Tegagia 34

I Dina ka i Sikemi

34:1-31

1Asa tempo i Dina, ana beineno i Lea anu pine'anaakono ndi Yako, lumako tepohaweako ira beine i wita atuu. 2Mansano i Sikemi, anano i Hemori, to Hewi, anu pabawa i wita atuu, kumitao i Dina, ipolaisakono ka idadaio. 3Sine aroano metako ndi Dina, anano i Yako; tedonta aroano a ana beine atuu, ka i'amba mokorodoakono aroano ana beine atuu. 4Ka i'amba motaeomo i Sikemi ndi Hemori, amano, ”Ipesikenoakune a ana beine andio gagi beineku.” 5Irongeo i Yako nine i Sikemi sumosa'aio i Dina, ana beineno. Sine luwuno ana ntamano mekongko ira a mpada saru pinotuwudo, onaemo ka ipenoro-noro mpiha i Yako ranta ka dompekule.

6I Hemori amano i Sikemi, lumako tepohaweakono i Yako ta mepauakono. 7Tempono dompekule anano i Yako inso a mpada, domerongeo anu gagi atuu. Mia andiodo memahaki aroa ka tedoa ira ntekuda hangano i Sikemi moweweuomo mokoburu i olodo to Isaraeli mewowaliakono ana beineno i Yako, hangano poweweu anu kanandio nahi moiko iwineweu. 8I Hemori mepau ndi ondae kanandio, ”Aroano i Sikemi anaku kumekewoio anamiu. Tewala impemoikoo iweeakonomo gagi beineno anaku, 9ka po'ineeomo to mpenggoe rea molalo pekombiaa; iweeakamimo ana beinemiu ndi omami ka ime'ala iramo ana beine mami. 10Impo'iamo i olomami; wita andio te'ungkahi ndi omiu. Impo'iamo i ndi'ai, impelelumo po'ehemiu, ka impope'uemo wita i wita andio.” 11Ka i'amba i Sikemi motaeakono amano nana'ote atuu ka a luwuno pepaekompono, ”Po'ineeomo ka kupohawe pompehohawamiu, hapa anu inemamiu ndi ongkue aku meweengakono. 12Maupo te'opia hadiono doi gau pekombiaa ka pompowee anu imempopotembiakune, aku weeakomiu kana anu inemamiu ndi ongkue. Polomo koa, weeakunemo ana beine atuu gagi beineku.”

13Ka i'amba luwuno anano i Yako atuu sumangkiako ira pe'akala i Sikemi ka i Hemori, amano. Hangano i Sikemi sumosa'aiomo i Dina, uaido, 14mpotae iramo a orua mia atuu, ”Nahi kami mpokoweweuo anu kanandio, meweengakono uaimami a asa tama anu nahi petindi hangano anu kanatuu gagi mokoko'iia ndi omami. 15Butu kanandio pesalaano ka kimpoko'induo po'emamu. Tewala omiu mpengkena kana omami, sompo tama i olomiu tinindi, 16ka ki'amba mpeweengako ira ana beinemami ndi omiu ka mpo'ala ana beinemiu. Kami koa mpo'ia i olomiu, ka kita megagi asa tongku. 17Sine tewala nahi iperorongeakono po'emamami ka impetindi, kami wali me'alao ana beinemami, ka ki'amba melako.” 18Pinaudo dopemoikoo i Hemori ka i Sikemi, anano i Hemori. 19Mia mongura atuu mompari-pari weweuo, hangano ineheno a anano i Yako. Metiangi mbo'u onae asa mia anu tedoa pinelangkai i olodo luwuno pe'etuno. 20Ka i'amba i Hemori ka i Sikemi, anano, lumako a mpewowa langkaino kotado, ka dopepau a mpalilino kota atuu, kanandio, 21”Mia atuudo inehedo tuwu manangai saru ontae. Po'ineeomo dompo'ia i wita andio ka dompelelu po'ehedo; kombake wita andio sompo molueno tiado? Moiko tompo'ala ana beinedo gagi beineto ka moiko tompoweeako ira ana beineto. 22Sine, butu ndio po'emado mia atuudo me'induo mpo'ia i oloto, ka tomegagi asa tongku: sompo tama i oloto tinindi kana ondae mbo'u mentinindi. 23Arataa, ka luwuno pinotuwudo, kombake luwuno atuu ta gagi ontae mpe'ueo? Po'ineeomo koa tome'induo po'emado, ka dokongko mpo'ia i oloto.” 24Po'emado i Hemori ka i Sikemi, anano, dome'induo luwuno mia anu hawe a mpewowa langkaino kota atuu. Ka i'amba tinindiomo sompo tama, onaemo luwuno anu hawe a mpewowa langkaino kota.

25A oleo ko'otolu, tempono kontongaado mpompemahaki, i Simeo ka i Lewi, orua ira anano i Yako, luwuno pepaekompono i Dina, singge umalao ponaido. Dosapoio kota atuu nahina anu umewa saru mpepate ira sompo tama. 26I Hemori mbo'u ka i Sikemi, anano, dopepateako ira mata mponai. Do'alao i Dina inso a rahano i Sikemi, ka do'amba lumako. 27Ka i'amba mehawe iramo anano i Yako merontuo arataado mia anu mempinepate atuu, ka dompomuruo kota atuu, hangano sinosa'aiomo uaido. 28Bawaano bembe bimba ka sapido, kalidedo ka luwuno anu kongko i larono ka i bungkuno kota atuu domewawao. 29Luwuno kaeano ka luwuno anano ka beineno domentawa ira ka mpomuruo, tewinso luwuno anu hina a luwuno raha.

30I Yako motaeako ira i Simeo ka i Lewi, ”Isolangi akumo mokomosa'oo neeku a mpalilino wita andio, a nto Kana'a ka to Perisi, kahinaano luwuno miaku tedei koa. Tewala ntepo'asa ira me'ewai aku, manasa domenangi aku, ka aku pinepate, ongkue saru luwuno ihino rahaku.” 31Sine sumangki ira, ”Tembio uaito ka iwineweu kana asa beine belesu!”

Currently Selected:

Tegagia 34: XMZ

Highlight

Copy