Mga Binuhatan 4
4
Si Pedro ag si Juan hay Gin-imbistigar sa Atubang it *Sanedrin
1Tag nagahambae pa sa mga tawo sanday Pedro ag Juan hay ginpaeapitan sanda ku mga *saserdote, ku kapitan it mga gwardya it Templo ag ku mga *Saduceo. 2Naugot sanda it duro kanday Pedro ay nagaturo sanda sa mga tawo nga tungod nabanhaw si Jesus raya hay nagapamatuod nga may pagkabanhaw man ro mga patay. 3Ngani gindakop nanda sanday Pedro ag Juan ag ginpriso hasta pagkaaga ay gabii eon kato. 4Pero bisan makarato ro natabo hay abo sa mga nakabati ku mensahi ni Pedro ro nagpati. Kon taeapueon it huyap rayang mga nagpati ag ratong mga hauna, ro mga eaki eang hay nakaabot eon it mga 5,000.
5Pagkaagahon kato, nagtilipon sa Jerusalem ro *Sanedrin nga ro mga myembro hay mga pinuno it mga saserdote, mga manogdumaea it mga Judio ag mga *maestro it Kasuguan. 6Idto man kato si Anas nga pinakapinuno nga saserdote, si Caifas, si Juan, si Alexander ag ro iba pa nga mga igbata ni Anas. 7Ginpadaea nanda sa andang atubang sanday Pedro ag pagkatapos hay ginpangutana, “Sin-o kinyo ro nagtao it gahom nga nahimo ninyo rato? Anyo nga ngaean ro inyong ginsambit sa pagpamayad sa tawo ngara?”
8Nagsabat si Pedro sa gahom it Espirito Santo nga nagaistar kana, “Mga pinuno ag iba pang mga manogdumaea naton, 9kon inyo kaming ginausisa makaron dahil sa mayad nga natabo sa eupog ngara ag kon paalin imaw nagmayad, 10dapat nga masayran ninyo tanan, ag ku tanan nga mga tagaIsrael, nga dahil ro ngaean ni Jesu-Kristo nga tagaNazaret ro among gintawag ngani ro gahom 't-a nana ro nagpamayad sa tawo ngara nga iya sa inyong atubang. Si Jesus ngato hay tag inyong ginpaeansang sa krus pero ginbanhaw it Dyos. 11Si Jesus ro ginapatungdan sa nasueat sa Sagrado nga Kasueatan nga ‘ro bato nga ginbilang it mga panday nga owa it pueos hay imaw pa gali ro pinakaimportanti nga bato sa pundasyon it bilding.’#4:11 Salmo 118:22. Ag kamo't-a ro mga panday nga nagbilang kana nga owa it pueos. 12Owa eon kita it iba pang maagyan agod maeuwas kundi si Jesus eang, ay imaw eang sa bilog nga kalibutan ro gintao it Dyos nga dapat naton nga tuuhan agod maeuwas.”
13Hangawa gid ro mga myembro it *Sanedrin sa kaisog nga ginpakita nanday Pedro ag Juan ay sa tan-aw nanda hay mga ordinaryo eang sanda nga mga tawo ag owa it tinun-an. Hadumduman dayon nanda nga ro daywa ngato hay kaibahan anay gali ni Jesus. 14Mas kapin nga owa sanda it ikahambae ay hakita nanda ro eupog nga nagmayad nga una nagatindog sa euyo nanday Pedro ag Juan. 15Ngani ginpaguwa anay nanda sanday Pedro sa andang ginatipunan ngato ag nag-istorya dayon sanda nga sanda-sanda eang. 16Nagpaeangutan-an sanda, “Alinon ta ro mga tawo ngara ay hasayran eon gid it tanan nga tagaJerusalem ro milagrosong pamatuod nga andang gin-obra ag indi eon ron naton manigaran? 17Pero agod indi eon mageapnaag pa gid ro andang ginaturo parti kay Jesus, paandaman naton sanda nga indi eon gid maghambae o magturo parti kay Jesus ngato bisan kanyo.” 18Ngani ginpasueod nanda it uman sanday Pedro ag ginpaandaman nga indi eon gid maghambae o magturo parti kay Jesus. 19Pero nagsabat sanday Pedro ag Juan, “Ano ro tama sa mata it Dyos, sundon namon kamo o imaw ro among sundon? Abi, kamo ro maghusgar. 20Ro among mga hakita nga ginhimo ni Jesus, ag ro among mga habatian nga anang ginturo hay indi gid namon sarang mahipusan.” 21-22Ginpaeag pa gid sanda ku mga myembro it *Sanedrin bago ginbuhian. Gusto kunta nandang pinahan sanday Pedro ugaling hay owa sanda kasayod kon paalin ay nagadayaw ro mga tawo sa Dyos dahil sa milagrosong pamatuod nga andang hakita nga ginpamayad ro sangka tawo nga sobra eon nga 40 anyos nga eupog.
Nagpangamuyo ro mga Tumueuo nga Paisugon ro Andang Buot
23Pagkabuhi nanday Pedro ag Juan, nag-adto sanda sa andang mga kaibahan nga mga tumueuo ag ginsugid ro ginhambae kanda it mga pinuno it mga saserdote ag ku iba pang mga manogdumaea it mga Judio. 24Pagkabati kara nanda hay nag-ugyon sanda sa andang pagpangamuyo sa Dyos. Hambae nanda, “Makagagahom nga Ginuo, ikaw ro manunuga ku tanan sa eangit, sa kalibutan ag sa kadagatan. 25Paagi sa Espirito Santo ginpahambae mo sa amon nga lolo anay nga si David nga imong sueuguon nga,
‘Ham-an it naakig gid it duro kato ro ibang mga rasa it tawo nga owa nagakilaea sa Dyos? Ag ham-an it nagplano sanda it owa it pueos?
26 Ro mga hari iya sa kalibutan hay nagpahaom nga magpakig-away, ag ro mga pinuno hay nag-ugyon kuntra sa Ginuong Dyos, ag sa anang ginpromisa nga Maneueuwas.’#4:26 Salmo 2:1-2.
27Natuman gid ra iya mismo sa among syudad ay nag-aeapinan sanday *Herodes, Poncio Pilato, ro mga bukon it Judio ag ro among mga kadugo nga mga inapo ni Israel kuntra kay Jesus nga imong balaan nga sueuguon, nga imong ginbutang nga Maneueuwas. 28Pero sa anda ngatong ginhimo hay natuman ro imo nga ginplano kato pa nga matabo suno sa imong gahom ag pagbuot. 29Ginuo, pamatii tuo ro andang pagpamaeag, ag taw-i kami nga imong mga ulipon it kaisog it buot nga magsugid ku imong mensahi. 30Pakitaan ro imong gahom sa pagpamayad namon it mga masakit ag sa paghimo namon it mga makangawa-ngawa ag milagroso nga pamatuod paagi sa gahom ku imong balaan nga sueuguon nga si Jesus.”
31Pagkapangamuyo nanda hay nag-uylog ro lugar nga andang ginatipunan ag napuno sanda tanan it Espirito Santo ag halin kato hay nagsinugid sanda ku mensahi it Dyos nga may kaisog it buot.
Ro Pagkabutang ku mga Tumueuo hay Para sa Tanan
32Nagsambilog ro tanan nga mga tumueuo sa andang kabubut-on ag paino-ino. Owa gid it nagahambae nga ana eang ro anang pagkabutang dahil ginabilang nanda nga rato tanan hay para man sa andang mga kaibahan. 33Paagi sa bulig it Dyos sa mga apostoles hay hapamatud-an gid nanda sa iba ro pagkabanhaw ni Ginuong Jesus. Ag ginpinakamaayo gid sanda tanan it Dyos. 34Owa it bisan sambilog kanda nga ginakueang ay ginabaligya ku mga may ikasarang ro iba nandang mga eugta o mga baeay ag ro kabakeanan 35hay ginatao nanda sa mga apostoles agod ipanueupod sa iba suno sa andang kinahangeanon. 36Makaruyon ro gin-obra ni Jose nga tagaCyprus, isaea sa inapo ni Levi nga ginhayuan ku mga apostoles nga Barnabas (ro kahueugan ku anang ngaean hay “Gapabaskog it Buot”). 37Nagbaligya man imaw it eugta ag gindaea nana ro kabakeanan sa mga apostoles ag gintao kanda agod ipanueupod sa gakinahangean.
Currently Selected:
Mga Binuhatan 4: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
