యోహా 11
11
లాజర్ను మరణ్‍
1మరియకరి బుజు ఇని భేనెహుయీతె మార్త కరి ఇను గామ్‍ హుయుతె బేతనియమా ఛాతె లాజర్‍కరి ఏక్జనో రోగ్వాలో థో. 2ఆ మరియా ప్రభువున అత్తర్‍ లగాఢీన్‍ ముడ్‍క్యాన కేహ్‍నా తేల్‍ ఇను హాతేలి నుఛ్చితే మరియనొ భై. 3ఇని భేనె ప్రభూ, థూ లాఢ్‍కర్యొతె యో రొగ్తీ ఛాకరి, ఇనకనా వర్తమానమనా మొక్లొ.
4తెదె “యేసు ఆ హాఃజీన్‍ ఆ రోగ్ మర్రాఖనటేకె ఆయుకొయిని పన్కి, అనటేకే దేవ్‍నో ఛియ్యో ఇనుటేకె మహిమపరచబడ్నుతింమ్ దేవ్ను మహిమనటేకె ఆయుకరి” బోల్యొ.
5యేసునే మార్తనఫర్‍ ఇను భేనె బుజు లాజర్నా ఫ్యార్‍కర్యో. 6ఇనే రొగాఢిహుయిన్‍ ఛాకరి మాలంహువమా, యేసు ఛాతె జొగొమా బుజు భే, ధన్ థో. 7అనుపాసల్‍ ఇనే “అప్నె యూదయమా ఫరిన్‍ జయ్యేకరి” ఇను సిష్యుల్‍తి బోలమా
8ఇను సిష్యుల్‍ బోధకుడ్‍ హంకేస్‍ యూదుల్‍ తున పత్రవ్‍తి మార్నుకరి దేకుకరస్‍ని, బుజు ఎజ్గా పరీన్‍ జియ్యానా? కరి ఇనా పుఛ్చాయా.
9అనటేకే “యేసు, ధోపారే భార ఘంటాఛా, కాహేనా ఏక్జనో ధన్నూచాలీన్ గయో. తెదె ఆ ములక్నూ ఉజాలూ దేక్చే. పన్కి, పిస్లీన్‍ పడిజాసెకొయిని. 10పన్కి రాత్నివఖాత్‍ ఏక్జనొ చాల్యొతెదె ఇనకనా ఉజాలుకొయిని, అనహఃజే పడిజాసేకరి” బోల్యొ. 11ఇనే ఆ వాతె బోలీన్‍ పాసల్తీ అప్న దోస్త హుయోతే లాజర్ నిందార్‍మా ఛా ఇనా ఖూద్రావనటేకె జావుంకురు కరి ఇవ్నేతి బోలామ,
12సిష్యుడ్‍ ప్రభూవా ఇనే ఖూత్యోతో అజు ఖుదర్‍సేనా కరి బోల్యొ.
13యేసు ఇను మరణ్నఖాజే ఆ వాత్‍ బోల్యొ. పన్కి, ఇవ్నే ఇను ఖావను ఆరామ్‍నాఖాజె బోల్యుకరి రహిగు. 14అనటేకే యేసు లాజరు మరిగొ, 15అనహాఃజె యేసు లాజర్ మరిగయో, తుమే నమ్ఛుతింమ్‍ మే ఎజ్గాకోథోని, కరి తుమారబారేమా ఖుషీహుయిరోస్‍ హుయితోబి ఇనకన అప్నెజియ్యే, ఇవ్నేతి బోల్యొ.
16అనటేకే దిదుమ#11:16 మూలభాషమా కవలలు కరి బోలతె తోమా “బోధకుడుకెడె మరిజవాన అప్నేబి జియ్యెకరి” ఇనకెడె ఛాతె సిష్యుల్నా బోల్యు.
యేసుస్‍ జీవమ్‍ అజు పునరుత్థానం
17యేసు ఆయిన్‍ తెదేస్‍ యో ఛార్‍ ధన్ సమాధిమా రయ్యోకరి మాలంకర్లిదొ. 18బేతనియ యెరూషలేమ్‍నా హాఃమేస్‍ రైహితూ ఇనఖామే బరాబ్బర్‍ తీన్‍ మైల్‍ దూర్‍ థూ. 19అనటేకె యూదుల్మా ఘనూ అద్మి ఇవ్ని భైయేనా మరాన్‍ గూర్చిన్‍ మార్తనా బుజు మరియనా ఖాంజావనటెకే ఆవ్నకన ఆయిన్‍ థా
20తెదె మార్త, యేసు వలావాస్కరి ఖంజీన్‍ ఇన మల్నుకరి గెయి. పన్కి, మరియా ఘర్మా బేసిన్‍ తి. 21తెదె మార్తనె యేసుతి, ప్రభువా తూ అజ్గ రయోతో మార భై మర్యోహోత్కొయిని కరి బోలి. 22హంకేబిహొ తూ దేవ్నా సాత్‍ మాంగ్యొతోబి దేవ్‍ తునబి దెవ్వాయి జాసెకరి మే సోఛ్చిరాక్యోస్‍
23యేసునె తారొ భై బుజు ఉట్సేకరి, బాయికోతి బోలమా
24మార్త ఇనెతి ఆఖారి ధన్మా జీవిన్‍ ఉట్సేకరి మనమాలం.
25అనటేకే యేసు బోల్యొ మారన్‍ మాతు జీవిన్‍హుయ్‍ర్రొతె, జివీన్‍ఛాతే మేస్‍; మన నమ్మా వాలు మరిగుతోబి జీవ్సె, 26మారప్పర్‍ విష్వాస్‍ రాఖవాలో హర్యేక్‍జనూ కెదేబి మర్సేకోయిని. ఆవాత్‍ నమ్ముకరస్నాకరి యో బాయికోనా పుఛ్చాయో.
27బాయికో “ఓహో, ప్రభూ తూ ములక్నాటేకె ఆవను ఛాతె దేవ్నోఛియ్యోహుయోతె క్రీస్తుకరి హమే నమ్ముకరస్కరి” ఇనేతి బోలి.
యేసు ఆంజు కాఢను
28బద్మా మార్త ఆవాత్‍ బోలిన్‍ జైయిన్‍ బోధకుడునా; ఆయిన్‍ తున బులాంకరస్కరి ఇను భేనెహుయితె మరియానా ఆఖ్రాతీ బులాయు. 29తెదె బాయికో హాఃజీన్‍ ఎగ్గీస్‍ ఉట్టీన్‍ ఇనకనా గయీ. 30యేసు బుజుబి యోగామ్మా నాఆవమా మార్త ఇన మల్యాతే జోగొమాస్‍ రయ్యోథో. 31అనహఃజే ఘర్మా మరియతీబి ర్హహీన్‍ బాయికోనా ఓదార్చుకరతె యూదుల్నా మరియ ఎగ్గీస్‍ ఉట్టీన్‍ జావను దేఖిన్‍ ఆ బాయికో గొర్రాడుకన రొవ్వానటెకె ఎజ్గా జంకరస్కరి సోచిలీన్‍ బాయికోనకెడె గయూ.
32ఎత్రమస్‍ మరియా యేసుఛాతె జొగొకన ఆయిన్‍ ఇన దేఖిన్‍ ఇను గోడఫర్‍ పడీన్‍ ప్రభూ తూ ర్హాయోతొ మార భై మర్యోహోత్‍ కొయినీకరి బోలి.
33యో బాయికొ రొవ్వానుబి, బాయికోనకెడె ఆయుతె యూదుల్బి రొవ్వాను యేసునె దేఖిన్‍ గబ్రాయిన్‍ ఆత్మమా కుంగావ్తో
34ఇన కెజ్గా రాక్యాస్‍కరి పుఛ్చావమా. ఇవ్నే ప్రభూ ఆయిన్‍ దేక్కరి ఇనేతి బోల్యొ.
35యేసునే ఆంజు ఖాడ్యో. 36అనటేకే యూదుల్‍ ఇన కింనితర ఫ్యార్‍కరోకి దేక్కోకరి బొల్లిదా.
37హుయుతో ఇవ్నమా థోడుజను ఆ కాణోనా ఢోలాకొల్యొహొతే అనే, అన మరకొయింనితింమ్‍ కర్సెకోయిన్నా? కరి బోల్యా.
యేసు లాజర్నా జివ్వాడను
38యేసు బుజు మహ్హీస్ బాదతి సమాధికనా అయిన్‍ కేవు గుహాను ధర్వాజునా బండో బేందిరాక్యుతు యో సమాదికనా గయో. 39యేసునె యో బంఢోనా కనాక్కరి బోలమా, మరీగుతె ఇని భేన్‍హుయితె మార్త ప్రభూ, ఇనే మరిజైయిన్‍ ఛార్రోజ్‍ హుయ్గు. అనహఃజే వాఖ్‍ మార్సేకరి ఇనేతి బోల్యొ.
40అనటేకె యేసు ఇనేతి బోల్యొ, తూ నమ్మితోతెదె దేవ్ని మహిమనా దేఖిస్‍కరి మే తారేతీ బోల్యొకొయిన్నా. 41తెదె ఇవ్నే యో బాంఢోనా కనాక్యూ యేసునె ఢోళాపాఢీన్ “భా, తూ మారు మనవిన ఖాంజ్యో అనటేకే తూన కృతజ్ఞతల్‍ చెల్లించుకరుస్‍ 42తూ కెదేబి మారు మనవిన ఖాంజుకరస్‍కరి మే దిల్మాకర్యాకోస్‍ పన్కి, తూ మన మొక్లోకరి అస్సిస్‍ ఉబ్రిన్‍ఛాతె ఆ అద్మిహఃర్వనా నమ్మతింమ్‍ ఇవ్నఖాజె ఆవాత్‍ బోల్యొకరి” బోల్యు. 43యో ఇమ్నితర బోలిన్‍ లాజర్, భాధర్‍ అవ్‍కరి గట్టితి బోలమా 44మరిగుతే యో హాత్‍ గోడా లుంగ్డవ్తీ బందాయిన్‍ భాధర్‍ ఆయో ఇను మోఢన రుమాల్‍ బాందిరాక్యుతు. తెజాత్నో యేసు తుమే “ఇను కట్లునఛోడీన్‍ జావదాకరి” ఇవ్నేతి బోల్యొ.
యేసుఫర్‍ పాచుఫరను
45అనహాఃజె మరియకన ఆయిన్‍ ఇనే కర్యోతె కార్యల్‍నా దేక్యుతె యూదుల్మా ఘాణుజను ఇనపర్‍ విష్వాషంనరాక్యూ, 46పన్కి ఇవ్నమా థోడుజను పరిసయ్యల్కన ఆయిన్‍ యేసు కర్యొతె కార్యాల్‍నా గూర్చి ఇవ్నేతి బోల్యు. 47అనటేకే ప్రధాన్‍యాజకుల్‍ పరిసయ్యుల్‍ కెవ్డుకి మోటు సభనా జోడ్‍కరిన్‍ అప్నె సాత్‍కరుకరియస్‍? ఆ అద్మి కెత్రూకి సూచక క్రియల్‍నా కరుకరస్‍కి. 48అప్నే ఇనా అమ్‍ దేక్తా గప్చూప్‍రయ్యాతో హఃరుజనూ ఇనప్పర్‍ విష్వాషం రాక్చ తెదె రోమీయుల్‍ ఆయిన్‍ అప్ను మందిర్నా, అప్నూ అద్మినా కోన్డిలిసేకరి బోల్యు.
49హుయుతో ఇవ్నమా ఏక్జనో కయపకరి నామ్‍వాలు యోవరఖాన ప్రధాన్ యాజకుడ్ “తుమ్న సాత్బీ మాలంకొయిని” కరి బోల్యొ. 50యో అజు, “దేహ్క్ ఖారూ నాషనంహువణూ బదుల్‍ అద్మినటెకె ఏక్ అద్మి మర్జావను అషల్ ఆ తుమ్న సోచిలేంకరస్‍” కరి ఇవ్నే బోల్యొ. 51ఇను యోస్‍ అమ్‍ బోల్యో కొయిని పన్కి, యోవరఖ్ నా ప్రధాన్‍యాజకుడ్‍ హుయిన్‍ థో 52అనటేకే యేసు “యో యూదుల్నా‍టేకెస్ కాహేతింమ్‍ నాసిగుతే దేవ్ని జానమ్‍ ఏక్నితర జమకరనాటేకె, మరణాటేకె హుయిన్‍ ఛా” కరి ప్రవచించ్యో.
53యుదా అధికారుల్‍ యో ధ‍న్తూ నిఖీన్‍ ఇవ్నే యేసున మర్రాక్నూకరి సోచలగూ. 54అనహాఃజె యేసునె తెప్తూధరిన్‍ యూదియామా భాధర్‍ పరకొయినీతింమ్‍ ఎజ్గాతూ నిఖీన్‍ ఝాడినూ హాఃమేను జొగొమా ఛాతె ఎఫ్రాయికరి గామ్మా జైయిన్‍ ఎజ్గా ఇను సిష్యుల్‍నాకేడె మలీన్‍ రయ్యో.
55బుజు యూదుల్ను పస్కాపండగను ధన్ హాఃమేహుయిన్‍ రయ్యూ. అనహాఃజె కెత్రూకిజణు ఇవ్నే యినూ సుద్ధి కర్లేవనటేకె పస్కానుపండగ ఆవకొయింతె అగాఢీస్‍ గామ్తూనికిన్‍ యెరూషలేమ్మా ఆయూ. 56ఇవ్నే యేసునా ధూండ్తూహుయిన్‍ మందిర్‍మా ఉబ్రీన్‍ తుమ్న సాత్‍ సోఛ్చుకరాస్‍? ఇనే పండగనా ఆవ్సే కోయినా సానటేకెకరి ఎక్తి ఏక్ బొలిదా. 57పన్కి, ప్రధానయాజకుల్బీ పరిసయ్యల్బీ ఇనే ఎజ్గా ఛాతె కినాబిమాలంహుయుతో హమే ఇనా ధర్లేవనాటెకె హమ్నా మాలంకరావోకరి ఆజ్ఞదిన్‍ రయ్యో.
Currently Selected:
యోహా 11: NTVII24
Highlight
Share
Copy
Want to have your highlights saved across all your devices? Sign up or sign in
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024
Free Reading Plans and Devotionals related to యోహా 11
FCA Wrestling: The Miracles
Together in Scripture | God's Eternal Love
Reborn
