ROMA 6
6
Mate ka mewangu saru Ondae i Kerisituu
6:1-14
1Tewala kanandio, hapake kita mpopau? Moiko koake tompo'iamo koa a laro hala, ka ikoteti-tetiangino pompehohawa atuu? 2Naahi ntu'u! Kombake memate kitamo a hala, kana'umpeke ka da kita mpokotuwu i larono? 3Ke nahi imento'orioke, nine luwuto anu mebinaho kitamo ndi Ondae i Kerisituu, mebinaho kitamo a mate-Do? 4#Kol. 2:12 Hangano kanandio mengkinaburu kitamo meronga saru Ondae hangano pebahoa a matea, ka ipengkena kana Dowinangu i Kerisituu inso i olodo mia mate hangano maramba-Do i Ama, kanandio koa mbo'u ontae kita mentuwu a laro ntuwua anu wo'ohu.
5Hangano tewala ntepe'asa kitamo saru hapa anu mengkena saru mate-Do, kita koa mbo'u ntepe'asa saru hapa anu mengkena saru pewangu-Do. 6Hangano tomento'orio, nine mia laanoto pinasoomo a ngkeu pinotamba, ka itetadi pabawano koroi ntehalato, ka si tontepe'ata mbo'u a hala. 7Hangano isema anu mateomo, tolaomo inso a hala. 8Gagi tewala memate kitamo saru Ondae i Kerisituu, tompe'ala-alao, nine kita koa mentuwu mbo'u saru Ondae. 9Hangano tomento'orio, nine Ondae i Kerisituu, umari-Do mewangu inso i olodo mia mate, nami Domate mbo'u: matea nami pabawai Ira mbo'u. 10Hangano mate-Do onaemo matea a hala, pohona ka ranta nahina tampulaano, ka tuwu-Do onaemo tuwua ndi Ondae Ue Ala. 11Kanandiomo ba imengkitao: nine imemateakonomo hala, sine mentuwu komiu tia-Do Ue Ala ndi Ondae i Kerisituu Yesu.
12Onaemo pu'uno siimo ipabawa mbo'u hala a ngkoroimiu anu ta mate, ka si mentondao mbo'u po'eheno. 13Ka si mpeweengakono luwuno parewa ngkoroimiu a hala ka ipinake gagi parewa poweweu mosa'oa, sine impeweengakonomo koroimiu ndi Ondae Ue Ala kana mia anu i ndi'upua mate, sine anu kanandio-andio tuwu. Ka ipeweengakonomo luwuno parewa ngkoroimiu ndi Ondae Ue Ala ka igagi parewa menteea. 14Nde nami ta pabawai komiu mbo'u hala, hangano omiu komba mpo'ia i totono songka Taura, sine i totono pompohohawa.
Orua rupa te'ataa
6:15-23
15Gaagi kana'umpe? Nde kita mpoweweu halake, hangano nahi tompo'ia i totono songka Taura, sine i totono pompehohawa? Naahi ntu'u! 16Nde nahi imento'orioke, nine tewala impeweengakono koroimiu a asa mia gagi ata ka impetenunuio, omiumo atano mia atuu, anu asalakono impetenunuio, moiko a hala anu wawa komiu a matea, maupo a mpetenunu anu wawa komiu a menteea? 17Sine pontarimakasimo ndi Ondae Ue Ala! I ndi'upua omiu lano atano hala, sine kanandio-andio mpetenunu komiumo tompaano aroamiu a pompaguru anu pinotilaloakoomo ndi omiu. 18Mempinokomaradeka komiumo inso a hala ka imegagi atano menteea. 19Kupauo mongkona andio a mpinewowolono mia hangano molemamiu. Hangano mengkena kana omiu impeweengakonomo luwuno parewa ngkoroimiu gagi atano mokoburua ka buuntoa anu wawa komiu a buuntoa, kanandiomo teweweumiu kanandio-andio asalakono impeweengakono parewano koroimiu gagi atano menteea anu wawa komiu a pompokomemporia.
20Hangano tempono inte'ata a hala, mentola komiu inso a menteea. 21Ka wua hapake anu inopumiu inso ndi onae? Luwuno atuu weweu komiu memokoko'ii kanandio-andio, hangano poko'ariano luwuno atuu onaemo matea. 22Sine kanandio-andio, umarimiu mempinokomaradeka inso a hala ka mansamiu megagi tetenaa-Do Ue Ala, mpohawe komiu wua anu wawa komiu a pompokomemporia ka gagi poko'ariano onaemo tuwua anu nahina tampulaano. 23Hangano tambono hala onaemo matea; sine pompehohawa-Do Ue Ala onaemo tuwua anu nahina tampulaano ndi Ondae i Kerisituu Yesu, Ueto.
Currently Selected:
ROMA 6: XMZ
Highlight
Share
Copy
Want to have your highlights saved across all your devices? Sign up or sign in
LAI 2021
