Juan 3

Ro Ginturo ni Jesus kay Nicodemus

1May isaeang ka Pariseo nga si Nicodemus ro anang ngaean, nga myembro man it *Sanedrin. 2Isaeang gabii, nag-adto imaw kay Jesus ag naghambae, “*Rabbi, sayod kami nga ginpadaea ka it Dyos iya agod magturo kamon. Nakahambae ako kara dahil owa it makahimo ku mga milagroso nga pamatuod pareho sa imong mga ginahimo kon owa kana ro gahom it Dyos.”

3Nagsabat si Jesus, “Matuod gid rang ginahambae kimo nga kon ro isaeang ka tawo hay indi matawo it uman,#3:3 Sa Griniyego, ro kahueugan man kara hay “halin sa ibabaw.” indi imaw hitapoe sa mga sinakpan it Dyos.”

4Pero nagpangutana si Nicodemus, “Paalin baea matawo it uman ro tawo kon may idad eon imaw? Hay pa, makabalik pa imaw sa tiyan ku anang ina ag iunga eon man ay?”

5Nagsabat si Jesus, “Matuod gid rang ginahambae kimo nga kon ro tawo hay indi matawo paagi sa tubi#3:5 Sa Griniyego raya hay “paagi sa tubi ag espirito.” Sa Ezek 36:25-26, naghambae ro Dyos nga sa ulihi hay ana nga wisikan it tubi ro mga tawo agod limpyuhan sanda sa andang mga saea ag taw-an sanda it bag-o nga espirito. Ngani posible nga ro buot hambaeon ni Jesus dikara hay “kon ro batasan it tawo hay indi malimpyuhan ag mabag-o.” ag paagi sa Espirito Santo hay indi imaw hitapoe sa mga sinakpan it Dyos. 6Ro natawo iya sa kalibutan paagi sa andang ginikanan hay may kabuhi nga tawhanon pero ro natawo paagi sa gahom it Espirito Santo hay may kabuhi nga espirituhanon. 7Ngani ayaw hingawa nga ginhambae ko kimo nga dapat ka nga matawo it uman. 8Ro kahalimbawa karon hay hangin. Pagusto ra it huyop kon siin-siin ag indi masayran kon siin naghalin o siin nagapaadto, pero mabatian gid ro anang hagunos. Makaruyon man sa kada isaea nga matawo paagi sa gahom it Espirito#3:8 Sa Griniyego, ro kahueugan man it bisaea nga “espirito” hay “hangin.” Santo nga makita eang ro resulta sa andang kabuhi.”

9Pero nagpangutana pa gid si Nicodemus, “Hay paalin ron matabo?”

10Nagsabat si Jesus, “Ginatahod ka pa man nga maestro ku mga inapo ni Israel, pero owa ka't-ing gali kaeubot kara? 11Matuod gid rang ginahambae kimo nga nasayran gid namon ag nasaksihan ro among ginasugid pero owa gid kamo gapati karon. 12Indi ngani kamo magpati sa akong ginsugid kinyo parti sa mga butang iya sa kalibutan, mas kapin pa gid kon ro akon eon nga isugid kinyo hay ro mga butang parti sa eangit. 13Owa it nakasayod parti sa mga butang sa eangit ay owa pa it nakaadto idto. Pero ako nga Unga it Tawo hay makasugid karon ay idto ako maghalin. 14Ag ro matabo kakon hay pareho man sa natabo sa sawa nga saway nga ginpakabit ni Moises sa kahoy ag ginpatindog tag idto sanda sa *disyerto.#3:14 Num 21:4-9. Dahil dapat ako nga Unga it Tawo hay ieansang sa krus ag patindugon 15agod ro tanan nga nagatuo kakon hay may kabuhi nga owa it katapusan.

16“Matuod ron ay makaraya kabahoe ro paghigugma it Dyos sa mga tawo iya sa kalibutan nga ana nga gintao ro anang Unga, ro Owa't Kapareho, agod mangin sakripisyo agod ro tanan nga magatuo kana hay indi mapaimpyerno kundi may kabuhi nga owa it katapusan. 17Owa pagpaadtuna it Dyos iya sa kalibutan ro anang Unga agod sintinsyahan nga pinahan ro mga tawo, kundi agod maeuwas sanda paagi kana. 18Ngani ro tanan nga nagatuo kana hay indi eon gid pagsintinsyahan nga pinahan, pero ro mga owa nagatuo hay ginsintinsyahan eo't-a nga pinahan dahil owa sanda magtuo sa Unga it Dyos nga Owa't Kapareho.

19“Ginsintinsyahan eo't-a sanda nga pinahan dahil tag nag-abot sa kalibutan ro ginatawag nga ro Iwag hay owa nanda rato pagpatihi, kundi mas ginpahaegahan pa nanda ro kadueom dahil maeain ro andang mga buhat. 20Ro tanan abi nga ro buhat hay maeain hay ginakaugtan ro Iwag ag ginalikawan nanda ron agod indi mabulgar ro andang buhat. 21Pero ro tawo ma't-a nga ro buhat hay matarong hay nagapaeapit sa Iwag agod masayran nga ro anang buhat nga matarong hay anang ginahimo sa bulig it Dyos.”

Nagpaiway si Juan kay Jesus ag Ana ra nga Ginpabaluran

22Pagkataliwan it pilang adlaw, si Jesus ag ro anang mga sumueunod hay nag-adto sa sangka lugar nga owa it nagaistar sa probinsya it Judea. Nagtenir sanda idto it mabuhay-buhay ag nagpangbawtismo.#3:22 Bisan owa idto it nagaistar hay nagaadto ma't-a basi ro mga tawo idto kanday Jesus pagkasayod nanda kon siin sanda. 23Si Juan nga Manogbawtismo ma't-a hay nagapangbawtismo man sa Enon nga maeapit sa Salim, ay abo idto nga tubi. Sige idto ro inabot it mga tawo agod magpabawtismo. 24Owa pa't-a kato hapriso si Juan.

25Isaeang adlaw, nagbais ro pilang ka sumueunod ni Juan ag ro isaea sa andang kapareho man nga Judio parti sa andang ritwal sa pagpalibanaw. 26Pagkatapos, nag-adto ro mga sumueunod ngato ni Juan kana ag naghambae, “*Rabbi, tag ratong imong ginpakilaea sa mga tawo kon sin-o gid imaw, tag nakaibahan mo anay sa tabok it suba it Jordan hay hato't-a, nagapangbawtismo man. Ag idto't-a pa man nagainadto kana ro tanan nga tawo!”

27Nagsabat si Juan, “Ayaw ninyo imaw pagkahisai ay ro anang pagkabantog ngaron hay nagapamatuod nga nagahimo imaw ku kabubut-on it Dyos.#3:27 Sa Griniyego raya hay “Owa it mabaton ro sangka tawo nga bisan ano kon owa ron igtao kana halin sa eangit.” 28Kamo mismo hay saksi nga naghambae ako nga bukon it ako ro Maneueuwas nga ginpromisa it Dyos kundi ako ro ginpauna kana iya it Dyos. 29Kon sa kasae pa ron, ro nagapakasae sa nobya hay ro nobyo, bukon it ro abay it nobyo. Pero kon sa seremonya eon hay nalipay it duro ro abay nga nagatindog sa kilid it nobyo, ag nagapamati samtang ginadayaw ku nobyo ro anang nobya. Makaruyon man ako, nalipay ako it duro ay iya eon ro nobyo, ag nagapaeapit kana ro anang nobya. 30Ag dapat nga mas magbantog pa gid imaw ag dapat nga ako hay indi eon pag-inatuhon.”

Ro Pagkadaeayawon ku Tagaeangit nga Ginpaadto Iya it Dyos

31Nag-adto imaw iya halin sa eangit ag eabaw imaw sa tanan. Kita nga mga tawo hay tagakalibutan, ag ro atong pagginawi hay kinalibutanon gid, ag ro atong ginaistoryahan hay parti eang sa mga butang iya sa kalibutan. Pero imaw 't-a nga nag-adto iya halin sa eangit hay eabaw sa tanan. 32Ro anang hakita ag habatian idto sa eangit hay imaw ro anang ginasugid, pero sangkiri ea't-a ro nagapati kana. 33Ro mga nagpati ngato kana hay nagapamatuod man nga matuod gid ro ginahambae it Dyos#3:33 Basaha sa Luc 3:22. 34tungod ro mga ginahambae mismo it Dyos ro ginasugid ku anang ginpadaea iya, ag gintaw-an imaw it Dyos it Espirito Santo nga owa it hawid-hawid. 35Ginahigugma gid it Dyos Ama ro ana nga Unga mawron nga kana kara gintugyan ro tanan-tanan. 36Ro nagatuo sa Unga hay may kabuhi nga owa it katapusan. Pero ro indi magtuo kana hay indi gid makasamit ku ruyon nga kabuhi, kundi makasamit ku pina it Dyos hasta sa owa it katapusan.

Currently Selected:

Juan 3: akl

Highlight

Copy