beine to Heti atuudo. Tewala i Yako mbo'u mo'ala kombiano inso i olodo beine i wita andio, kana beine to Heti atuu, hapa mbo'u tuduno kutuwu?”

Currently Selected:

Tegagia 27: XMZ

Highlight

Copy