Tegagia 29

I Yako kumombiao i Lea ka i Raheli

29:1-30

1Ka i'amba melungkaomo i Yako inso i tu'ai lumako i witado to sabaano oleo. 2Tempono mengkita limbu-limbu, i kitaomo asa sumuru a mpada ka otolu bawaa bembe bimba mpelungku umpeda a nsumuru atuu. Hangano, inso a nsumurumo atuu mia mpopo'inu ira bawaano bembe bimba atuu. Ka ndio watu tutuwino sumuru atuu, langkai. 3Tewala luwuno bawaano bembe bimba atuu mepinumpu i ra'ai, luwuno puu mpopakambi melundio watu atuu inso a ngangano sumuru, ka i'amba bawaano bembe bimba atuu mempinopo'inu. Ka i'amba watu atuu pinokule a ngangano sumuru atuu. 4Mesikenoomo i Yako ndi ondae, ”Pepaekompo, inso isuake omiu?” Mesangki ira, ”Omami inso i kota Harani.” 5Ipotaeako ira mbo'u, ”Nde imento'orioke i Laba, ana'ueno i Nahori?” Mesangki ira, ”Humbee, kimento'orio.” 6Isikeno ira mbo'u, ”Nde moi-moiko ira koake?” Mesangki ira, ”Humbee, moi-moiko ira koa. Kitao, atuu i Raheli, anano anu beine, aiwa saru asa bawaa bembe bimbano.” 7Ka i'amba motae i Yako, ”Da ondau oleo, napi tempono domepinumpu pinotuwu. Ipopo'inu ira bawaano bembe bimbamiu atuu, ka i'amba melako pakambi ira mbo'u.” 8Sine, mesangki ira, ”Nahi kami mpokoweweuo atuu sangkadio tepumpuomo luwu bawaano pinotuwu atuu. Umarino atuu ka i'amba linundi watu atuu inso a ngangano sumuru ka kimpopo'inu ira bawaano bembe bimba mami.”

9Kontongaano mepauako ira, haweomo i Raheli saru asa bawaa bembe bimbano amano, hangano onaemo anu pakambi ira. 10Mansano kumitao i Yako i Raheli, anano i Laba pepaekompono ineno, saru asa bawaa bembe bimbano i Laba, aiwaomo merangkuhako, ka i'amba lumundio watu atuu inso a ngangano sumuru, ka ipopo'inu ira asa bawaa bembe bimbano i Laba, pepaekompono ineno. 11Ka i'amba i Yako woo-wooo i Raheli saru mengese meroku. 12Ka i'amba i Yako pauakono i Raheli nine onae pe'etuno amano i Raheli, ka anano i Ribeka. Meluluomo i Raheli tumutuluakono amano. 13Nahi tehine umarino rumongeo i Laba lele mongkona i Yako, anano pepaekompono atuu, meluluomo tumotowoo. Ikopuio ka iwoo-wooo i Yako, ka i'amba wawao i rahano. Ka i'amba i Yako tumutuluakono i Laba luwuno anu pinembasaino. 14Motae i Laba ndi onae, ”Menteeomo omue rea ka ihiku.” Mo'iaomo i Yako saru onae i larono asa wula.

15Ka i'amba i Laba motaeakono i Yako, ”Butu hangano omue pe'asa reaku, tekonake omue mo'angga mpena ndi ongkue? Pauakune hapa anu tekona gagi tambomu.” 16I Laba hinao anano orua ira ana beine; anu aka neeno i Lea ka anu uai neeno i Raheli. 17I Lea moleu-leu pematano, sine i Raheli tekosi koroino ka tekosi rupano. 18I Yako tedonta aroano ndi Raheli. Onaemo ka ipotae, ”Aku mo'angga ndi omiu i larono opitu nta'u ka iweeakune i Raheli, anamiu anu uai atuu.” 19Sumangki i Laba, ”Laluopo onae kuweeakomu sekonopo a mia susua. Po'iamo ndi ongkue.” 20Ka i'amba i Yako mo'angga i larono opitu nta'u ka iwineeako i Raheli. Sine, tempo opitu nta'u atuu ituduo kana ba opia oleo koa hangano tedonta aroano ndi Raheli.

21Umarino atuu i Yako motaeakono i Laba, ”Iweeakunemo anu ta beineku atuu, hangano sompoomo tempoku, ka kupewowaliakono.” 22Ka i'amba i Laba umolu ira luwu mia a mpo'ianga atuu ka ipoweweu pelimbua. 23Sine, i tempono wongi i Laba umalao i Lea, anano, ka iwawao ndi Yako. Ka i'amba i Yako mewowaliakono. 24I Laba, meweengakono mbo'u i Silipa, atano beine ndi Lea, anano, gagi atano. 25Tempono mo'oru mengkaa beine atuu i Lea! Ka i'amba i Yako motaeakono i Laba, ”Hapake anu wineweumiu ndi ongkue? Kombake ka kuhaweo i Raheli kupo'angga ndi omiu? Tembio ka ipopo'oo aku?” 26Sumangki i Laba, ”A mpo'ianga mami andio nahi domeleleongakono mia mpoweweu kanandio: mopokombiao uaino mese'elungio akano. 27Pokosompoomo ari opitu oleo pekombiamu saru anaku andio. Ka i'amba anaku anu susua mbo'u kowineeako gagi tambomu, poolo ka upo'angga ndi ongkue opitu nta'u mbo'u.” 28Iweweuomo i Yako kanatuu. Ipokosompoo opitu oleo pekombiano saru i Lea, ka i'amba i Laba weeakono i Raheli, anano gagi beineno.

29I Laba mbo'u meweengakono i Biliha, atano beine ndi Raheli, anano, gagi atano. 30I Yako mbo'u mewowaliakono i Raheli, tendeano ikekewoiopo i Raheli sekonopo i Lea. Kanatuumo ipo'angga ndi Laba i larono opitu nta'u mbo'u.

Luwuno anano i Yako

29:31–30:24

31Mansa-Do kumitao i Ue nine i Lea nahi kekewoio, Do'ungkahiakono pe'anakaano, sine i Raheli biita nahi pe'ana. 32I Lea mentia, ka ipe'anaakono asa ana ntama, ineeakono i Rube, hangano ipotae, ”Menteeano Dokitaomo i Ue marasaiku; kanandio-andio manasa tamo kumekewoi aku tamaku.” 33Onae mentia mbo'u, ka ipe'anaakono asa ana ntama, ipotae, ”Menteeano Dorongeomo i Ue nine nahi kukinekewoi, onaemo ka Dopoweeakune mbo'u ana andio.” Ka i'amba numeeakono anano atuu i Simeo. 34Onae mentia mbo'u, ka ipe'anaakono asa ana ntama. Ipotae, ”Pohona andio tamaku ta laluopo metako ndi ongkue, hangano otolumo ana ntama kupe'anaakono.” Onaemo pu'uno ineeakono anano atuu i Lewi. 35Onae mentia mbo'u, ka ipe'anaakono asa ana ntama. Ipotae mbo'u, ”Pohona andio, aku montarimakasi ndi Ondae i Ue.” Onaemo pu'uno ka ineeakono anano atuu i Yehuda. Umarino atuu nami pe'ana mbo'u.

Currently Selected:

Tegagia 29: XMZ

Highlight

Copy