అపొ 5
5
అననీయ బుజు సప్పీరా
1అజు అననీయ కరి ఏక్ అద్మి ఇని భావణ్‍ సప్పీరాతి మలీన్‍ ఇవ్నా ఖేథర్‍ ఏచ్యా. 2భావణ్‍నా మాలం ర్హాయిన్‍ ఇనమాతు థోడు లఫాడ్‍లీన్‍ థోడు లాయిన్‍ అపొస్తుల్నా దిదో. 3తెదె పేతురు అననీయాతి, తారు జమీన్‍ రఫ్యావ్‍మా థోడు లఫాడి లీన్‍ పరిషుద్ధాత్మనా జుట్టికరనా సైతాన్‍ ష్యాన తారు దిల్‍నా వుషీ కర్యో? 4యో తార కనా రైతో తెదే తారుస్‍తో? ఏఛానా బాద్మాబి యో తారు సొంతం కోహుసిన్నా? స్యాన ఆ సంగతి తారు దిల్మా సోచుకరాస్‍? తూ అద్మీతి కాహే దేవ్తి జుట్టి బోల్‍రాక్యోస్‍ కరి ఇనేతి బోల్యొ. 5అననీయ యో వాతె హఃమస్తోహుయినస్‍ పడీన్‍ జాన్‍ మ్హేందో, హఃజూతే హఃరవ్నా ఘణు ఢర్‍ హుయుగు. 6తెదె కవ్వార ఛోగరా వూట్టీన్‍ ఇనా లుంగ్ఢాతి లఫ్టీన్‍ ఢొయిలీజైన్‍ గాఢ్యా.
7భరోబర్‍ తీన్‍ గంఠనాబాద్మ ఇని భావణ్‍ హుయుతే మాలంకోయినింతే మహి ఆయీ. 8తెదె పేతురు తుమే యో జమీన్‍నా అత్రనస్‍ ఏఛానా మారేతి బోల్కరి ఇనా పుచ్ఛాయో. ఇనహాఃజే యో హో అత్రనాస్‍ ఏచ్యాకరి బోలి.
9తెదె పేతురు యోబాయికోతి ప్రభునూ ఆత్మనా సోధించనా తూ తార బావ్రి ష్యాన పూనిల్దా? హాధేక్‍ తార భావ్రీనా గాఢీన్‍ ఆయుతే ఇవ్నె ఘర్‍నా భారస్‍ ఛా; యూవ్నే తునాబి ఢోయిలీజాసె కరి ఇనేతి బోల్యొ. 10జల్దీస్‍ యోబాయికొ ఇనా గోఢకనా పఢీన్‍ జాన్‍ మ్హేంధి. యో కవార ఛోగరా మహీ ఆయిన్‍, యో మేరిగయేతె ఇనా దేఖిన్‍, ఇన ఢోయిలీజైన్‍ ఇని భావ్రీకనాస్‍ గాఢ్య. 11సంఘ హాఃరవ్‍నా, ఆ సంగతి హఃజూతే హఃరవ్‍నాబి ఘణు ఢరిగయు.
అద్భుతాల్‍ ఆష్చర్యకార్యాలు
12జనాల్మా కెత్రూకి సూచక క్రియల్‍, మాహాత్‍కార్యల్‍ అపొస్తుల్నా హాతె హోతుర్హయు. బుజు ఇవ్నే హాఃరు ఏక్ మలీన్‍ సొలొమోన్‍నూ మండపంమా థూ. 13అజు హాఃరుబి ఇవ్నేతి మలిర్హవానా ఇవ్నా హిమ్మత్‍ కోపూర్యుని పన్కి, అద్మియే ఇవ్నా ఘనపరుచుచూ రయ్యూ. 14హుయుతో కెత్రుకి బాయికా వాగ్రియే ప్రభువును నమ్మిన్‍ కెత్రుకి జాణు ఇవ్నామా చేర్యు, 15అనటేకే పేతురు అవ్వామా అద్మియే ఆష్యల్ కొయిన్తే ఇవ్నా ఇను ఛాళో ఫణ్‍నూ కరి మంచల్‍ ఫర్‍ పరుపుల్‍నాఫర్‍ ఇవ్నా రాఖ్య. 16బుజు యెరూషలేమ్‍నా ఆష్పిస్‍నూ హాఃయార్నూ జనాల్‍ రోగేలనా అపవిత్రాత్మథీ హాఃతూకరాతే ఇవ్నా ఢోయిలీన్‍ మలిన్‍ ఆయు. ఇవ్నే హాఃరబి ఆష్యల్ హుయి.
అపొస్తల్నా హింసకరను
17ప్రధానయాజకుడ్‍బి ఇనాకేడె ర్హవాళు హాఃరుబి, కతో సద్దూకయ్యుల్‍నూ జాత్‍ వాళు వుటీన్‍ దావోథీ భరైన్‍, సాత్బి కర్నుకరి థా. 18అపొస్తల్నా జభర్‍జస్తిథీ ధర్లీన్‍ ఠాణమా రాఖ్య. 19హుయుతోబి ప్రభునూ దూత రాత్నూ వహాఃత్‍ యో ఠాణాను ధర్వాజకాఢిన్‍ ఇవ్నా భా ఆయిన్‍ ఇవ్నేతి అమ్ బోల్యొ. 20తుమే జైన్‍ దేవాలయ్‍మా భీరిన్‍, ఆ జీవంనూ గూర్చిన్‍నూ వాతె హాఃరుబి ప్రజల్‍తీ బోలో కరి ఇవ్నేతి బోల్యొ. 21ఇవ్నే యో వాతె హాఃజీన్‍, వ్వాణు హూస్‍కరా దేవాలయ్‍మా జైన్‍ బోధిస్తార్హయా. తెదె ప్రధాన యాజకుడ్‍బి ఇనాకేడె ర్హవాళుబి ఆయిన్‍, మహాసభ వాళన యూదుల్‍ ష్యాణవ్‍నా బులైమంగయుతే ఇవ్నా అపొస్తుల్నా బులైలీఆవ్‍ కరి భటుల్‍నా ఠాణమా బోలిమొక్‍ల్యా. 22పన్కీ భటుల్‍ ఎజ్గా గయా తెదె ఇవ్నే నాదేఖవమా ఫాచు ఆయిన్‍, అమ్ బోల్యు 23“ఠాణా ఘణు అసేల్తీ మూచైర్హవానుబి, కావ్లీ కరవాళు ధర్వాజనా హాఃమే భిరిర్హవాను దేక్యా పన్కీ ధర్వాజు కాఢ్యాతేదె మహీ హామ్నా ఏక్ జణోబి దేఖాయో కోయిని.” 24ఇనబాద్మా దేవాలయ్‍నూ అధిపతిబి ప్రధాన యాజకుల్‍బి యో వాతె హాఃజీన్‍ ఆ ష్యాత్ హూవాస్‍కి కరి ఇవ్నా విషయ్‍మా కాయి సోఛవాకోయిన్తె రైయు. 25తెదె ఏక్ జణో ఆయిన్‍ హాధేక్‍ తుమే బందించుతే ఇవ్నే దేవాలయంమా భిరిన్‍ ప్రజల్‍నా బోధించుకరాస్‍ కరి యూవ్నా బోలమా, 26అనటేకే అధిపతి భటుల్‍థి కేడె జైన్‍, ప్రజల్‍ ఫత్రావ్తి మారస్‍షికి కరి ఢరీన్‍, జభర్‍జస్తీ నాకర్నూతిమ్‍ ఇవ్నా అపొస్తుల్నా ఆయిత్రా.
27ఇవ్నా లీఆయిన్‍ సభమా భిర్హకాఢమా ప్రధానయాజకుడ్‍ ఇవ్నా దేఖిన్‍ అమ్నితరా పుచ్చావమా, 28తుమే ఆ నామ్తి బోధించో నొకో కరి ఖచ్చితంగా ఆజ్ఞ దిదా కోయిన్నా? హాదేక్‍ తుమే యెరూషలేమ్‍నా తూమారు బోధిం భరీన్‍, ఆ అద్మీను మరణ్‍ హామారఫర్‍ లావ్నూ కరి సోచుకరాస్‍ కరి బోల్యొ.
29ఇనహాఃజే పేతురుబి బుజు బగల్‍ అపొస్తుల్‍ అద్మినా కాహే పన్కి దేవ్నా తప్ప అజు అద్మియేన లోబడ్సు కొయిని. 30తుమే మ్రాన్‍ఫర్‍ ఛడైన్‍ మార్రాక్యతే యేసునా అప్ను పితరుల్‍నో దేవ్‍ జీవ్వాడీన్‍ ఉఠ్టాడ్యో. 31ఇష్రాయేల్‍నా దిల్‍ బదలనుబి పాప్‍క్చమాపణ్‍ దేవానటేకె దేవ్‍ ఇనా ఉట్టాడీన్‍ అధిపతింతర రక్చకుడింతర ఇను ఖవ్వాత్‍బనే రాక్యోస్‍. 32హామేబి, దేవ్‍ ఇనా విధేయుడ్ హుయిన్‍ ర్హైతె యూవ్నా దీదూతే పరిసుద్ధాత్మబి, ఆ సంగతుల్‍నా సాక్చుల్‍నితరా ఛియ్యే.
33మహాసభమా ఛాతే ఇవ్నే ఆ వాతె హాఃజీన్‍ ఘణు ఛంఢాల్‍ లాయిలీన్‍ ఆవ్నా మర్రాక్నూ కరి సోచమా, 34ఖారుఅద్మిథి ఘనత పోంద్యుహుయుబి ధర్మషాస్త్రం బోలావళు గమలీయేలకరి ఏక్ పరిసయ్యుడ్‍ మహాసభమా వుటీన్‍, ఆ అద్మీయేనా జర ఘడీ భార్‍ రాఖోకరీ ఆజ్ఞాదీన్‍ ఇవ్నేతి అమ్ బోల్యొ.
35ఇష్రాయేలియుల్‍వాల, ఆ అద్మీయేనూ విషయంమా తుమే ష్యాత్ కరాజౌంగ్రస్‍కీ ఝథన్ హుయి‍ర్హవో. 36ఆ ధన్నా ఆగడీ థూదా వుటీన్‍ యో ఏక్ మోటో కరి బోల్లీదో; భరోభర్‍ ఛార్‍హోః అద్మీయే ఇనేతి మళీజైన్‍, యో మరైగయో. ఇనా లోబడ్యుతే ఇవ్నే హాఃరు చేద్రిజైన్‍ లఢాయ్‍ వ్యర్థం హుయిగు. 37ఇనబాద్మా జనాభలెక్కమా ధన్మా గలిలయడ్‍నో యూదాబి తిరుగుబాట్‍ కరనా వూషి కర్యో; యోబి నాషనం హుయిగో, ఇనా లోబడ్యుతే ఇవ్నే హాఃరు చేద్రిగయు. 38ఇనహాఃజే మే తూమారేతి ష్యాత్ బోలుకరూస్‍ కతో ఆ అద్మీనూ జోలినా నాజైన్‍ ఇవ్నా మ్హేందేవో. ఆ హూఃజ్‍బి హూవో ఆ కామ్బి హూవో ఆద్మీయేథి హూయుతో యో వ్యర్దం హుయిజాసే. 39హుయూతొ దేవ్తి బరేమా హుయూతొ ఇనాస్ కర్సుకోయిని; తుమే ఏక్ వోహాఃత్‍ దేవ్తి పోరడా వళా హుయిజాస్‍సీకి జథన్‍. 40ఇవ్నా ఇనా వాత్‍నా ఒప్పిన్‍, అపొస్తుల్నా బులైమంగైన్‍ కోల్డోతి మార్‍ ఖడైన్‍ యేసునూ నామ్‍థి బోధించో నోకో ఆజ్ఞాదిన్‍ ఇవ్నా మ్హేందిదా. 41యో నామ్నా టేకె అవమాన్‍ హూవానా పాత్రుల్‍ కరి ఎంచబడ్యుతే ఇనా హాఃజే ఇవ్నే సంతోషించిన్‍ మహాసభమ థూ ఛల్‍జైన్‍, 42హార్‍ ధన్‍ దేవాలయ్‍మాబి ఘర్‍ ఘర్‍మా నాతప్నూతిమ్‍, యేసుస్‍ క్రీస్తు కరి సువార్తనా ప్రచార్‍ కర్తర్హయా.
Currently Selected:
అపొ 5: NTVII24
Highlight
Share
Copy
Want to have your highlights saved across all your devices? Sign up or sign in
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
