लूका 23

पिलातुसअ जे सामूं येशु

(मत्ती 27:1-2,11-14; मर 15:1-5; यूहन्ना 18:28-38)

1तड॒ऐं सजी॒ यहूदी महासभा उथी ऐं उहे येशुअ खे रोमी राज्यपाल पिलातुसअ डा॒ं वठी वया। 2उते उहे येशुअ ते इंय इल्ज़ामअ हरण लगा॒, “के असां इन मांणूअ खे असां जी जातिअ खे गुमराह कंदे, रोमी महाराजा खे महसूल डि॒यण खां मना कंदे ऐं पांजे पाण खे मसीह, याने राजा चवंदे बु॒धो आहे।#लूका 20:25” 3इन ते पिलातुसअ येशुअ खां पुछो, “छा तूं यहूदिन जो राजा आईं?” येशुअ संदस खे जवाब डि॒नो, “हे त तूं पाण हीं तो चईं।#1 तीमु 6:13” 4तड॒ऐं पिलातुसअ मुख्ययाजकन ऐं भीड़अ खे चयईं, “मां इन मांणूअ में एड़ो कुछ न पातो आहे, के जेंजी वजह सां मां इन खे डो॒ही ठहेरायां।” 5परअ उहे अञा बी ज़ोर भरे करे इंय चवण लगा॒, “के इन सजे॒ यहूदिया क्षेत्रन जे मांणुन खे पांजी सिख्या ड॒ई भड़कायो तईं। इन गलील क्षेत्रन खां शरूआत कई हुई ऐं हाणे हेसताईं पौंतो आहे।” 6इयो बु॒धी पिलातुसअ उनन खां पुछो, “छा हे मांणू गलीली आहे?” 7जड॒ऐं पिलातुसअ खे खबरअ पई त, येशु गलील क्षेत्र जे हाकिम हेरोद अंतीपास जी हदअ जो आहे, तड॒ऐं उन संदस खे उन डा॒ं मोकल्यो ऐं उन वक़्त हेरोद यरूशलेम शहेरअ में हीं हो।#लूका 3:1

हेरोदअ जे सामूं येशु

8हेरोदअ जड॒ऐं येशुअ खे डि॒ठो, त उहो डा॒ढो ख़ुश थ्यो, छोके उहो घणे हीं वक़्तअ खां संदस खे डि॒सण प्यो चाहे। उन येशुअ जी चर्चा बु॒धी हुई ऐं हुन जे तरफां कोई चमत्कार डि॒सण जी आशा प्यो रखे।#लूका 9:9 9सो हेरोद हुन खां घणाहीं सवालअ कंदो रयो परअ येशुअ उन खे कुछ बी जवाब न डि॒नो। 10उते मुख्ययाजकअ ऐं धर्मशास्त्री बी हुन जे पासे में बीठा हुवा; उहे सख़्तीअ सां येशुअ ते डो॒ह हरण लगा॒। 11तड॒ऐं हेरोदअ पांजन सैनिकन सां गड॒ मिली करे येशुअ जी ठठोली करे संदस जी बेइज़ती कयईंस ऐं हुन खे शाही वगो॒ पाराए करे वापस पिलातुसअ डा॒ं मोकले छड॒यईंस। 12उन डी॒ंहं ते हेरोद ऐं पिलातुस पाण में दोस्तअ थी वया। इन खां पहेरयों बि॒नी में दुश्मनी हुई।

येशुअ जे लाए मौतअ जी सज़ा जो हुकुम डि॒यण

(मत्ती 27:15-26; मर 15:6-15; यूहन्ना 18:39; 19:16)

13पिलातुसअ मुख्ययाजकन, यहूदी सरदारन ऐं मांणुन खे सड॒ करायईं, 14ऐं उनन खे चयईं, “तवां इन मांणूअ जे मथां इयो डो॒ह हणी करे मूं वट वठी आया आयो, के हे मांणुन खे भड़काए तो। मां तवां जे सामूं इन जी जांचअ कई आहे; परअ जिन गा॒ल्युन जो डो॒ह तवां इन मांणूअ जे मथां हणी रया आयो उन जे बारे में, मां त इन में कोई बी डो॒ह न पातो आहे, 15ऐं इन जे अलावा हेरोदअ बी इन में कोई डो॒ह न पातो आहे; सो हेरोदअ इन खे मूं वट वापस मोकले छड॒यो आहे। इन एड़ो कोई बी गुनाह न कयो आहे, के इन खे मौतअ जी सज़ा डि॒नी वञे। 16सो मां इन खे खाली कुटाए करे छडे॒ तो डि॒यांस।” 17[पिलातुसअ खे हर साल फसह जे तहेवारअ जे मौके ते पांजी रीतीअ मुजुब मांणुन जी विनतीअ ते कें हिकअ कैदीअ खे रिहा करणो पवंदो हो।]#23:17 जेके यूनानी पत्रियूं मिलियूं आइन, उनन मां कुछ में इयो वचन नथो मिले। 18तैंते सजी॒ भीड़अ रड़यूं करण लगी॒, “त येशुअ खे मारे छड॒यो ऐं असां जे लाए बरअब्बा खे छडे॒ डि॒यो!” 19बरअब्बा उहो मांणू हुयो जेंखे यरूशलेम शहेरअ में कें फ़सादअ ऐं खून करण जे करे जेलअ में विधो वयो हो। 20पिलातुसअ येशुअ खे रिहा करण जी इच्छा सां वरी भीड़अ खे मनाएण जी कोशिश कयईं, 21परअ उहे रड़यूं करे इंय चवण लगा॒, “इन खे क्रूस ते चाढ़यो! इन खे क्रूस ते चाढ़यो!” 22उन खां पो पिलातुसअ टियों दफ़ो भीड़अ खे चयईं, “छो? इन केड़ो गुनाह कयो आहे? मां इन मांणूअ में मौत जी सजा डि॒यण जे लायक कोई डो॒ह न पातो आहे। इन करे मां इन खे कुटाए करे छडे॒ डी॒ंदुम।” 23परअ भीड़अ ज़ोर-ज़ोर सां रड़ियूं करे इंय चवण लगी॒, के येशुअ खे क्रूस ते चाढ़यो! आखिरकार उनन जूं रड़यूं करण सफल थ्यूं। 24तड॒ऐं पिलातुसअ उनन जी गा॒ल मञी वरती ऐं उन खे पूरो करण जो फ़ेसलो कयईं। 25सो पिलातुसअ संदन जी इच्छा ते बरअब्बा खे जेको फ़सादअ ऐं खून करण जे करे जेलअ में हो, उन खे त रिहा करे छड॒यईं परअ उन येशुअ खे भीड़अ जी इच्छा जे मुजुब सैनिकन जे हवाले करे छड॒यईं।

येशुअ खे क्रूस ते चढ़ायो वञण

(मत्ती 27:32-44; मर 15:21-32; यूहन्ना 19:17-27)

26जड॒ऐं सैनिकअ येशुअ खे वठी प्या वञन, तड॒ऐं उनन शमौन नाले जे हिकड़े कुरेनी वासीअ खे पकड़यो, जेको पांजे नगरअ मां यरूशलेम शहेरअ डा॒ं अचे प्यो। सैनिकन शमौन जे मथां क्रूस रखी छड॒यऊं, के उहो येशुअ जे पोयां-पोयां खणी हले।#मत्ती 27:32; मर 15:21

27मांणुन जी वडी॒ भीड़अ उनन जे पोयां-पोयां हली रही हुई। उन भीड़अ में स्त्रीयूं बी हुयूं जेके येशुअ जे लाए रोवन पयूं ऐं अफ़सोस पयूं कन। 28येशुअ मुड़ी करे उनन स्त्रियुन खे चयईं, “हे यरूशलेम जूं धीअरियूं मुंजे लाए न रोओ, परअ पांजे लाए ऐं पांजे बा॒रन जे लाए रोओ। 29छाकाण त उहे डी॒ंहं अची रया आइन जड॒ऐं मांणू चवंदा, ‘धन्य आइन उहे स्त्रीयूं, जेके बेऔलाद आइन; धन्य आइन उहे कोखूं जैं जनम न डि॒नो ऐं धन्य आइन उहे थञअ जैं खीर न प्यारो!#लूका 21:23’ 30उन वक़्त मांणू पहाड़न खे चवंदा, ‘त असां जे मथां किरी पओ’ ऐं पहाड़ियुन खे चवंदा, ‘त असां खे ढके छड॒यो’;#होशे 10:8; प्रका 6:16; 9:6 31छोके अगर उहे मूं जेड़े साहे-ताजे वण#23:31 हिते साहो ताजो वण, येशुअ खे तो डे॒खारे जेंजे अंदर कोई बी पाप कोने। सां इंय ता कन, त तवां जेड़े सुकल वण सां छा-छा न कंदा?#1 पत 4:17”

32सैनिकअ बि॒यन बि॒न मांणुन खे बी येशुअ सां गड॒ मारण जे लाए वठी प्या वञन। उहे ब॒ई मांणू गुनेहगारअ हुवा।

33जड॒ऐं उहे खोपड़ी नाले जी जग॒ऐ ते पौंता, त उते सैनिकन येशुअ खे क्रूस ते चाढ़यऊं ऐं इंय हीं संदन उन बि॒न गुनेहगारन खे बी क्रूस ते चाढ़यऊं, हिकअ खे येशुअ जे साजे॒ पासे ऐं बे॒ खे हुन जे खाबे॒ पासे। 34[येशुअ चयो, “ हे पिता परमेश्वर, इनन खे माफ़ कर, छोके इनन खे खबरअ कोने, के हे छा करे रया आइन।”]#23:34 जेके यूनानी पत्रियूं मिलियूं, उनन में कुछ में इयो वचन नथो मिले।। तड॒ऐं सैनिकन येशुअ जे कपड़न खे पाण में विराए छड॒ण जे लाए चिठियूं विधऊं।#मत्ती 5:44; यशा 53:12; भजन 22:18

35मांणू उते बीह करे इयो सब डि॒सन पया। यहूदी सरदारअ इयो चई करे येशुअ जी ठठोली करण लगा॒,#भजन 22:7 “इन बि॒यन खे बचायो। अगर हे परमेश्वरअ जे तरफां मसीह आहे ऐं हुन जे द्वारा चूंडयल आहे, त हाणे पांजे पाण खे बचाए।#भजन 22:7” 36सैनिकअ बी येशुअ जी ठठोलियूं करण लगा॒ ऐं संदस वट अची करे सस्तो खटो दाखरस डी॒ंदे चयऊंस,#भजन 69:21 37“अगर तूं यहूदिन जो राजा आईं, त पांजे पाण खे बचाए।” 38येशुअ जे क्रूस जे मथां बी लिख्यल हुयो, “हे यहूदिन जो राजा आहे।”

येशुअ खे स्वीकार करण वारो गुनेहगार

39जेके ब॒ गुनेहगारअ येशुअ सां गड॒ क्रूस ते चाढ़या वया हुवा, उनन मां हिकअ ज॒णे हुन जी बेइज़ती करे इंय चयईंस, “तूं मसीह आईं न? त हाणे पांजे पाण खे ऐं असां खे बी बचाए।” 40इन ते बे॒ गुनेहगारअ उन खे दड़का ड॒ई करे चयईंस, “छा तोखे परमेश्वरअ जो डप कोने? तूं बी त सागी॒ सजा ही तो भोगीं॒। 41असां खे जेकी सजा मिली रई आहे उहा वाजिबी आहे, छो त असां जेको कयो आहे, उन जो फ़ल भोगे॒ रया आयूं; परअ येशुअ त कोई बी गुनाह न कयो तईं।” 42तड॒ऐं उन येशुअ खे चयो, “हे येशु, जड॒ऐं तूं पांजे राज॒अ में अचीं, त मुखे याद कजैं।#मत्ती 16:28” 43तैंते येशुअ उन खे चयईंस, “मां तोखे सच तो चवां तूं अज॒ ही स्वर्ग॒लोकअ में मुसां गड॒ हुंदे।”

येशुअ जी मौत

(मत्ती 27:45-56; मर 15:33-41; यूहन्ना 19:28-30)

44इयो लगभग मंझंद जो वक़्त हो ऐं उन वक़्तअ खां वठी करे टीं बजे ताईं सजे॒ मुल्कअ में ऊंदए छायल रही।#आमो 8:9 45सिजअ जी रोशनी हली वई। ऐं मंदरअ जो परदो#निर्ग 26:31-33 विचअ मां फाटी करे ब॒ टुकड़ा थी वयो। 46येशुअ वडे॒ आवाज़अ सां पुकारे करे चयईं, “हे पिता परमेश्वर, मां पांजी आत्मा खे तुंजे हथन में तो सौप्या”,#भजन 31:5 एतरो चई करे हुन पांजो साह छडे॒ डि॒नईं।#प्रेरि 7:59; भजन 31:5 47रोमी सूबेदार जेको उते बीठो हुयो जड॒ऐं उन इयो सब डि॒ठो, त उहो परमेश्वरअ जी स्तुति करे इंय चवण लगो॒, “बेशक ही, इयो हिक धर्मी मांणू हुयो।” 48डा॒ढा ही मांणू इयो किस्सो डि॒सण जे लाए गड॒ थ्या हुवा। सो उहे इयो सब डि॒सी करे पांजी छाती पिटींदे घर डा॒ं मोटी वया। 49परअ उहे सबही ज॒णा जेके येशुअ खे जाती तोर ते सुञाणींदा हुवा, जेमें उहे स्त्रीयूं बी शामिल हुयूं जेके गलील क्षेत्रन मां आयूं हुयूं। उहे परयां खां बीह करे इयो सब डि॒सन पयूं।#लूका 8:2; भजन 38:11; 88:8

येशुअ खे क़बरअ में रख्यो वञण

(मत्ती 27:57-61; मर 15:42-47; यूहन्ना 19:38-42)

50उते यूसुफ़ नाले जो हिकड़ो मांणू हुयो जेको यहूदी महासभा जो हिक सदस्य हो। उहो भलो ऐं नेक मांणू हो। 51यूसुफ़अ महासभा जे फैसले ऐं कमन में पांजो मत न डि॒नो। उहो यहूदिया क्षेत्र जे अरिमतिया नगरअ में रवंदो हो ऐं परमेश्वरअ जे राज॒अ जे इंतज़ारअ में हो।#लूका 2:25,38 52उन पिलातुसअ वट वञी करे येशुअ जी लाश घुरयईंस। 53उन लाश खे क्रूस तां हेठ लाथईं ऐं उन खे सोटी कपड़े जे कफ़नअ में वेरे करे हिकअ क़बरअ में रखी छड॒यईं, जेकी चट्टानअ खे कटे करे खोदी वई हुई ऐं जेमें कड॒ऐं केंखे बी न रख्यो वयो हो। 54उहो जुम्मे जो ॾींह हो, मतलब यहूदिन जी तैयारीअ जो ॾींह ऐं सबध शुरू थ्यण वारो हो। 55जेके स्त्रीयूं येशुअ सां गड॒ गलील मां आयूं हुयूं, उनन यूसुफ़अ जे पोयां-पोयां वञी करे क़बरअ खे डि॒ठऊं ऐं इयो बी, के कीअं येशुअ जी लाश खे उन में रख्यो वयो आहे। 56इन खां पो उहे मोटी करे वापस शहेरअ में आयूं ऐं लाश ते हरण जे लाए ख़ुशबूदार शयूं ऐं अत्‍तुर तैयार कयऊं। तड॒ऐं उनन नियमअ जे मुताबिक सबधअ जे डी॒ंहं ते आराम कयऊं।#निर्ग 20:10; व्य 5:14

Currently Selected:

लूका 23: SND

Highlight

Copy