Mga Binuhatan 1
1
1-2Dungganon nga Teofilus:
Sa akon ngatong hauna nga sueat hay ginsueat ko kimo it pasunod ro kaabo nga ginhimo ag ginturo ni Jesus hasta sa oras nga gindaea imaw it Dyos sa eangit. Rato ro pag-umpisa pa eang ku tanan nanang hilimuon ag pagturo.#1:1-2 May mga mangin-aeamon nga nagapati nga ro buot hambaeon kara hay ro mga ginhimo ni Jesus tag iya pa imaw sa kalibutan hay umpisa pa eang ku anang mga hilimuon ag ro mga hinimuan ku mga apostoles pagkabalik ni Jesus sa eangit hay pagpadayon nana ku ana nga gin-umpisahan tag iya pa imaw sa kalibutan. Bago imaw gindaea sa eangit hay may ana nga ginbilin sa mga *apostoles nga anang ginpili paagi sa bulig it Espirito Santo. 3Pagkapatay kana hay nabanhaw imaw ag nagpinakita imaw kanda sa sueod it 40 diyas ag sa sari-saring paagi hay ginpamatud-an nana nga buhi matuod imaw. Gintud-an man nana sanda parti sa paghari it Dyos sa anang mga sinakpan. 4Isaeang adlaw, tag kaibahan nanda si Jesus, ginbilinan nana sanda, “Ayaw kamo it halin sa Jerusalem. Hueata anay ninyo ro ginpromisa kinyo it akon nga Ama nga akon man anay kato nga ginhambae kinyo. 5Nagbawtismo si Juan it tubi pero kamo't-a, sa indi magbuhay hay ro Espirito Santo't-a ro ibawtismo kinyo.”
Nagpakayab si Jesus Pabalik sa Eangit
6Kaisaea kato nga nagtilipon eon man sanda, ginpinangutana nanda si Jesus, “Ginuo, makaron eon baea ro oras nga imong hilwayon kita nga mga inapo ni *Israel sa mga nagasakop katon agod ikaw 't-a ro gahari katon?” 7Nagsabat si Jesus, “Ro Dyos Ama eang ro may otoridad nga magtaeana ku oras ag tyempo nga matabo ro anang mga ginplano eon. Owa it kinahangean nga masayran ninyo ron. 8Pero ro inyo't-a nga dapat masayran hay makabaton kamo it gahom kon magkunsad eon kinyo ro Espirito Santo. Ag paagi sa anang gahom hay magapamatuod kamo parti kakon iya sa Jerusalem, sa tanan nga lugar iya sa probinsya it Judea, sa Samaria ag pati sa pinakamaeayo nga mga lugar sa kalibutan.” 9Pagkahambae kara ni Jesus hay nag-amat-amat imaw it kayab samtang nagatan-aw ro mga apostoles hasta nga ginsalipdan imaw it daeaura ag owa eon nanda imaw hikita.
10Idto't-a ro andang panueok tanan sa eangit samtang nagakayab si Jesus ngani owa eagi nanda hapan-uhi ro daywang ka eaki #1:10 Mga eaki ro itsura ku daywa ngato pero masayran gid nga mga anghel 't-a sanda. nga nakasuksuk it puti #1:10 Sa Griniyego, ro kahueugan it “puti” hay puydi man nga “masilaw” nga nagatindog maeapit kanda. 11Hambae nanda, “Mga tagaGalilea, ham-an it nagatinangda pa't-a kamo dikaron? Si Jesus ngara nga ginbuoe kinyo ag nagkayab sa eangit hay mabalik man sa ulihi. Kon mauno ro inyong hakita nga anang paghalin hay makaruyon man ro anang pagbalik.”
Ro Kabueos ni Judas
12Pagkatapos, nagbalik sanda sa syudad it Jerusalem halin sa Bukid it Olibo nga mga sangka kilometro#1:12 Sa Griniyego, raya hay “ro kaeayo nga puydi tikangon sa Adlaw it Inogpahuway.” man lang it eayo sa syudad. 13Pag-abot idto, nagsaka sanda sa ibabaw ku baeay nga andang ginadayunan. Rato hay sanday Pedro, Juan, Santiago, Andres, Felipe, Tomas, Bartolome, Mateo, Santiago nga unga ni Alfeus, si Simon nga isaeang ka rebelde anay sa paggobyerno it Roma, ag si Judas#1:13 Raya nga si Judas hay si Taddeos sa listahan sa Mat 10:3 ag sa Mar 3:18. Imaw man siguro ro ginapatungdan ku “bukon ra it tag si Judas Iscariote” sa Juan 14:22. nga ro anang ama hay Santiago man ro ngaean. 14Permi sandang nagatililipon ag nagahiliugyon sa pagpangamuyo. May mga bayi man nga nagaiba kanda, pati man si Maria nga nanay ni Jesus ag ro mga igmanghod ni Jesus nga mga eaki.
15Kaisaea kato, tag may mga 120 nga mga tumueuo nga nagatililipon idto hay nagtindog si Pedro ag naghambae, 16“Mga igmanghod, kinahangean gid ma't-a nga matuman ro nasueat sa Sagrado nga Kasueatan nga ginhambae kato ku Espirito Santo paagi kay Haring David. Raya hay parti kay Judas nga nagpanguna sa mga nagdakop kay Jesus. 17Isaea imaw kamon nga mga apostoles, ag may ana man nga parti sa oeobrahon nga gintugyan kamon.” 18(Ro natabo kay Judas hay makaraya: ro ginbayad kana sa anang gin-obra nga maeain hay ginbakae it eugta. Idto imaw rikato nagpakamatay. Tumugpa imaw it pahapa sa eugta halin sa sangka mataas nga lugar ag nabusdik ro anang tiyan ag naggueuwa ro anang tinai.#1:18 Suno sa Mat 27:5 hay anang ginbitay ro anang kaugalingon. Basi ro natabo't-a hay nabali ro sanga o nautod ro eubid, mawron nga nahueog imaw sa eugta. 19Habatian ra ku tanan nga mga tagaJerusalem ngani gintawag nanda ro eugta ngato nga “Akeldama” sa andang linggwahe nga ro buot hambaeon hay “Eugta it Dugo.”)
20Hambae pa gid ni Pedro, “Raya ro nasueat sa Libro it mga Salmo nga parti rikaron: ‘Pabay-i ro anang ilistaran nga mangin abandonado ag owa eon it bisan sin-o nga mag-istar dikaron.’#1:20 Salmo 69:25.
“Ag may ginsueat pa gid nga makaraya: ‘Pabusli sa iba ro anang pwesto.’#1:20 Salmo 109:8.
21-22“Ngani dapat kita nga magpili it kabueos ni Judas nga mangin isaea kamon nga gapamatuod parti sa pagkabanhaw ni Jesus. Dapat nga ro magabueos hay isaea sa mga eaki nga kaibahan eon namon sa sueod it mga dinag-on nga nagaminunot kami kay Ginuong Jesus sa anang pagpamanawon, umpisa ku pagpangbawtismo ni Juan hasta gid nga ginbuoe kamon si Jesus, ag nagkayab imaw sa eangit.” 23Ngani nagpili sanda it daywang ka tawo nga si Jose Barsabas, nga ginatawag man nga Justus, ag si Matias. 24Pagkatapos, nagpangamuyo sanda, “Ginuo, ikaw ro nakasayod ku kabubut-on it kada tawo, ngani ipakita kamon kon sin-o sa daywa ngara ro imong ginpili 25nga magbueos kay Judas sa pagserbi bilang apostol nga gin-aywanan nana, ag idto imaw inapok sa lugar nga bagay kana.” 26Nagpagabot-gabot dayon sanda ag si Matias ro hagabutan ngani gindugang imaw sa onse ka apostoles.
Currently Selected:
Mga Binuhatan 1: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
