Matius 22
22
“Ap mesik hwe wogugulat seni naumagoluk yoʼgo enebesi,” oluk ebam elitsogo moʼgulentesi wene
(Lukas 14:15-24)
1At Yesus ebe tenak po erlakma en, ukpegesema re, pobuk at en wene mesik ebam elitsogo aphwami ebano disogo moʼgulentesi,
2“At Allah en eragam enebasumu eba emin hegit e, ap ʼgain onuk logo aʼge mesik omlogo ugwe wogogulat e, seni serigisa ʼgelaʼgeat o. 3Seni sorogulat aphwami yoʼgo enebesi aʼge naumagoluk, at eragam aʼge logon disogo moʼgulentesi,
Aphwami yoʼgo enebegi ebano wemagoluk wogenebi lit o, oluk, moʼgulentesi aʼgeat de, is yoʼgo enebesi aʼge ebano wom enebit en wom erlak mo egesa. 4Wom erlak mo egesema re, pobuk at eragam aʼge logon disogo moʼgulentesi,
Aphwami yoʼgo enebegi aʼge ebano wemagoluk wogenebi lit o. Laguptik e,
Nonue en e, disogo egei oluk ip o,
Wam sapi ugwaʼbuk aʼge emin, sapi emalik ebe op aʼge emin, modok perlengsogo wusogo arat sogo pegirik e, di aʼge yu aʼge ʼberleksogo degelogo pegirik arat no hegit aga o. Holuk e, wemagoluk moʼgulentai lit o, oluk egeimu wege o, oluk peragenebesimu legesa. 5Legesa aʼgeat de, is yoʼgo enebesi aʼge ebano enede ʼbuk-ʼbuk legesarik e, at agaikhen iabuk oʼgwe ʼbok lasukhwe, at agaikhen di aʼge yu aʼge oʼgo ʼbaligoluk lasukhwe, 6is nin pema re, at ʼgain aʼge en eragam aʼge yoʼgo peragenebesi aʼge ebano enebe tenagonoboluk ʼgoʼbu warenebegisarik e, enebe modogat ʼbeʼgi waronobogulat, tigisa. 7Asogo tigisema re, at ap ʼgain onuk logo aʼge ano esaʼgo hwelegeitik e, olot het aʼbik agarik osi tentara aʼge peragenebesimu legesarik, at ap ʼgain eragam aʼge warenebegisa aʼge ebano enebe modok wusogo hwigontogulat, onowi werik aʼge kota ebano modok wi tigisa. 8Arat asogo tigisema re, at ap ʼgain onuk logo aʼge ano en eragam aʼge ebano disogo moʼgulentesi,
Seni arat onlogotma seregis aʼgeat de, is aphwami yoʼgo enebegi aʼge ebano nuam sogo pobuk nouwa modok erlak. Nebit o. 9Holuk e, his ebela lok aʼge adugalma eba loluk oruakma, aphwami muon lagai holuk,
Seni sogo na louwok o, oluk, yoʼgo enebemen o, oluk moʼgulentesimu re, 10is eragam aʼge ebano pobuk ebela lok aʼge adugalma eba legesarik oruakma, aphwami enebabut wiak aʼge, op aʼge, lagaimu re, enemin sarlok tigisa aʼge ʼberlegat yoʼgo onobogwiam wegesema re, o pam enebe modok ʼbete egei. 11Arat ʼbetesogo ʼgwigisema re, at ap ʼgain onuk logo aʼge ano il entaigoluk o pam ʼgwegei ʼgal e, ap mesik nak e, sum hwami wogonobogulat seni sogo nouwogoluk ʼbuktogwi aʼge ʼbuktak erlak oruakma il yethesirik e, disogo moʼgulesi,
12Eige, not! Hat e, sum hwami wogonobogulat seni sogo nouwogoluk ʼbuktogwi aʼge ai, ʼbuktak erlak ʼgu egen yema re! ʼGesogo oluk ʼgu egen, oluk moʼgulesi aʼgeat de, ap ano en iak modok u erlak mo egei. 13Iak modok u erlak mo egeimu re, at ap ʼgain onuk logo aʼge ano en eragam aʼge ebano disogo moʼgulentesi,
Ap ai eʼgik oyuk modok herle wusogo re, oʼborlma eniak ʼgerlit marogulat nge togwi modok welagaimu o modok hiktakma eba lebigenebemit o, oluk moʼgulentesi. 14Ai ʼgelaʼge, Allah en aphwami enebe modok aʼbik yoʼgo enebasu aʼgeat de, enebe wei nak en e, pebisogo onobouwa o,” oluk moʼgulentesi.
“Uang pemerintah paget ʼgonu ogwiam, wogonto a? Erlak a,” oluk hin Yesus ebam wegesa wene
(Markus 12:13-17; Lukas 20:20-26)
15Pobuk e, is ap Farisi aʼge en,
“Nis Yesus il walsogo wene ebam hin wogwiam iak ua ano pam wene eʼgen poluk wene ebam pouwok o,” oluk obok ʼbalugu legesa. 16Obok ʼbalugu legesarik e, ap is onosi eniak wogu legesa aʼge emin, is ap Herodes oruak oʼgwe aʼge emin, Yesus ebam wene hin wouwagoluk peragonobou wegesema is ai wegesarik e, disogo moʼgulegisa,
“Yesus nue. Hat hebabut e, wene demat nak eselat, Allah ogola en,
Aphwami asogo togu lemak, oluk epasu aʼge demat moʼgulnentasu legen ai nis nenalugat o. Aphwami enebe hogorlok erlak welat onorogole pam nak yerontoluk e, logon holukhwema enebasulat, logon hoʼborlma enebasulat, taga legen erlak hiogu lege. 17Holuk e, hat hede ʼgesogo epegen. Nis Yahudi aʼge togwi hegitsogo re, uang pemerintah paget ʼgain onuk logo aʼge Kaisar wogomok a? Erlak a,” oluk moʼgulegisema re, 18at Yesus en e, is ap ai enebabut wiak enagat ʼbalegeitik e,
“His henagap pam nak e, op ʼgelaʼge welat, henede ʼbiren aʼge yema re! Nopaget nebabut ʼbaluogoluk togu legep. 19Uang pemerintah paget po aʼge ano nil haik en onukniemit da,” oluk egeimu uang ano mesik wogegisema re, 20at en e,
“Yu sa ebe orogole heleʼgik aʼge pam onuk pelal wogo oruak,” oluk moʼgulentesimu, 21is en e,
“Yu Kaisar at o,” oluk moʼgulegisema, at Yesus en e,
“Kaisar en aʼge holuk e, Kaisar at wogogulat, Allah en aʼge holuk e, Allah yat wogugulat, togu lomup o,” oluk, moʼgulentesimu re, 22is ebano enesaʼgo hweligisarik e,
“Eige! Nonogorlok o,” oluk, erliktoluk e, Yesus ukpoluk o momu legesa.
Ap Saduki aʼge en, aphwami warotluk enelaluk om paget Yesus ebam hin wegesa wene
(Markus 12:18-27; Lukas 20:27-40)
23Is ebano arat legesema re, o ai erligeat, is ap Saduki aʼge en,
“Aphwami warotluk enelaluk ema modok erlak o,” oluk ogwi aʼge logon Yesus eʼbek wegesarik e, disogo moʼgulegisa,
24“Nue. At Musa en disogo oluk moʼgulnentesi,
Ap mesik eiyagai owan dagonobu erlakma en ebe warago holuk e, ebalema malik mesik dagonobuagoluk, hwe sugwe ai ap ai orat wo yo, (Ulangan 25:5-6)
oluk moʼgulnentesi. 25Asogo egeimu oruakma re, nis oruakma yema ap enebe sabiren enaik mesigat en dogo welegesa. Welat e, onue naduk aʼge ai ugwe wesirik eiyagai dagonobu erlakma en, waragama ot eʼberlik aʼge ai en,
Hwe yu nue en sugwe an noboluk laga aʼge, oluk, wesi. 26Wesi aʼgeat de, at ai eiyagai dagonobu erlagat waraga. Pobuk hwe sugwe aʼge ano onot eneʼberlik aʼge ai en wesi aʼge re, asogoat eiyagai dagonobu erlakma en waragayat. Enebe sabiren ebano eneiyagai dagonobu erlakma en waretil legesa nak. 27Asogo waregesarikmu en, pobuk hwe ano ebe warat aga. 28Holuk e, is ap enebe sabiren eria re, hwe mesigat aʼge ai wil wegesarikmu re, pobuk Allah en aphwami werak aʼge enelalugabonobua ai erlige re, hwe ai sa ʼgelaʼge ugwe ema epegen,” oluk hin wegesema re, 29at Yesus en e, disogo moʼgulentesi,
“His e, Allah iak pelal wogo ai emin, Allah anni ai emin, heneperlak welat, heniak dagansogo ogu legep aiat o. 30Ye, aphwami werak aʼge Allah en enelalugabonobua ano pam en, hwami wogonobogulat, is pema wogontugulat, togu lema modok erlak o. We, is malaikat ʼbogorl pam aʼge welagai ai ʼgelaʼgeat welema o. 31-32Ye, aphwami warema aʼge Allah en enelalugabonobua ai nak e, at en,
Abraham emin, Ishak emin, Yakub emin, enaik Allah anat o, (Keluaran 3:6)
oluk egeimu, at iak pelal wogo oruak ano onuk moʼgulu erlakma en welegep no? Moʼgulogu legebat o. At Allah re, aphwami werak aʼge enaik puk o. At e, aphwami enelaluk aʼge enaigat o,” oluk moʼgulentesimu re, 33is aphwami aʼbik ebano enesaʼgo hweligisarik e,
“Eige! Nonogorlok e,” oluk erliktigisa.
“Allah en nenesaʼgo weregei aʼge wene logo re, ʼbiren eriayat o,” oluk ap mesik moʼgulesi wene
(Markus 12:28-34; Lukas 10:25-28)
34At Yesus en asogo wene moʼgulentesimu re, aphwami en e,
“Yesus en is ap Saduki aʼge wene moʼgulentesimu, is en oʼgo u mia aga,” oluk egesema re, is ap Farisi aʼge enesaʼgo hweligisarik e, enebe odoktak poluk, 35ap mesik Allah iak moʼgulentasu laga aʼge en, Yesus ebabut ʼbaligoluk ebam hin wasulat e, disogo moʼgulesi,
36“Yesus nue. Wene Allah en nenesaʼgo weregei wene ano, wene ebe logo ʼgelaʼge re, ʼgesogo egei epegen,” oluk moʼgulesimu 37at Yesus en e,
“Wene logo re, at Musa en,
Henede emin, henebabut emin, honogola emin, mesigat oroguptik,
nenaik ʼgain Allah Onuk Logo aʼge ebe aiat henede hwedik welemis o, (Ulangan 6:5)
oluk egei ai, 38wene ebe logo ʼgelaʼge re, aiat o. 39Ye, wene ai emin hegit e, mesik yu,
His honuʼgwarek henebe henede hwedik welegep ai ʼgelaʼge,
is aphwami logon henemin welegep aʼge ai henede hwedik welemis o, (Imamat 19:18)
oluk egei aʼge mesik logo aʼge re, ai o. 40Ye, wene at Allah en,
Disogo tip, asogo tip, oluk nenesaʼgo weregei wene ʼberlek emin, wene is ap Allah iak moʼgulontogu legesa aʼge en egesa wene ʼberlek emin, wene logo re, edip ʼbiren eria pam erlelik oruak o,” oluk moʼgulesi.
“At Kristus ai, ebe sa epegep,” oluk moʼgulentesi wene
(Markus 12:35-37; Lukas 20:41-44)
41At Yesus en asogo moʼgulentesirik e, is ap Farisi aʼge ebano odoktak oruakma, at en enebam hin wasulat e, 42disogo moʼgulentesi,
“His henede en, Kristus Allah en yoʼgo poluk perakpou weik egei ano, ebe sa opogu legep. Ye, eʼba sa en dogoʼgwe aʼge opogu legep,” oluk moʼgulentesimu, is en e,
“At ai Daud en dogoʼgwe aʼge o,” oluk moʼgulegisa. 43Asogo moʼgulegisema, at Yesus en e,
“Holuk e, Allah Arogun en Daud ede ʼgagalegeimu, at en e,
44Allah ʼgain Onuk Logo aʼge en an nue ʼgain Onuk Logo aʼge moʼguleselat e,
Aphwami hat heselei aʼge ebano hoyuk en al ʼbesilogo enebagun en,
an en owan heʼbek onobou wom erlak oruakhwe,
hat an neragam neʼgik ʼbekhit akhit hebe ʼgain hweriogo wolorogun o, (Mazmur 110:1)
oluk Allah en Kristus moʼgulesi, oluk Daud en egei ai re, nopaget egei epegep. 45At Daud uʼgwarek en Kristus ebe paget,
An nue ʼgain Onuk Logo aʼge, egei holuk e, his en e,
Kristus ai Daud en dogoʼgwe aʼge o, oluk, noʼgosogo u epegep. Asogo u mia o,” oluk moʼgulentesimu re, 46is en e, wene oʼgo ʼgesogo u ʼgelaʼgeat agama re, hwerli ai hwerli en e, pobuk aphwami ʼberlegat wene mesik hin wo onogorlok aga.
Currently Selected:
Matius 22: WUL
Highlight
Share
Copy
Want to have your highlights saved across all your devices? Sign up or sign in
