Lukas 4
4
At Iblis en Yesus ede ʼgagaligoluk eʼbek waga laga wene
(Matius 4:1-11; Markus 1:12-13)
1At Yesus ik Yordan ik olomu ʼbelakpesimu re, Allah Arogun ogola ʼbetesogo ʼgwegeimu liplau wagarik lasumu, at Allah Arogun en ebe woluk e, o leimu aphwami erlakma eba laga. 2Labarik eba oruakma agauwa 40 Iblis en ede ʼgagaligoluk eʼbek waga laga. Wago modok oruakhwe, agauwa 40 eria soʼboru modok no erlak welagarikmu no oluk e, soʼboru modok nele agama, 3pobuk at Iblis eʼbek wagarik e, disogo moʼgulesi,
“Hat demat Allah omlogo holuk e, helep yema soʼboru roti ʼgelaʼge emagoluk moʼgulemin o,” oluk moʼgulesimu, 4at Yesus en e, disogo moʼgulesi,
“Allah en e,
Aphwami soʼboru nak noʼgwi holuk e,
enelaluk modok welagai erlak o, (Ulangan 8:3)
oluk egeimu pelal wokho pegesema oruak o,” oluk moʼgulesi. 5Asogo moʼgulesimu, pobuk Iblis en Yesus woluk e, erabu pei ligagarik e, eba en o ʼgwiangma di owi yu owi ʼgain ononuk logo aʼge welagai oʼgwe ʼberlegat yegelogo selakma poluk mesik erlige il yethouwagoluk moʼgulesi. 6Moʼguleselat e, disogo moʼgulesi,
“Is ʼgaindek ononuk logo aʼge welagaimu eniak hologo welat erligonobogwi ai ʼberlegat an eiye welemagoluk woknegisema re, an nede ebetholuk,
Ap ai wogeik, oluk wogentasu legirikmu re, 7hat hodogorlu pam neragam hutla ʼgu woroguntik erliknobogun holuk e, ʼberlegat hat eiye wolorogun en e, wokheik o,” oluk moʼgulesi, 8at Yesus en e, disogo moʼgulesimu,
“Allah en eselat e,
His en e, henaik Allah ʼgain Nonuk Logo aʼge anat hodogorlu pam neragam hutla ʼgu oroguptik erliknobogulat e,
an nebaget nak togu lemis o, (Ulangan 6:13)
oluk egeimu pelal wokho pegesema oruak o,”
oluk asogo moʼgulesimu re, 9-11pobuk Iblis en Yesus woluk e, o Yerusalem lagarik e, Yesus ebe o Allah owi dum yatsogo werik aʼge pam woluk ligagarik e, disogo moʼgulesi,
“At Allah en e,
An nosi malaikat yoʼgo ʼbelabonobou waga legi aʼge ebano en tenhiarok welemagoluk yoʼgo enebaik o,
oluk egeimu oruak o. Ye, agaikhen disogo egeimu oruak.
Hat hoyuk helep pam dungsogo wathwerlagunno oluk, is malaikat ai eneʼgik delakma wokhobua o, (Mazmur 91:11-12)
oluk pelal wogo oruagat epegi. Holuk e, hat demat Allah omlogo holuk e, ya en ʼgolokho orogobu ʼbi lak da,” oluk moʼgulesimu, 12at Yesus en e, disogo moʼgulesi,
“Allah en eselat e,
His en, an nebaget,
Nenaik ʼgain Onuk Logo aʼge anni oruak a? Erlak a, oluk, nebabut ʼbalogup no yo, (Ulangan 6:16)
oluk egeimu pelal wokho pegesema oruak o,” oluk moʼgulesi. 13Asogo moʼgulesimu, at Iblis en Yesus ebabut ʼbaligoluk di walhasulat, yu walhasulat, til laga aʼge mia agama re, pobuk moʼgulosokhwe elit ema hwi a, oluk, ukpoluk ʼbok laga.
At Yesus togolik o Galilea orlu aga wene
(Matius 4:12-17; Markus 1:14-15)
14At Iblis ano arat ʼbok lagama en e, at Yesus Allah Arogun annisogo ogola oruakma re, togolik o Galilea doʼgo orlu aga. Orlu agama re, at obok o eba modok saga egei. 15Asogo saga osokhwe, at ebe eba welat, o seʼban ogwiʼgwe ʼgoluk wene moʼgulentasukhwe aphwami eba aʼge ʼberlek en erliktogu legesa.
Aphwami o Nazaret aʼge onogola en, Yesus mi-miarak pegesa wene
(Matius 13:53-58; Markus 6:1-6)
16Asogo erliktugukhwe re, at Yesus o Nazaret ebe arlue agama ebano laga. Lagarik e, at taga laga ʼgelaʼgeat, agauwa sabit aʼge pam Allah paget weat welat, seʼban uogoluk o aphwami Yahudi aʼge seʼban ogumu ebano ʼgwegeitik e, Allah iak pelal wogo aʼge onuk tualiselat moʼgulentaigoluk inaga. 17Inagama re, ap mesik Allah iak ap Yesaya en pelal wogo pesi aʼge ano Yesus wogosi. Wogesimu hebilogo il ʼgwelakhesi ʼgal e, wene disogo egei aʼge pelal wokho oruakma onuk tualogo moʼgulentesi,
18“Is aphwami enaʼge modok erlak aʼge enerlagaik aʼge ai op wene yu moʼgulentasu lemagoluk ediknebesimu no oluk e,
naik ʼgain Onuk Logo aʼge Arogun ʼbelakpou wagama an nebam louktak oruak o. Ye, yoʼgo nebasulat e, disogo moʼgulnesi,
Is aphwami eneʼgik herle werak aʼge herle hebilonobu wene emin,
enil hopnik aʼge dek uagoluk obabonobu wene emin, moʼgulentasulat,
is aphwami eneragam ʼgelaʼge sebelogo onobogwi aʼge delogo enematekma enebasulat,
19nenaik ʼgain Onuk Logo aʼge en obapnonobua aʼge arat horok lau waga o, oluk moʼgulentasulat, taga lomup, oluk peraknobou wagama wegi ai o,” (Yesaya 61:1-2)
oluk egeimu, pelal wogo aʼge ano onuk tualiselat moʼgulentesi.
20Arat moʼgulontoluk pelal wogo aʼge ano eʼgirlogo re, ap eiye aʼge ano wogotluk e, ebe huraga. Huragama is aphwami ʼberlegat seʼban uogoluk emin ʼgwigisa aʼge ebano enil at ebam modok puttak pegesa. 21Asogo puttak oruakma, at Yesus en e,
“Allah iak pelal wogo yu pam,
Disogo tul, oluk egesa aʼge ano yogodak moʼgulhentasuam e, henesaʼgo holugukhwe yayat emin hegit aga o,” oluk egeimu, 22is aphwami ebano en e, disogo egesa,
“Ap yu ap Yusuf omlogo ano erlak no? Arat o. Aʼgeat de, at en wene op modok moʼgulnentesi ai nonogorlok o,” oluk erliktigisa. 23Asogo erliktigisema, at Yesus en e, disogo moʼgulentesi,
“Is aphwami en, nin hwedik nan hwedik ʼban yeng hogulat e,
Hat hebe ap dokter ʼgelaʼge eba re, hebam ou ai huʼgwarek en obaphwerlagunmu re, oluk ogwi aʼgeat de, his en lagaksogo an moʼgulnorogup hegi. Asogo moʼgulnoroguptik e,
O Kapernaum en taga legen aʼge hologu lege ano ʼgelaʼge, yogodak huʼgwarek howi pam yema en ogo, asogoat mesik tin o, oluk, moʼgulnomogoluk ogu legep hegi o,” oluk asogo moʼgulontoluk mesik disogo moʼgulentesi,
24“Is ap Allah iak moʼgulontogwi aʼge ai re, onuʼgwarek onowi pam eba onuelak enarilak en hau doʼgoksogo wogonobogwi erlak o, oluk, demat moʼgulhentegis. 25Ye, ap Elia welaga eria hegit e, moru wago erlak 3 tahun agarik e, pobuk lagaksogo dugwi hebarligen pollegeimu re, o eba da ya soʼboru modok obuk aga. Eria hegit e, aphwami Israel aʼge oruakma hwami sugwe aʼbik welegesa aʼgeat de, 26Allah en Elia hwami sugwe aʼge eba logon entai louwagoluk eneʼbek perakpo erlak o. We, hwe sugwe aʼge mesigat aʼge o wema Sidon seli onuk Sarfat eba oruakma eʼbek perakpesi o. 27Ye, ap Elisa en Allah iak moʼgulentasu laga eria hegit e, o aphwami Israel aʼge oruakma eba ou hwenaʼgo ʼgelaʼge ano aʼge aʼbik welegesa aʼgeat de, mesik obabenebise laga modok erlak. We, ap Naman owi o Siria aʼge aiat obaptegei o, oluk, demat moʼgulhentegis,” oluk asogo moʼgulentesimu re, 28is Yahudi aʼge seʼban ogumu welegesa aʼge enesaʼgo hweligisarik e, onolot het aʼbik aga. 29Onolot het aʼbik agarik, enebe inegesarik, at ebe eneʼgik tenakho odipmu lebikpoluk e, o Nazaret eragam de, duk pam werigisema ebano woluk ligegesarik, pelaʼgogo ʼbule ʼbelabuogoluk tigisa. 30Asogo tigisa aʼgeat de, at Yesus is ebano ugonoboluk eneʼgerlakma en niagup-hiagup aʼge toluk laga.
At Yesus en ap mesik muʼgat ebabut wiak aʼge ogola ʼgwegei aʼge henokho lebikpesi wene
(Markus 1:21-28)
31Eneʼgerlakma en niagup-hiagup aʼge libagarik e, o Galilea doʼgo kota onuk Kapernaum ʼgwegei. ʼGwegeitik e, agauwa sabit aʼge pam Allah paget weat welat, wene moʼgulentesi. 32Moʼgulentasulat, wene ebe eiye aʼge en ogwi ʼgelaʼge osoma is ebano en e,
“Nonogorlok e!” oluk erliktogu legesa. 33O seʼban ogumu ebano oruakma, ap mesik muʼgat ebabut wiak aʼge ogola ʼgwegeimu welat iak loksogoat disogo moʼgulesi,
34“Yesus Nazaret aʼge yu a! Hat en noʼgosogo taknenebaigoluk wegen! Nis wiagapnenebigoluk wegen a? Hat hebe re, Allah uʼgwarek paget edikhebesirik perakhobou wagama wegen ai, an en pobi hebegisat o,” oluk iak loksogo moʼgulesimu, 35at Yesus en wene yageselat e,
“Hiak. Ap yu ogola en henokho libemen o,” oluk moʼgulesimu re, muʼgat ebabut wiak aʼge ano en ap ano ebe erleʼgalogo aphwami aʼbik ebano eneʼgerlakma hwikhai lagama re, ap ebe wiagap tu erlakma re, we libaga. 36Asogo libagokhwe re, aphwami aʼbik ebano onogorlok egesarik e, is-is nak ogulat e, disogo egesa,
“At iak oso ai noʼgorak. At en muʼgat enebabut wiak aʼge,
Libemis, oluk u ai eiyeat welat, iak annisogo wene yagentasuam libagai ai nonogorlok e,” oluk erliktigisa. 37Asogo erliktigisarik, at Yesus obok ʼbaksogo o da ya eba woluk libegesa.
At Yesus en Simon iemalhwe emin, aphwami pema emin, ou obabenebegei wene
(Matius 8:14-17; Markus 1:29-34)
38Asogo obok woluk libegesema, at Yesus o seʼban ogumu ebano ukpoluk e, ap Simon owi pam laga. Lagama, at Simon ai iemalhwe ou ebam aganhan aʼbik oruakma Yesus en obap tuagoluk yoʼgo pegesema, 39at en, hwe ano eragam lagarik edik welat e,
“Ou yu erlak emen o,” oluk, moʼgulosokhwe erianoat, ou ano erlak aga. Erlak agama, hwe ano inagarik e, is lerentasu laga.
40Lerentasu oruakma, o mo il obuk osokhwe, aphwami en is pema enebam di ou yu ou oruak aʼge ʼberlegat wogonoboluk Yesus eʼbek wegesema, at en enebe loʼbok eʼgik tenentil lagarik obabenebegei. 41Asogo obabenebegeimu, is pema akhit enebe logolagat, muʼgat enebabut wiak aʼge onogola ʼgoluk welegesa aʼge en disogo moʼgulegisa,
“Allah omlogo harat o,” oluk eniak ngai il il libegesa aʼgeat de, is onogola en e,
“Kristus Allah en, delnonobuagoluk edikpesirik perakpou weik egei ano ebe yuat o,” oluk, enalukmu re, Yesus en eniak erlagat libemagoluk wene yagentesi.
At Yesus en o seli loʼbok wene moʼgulentil laga wene
(Markus 1:35-39)
42Asogo yagentesirik e, nogo oluk hubet o arat dakha egeimu re, at Yesus o aphwami erlakma eba laga. Lagama, aphwami modok aʼbik, at heratil legesarik ebe arat emin sarlok tigisarik e, wema louwano oluk e, eneʼgik tenak pegesa. 43Tenak pegesema, at Yesus en e,
“Op wene Allah eragam enebasu aʼge wene ano o seli pema akhit eba eminat moʼgulentil denaga lemagoluk peraknobou wagama wegirikmu re, an o ebayat moʼgulentil nese leik o,” oluk moʼgulentesi. 44Asogo moʼgulontoluk e, o Yudea doʼgo aphwami Yahudi aʼge seʼban ogumu ebano ʼgwegeitik, wene ano moʼgulentasu laga.
Currently Selected:
Lukas 4: WUL
Highlight
Share
Copy
Want to have your highlights saved across all your devices? Sign up or sign in
