అపొ 10
10
పేతురుబి కొర్నేలీ
1ఇటలీ పటాలం కరి బోలాతే పటాలంమా షతాధిపతి హూయోతే కోర్నేలీ కరి ఏక్ భక్తీతీ ర్హవళు యో కైసరయామా థో. 2యో ఇను ఘర్‍ పరీవార్‍తి దేవ్‍మా గ్హణు భయభక్తితి ర్హైన్‍, అద్మీయేనా ఘాణు ధరమ్‍ కర్తోహుయిన్‍ కెధేబి ప్రార్థన కర్తోర్హవళో. 3ధోఫర్ను భరోబర్‍ తీన్‍ బజేనూ వోహఃత్మా దేవ్‍నూ దూత ఇనాకనా ఆయిన్‍, కోర్నేలి కరి బులావమా యో దర్షనంమా ఖూల్లా దేఖ్యొ.
4యో దూత మ్హణీ ఫరీన్‍ ధేఖీన్ ఢరీజైన్‍ ప్రభు సాత్ కరి పుఛాయో, ఇనటేకె దేవ్ను దూత తారు ప్రార్ధనబి, ధరమ్‍నూ కామ్‍ హాఃరు దేవ్‍ ఖుషి హుయో తారు ప్రార్థనా జబబ్‍ కరి బోల్యొ. 5హాంకే తూ తారు అద్మీయేనా యొప్పేనా బోలిమొక్లీన్‍, పేతురు కరి బోలాతే సీమోన్‍నా బులైమంగౌ, 6యో ధర్యవ్‍నా కనారినా ఛాతే సీమోన్‍ కరి ఏక్ చేప్లే సీవవాళునా ఘర్మా ఛాకరీ ఇనేతి బోల్యొ. 7తెదె ఇనేతి వాతె బోల్యుతే దూత ఛల్‍జావదీన్‍, యో యగ్గిస్‍మా ఇనా ఘర్మా కామ్‍ కరవాళుమా బేజణాన, బుజు ఇనాకనా నమ్మకంతి ర్హవళు సైనిక్నా బులైన్‍, 8యూవ్నా ఆవాత్‍ హాఃరు బోలిన్‍ యొప్పేనా బోలిమొక్‍ల్యొ.
9బుజా ధన్నేయూవ్నే యొప్పేనా కందే జాతార్హయా. తెదె భరోబర్‍ భరాబజనా పేతురు ప్రార్దన కరానటేకె మిద్ది ఛడీన్‍ గయో. 10యో ఘణు బుక్‍తి ర్హైన్‍ ఖాణు ఖాణు కరి రైగో ఘర్‍వాళు ధాన్‍ కర్తుర్హవమా యో దర్షనం దేఖ్యో, 11తెదె ఆకాష్‍ ఉక్‍డైన్‍ చార్‍బాజు నూఛేడో ధరైన్‍ వుత్ర్యుతే ఏక్ మొటు గోధిడినూ జోణ్‍నూ ఏక్ థాళి జమీన్‍ఫర్‍ వుత్రానూ దేఖ్యో. 12ఇన్‍మా జమీన్‍ఫర్‍ ర్హవళు కెత్రూకి రకంనూ జీన్‍వార్‍, జమీన్‍ హాఃవ్‍ళవాలు కీడాబి, బుజు ఉడావాళు జీన్‍వార్‍ థూ. 13తెదె “పేతురునా తూ వుటీన్ మారీన్‍ ఖా” కరి బోలిన్‍ ఏక్ ఆవాజ్‍ హాఃజాయు.
14పన్కి పేతురు నకో ప్రభు అపవిత్రంనూ కేయుబి మే కెధేబి ఖాధో కోయిని కరి బోలమా,
15దేవ్‍ పవిత్రం కర్యోతే ఇన అపవిత్రం కరి నకో ఏంచ్‍ కరి బుజేక్‍ చోట్‍ యోస్‍ ఆవాజ్‍ ఇనా హాఃమ్‍జాయు. 16ఇమ్మస్‍ తీన్‍ వొహఃత్‍ హుయు, ఇనబాద్మా యో ఎగ్గిస్‍మా ఆకాష్‍మా థాళి ఉఫర్‍ పడైగయు.
17పేతురు ఇనా ఆయుతే ఖోఃణ్యు సాత్‍లాకరి ఇను ఇనూస్‍ కాయిబి తోచకోయింతే ర్హవమా, కోర్నేలి బోలిమొక్‍ల్యొతే అద్మియే సిమోన్‍నూ ఘర్‍ కేయు కరి పుఛావ్‍తూహుయిన్‍, మాలంకరీన్‍ ఇనా ఘర్‍నా బాధర్‍ హుబ్రిన్‍. 18ఘర్‍నూ అద్మీయేనా చిక్ర్యు. పేతురు కరి బుజైక్‍నామ్‍నూ అద్మి సీమోన్‍ అజ్గ ఛానా? కరి పుఛ్చాయు.
19పేతురు యో ఖోఃణ్యానా గూర్చి సోచుకరాతో ఆత్మ హదేక్‍ తిన్‍ జణ తూనా ఢూండుకరాస్‍ కరి బోల్యా. 20తూ వుటిన్‍ హేట్‍ వుత్రిన్‍ నోకోకరి బొలిన్‍ యూవ్నా కేడె జా యూవ్నా బోలిమొక్‍ల్యోతే మేస్‍ కరి ఇనేతి బోల్యొ.
21పేతురు యో అద్మీయేకనా ఆయిన్‍ హదేక్‍ తుమె డుండుకరాతే అద్మి మేస్‍ తుమె ఆయుతే ష్యానటేకెకీ బోల్‍ కరి ఇవ్నే బోల్యొ.
22తెదె ఇవ్నే అమ్‍ బోల్యా, నీతిమంతుడ్‍నితరా ర్హావళు, దేవ్తి ఢరవాళు యూదుల్‍తి అషల్ నామ్‍ కమైలిదోతే షతాధిపతి కోర్నేలి కరి ఏక్ అద్మి ఛా యో తునా బులైమంగైన్‍ తూ బోలాతే వాతె హాఃజ్ను కరి పరిసుద్ధ దూతతి బోలావమ యో ఇనటేకె తూనా బులాయో. తెదె యో ఇవ్నా బులైన్‍ తూ సాత్ బోలస్కి ఇనా హాఃజనటేకే.
23పేతురు ఉజేక్ దన్నె ఇవ్నాకేడె గయో, యొప్పెకరి హాఃరైమరావళు, థోడుజణు భైయ్యేబి ఇనా కేడె గయూ. 24బుజేక్‍ ధన్నే యూవ్నే కైసర్‍మా గయా. తెదె కోర్నేలి ఇనా బందుల్‍నా దోస్తుల్‍నా బులైలీన్‍, ఇనటేకె ఎదుర్‍ దేక్తుర్హయు. 25పేతురు మై అవదీన్‍ కోర్నేలి ఎదుర్కోని ఇనా గోఢాఫర్‍ పడీన్‍ క్హలామ్‍ కర్యో. 26ఇనటేకె పేతురు బోల్యొ తూ వుటీన్ భిర మేబి అద్మీస్‍ కరి బోలిన్‍ ఇనా ఉటాడీ భిరకాఢీన్‍, 27ఇనేతి వాతె బోల్తుహుయిన్‍ మై ఆయిన్‍, కెత్రూకి జణు భరైర్హవనూ దేఖ్యో. 28తెదె యో అన్యుల్‍తి మలీన్‍ ర్హావనుబి ఇంనూ అద్మీయేనా ఛీమానుబి యూదుల్‍నా ధరమ్‍ కాహే కరి తూమ్నా మాలం, కానీ హఃయు అద్మీబి ధక్‍లాయిగయో కరీతోబి, అపవిత్రంనో కరీతోబి నాబోల్‍నూ కరి దేవ్‍ మన దేఖాఢీరాక్యోస్‍. 29ఇనహాఃజే మన బులాయోతేదె కోఆవ్‍ని కరి ఆఢు క్హయుబి నాబోల్‍నూతిమ్‍ ఆయో. ఇనటేకె ష్యాన బులాయాకీ ఇనా గూర్చీ పుచాంగ్రస్‍ కరి యూవ్నేతి బోలుకరూస్‍.
30ఇనటేకె కోర్నేలి ఛార్‍ రోజ్‍నా అగఢీ ధోఫర్ను తీన్‍ భజేతూ ధరీన్‍ ఆ వొక్హత్‍ తోడి ప్రార్దన కరుకరుతో ధోళుఫట్‍ జంమ్‍కుకరాతే లుంగఢా పేర్రాక్యుతే ఏక్ జణో మార క్హామె భీరిగొ. 31కోర్నేలి తారీ ప్రార్దన హాఃమ్‍జాయు; తారు ధరమ్‍ కామ్‍ దేవ్‍నా హాఃమె హాఃయాల్‍ కర్యోకరి బోల్యొ. 32ఇనటేకె తూ యొప్పేనా బొలీమొక్లీన్‍ పేతురు కరి బోలాతే సీమోన్‍నా బులైమంగౌ యో ధర్యావ్‍నా కనారీనా ఛాతే చేప్లే సీవవాళు సీమోన్‍నా ఘర్మా ఆయిరోస్‍ కరి మారేతి బోల్యొ. 33జల్దీస్‍ తూనా బులాయో తూ ఆయోతే ఆసేలస్‍. ప్రభు తూనా ఆజ్ఞాపించ్యోతే క్హారు హాఃమ్‍జనా టేకె హంకే హమే హాఃరా దేవ్‍న క్హామె అజ్గ ఏక్‍జోగొ బేటాస్‍ కరి బోల్యొ,
పేతుర్ను బోధ
ఇనటేకె పేతురు మోఢు కాడీన్‍ అమ్‍ బోల్యొ. 34దేవ్‍ పక్చపాతి కాహే యో హాఃచి కరి మాలంకర్‍రాక్యోస్‍. 35హార్యేక్ జనంబీ ఇనేతి ఢరీన్‍ నీతిథీ రావవాళునా యో అంగీకరించస్‍. 36యేసు క్రీస్తు హాఃరవ్‍నా ప్రభుస్‍. ఇనద్వార సమాదానంను సువార్తనా ప్రచార్‍ కరీన్‍ ఇస్రాయేలిల్‍నా బోలిమొక్‍ల్యొతే ఖభార్‍ తూమ్నా మాలమస్‍. 37యోహాన్‍ బాప్తిస్మమ్‍ లేను కరి ప్రచార్‍ కరానుబాద్‍మా గలిలయతూ ధరీన్‍ యూదయాదేహ్ః క్హారు ఫైలాయుతే వాత్‍ తూమ్నా మాలం. 38యో ష్యాత్‍ కతో దేవ్‍ నజరేయుడ్‍నో యేసునా పరీసుద్దాత్మతి థాకత్‍తి అభిషేకించ్యొతేస్‍. దేవ్‍ ఇనా కేడె రయో యో మేల్‍ కర్తోహుయిన్‍, సైతాన్‍నా హాతె పింజావ్‍కరాతే యూవ్నా హాఃరౌనా అసేల్‍ కర్తోహుయిన్‍ రయో. 39యో యూదుల్‍ను దేఖ్‍ఃమబి, యెరూషలేంమబి కర్యోతే హాఃరౌనా హామే సాక్చుల్‍. యూవ్నే ఇనా సిలువఫర్‍ మారీనాఖ్యా. 40పన్కి దేవ్‍ ఇనా తిన్‍మన్‍ ధన్నే ఉట్టాడీన్‍ 41ప్రజల్‍ కాహేతిమ్‍ దేవ్‍ చూనిలిదోతే సాక్చుల్‍నస్‍ కతో యో మరీహుయుమతూ ఉట్యోతే ఇనబాద్‍ ఇనేతి మలిన్‍ ఖాణు పాణీ ఖాదాతే హామ్‍నస్‍, యో ప్రత్యేకంగా దేఖవహాఃరుకు దేఖాయో. 42ఆస్‍ కాహే తిమ్‍ దేవ్‍ జీవ్తావ్‍నబి, మర్యాహుయమబి న్యాయాధిపతింతర మ్హేందోతే ఆస్‍ కరి ప్రజల్‍నా ప్రచార్‍ కరీన్‍ ఘట్‍ సాక్చ్యం బోల్‍నూ కరి హామ్నా ఆజ్ఞాపించ్యో. 43ఇనకనా విష్వాసంగా ర్హవళు కోన్‍కీ యేసునూ నామ్‍తి యూవ్నా పాప్‍ మాఫి మళ్‍స్యే కరి ప్రవక్తల్‍ హాఃర బోల్యా.
యూదుల్‍ కాహెతె విష్వాసుల్నా ఉప్పర్‍ పరిషుద్ధాత్మ ఉత్రీన్ ఆవను
44పేతురు అజున్‍బి ఇమ్మస్‍ వాతె బోలుకరాతో ఇను వాతె హాఃజుకరతె యూవ్నాఫర్‍ పరీసుద్దాత్మ ఆయు. 45యొప్పెతూ పేతురుతి ఆయుతే యూదుల విష్వాసుల్‍ పరీసుద్దాత్మను వరం అన్యుల్‍ఫర్‍బి ఆవాను దేఖీన్‍ కలవర పడ్యు. 46కిమ్కతో యూవ్నే అన్యబాషల్‍తి వాతె బోల్తుహుయిన్‍ దేవ్‍నా స్తూతికరను యూవ్నే ఖంజు. 47ఇనటేకె పేతురు అపిణింతర పరీసుద్దాత్మమ లీరాక్యుతే పానినా బాప్తిస్మమ్‍ నాలేనూ కరి కోన్‍బి ఆఢు బోల్సునా? కరి బోలీన్‍, 48యేసు క్రీస్తునూ నామ్‍తి ఆవ్నే బాప్తిస్మమ్‍ లేనూకరీ ఆజ్ఞా దిదొ. యో హాఃరు హుయిజావదిన్‍ పేతురునా యూవ్నే థోడధన్‍ హామరకేడేస్‍ ర్హకరీ బతిమాల్యు.
Currently Selected:
అపొ 10: NTVII24
Highlight
Share
Copy
Want to have your highlights saved across all your devices? Sign up or sign in
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
