Lucas 10

Itacatic batel ta xcholel sc'op Dios lajchab xchanvinic (72) viniquetic

1Ts'acal la st'uj lajchab xchanvinic (72) viniquetic li Cajvaltique. Ta chabchab la stacan batel ba'yuc ta jujun lum xchi'uc ta tsobtsobnaetic ti bu snopoj chjelov batel li Cajvaltique.

2Jech laj yalbe scotolic: “Ta melel toj ep li c'aoje; ja' mu'yuc ep li boch'o tsc'ajique. Ja' lec c'anbeic Yajval c'aoj ti ac'o stac batel ep jc'aojetic yu'une.#Mt 9.37-38. 3Batanic, vu'un ta jtacoxuc batel ta o'lol oq'uiletic jech chac c'u cha'al chijetic.#Mt 10.16. 4Mu me xavich' batel anuti'ic, me yavil ataq'uinic, me axonobic. Mu me boch'o xalo'ilaj achi'uquic ta be.#Mt 10.7-14; Mr 6.8-11; Lc 9.3-5. 5C'alal chac'otic ta jun nae, ba'yuc jech xavalbeic: ‘Junuc avo'nton li' ta anaique’, utic. 6Li boch'o lec cha'ye, tstaic li jun yo'ntonique. Me mu sc'anique, te ta sut batel ta atojolic. 7Li na bu cha'ic'atic ochele te me oyanic o. Mu me xajelilanic li na bu chanaquiique. Ve'anic, uch'anic scotol li c'usi cha'ac'batique, yu'un li jun j'abtele ta persa ta xich' stojol.#1 Co 9.14; 1 Ti 5.18. 8Me oy boch'o chayic'oxuc ochel ta sna c'alal chac'otic ta jun lume, ve'anic li c'usi chayac'boxuque. 9Me oy jchameletique, coltaic. Jech xavalbeic: ‘Li' xa oy ta atojolic li ventainel yu'un Diose’, utic. 10Me oy junuc lum mu xayic'oxuc ochel ta snaique, loc'anic batel ta xoraltic, jech xavalic: 11‘Li spucucal alumalic la jtec'cutique, li' ta jlilincutic comel ta atojolic, yu'un ac'o acuch comel atuquic.#Hch 13.51. Xchi'uc ja' sventa ac'o ana'ic ti jutuc xa muc xvul ta atojolic li ventainel yu'un Diose’, utic comel. 12Chacalboxuc ava'yic. C'alal tsta yorail chich' chapanel li cristianoetique, ja' jutuc stojol smul ta xich'ic li cristianoetic te ta Sodoma#Gn 19.24-28; Mt 10.15; 11.24. ta vo'onee. Ja' tsots tstoj smulic li cristianoetic ta lum bu mu xayotesoxuque.

Ta ono'ox stoj smul li cristianoetic ti mu xch'unique

(Mt 11.20-24)

13“¡Toj abul aba, lum Corazín! ¡Toj abul aba lum Betsaida! Ti lajuc yilic la jpas sq'uelubil jtsatsal ec li yanlum cristianoetic ta lum Tiro xchi'uc ta lum Sidón#Is 23.1-18; Ez 26.1—28.26; Jl 3.4-8; Am 1.9-10; Zac 9.2-4. jech chac c'u cha'al laj avilic li vo'oxuque, la slapic ch'ixlajan c'u'il sventa at-o'ntonal, xchi'uc la xchotan sbaic ta tantic, la sutes yo'nton yu'un smulic ti jechuque. 14Ja' yu'un c'alal tsta yorail chchapanvan li Diose, vo'oxuc tsots chayac'boxuc atoj amulic; ja' jutuc no'ox tstoj smulic li lum Tiro xchi'uc Sidón ta vo'onee. 15Li vo'ote Capernaum, chanop ti chatoy muyel c'alal ta vinajele, ¡pero c'alal to ta yavil animaetic chajipat yalel!”,#Is 14.13-15. xi li Jesuse.

16Li Jesuse jech laj yalbe li yajchanc'optaque:

—Li boch'o chaya'iboxuc ac'opique ja' vu'un chiya'ibun o jc'op.#Mt 10.40; Mr 9.37; Lc 9.48; Jn 13.20. Li boch'o mu xayich'oxuc ta muq'ue ja' vu'un mu xiyich'un o ta muc'. Li boch'o mu xiyich'un ta muq'ue ja' mu xich'ic o ta muc' li Boch'o la stacun tale —xi li Jesuse.

Isutic batel ta stojol Jesús li lajchab xchanvinique (72)

17Li lajchab xchanvinic (72) itacatic batele xcuxet no'ox yo'ntonic isutic, jech c'ot yalbeic li Jesuse:

—Cajval, vo'ot ta abi ti c'alal ta pucujetic la xch'unbun jmantalcutique —xutic.

18Li Jesuse jech laj yal:

—Ta melel laj quil sjislej yalel tal ta banamil jech chac c'u cha'al sacsevul li banquilal pucuje. 19A'yo ava'yic, laj xa cac'boxuc avu'elic sventa chapech'ic ta teq'uel jti'val chonetic xchi'uc stsequetic,#Sal 91.13. xchi'uc scotol cajcontratic ti toj tsots svu'elique. Me jutuc mu'yuc c'usi xu' yu'un chaspasboxuc. 20Pero mu me ja'uc xcuxet avo'ntonic ti ch'unbil amantalic yu'un li pucujetique. Ja' cuxetuc avo'ntonic ti te xa ts'ibabil abiic ta vinajele —xi li Jesuse.

Ja' ch-ac'bat ya'ibeic smelol Lequil A'yej li boch'otic mu c'usi sna'ique

(Mt 11.25-27; 13.16-17)

21Ta yorail le'e, toj xcuxet yo'nton laj ya'ay ta sventa Ch'ul Espíritu li Jesuse, jech laj yalbe li stote: “Tati, vo'ot Yajvalot li vinajel banamile, colaval ti muc xavac'be ya'yic smelol li boch'otic bijique, xchi'uc li boch'otic lec sna' yalojique. Ja' laj avac'be ya'yic smelol li boch'otic mu'yuc stu ch-ilatique. Tati, lec oy ti jech la sc'an avo'ntone”, xi.

22Li Jesuse lic sc'opan yan velta li cristianoetique, jech laj yal:

—Scotol li c'usitic oye, yac'ojbun ta jc'ob li Jtote.#Jn 3.35. Mu'yuc boch'o sna'bun c'u x'elan co'nton vu'un li Nich'onilune. Ja' no'ox sna' stuc li Jtote. Ja' no'ox jech ec li Jtote mu'yuc boch'o sna'be c'u x'elan yo'nton. Vu'un no'ox jna', xchi'uc ta sna'ic ec li boch'otic ta xcac'be sna'ique#Jn 10.15. —xi li Jesuse.

23Slecoj laj yic' loq'uel li yajchanc'optaque, jech laj yalbe:

—Xcuxet no'ox yo'nton li boch'otic chilic ec li c'usitic chavilique. 24Chacalboxuc ava'yic, oy ep j'alc'opetic xchi'uc muc'tic ajvaliletic tsc'an chilic ec li c'usi chavilique, pero muc xilic. Tsc'an cha'yic ec li c'usi chava'yique, pero muc xa'yic —xut.

Lo'il c'op ta sventa jun samaria vinic

25Te oy jun boch'o lec xchanoj smantal Dios. La sva'an sba, yu'un oy c'usi tsc'an tsjac'be li Jesuse,#Mt 22.35-40; Mr 12.28-34. yu'un tsc'an tsq'uel c'uxi ta xtac'ov. Jech laj yalbe:

—Jchanubtasvanej, ¿c'usi tsc'an ta jpas ti xu' chicuxi o sbatel osile? —xut.

26Itac'ov li Jesuse:

—¿C'usi ts'ibabil ta smantal li Diose, yu'un aq'ueloj xa? —xut.

27Itac'ov li vinique:

—C'ano me ta scotol avo'nton li Dios avu'une, xchi'uc ta scotol ach'ulel, ta scotol atsatsal, xchi'uc ta scotol ajol.#Dt 6.5. C'ano achi'il jech chac c'u cha'al c'ux ta avo'nton abec'tal atuc,#Lv 19.18. xi li smantal Diose —xi li vinique.

28Itac'ov li Jesuse:

—Toj lec latac'ov. Paso jech, jech chacuxi#Lv 18.5. —xut.

29Li vinique mu sc'an tsalel, jech laj yalbe li Jesuse:

—¿Boch'o li jchi'ile? —xut.

30Li Jesuse laj yalbe jun lo'il, jech laj yal:

—Oy jun jchi'iltic iloc' batel ta Jerusalén, ibat ta Jericó. Te itsacat ta be yu'un j'eleq'uetic. Ipojbat scotol li c'usitic oy yu'une, xchi'uc imajat comel. Chamen xa icom yu'unic yilel. 31Ts'acal te iloc' tal jun pale. C'alal laj yil te mochole, la sjoy sbe; ta nom no'ox ijelov batel. 32Ts'acal te iloc' tal jun leví noxtoc. C'alal ivul yo' bu mochol li vinique, la sjoy sbe, jech ta nom no'ox ijelov batel. 33Ts'acal te iloc' tal jun samaria#10.33 Samaria - Q'uelo Glosario. vinic. C'alal laj yil li vinique, toj abul sba laj yil. 34Inoch'aj batel ti bu mochole. La xpoxtabe scotol ti bu tuch'emique. Laj yac'be aceite xchi'uc ya'lel ts'usub; la xpixbe ta poc'. La scajan batel ta sburo; laj yic' batel ta snail vaybal. Te la xchabi. 35Ta yoc'omal c'alal iloc' batele, laj yac'be comel chib denario#10.35 Denario - Q'uelo Glosario. taq'uin li yajval nail vaybale. Jech laj yalbe comel: ‘Chabibun lec li vinique. Me oy to c'usi ep chlaj avu'une, ta jtojbot scotol c'alal me lisut tale’, xut comel. 36Li oxibique ¿boch'o junucal la scuy ta xchi'il li jun vinic ti imajat yu'un j'eleq'uetique? —xi li Jesuse.

37Itac'ov li boch'o lec xchanoj smantal Diose:

—Ja' li boch'o ic'uxubinvane —xi.

Li Jesuse jech laj yal:

—Batan, bat c'uxubinvanan jech ec li vo'ote —xut.

Bat svu'lan Marta xchi'uc María li Jesuse

38C'alal chanovic batel li Jesuse, te i'ochic ta jun tsobtsobnaetic. Te nacal jun ants Marta sbi; laj yic' ochel li Jesuse. 39Li Martae oy smuc, María sbi.#Jn 11.1. Li Mariae te bat chotluc ta sts'el li Jesuse, yu'un tsc'an cha'ibe sc'op. 40Yan li Martae ibat yo'nton yu'un c'usitic tspas. Inoch'aj batel ta stojol li Jesuse, jech laj yalbe:

—Cajval, ¿me mu'yuc abul jba chavil ti jtuc chac' abtejcun li jmuque? Ja' lec albo ac'o tal scoltaun —xut.

41Itac'ov li Jesuse:

—Marta, Marta, ta sventa ti toj ep c'usitic chanop chapase, jech chlo'ilaj avo'nton. 42Pero jun no'ox li c'usi tsots sc'oplale. Li Mariae ja' xa la st'uj li c'usi tsots sc'oplale, jech mu'yuc boch'o xu' chpojbat —xut.

Currently Selected:

Lucas 10: TZE97

Highlight

Copy