ROMA 13
13
Petenunu a nto poparenta
13:1-7
1Sompo-sompo mia asalakono metuundu a parenta anu i wawono, hangano komba hina to poparenta, anu komba inso ndi Ondae Ue Ala; ka luwuno to poparenta anu hina, Dopakosio Ue Ala. 2Onemo pu'uno ba isema mo'ewai to poparenta, i'ewaio pompakosi-Do Ue Ala ka isema anu weweuo, ta mohawe hukuno. 3Hangano tewala asa mia moweweu moiko, siimo idoito a nto poparenta, sangkadio onae moweweu anu mosa'o. Mebehe komiuke mentuwu nahi medoito a nto poparenta? Impoweweumo anu moiko ka komiu mpohawe po'unde-unde inso ndi onae.
4Hangano to poparenta onaemo tetenaa-Do Ue Ala tiano moikomiu. Sine tewala moweweuko mosa'o, doitoakonomo, hangano hapamo koa tuduno to poparenta ka dompotampi ponai. To poparenta onaemo tetenaa-Do Ue Ala mombaloakono tekuda-Do Ue Ala ndi ondae anu mpoweweu mosa'o. 5Onaemo pu'uno ka tomenagio po'eheno koroi, komba butu hangano pontekudaako-Do Ue Ala, sine hangano koa mbo'u pompauno aroato.
6 #
Mat. 22:21; Mrk. 12:17; Luk. 20:25 Onae koa mbo'u pu'uno ka impo'owahi sima'ulu. Hangano ondae anu me'anggao mongkona atuu onaemo anu mpo'anggaako Ira Ue Ala. 7Ime'owahiomo a luwuno mia hapa anu asalakono komiu me'owahio: sima'ulu a mia anu tekona montarima sima'ulu, sima'ulu susua a mia anu tekona montarima sima'ulu susua; imedoito a mia anu tekona idinoitoako ka impelangkaio mia anu tekona ipinelangkai.
Pompehohawa onaemo te'ihiino songka Taura
13:8-14
8Si mpepasua hapa-hapa maupo ndi semamo koa, sine asalakono ka imambepehohawa. Hangano ba isema mehohawao pe'asa miano, i'ihiiomo songka Taura. 9#Pel. 20:13-15, 17; Ima. 19:18; Win. 5:17-19; 21 Hangano pau-Do: si ponsosabo, si pompepate, si ponako, si mosisiri ka pau-Do mehano maupo anu isua, teporokoomo a mpau-Do andio, onaemo: Pehohawaomo pe'asa miamu kana koroimu omuemu!
10Pompehohawa nahi poweweu mosa'o a mpe'asa miano, hangano atuu pompehohawa onaemo ihiino songka Taura. 11Mongkona andio asalakono ka imeweweuo, hangano imento'orio tempo kanandio-andio, onaemo nine haweomo tempono ka impewangu umari mpoturi. Hangano kanandio-andio tekaduduiato rangkuomo susua sekonopo tempono tomegagi mpompe'ala-ala.
12Tehineomo wongi, tamo ronga meene. Onaemo pu'uno aiwamo ka tomebintao luwuno wineweu wongi-wongia ka tompokonao parewa mpetea mewine! 13Aiwamo tomentuwu mponto'ori gau, kana tempono meene, komba a mpogawea nahina sa'uno ka memolangu, komba a mpebelesua ka montonda po'eheno aroa, komba a nteposisalaa ka mengkohili. 14Sine impokogagi Iramo Ue Yesu Kerisituu gagi pepatinda parewa mpetea mewine ka si mpekariao koroimiu ka impotendeo po'eheno.
Currently Selected:
ROMA 13: XMZ
Highlight
Share
Copy
Want to have your highlights saved across all your devices? Sign up or sign in
LAI 2021