I YOHANE 16

Mompedato

16:1-4a

1”Luwuno andio Kupauakomiu, ka si mengkodei aroa ka nahi mentarima Aku. 2Komiu meliniahako, tendeano ta hawe tempono nine sompo mia anu mepate komiu ira mpotae nine mpesomba ira ndi Ondae Ue Ala. 3Ira mpoweweu kanandio, hangano nahi domento'orio moiko Ondae i Ama maupo Ongkue. 4aSine luwuno andio Kupauakomiu, ka impewowoloo tewala hawe tempono, nine umariomo Kupauakomiu.”

Anggaa Pontarero

16:4b-15

4b”Mongkona andio nahi Kupauakomiu inso amba-ambano, hangano tempo andio da kongko aku saru omiu, 5sine kanandio-andio Aku lumako ndi Ondae anu tumena Aku, ka nahina maupo te'asa mia i olomiu anu mesikeno ndi Ongkue: Isuake ba Ilako? 6Sine hangano Kupauakomiu mongkona atuu, onaemo pu'uno ka imasusa aroamiu. 7Sine mentee anu Kupauakomiu andio: Mentuduopo ndi omiu, ba Kulako. Hangano tewala nahi Kulako, Pontarero atuu nahi Ira hawe ndi omiu, sine tewala lumako Aku, Aku tumena Ira ndi omiu. 8Ka tewala hawe Ira, Ira mopoto'oriakono ntu'u wawontolino mongkona hala, menteea ka pobitaraa; 9mongkona hala, hangano kongkodo nahi dompe'ala-ala Aku; 10mongkona menteea, hangano Aku lumako ndi Ondae i Ama ka nahi komiu mengkita Aku mbo'u; 11mongkona pobitaraa, hangano anu pabawa i wawontolino andio hinukuomo.

12Da hadio rupa anu asalakono Kupauakomiu, sine kanandio-andio napi komiu mpokotembio. 13Sine tewala hawe Ira, onaemo Penaa Menteea, Ondae Ira wawa komiu a luwuno menteea; hangano nahi Ira mepau inso a mpo'ehe-Do Ondae-Do, sine luwuakoano anu rinonge-Do onaemo anu Ira pauo ka Ira paleleakomiu luwuno anu ta hawe. 14Ira mokomaramba Aku, hangano Ira paleleakomiu hapa anu tinarima-Do inso ndi Ongkue. 15Luwuakoano anu ndi Ondae i Ama, Ongkue me'ueo; onaemo pu'uno ka Kupotae: Ira paleleakomiu hapa anu tinarima-Do inso ndi Ongkue.”

Masusaa anu mese'elungio poponangia

16:16-33

16”Saraimo koa ka nami komiu mengkita Aku mbo'u ka saraimo koa mbo'u ka komiu mengkita Aku.” 17Rumongeo atuu ba opia ira inso a ana guru-Do mpepau-pau pada ondaedo, ”Hapake pengkonaano Dopepau ndi ontae: Saraimo koa ka nami komiu mengkita Aku ka saraimo koa mbo'u ka komiu mengkita Aku? Ka: Aku lumako ndi Ondae i Ama?” 18Onaemo ka dompotae, ”Hapake pengkonaano Dopotae: Saraimo koa? Nahi tomento'orio hapa tinoo-Do.” 19Doto'orio i Yesu, nine hinao anu ira mingki mpesikeno ndi Ondae, ka Do'amba motaeako ira, ”Onaeke impepau-pauako anu pinau-Ku hieno, onaemo: Saraimo koa ka nami imengkita Aku ka saraimo koa mbo'u ka komiu mengkita Aku? 20Kupauakomiu: Menteeano komiu mpengese ka mposabangi, sine wawontolino ta mo'unde; komiu mpompemasusa, sine pompemasusamiu ta bali gagi po'undea. 21Aasa beine mompemasusa tempono ipe'ana, sine umarino me'anaakono anano, nami pewowoloo mbo'u marasaino, hangano mo'unde nine aasa mia hinaomo i wawontolino. 22Kanandio koa mbo'u omiu kanandio-andio i'alukomiu pompemasusa, sine Aku koa kumita komiu mbo'u ka ta mawongko aroamiu ka nahina maupo te'asa mia anu mokorontuo mawongkomiu atuu inso ndi omiu. 23Ka a oleo atuu nahi komiu mpompesikenoako hapa-hapa ndi Ongkue. Kupauakomiu: Menteeano luwuakoano anu inemamiu ndi Ondae i Ama, Ira weeakomiu a nee-Ku. 24Hawe kanandio-andio napi hina maupo te'asa impo'ema a nee-Ku. Impo'emamo ka komiu mentarimao, ka isompomo po'undemiu.

25Luwuno andio Kupauakomiu a mpotundaano. Ta hawe tempono nami Aku mepauakomiu a mpotundaano, sine mepau a manasaano ndi omiu mongkona Ondae i Ama. 26A oleo atuu komiu mpekakai a neeKu. Ka komba Kupauakomiu nine Kupo'emaakomiu ndi Ondae i Ama, 27nde Dopehohawa komiu i Ama, hangano impehohawa Akumo ka mpe'ala-alao nine Ongkue hawe inso ndi Ondae Ue Ala. 28Ongkue aiwa inso ndi Ondae i Ama ka Kuhawe i wawontolino; Kubintao mbo'u wawontolino ka lumako ndi Ondae i Ama.”

29Dompotae ana guru-Do, ”Kitao, kanandio-andio manasa Ipepau ka nami pepau a mpotundaano. 30Kanandio-andio kimento'orio, nine Ito'orio luwuakoano ka siimo dompesikeno mia ndi Omiu. Onaemo pu'uno ka kimpe'ala-alao, nine Omiu hawe inso ndi Ondae Ue Ala.” 31Sumangki Ira i Yesu ndi ondae, ”Mpompe'ala-ala komiumoke kanandio-andio? 32Kitao, hawe tempono, tendeano haweomo, nine mensiniarawo komiu singge mia lumako a mpo'iangano onaeno ka imebinta Aku asa-asa-Ku. Sine komba asa-asa-Ku, hangano Ondae i Ama kumongkomi Aku. 33Luwuno atuu Kupauakomiu, ka impohawe rodoa ndi Ongkue. I wawontolino omiu memarasaiako poweweu nsa'oa, sine impokorosoo aroamiu, Kunangiomo wawontolino.”

Currently Selected:

I YOHANE 16: XMZ

Highlight

Copy