Juan 4
4
Ro Bayi nga TagaSamaria nga Nakahambae ni Jesus sa Bubon
1Ro mga Pariseo hay nakabalita nga ro ay Jesus nga ginakumbinsi nga mangin anang mga sumueunod hay mas nagainabo pati ro anang ginabawtismuhan kaysa sa ay Juan. 2(Pero ro minatuod hay bukon it si Jesus ro nagapangbawtismo kundi ro anang 12 nga haunang mga sumueunod.) 3Ngani pagkasayod ni Jesus nga nakabalita karon ro mga Pariseo hay naghalin imaw sa Judea ag nagbalik sa Galilea, kaibahan ro anang mga sumueunod.#4:3 Naghalin imaw sa Judea ay sayod nana nga gusto imaw nga dakpon ag ipapatay ku mga Pariseo, pero bukon pa it rato ro oras suno sa plano it Dyos ay dapat anay imaw magturo sa Galilea. 4Sa andang pagpamanawon pabalik hay sayod ni Jesus nga importanti't-a nga mag-agi sanda sa probinsya it Samaria.
5Tag idto eon sanda sa Samaria, nakaabot sanda sa banwa it Sicar nga maeapit sa eugta nga ginpapanubli anay ni Jacob sa anang unga nga si Jose.#4:5 Basaha sa Gen 48:21-22. 6Ag idto man rikato ro bubon nga ginpaobra anay ni Jacob. Mga ika-6 nga oras#4:6 Kon sa mga Judio, raya hay truadlaw pero kon ro ginagamit ni Juan sa paghuyap it oras hay ana it mga Romano, raya hay alas 6 it hapon. Daya man ro oras nga naandan it mga tawo nga magsag-ob. Basaha ro “Pagpaathag kon paalin ro paghuyap ni Juan it oras sa rayang anang ginsueat” sa “Mga Mapinuslanon nga mga Pamisaea” sa printi ku rayang sueat. eon rato ag gin-gaoy gid si Jesus sa andang pagpinanaw, ngani nagpungko imaw sa may bubon.
7Tapos, may bayi nga Samaritanhon nga nag-abot agod magsag-ob.
Naghambae kana si Jesus, “Taw-i abi ako, Nang, it tubi.” 8Owa eon kato idto ro mga sumueunod ni Jesus, ay nagpanaw sa banwa agod magbakae it andang makaon.
9Hakibot ro bayi sa ginhambae ni Jesus ngani sinana ku bayi, “Ha? Judio ka't-ing, tapos mangayo ka it tubi kakon nga Samaritanhon, ag bayi pa!” (Ruyon sinana ku bayi ay indi maggamit ro mga Judio ku ilimnan o kaean-an nga hagamit eon ku mga Samaritanhon.)
10Nagsabat si Jesus, “Kon hasayran mo eang kunta kon mauno ro regalo nga gustong itao kimo it Dyos, ag kon sayod ka kunta kon sin-o ako nga nagapangayo kimo it tubi hay ikaw 't-a ro mangayo kakon ag ro akong itao kimo hay tubi nga nagatao it kabuhi nga owa't katapusan.”
11Nagpangutana ro bayi, “Sir, owa ka't-ing it timba ag kadaeom 't-a ro bubon ngara. Hay siin ka mabuoe it tubi ngaron nga nagatao it kabuhi? 12Ginpapanubli kamon ku aton anay nga lolo nga si Jacob ro bubon ngara. Siin ka man mabuoe it tubi nga mas manami pa kaysa sa tubi nga anang gin-inom nga halin sa rayang bubon, ag gin-inom man ku anang mga unga ag pati ku anang mga kasapatan? Hay mas ka pa't-ing kaysa kana ay?”
13Pero nagsabat si Jesus, “Ro nagainom it tubi sa bubon ngara hay uhawon it uman. 14Pero ro nagainom it tubi nga akon nga ginatao hay indi eon gid pag-uhawon it uman bisan hasta hin-uno tungod ruyon hay mangin pareho it tuburan nga nagabusawak gid sa ana nga kabuhi ag magatao kana it kabuhi nga owa it katapusan.”
15Naghambae ro bayi, “Sir, taw-i abi ako ku tubi ngaron nga ginahambae nimo, agod indi eon ako pag-uhawon it uman ag agod indi eon ako magbinalik-balik it pagsinag-ob iya.”
16Ginhambae dayon ni Jesus ro bayi, “Sueanga anay rito ro imong asawa ag daehon iya.”
17Nagsabat imaw, “Pero owa ako it asawa.”
Sumabat si Jesus, “Matuod ro imong hambae ngaron nga owa ka it asawa. 18Limang beses ka eon abi nga nag-asawa ag ro eaki nga imong ginakabuhi makaron hay bukon mo man it asawa. Matuod gid ma't-a ro imong ginhambae.”
19Naghambae dayon ro bayi, “Sir, propeta ka't-ing gali. 20Iya sa bukid ngara#4:20 Raya siguro hay bukid it Gerizim. kato nagsimba sa Dyos ro atong mga kalolo-lolohan,#4:20 Kato anay hay nagpatindog it altar para sa Dyos si Abraham ag si Jacob sa Sekem nga sa bukid ngato it Gerizim (basaha sa Gen 12:6-7 ag 33:20). pero kon kinyo nga mga Judio hay sa Jerusalem eang ro lugar kon siin dapat magsimba.”
21Nagsabat si Jesus, “Patihi ro akong ginahambae ngara kimo, Nang. Maabot ro oras nga bukon eon it importanti kon iya sa bukid ngara o sa Jerusalem magsimba sa Dyos Ama ro mga tawo. 22Kamong mga Samaritanhon hay nagasimba sa owa ninyo hakilaea, pero kaming mga Judio hay kilaea namon ro among ginasimba dahil ro Maneueuwas hay halin sa linahi it mga Judio. 23Pero maabot ro oras ag makaron eon ngani ron, nga ro pagsimba ku mga tawo sa Dyos Ama hay sa bug-os nandang tagipusuon ag kabubut-on ag nabase sa kamatuuran halin kana. Makaruyon abi nga klasi it pagsimba ro anang ginausoy sa mga tawo. 24Espirito't-a ro Dyos ag owa it eawas ngani ro mga nagasimba kana hay kinahangean nga magsimba kana sa bug-os nandang tagipusuon ag kabubut-on, ag nabase sa kamatuuran halin kana.”
25Naghambae dayon ro bayi, “Sayod ako nga ro Mesias hay magaabot (nga ginatawag man nga Kristo, ro Maneueuwas nga ginpromisa it Dyos) ag pag-abot nana hay ana katon nga ipaathag ro tanan-tanan nga butang.”
26Nagsabat kana si Jesus, “Ako nga nagapakighambae kimo ro imo ngarong ginapaabot.”
27Tag nagahambae pa si Jesus hay nag-abot ro anang mga sumueunod. Hangawa gid sanda ay nagaistorya imaw sa isaeang ka bayi. Pero owa gid kanda it nagpangutana kon gaalin ro bayi ngato, ag kon ham-an it nagaistorya kara kana si Jesus.#4:27 Sa kultura it mga Judio, nagaawat eang sinanda it oras ro sangka *rabbi kon mag-inistorya imaw sa sangka bayi.
28Pagkatapos, inaywanan ku bayi ro anang banga ag nagbalik sa banwa. Pag-abot idto, hambae nana sa mga tawo, 29“Musyon kamo! Adtunan naton ro tawo nga naghambae kakon ku tanan nakong ginpang-obra. Bukon man siguro it imaw ro Maneueuwas nga ginpromisa it Dyos pero imaw lang kunta, no?” 30Ngani gumuwa sanda sa banwa ag umadto kon siin si Jesus.
31Idto ma't-a sa may bubon, ginahinambae si Jesus ku anang mga sumueunod, “*Rabbi, kaon eon.”
32Pero nagsabat imaw, “May akon 't-a nga pagkaon nga owa ninyo masayri.”
33Sinanda dayon ku anang mga sumueunod sa kada isaea, “Sin-o man abi kana iya ro madaea it pagkaon?”
34Naghambae si Jesus kanda, “Ro akong pagkaon hay ro pagtuman ku kabubut-on ku nagpadaea iya kakon ag ro pagtapos ku anang ginapaobra kakon. 35Bukon abi it may hambaeunon kamo nga ‘ap-at nga buean bago makaani’? Pero ginahambae ko kinyo nga tig-aeani eon kon tawo't-a ro aeanihon. Ngani umpisa makaron, kon makakita kamo it mga tawo, bilanga ninyo sanda nga pareho it aeanyon nga haom eon anihon. 36Ro nagaani kanda hay ginabaeusan it Dyos, ag sanda nga ginaani hay taw-an it kabuhi nga owa it katapusan. Ngani ro nagtanom ku mensahi it Dyos ag ro nagaani hay magkaibahan nga magakalipay. 37Kon mawron, matuod gid ro hambaeunon nga ‘eain ro gatanom ag eain man ro gaani.’ 38Ginpapanaw ko kamo agod anihon ro owa ninyo pagkabudlayi. Iba karon ro nagkabudlay ag kamo ro magaani ku andang kinabudlayan.”
39Abo nga mga Samaritanhon nga tagaidto sa banwa ngato ro nagtuo kay Jesus dahil sa ginhambae ku rato nga bayi nga ginhambae mana nana kakon ro tanan nakong ginpang-obra. 40Ngani pag-abot nanda kay Jesus hay ginhinawiran nanda imaw nga magtenir anay sa andang lugar. Ngani nagtenir imaw idto it daywang adlaw 41ag abo pa gid ro nagtuo kana dahil sa anang pagturo. 42Hambae ku mga tawo sa bayi ngato, “Gatuo eon kami makaron bukon eang it dahil sa imong ginsugid, kundi dahil habatian namon mismo ro anang hambae. Ngani sigurado eon kami nga imaw matuod ro Maneueuwas it mga tawo sa bilog nga kalibutan.”
Ginpamayad ni Jesus ro Unga it Sangka Opisyal
43Pagkataliwan it daywang adlaw ngato, nagpadayon sanday Jesus sa andang pagpamanawon pabalik sa probinsya it Galilea. 44Nag-adto imaw idto bisan imaw mismo ro naghambae nga ro propeta hay owa ginapadunggi sa ana mismong nasyon. 45Pag-abot nanda sa Galilea hay gin-abi-abi#4:45 Gin-abi-abi man lang nanda si Jesus ay gusto nandang makakita it mga milagro, bukon it dahil ginapadunggan nanda imaw bilang Maneueuwas it bilog nga kalibutan pareho ku gin-obra ku mga Samaritanhon. gid imaw ku mga tagaidto, dahil hakita nanda ro tanan nanang gin-obra sa Jerusalem pag-adto nanda sa Pagtililipon sa Pagdumdum ku *Pagtaliwan.
46Samtang idto si Jesus sa Galilea hay nag-adto imaw it uman sa Cana kon siin ginhimo nana kato nga bino ro tubi. Idto sa banwa it Capernaum#4:46 Ro kaeayo it Capernaum sa Cana hay mga 33 kilometros. nga sakop man ku probinsya it Galilea hay may opisyal it gobyerno nga may unga nga eaki nga nagamasakit. 47Habatian ku opisyal ngato nga nag-abot si Jesus sa Galilea halin sa Judea ngani ana ra nga gin-adtunan. Pag-abot idto hay nagpakitluoy imaw kay Jesus nga mag-adto sa anda ag pamayron ro anang unga nga nagatagumatayon.
48Pero naghambae si Jesus kana, “Indi gid-a kamo magtuo kakon kon indi ninyo ako hikita nga mag-obra it makangawa-ngawa nga milagroso nga pamatuod.”
49Nagsabat ro opisyal, “Sir, musyon bago mamatay ro akong unga.”
50Naghambae kana si Jesus, “Uli eon ay mayad eon ro imong unga.”
Nagpati ro opisyal sa ginhambae ni Jesus ag umuli dayon imaw. 51Pagkamasunod nga adlaw, tag nagapaeusob pa eang imaw paadto sa Capernaum hay ginsueang-sueang imaw ku anang mga ulipon ag ginsugiran nga mayad eo't-a ro anang unga. 52Nangutana dayon kanda ro opisyal kon kan-o imaw nagmayad.
Hambae nanda, “Gulpi eang naduea ro anang eagnat kahapon ku ika-7 nga oras.”#4:52 Basaha ro “Paathag kon paalin ro paghuyap ni Juan it oras sa rayang anang ginsueat” sa “Mga Mapinuslanon nga mga Pamisaea” sa printi ku rayang sueat. 53Dikato hasayri ku opisyal nga nagmayad ro anang unga ku oras ngato mismo nga naghambae si Jesus nga “Mayad eon ro imong unga.” Ngani nagtuo imaw kay Jesus, pati ro anang bilog nga panimaeay. 54Raya ro pangaywa nga milagroso nga pamatuod nga gin-obra ni Jesus sa Galilea. Gin-obra ra nana ku pangaywa nanang pagbalik sa Galilea halin sa Judea.
Currently Selected:
Juan 4: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
