Lucas 7
7
Li Jesuse la scoltabe smozo jun banquilal soldado
(Mt 8.5-13)
1C'alal ilaj yo'nton ta sc'opanel cristianoetic li Jesuse, ibat ta lum Capernaum. 2Te nacal ta Capernaum jun banquilal soldado, ip cha'ay smozo. Li smozoe toj lec sc'anoj, pero ta xa xcham. 3C'alal laj ya'ibe sc'oplal Jesús li banquilal soldadoe, la stac batel jayibuc banquilaletic yu'un israeletic, yu'un bat sjac'beic Jesús me ch-abulaj chbat coltabatuc li smozoe. 4C'alal ic'otic ta stojol li Jesuse, c'ot sc'anbeic vocol, jech laj yalbeic:
—Li banquilal soldadoe tsc'an la chbat acolta. 5Yu'un toj lec sc'anoj li jlumaltique, xchi'uc ja' la spas li nail tsobobbail cu'untic li' ta lume —xutic li Jesuse.
6Li Jesuse la xchi'in batel li viniquetique. C'alal jutuc xa sc'an xc'otic ta nae, li banquilal soldadoe la stac tal ta ora jayibuc li boch'otic lec sc'opan sba xchi'uque. Jech laj yalbeic li Jesuse:
—Jech laj yal tal li banquilal soldadoe: ‘Cajval, mu xtal avac' avocol; mu snupin ti vo'ot chach'unbun jmantal chatal ta jnae. 7Mu snupin laj ca'ay noxtoc ti chbat quic'ot tale. Ja' no'ox alo batel amantal ti ac'o coluc li jmozoe. 8Yu'un li vu'une pasbilun no'ox ta mantal ec. Ja' no'ox jech ec quich'oj cabtel ta jpas ta mantal ec li soldadoetique. Batan, me xcut li june, ta xbat cu'un. La', me xcut li yane, ta xtal cu'un. Paso jech, me xcut li jmozoe, ta spas cu'un’, xiyutuncutic tal —xutic c'otel li Jesuse.
9C'alal laj ya'ay li Jesuse, toj labal laj ya'ay. Ijoyij, jech lic yalbe li cristianoetic te xchi'inoje:
—Chacalboxuc ava'yic, mu'yuc to bu jtaoj jech junuc jchi'iltic li' ta Israel ti oy lec xch'unojel yo'ntone —xut.
10C'alal isutic batel li boch'otic itacatic tal yu'un banquilal soldadoe, colem xa c'ot staic li mozoe.
La xcha'cuxesbe yol jun me'on ants ta lum Naín li Jesuse
11Ts'acal to ibat ta lum Naín li Jesuse. Te xchi'inoj batel li yajchanc'optaque xchi'uc li epal cristianoetique. 12C'alal nopol xa'ox x'ech'ic batel ta ti'coralton yu'un lume, laj yil te xq'uechojic loq'uel tal jun anima, yu'un chbat smuquic. Ja' squerem jun me'on ants, c'ajumal jun li yole. Ep cristianoetic te ta lum xchi'inojic batel. 13C'alal laj yil li Cajvaltique, toj abul sba laj yil li antse. Jech laj yalbe:
—Mu xa'oc' —xut.
14Inoch'aj batel li Jesuse; la spicbe li svayabe. Li boch'otic xq'uechojic tale iva'iic. Li Jesuse jech laj yalbe li animae:
—Querem, vu'un chacalbot lican —xut.
15Jech ta ora ichoti li quereme; lic lo'ilajuc. Li Jesuse laj yac'be comel ta sc'ob yol li antse. 16Scotol li boch'otic te oyique ixi'ic; laj yalbeic slequilal Dios:
—Ja' banquilal yaj'alc'op Dios ti li' oy ta jtojoltique. Ja' tal scolta steclumal li Diose —xiic.
17Li c'usi la spas Jesuse ipuc batel ta scotol yosilal Judea banamil xchi'uc ta yantic lum ti te nopolique.
Bat sc'opanic Jesús li yajchanc'optac Juan j'ac'vanej ta vo'e
(Mt 11.2-19)
18Li Juan j'ac'vanej ta vo'e i'albat yu'un yajchanc'optac scotol c'usitic ta spas li Jesuse. C'alal laj ya'ay li Juane, laj yic' chib yajchanc'op; 19la stac batel yo' bu oy li Jesuse. Jech laj yalbe:
—Bat jac'beic Jesús me ja' li boch'o sc'oplal ono'ox chtale, o me ta to jmalatic yan —xut batel.
20C'alal ic'otic ta stojol li Jesuse, jech laj yalbeic:
—Li Juan j'ac'vanej ta vo'e la stacuncutic tal, yu'un tal jac'botcutic me vo'ot ti sc'oplal ono'ox chatale, o me ta to jmalacutic yan —xutic c'otel.
21C'alal ic'otique, ja'o la scolta ep jchameletic xchi'uc boch'otic ep svocolic xchi'uc boch'o ochem pucuj ta yo'ntonic, xchi'uc la sjambe sat ep ma'satetic. 22Itac'ov li Jesuse:
—Sutanic batel, bat albeic Juan li c'usitic laj avilique xchi'uc li c'usitic laj ava'yique: Li ma'satetique ijam xa satic; li coxoetique ta xanovic xa; li jc'a'el chameletique icolic xa; li boch'otic macal to'ox xchiquinique ijam xa xchiquinic;#Is 35.5-6. li animaetique icha'cuxiic xa; li me'onetique icholbat xa ya'yic li Lequil A'yeje.#Is 61.1. 23¡Toj xcuxet no'ox yo'nton li boch'o mu xchibaj yo'nton ta jtojole!, xiyutuncutic tal li Jesuse, utic c'otel li Juane —x'utatic.
24C'alal isutic batel li yajchanc'optac Juane, li Jesuse lic yalbe ya'ay epal cristianoetic sc'oplal li Juane, jech laj yal: “C'alal la'ayic ta xocol banamile, ¿boch'o ay aq'uelic? ¿Me ja' ay aq'uelic li boch'o ja' jech chac c'u cha'al jtec' aj ti xne'et no'ox ta jujujot yu'un iq'ue? 25¿Boch'o ay aq'uelic cha'e? ¿Me ja' ay aq'uelic li boch'o toj lequic sc'u' spoc' slapoje? A'yo ava'yic, li boch'o toj lequic sc'u' spoc' tslapique ja' li boch'o te oyic ta spasubmantal ajvaliletique. 26¿Boch'o ti ay aq'uelique? ¿Me mu ja'uc jun yaj'alc'op Dios? Ta melel ja' jun j'alc'op. Chacalboxuc ava'yic, ja' xjelov yabtel jech chac c'u cha'al li yantic j'alc'opetique. 27Ja' Juan ti jech ono'ox ts'ibabil sc'oplale:
‘A'yo ava'ay, ba'yuc ta xjelov batel avu'un li j'almantal ta jtac batele,
ja' ta sjambot abe’,#Mal 3.1. xi ono'ox ts'ibabil sc'oplal.
28Chacalboxuc ava'yic, ta scotol li cristianoetic voq'uemique mu'yuc boch'o jech tsots yabtel yich'oj jech chac c'u cha'al li Juane. Pero li boch'o chac' sba ta ventainel yu'un Diose, ac'o me biq'uit ch-ilat, ja' banquilal chc'ot yu'un li Juane”, xi li Jesuse.
29C'alal laj ya'yic c'usi laj yal Jesús li cristianoetique xchi'uc li jtsobpatanetic ti yich'ojic xa vo' yu'un Juane, jech laj yalic: “Ta melel toj tuc' c'usi chal xchi'uc c'usi tspas li Diose’, xiic. 30Yan li fariseoetic xchi'uc li boch'otic lec xchanojic smantal Dios ti muc sc'anic ich'vo' yu'un li Juane, muc sc'anic noxtoc li coltael yu'un Dios vulem ta stojolique.#Mt 21.32; Lc 3.12.
31Jech laj yal noxtoc li Jesuse: “¿C'u x'elan xu' ta jco'oltsanic li cristianoetic li' oyic ta orae? ¿Boch'o xco'lajic xchi'uc? 32Ja' co'ol xchi'uc ololetic te chotajtic chtajinic ta ch'ivit, ti jech chalbeic li xchi'ilique: ‘La jupancutic ama; muc xa'ac'otajic. C'alal li'oc'cutique, muc xa'oq'uic ec’, xut sbaic. 33Yu'un c'alal ital li Juan j'ac'vanej ta vo'e, muc xve', muc xuch' ya'lel ts'usub. Li vo'oxuque jech laj avalic: ‘Ochem pucuj ta yo'nton’, xachiic. 34C'alal lital vu'un ti Xnich'on cristiano lic'ote, live', laj cuch' ya'lel ts'usub; pero jech laj avalic noxtoc: ‘Toj ech'em xve', toj ech'em xuch' ya'lel ts'usub. Lec chil sbaic xchi'uc jtsobpatanetic xchi'uc yan jpasmuliletic’, xachiic. 35Li boch'o bijic ta melele chvinaj ta sventa yabtelic”, xi li Jesuse.
Li Jesuse ibat ve'uc ta sna jun fariseo Simón sbi
36Oy jun fariseo la sc'anbe vocol Jesús ti ac'o bat ve'uc ta snae. C'alal i'och ta sna fariseo li Jesuse, te ichoti ta ti'mexa. 37Oy jun jmulavil ants te ta lum, laj ya'ay ti te chve' ta sna fariseo li Jesuse, jech te ibat. Laj yich' batel jun limita muil poxil. Li slimitaile pasbil ta alabastro ton. 38Li antse te ic'ot ta sts'el yacan li Jesuse, te lic oc'uc. Lic spocbe yacan ta ya'lel sat; la scus ta stsotsil sjol. Lic sts'uts'be li yacane; ts'acal lic xjax ta muil poxil.#Mt 26.7; Mr 14.3; Jn 12.3. 39C'alal laj yil li fariseo ti yic'oj ta ve'el Jesuse, jech laj yal ta yo'nton: “Ti ja'uc yaj'alc'op Dios ta melel li vinic li'i, sna' c'usi yabtel, c'u x'elan stalel li antse, yu'un ja' jmulavil ants”, xi. 40Li Jesuse jech lic yalbe:
—Simón, oy c'usi ta jc'an chacalbot —xut.
Itac'ov li Simone:
—Lec oy, albun, Jchanubtasvanej —xi.
41Li Jesuse jech lic yal:
—Oy jun vinic q'uexbil staq'uin yu'un chib viniquetic. Li june vo'ob ciento (500) denario#7.41 Denario - Q'uelo Glosario. taq'uin xq'uexoj. Li yane lajuneb yoxvinic (50) no'ox xq'uexoj. 42Pero li chib j'iluviletique mu sut yu'unic li yilique, jech te ich'aybatic o. Alo ca'tic boch'o junucal ep c'uxubinbil ic'ot —xut.
43Itac'ov li Simone:
—Ta jnop ti ja' li boch'o ep yil ich'aybate —xi.
Jech i'albat yu'un li Jesuse:
—Ja' melel li c'usi chavale —xut.
44Ijoyij li Jesuse, la sq'uel li antse; jech laj yalbe li Simone:
—¿Me chavil c'usi tspas li ants li'i? C'alal li'och tal ta anae, muc xavac'bun vo' sventa cacan. Yan li ants li'i, laj xa spocbun cacan ta ya'lel sat. La scusbun ta stsotsil sjol noxtoc. 45Li vo'ote muc xats'uts'un. Yan li ants li'i yoquel to mu xlaj yo'nton o ta sts'uts'ilanel cacan ti c'u xa sjalil cochel tale. 46Li vo'ote mu'yuc xajaxbun aceite ta jol. Yan li ants li'i laj xa xjaxbun muil poxil ta cacan. 47Ja' yu'un chacalbot ava'ay, pasbil xa perdón scotol li yepal smul spasoje, yu'un lec sc'anojun. Li boch'o tsnop ti jutuc no'ox smul tspasbat perdone, jutuc no'ox chc'anvan noxtoc —xut.
48Li Jesuse jech laj yalbe li antse:
—Pasbilot xa perdón scotol li amule —xut.
49Li boch'otic te oyic ta mexa xchi'uc li Jesuse, jech lic sjac'be sbaic:
—¿C'usi xa svu'el li vinic li'i, ti c'alal ta smul cristianoetic xu' yu'un tspasbe perdone? —xut sbaic.
50Li Jesuse jech lic yalbe noxtoc li antse:
—Lacol xa ta sventa xch'unojel avo'nton; junuc avo'nton batan —xut.
Currently Selected:
Lucas 7: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
