Tegagia 32

Akalano i Yako ka itepohaweakono i Esau

32:1-21

1I Yako motilaloakono pelempaano, ka i'amba ntepotowo iramo mala'eka-Do Ue Ala saru onae. 2Tempono ikita ira i Yako, motaeomo, ”Ndio sorodadu-Do Ue Ala.” Ineeakono po'ianga atuu Mahanaimi.

3Umarino atuu i Yako montena miano lumako se'elu tepohaweakono i Esau, pepaekompono, i wita Seiri i Edomi. 4Iparenta ira, ”Kanandiomo imempauakono ueku i Esau: Kanandiomo ipotae atamiu i Yako: Tetoro akumo ndi Laba gagi mia hawe ka i tu'ai kupo'ia ia tempo anu telaloomo andio. 5Hinaomo sapiku, kalide, asa bawaa bembe bimba, ataku tama ka beine. Kutena ira mempauo mongkona andio ndi omiu ueku, ka kupohawe pompehohawa i aromiu.” 6Ka i'amba luwuno mia mentinena atuu mpekule ndi Yako ka dompotae, ”Mehawe kamimo ndi Esau, pepaekompomiu, ka onae mbo'u kontongaano a laro pelempaa aiwa tepohaweakomiu, meronga pato'etu mia.” 7I Yako tedoa doito ka mompema'iso. Ka i'amba tumia ira mia anu perongano, saru bawaano bembe bimbano, sapi ka untano gagi orua bawaa. 8Hangano ipewowoloo, ”tewala hawe i Esau sumapoio bawaa anu asa, ranta ka itenangi, bawaa anu toreano ta tola.” 9Ka i'amba motaeomo i Yako, ”Oo Ue Alano i Burahima, uempu'uku, ka Ue Alano i Saki, amaku, Oo Ue anu mepau Komiumo ndi ongkue, ’Pekulemo i witamu saru a mpepaekompomu ka Aku moweweu moiko ndi omue.’ 10Nahi pototoku ntu'u tumarimao luwuno pompehohawa ka petenunu anu pinopokita-Miu a ata-Miu andio. Butu saru mowawa tukoku andio kusakio koro Yarade, sine kanandio-andio gagiomo orua bawaa. 11Po'ineeomo ka Ipotola aku inso a ngkaeno i Esau, pepaekompoku, hangano kudoitoakono, ba mansa onae aiwa mepate aku, saru mbo'u luwuno ine ka anado. 12#Teg. 22:17Kombake mepau Komiumo: Manasa Aku moweweu moiko ndi omue ka mokogagio inulemu kana hadiono one a ntahi, anu nahi pinokodoa hangano hadiono.” 13Ka i'amba merato i ra'ai ia wongi atuu.

Ka i'amba inso a hapa anu hinao ndi onae i'alao pompowee tiano i Esau, pepaekompono: 14rua etu bembe waino ka rua pulu bembe lakino, rua etu bimba waino ka rua pulu bimba lakino, 15tolu pulu unta anu kontongaano mompo'uo saru luwuno anano, pato pulu sapi waino ka hopulu sapi lakino, rua pulu kalide waino ka hopulu kalide lakino. 16Luwuno atuu ipeweengakono a luwuno atano, sompo bawaa teponsia, ka ipotaeako ira, ”Impelempamo mese'elungi aku ka imedagaio ka ihina koa olono bawaa anu asa saru bawaa anu susua.” 17Iparentao atano anu lalu i arono, ”Tewala i Esau, pepaekompoku, tepotowo saru omue ka ipesikeno ndi omue, ’Isemake uemu, isuake ba ulako ka pinotuwuno isemake anu i aromu atuu?,’ 18Sangkiomo, ’Ndio pinotuwuno atamiu i Yako. Ndiomo pompowee anu inoliwi tiamiu ueku Esau, ka i Yako kongko ira i bungkumami.’ ” 19Iparenta ira mbo'u moiko a ata anu ko'orua maupo a ata anu ko'otolu ka a luwuno anu i bungkuno bawaano pinotuwu atuu, ipotae, ”Pauakonomo i Esau kana pauku hieno, tempono intepohaweakono. 20Asalakono imempauo mbo'u: Atamiu i Yako kongko ira i bungkumami.” Hangano ipewowoloo i Yako, ”Moikoopo saru pompowee anu winawa tese'elu kupokomolusaakono aroano, ka ku'amba kumitao rupano; bara'ura ta koa tumarima aku moiko.” 21Kanandiomo pompowee atuu winawa tese'elu, sine onae merato a mpekemaano a wongi atuu.

I Yako meluluku saru Ondae Ue Ala

32:22-32

22A wongi atuu i Yako mewangu ka iwawa ira orua beineno, orua atano beine ka hopulu ka asa ira anano, ka do'amba mensaki a mpesakiakoa a ngkoro Yabo. 23Umarino sumakiako ira, isakiako ira mbo'u luwuno arataano. 24Ka i'amba i Yako mo'ia asa-asano. Ka i'amba asa tama meluluku saru onae hawe tebosi towea. 25Mansano mia atuu kumitao nine onae nahi pokonangio, itunduhio lodi-lodi puu mpa'ano i Yako, ranta teposala lodi-lodi puu mpa'a atuu tempono ipeluluku saru mia atuu. 26Motaeomo mia atuu, ”Po'inee akumo lumako, hangano tebosiomo towea.” Sumangki i Yako, ”Nahi aku mo'ineekomiu lumako tewala nahi ironso aku.” 27Mesikenoomo mia atuu ndi onae, ”Isemake neemu?” Isangkio, ”I Yako.” 28#Teg. 35:10Ka i'amba motae mia atuu, ”Neemu nahi ta pinau mbo'u i Yako, sine i Isaraeli, hangano melulukukomo umewai Ira Ue Ala ka mia, ka omue monangi.” 29Mesikenoomo i Yako, ”Pauakune ngkuda neemiu.” Sine isangkio, ”Tembio ka upesikenoakono neeku?” Ka i'amba rumonsoo i Yako i tu'ai. 30I Yako numeeakono po'ianga atuu Penieli, hangano ipotae, ”Kukita Iramo Ue Ala tepo'aro rupa, sine penaaku tekadudui!” 31Sabaomo oleo i wawono tempono itelalo i Penieli, ka onae modingge hangano puu pa'ano. 32Onaemo pu'uno hawe kanandio-andio to Isaraeli nahi domengkaano bau anu tumutuwio lodi-lodi puu mpa'a, hangano Dotunduhiomo puu mpa'ano i Yako, a ihino puu mpa'ano.

Currently Selected:

Tegagia 32: XMZ

Highlight

Copy