Juan 5

Nagpamayad si Jesus it Sangka Eaki nga Eupog sa Adlaw it Inogpahuway

1Ku ulihi, may Pagtililipon eon man ro mga Judio, ngani nagpaJerusalem eon man si Jesus. 2Idto sa Jerusalem hay may gin-obra nga maeapad nga bubon nga maeapit sa pwertahan nga kon tawgon hay Pwertahan it mga Karnero.#5:2 Raya hay sambilog sa mga daeagko nga pwertahan sa mataas nga pader palibot sa syudad it Jerusalem. Dikara ginapaagya ro mga karnero nga inoghaead sa Templo. Ro bubon ngara hay ginatawag nga Betesda sa linggwahe ku mga Judio. May limang ka panilungan sa mga kilid kara 3ag dikato nagaeubog ro kaabo-abo nga mga may diperensya sa eawas pareho it mga bulag, mga eupog, ag mga paralisado.#5:3 Sa ibang mga kopya it Griniyego nga kasueatan hay gintapoe ro 3b-4: “dahil nagahueat sanda nga maghueag ro tubi. 4 Kato abi kuno hay may anghel kon amat nga gapanaog sa ratong tilipunan it tubi ag ginakueabo ro tubi ag kon sin-o ro hiuna nga makaeusob dikato hay gamayad bisan ano ro anang baeatian.” 5Kaibahan sa mga tawo ngato idto hay sangka eaki nga 38 anyos eon ro diperensya sa anang eawas. 6Hakita imaw ni Jesus nga nagaeubog idto ag hasayran nana nga mabuhay eon nga makarato ro sitwasyon ku eaki ngato. Ana ra dayon nga pinangutana, “Gusto mo nga magmayad?”

7Nagsabat ratong may diperensya, “Sir, gusto ko kunta, ugaling hay owa it gahakwat kakon paadto sa bubon kon kueabuon eon ro tubi. Permi akong haunahan it iba ay indi ako kadali-dali it adto idto.”

8Naghambae dayon si Jesus, “Bangon. Hakwata ring eugban ag magpanaw ka dayon.” 9Nagmayad eagi tag eaki, ag anang ginhakwat ro anang eugban ag pumanaw.

*Adlaw it Inogpahuway kat natabo rato 10ngani ginbuslahan ku mga manogdumaea it mga Judio ro eaki ngato nga nagmayad.

Hambae nanda, “Hoy! Adlaw it Inogpahuway makaron! Eapas sa atong mga kasuguan ro imong pagbitbit ku ing eugban ngaron!”

11Nagsabat ro eaki, “Hay ginhambae ma't-a ako ku ratong nagpamayad kakon nga hakwaton ko kuno ro akong eugban ag magpanaw.”

12Ginpangutana nanda imaw, “Sin-o ro naghambae kimo karon?” 13Pero owa imaw it ikasugid nga ngaean ay nakahalin eo't-a si Jesus it hipos, ag matsa naduea ea't-a imaw sa kaabo nga tawo idto.

14Ku ulihi, nakita ni Jesus ratong eaki sa Templo. Ginhambae dayon imaw ni Jesus, “Haron, mayad ka eon pero dapat ka eon nga maghinuesoe ag magtalikod sa imong mga saea. Dahil kon indi hay basi mas pa ro imong maagyan kaysa sa imong diperensya anay ngato.” 15Nagpanaw dayon tag eaki ag bumalik sa mga manogdumaea ngato ag ginsugid nga si Jesus gali ro nagpamayad kana.

Ginhiningabot si Jesus Dahil sa Anang mga Ginahimo sa Adlaw it Inogpahuway ag sa Anang Pag-ako nga Imaw hay Dyos

16Dahil makaraya ro mga ginhinimo ni Jesus sa mga Adlaw it Inogpahuway, mawron nga halin kato, ginhiningabot imaw ku mga manogdumaea.

17Pero ro ginasabat ni Jesus kanda hay, “Ro Dyos nga akong Ama hay owa gapundo sa anang ginaobra iya sa kalibutan, mawron nga owa ko man ginapunduhi ro anang ginapaobra kakon.” 18Pagkabati kara ku mga manogdumaea hay mas kapin pa gid nga nag-inusoy sanda it ideya nga hipatay imaw. Kon kanda, owa eang nana pageapasa ro Kasuguan parti sa Adlaw it Inogpahuway, kundi ana pa nga ginaako nga katupong imaw it Dyos Ama, ay ginhambae nana nga ana gid mismo nga ama ro Dyos.

Ro Otoridad ni Jesus nga Magbanhaw it Patay ag Maghukom

19Ngani naghambae si Jesus sa mga manogdumaea ngato, “Matuod gid rang ginahambae kinyo nga Ako nga Unga it Dyos hay indi puydi nga mag-obra it akon-akon eang kundi ro akon eang nga ginaobra hay kon ano ro akong hasayran nga gusto ku akong Ama nga obrahon. Ngani ro mga ginaobra it Dyos Ama hay anang ginaobra paagi kakon nga anang Unga. 20Tungod palangga it Dyos Ama ako nga anang Unga, mawron nga ginapakita nana kakon ro tanan nga anang ginapaobra kakon ag mas pa sa akong nahimo eon ro anang ipakita kakon nga akong obrahon agod mangawa kamo. 21Gabanhaw ro Dyos Ama it mga patay ag gatao it kabuhi sa mga tawo ag makaruyon man ro ginaobra nakon nga anang Unga. Ako man ro gatao it kabuhi sa gusto nakon nga taw-an. 22Bukon 't-a abi it ro Dyos Ama ro magahukom sa mga tawo kundi ako nga anang Unga ro anang gintaw-an it tanan nga otoridad nga maghukom. 23Gin-obra nana ron agod ako nga Unga hay tahuron it tanan nga tawo, pareho ku andang pagtahod kana nga akong Ama. Ro owa nagatahod kakon nga Unga hay owa man nagatahod sa akong Ama nga nagpadaea kakon iya.”

24Naghambae pa gid si Jesus, “Matuod gid rang ginahambae kinyo nga ro nagapamati sa akong ginahambae ag nagatuo sa nagpadaea iya kakon hay may kabuhi nga owa it katapusan. Indi imaw pagasintinsyahan it kamatayon nga owa it katapusan, dahil gintaw-an eon imaw it kabuhi nga owa it katapusan. 25Matuod gid rang ginahambae kinyo nga maabot ro oras, ag makaron eon ngani ron, nga mabatian ku mga pareho it patay tungod sa andang kasae-anan#5:25 Basaha sa Efeso 2:1. ro hambae nakon nga Unga it Dyos, ag ro magapamati hay taw-an ko it minatuod nga kabuhi. 26Mahimo ko ron tungod kon paalin nga may gahom ro akong Ama nga magtao it kabuhi hay makaruyon man ako. Gintugot nana nga ako man hay may gahom nga magtao it kabuhi.#5:26 Nagatao si Jesus it minatuod nga kabuhi ag kabuhi nga owa it katapusan. 27Gintaw-an man nana ako it otoridad nga maghukom sa mga tawo tungod ako ro Unga it Tawo. 28Ayaw kamo it kangawa sa akong ginhambae ngara tungod maabot ro oras nga mabatian it tanan nga mga patay ro akong limog 29ag mabanhaw sanda ag magaguwa sa andang mga eueubngan. Ro mga mayad ro binuhatan hay magakabuhi hasta sa owa it katapusan, pero ro maeain ro binuhatan hay pagasintinsyahan nga pinahan hasta sa owa it katapusan. 30Indi puydi nga mag-obra ako it akon-akon eang. Kon maghukom ako hay ginasunod ko eang kon ano ro ginahambae kakon it Dyos. Ngani, tama ro akon nga paghukom sa mga tawo tungod ro akong gusto nga tumanon hay bukon it ro akong pagbuot kundi ro ana ku nagpadaea iya kakon.”

Ro mga Pamatuod nga si Jesus ro Maneueuwas nga Ginpadaea Iya it Dyos

31Naghambae si Jesus, “Kon ako eang ro magpamatuod parti sa akong kaugalingon hay masinghan kamo nga bukon it matuod ro akong ginahambae. 32Pero may una't-a nga nagapamatuod parti kakon.#5:32 Ro ginapatungdan kara ni Jesus hay ro Ama (basaha sa bersikulo 37). Ag sayod ako nga ro anang ginahambae parti kakon hay matuod.

33“Kamo ngani mismo hay nagpaadto it mga tawo kay Juan nga Manogbawtismo agod magpamati sa anang pagturo. Ag ginpamatud-an nana kon sin-o gid ako. 34Owa eon gid man it kinahangean nga may tawo nga magpamatuod parti kakon pero ginapadumdum ko manlang kamo ku ginhambae ni Juan agod maeuwas kamo kon magpati kamo. 35Si Juan hay pareho it iwag nga gatao it kahayag sa paino-ino it mga tawo ag sa matag-od nga tyempo hay nalipay gid kamo nga nahayagan ro inyong paino-ino sa anang mga ginaturo. 36Pero may pagpamatuod parti kakon nga mas pa sa pagpamatuod ngato ni Juan. Ruyon hay ro akong mga ginahimo nga ginpaobra kakon ku akong Ama, nga dapat ko nga tapuson. Nagapamatuod ron sanda nga ro Ama gid ro nagpadaea iya kakon. 37Ag ro Ama nga nagpadaea iya kakon hay imaw mismo ro nagpamatuod parti kakon.#5:37 Tanan nga ginpasueat it Dyos sa Daan nga Kasugtanan hay nagatungod kay Jesus ag rato hay pamatuod it Dyos parti kana. (Basaha sa Mat 3:17, Mar 1:11 ag Luc 3:22.) Halin pa kato hay owa gid ninyo pagpamatii ro anang ginahambae ag owa man ninyo hakita kon ano gid ro anang hitsura. 38Owa man ninyo ginatanom sa inyong paino-ino ro anang ginahambae tungod ro anang ginpadaea iya hay ruyon mismo ro owa man ninyo ginapatihi. 39Sige ro inyong tinuon ku Sagrado nga Kasueatan ay gaeaom kamo nga paagi sa inyong pagtinuon ngaron hay makabaton kamo it kabuhi nga owa it katapusan. Pero ro Kasueatan ngaron hay nagapatungod kakon 40ugaling hay owa gihapon kamo naila magdangop kakon agod taw-an ko kamo ku kabuhi ngaron nga owa it katapusan.

41“Owa ako nagahangad nga dayawon it mga tawo nga parehas kinyo. 42Kilaea ko gid kamo ag sayod ko nga owa gid kamo it paghigugma sa Dyos. 43Nag-adto ako iya nga may otoridad ku akon nga Ama ugaling owa ninyo ako ginabatuna. Pero kon may mag-abot ngani iya kinyo nga gaturo nga sa ana eang nga kaugalingon gahalin ro anang otoridad hay imaw 't-a ro inyong ginabaton. 44Paalin 't-a abi kamo magtuo kakon kon ro inyo eang nga ginahangad hay ro pagdayaw it kada isaea, ag owa gid kamo gahangad ku pagdayaw it owa't kapareho nga Dyos?

45“Sa adlaw it paghukom hay bukon 't-a it ako ro magaakusar kinyo sa Ama. Nagasalig kamo nga sa inyong pagtuman ku Kasuguan nga ginsueat ni Moises hay maeuwas kamo. Pero indi ninyo ron matuman it husto, ngani si Moises mismo ro magaakusar kinyo. 46Kon matuod nga nagapati gid kamo sa ginsueat ni Moises hay inyo man kunta ako nga patihan tungod ako't-a ro ginapatungdan sa anang ginsueat ngato.#5:46 Abo nga bersikulo sa ginsueat ni Moises ro nagatumod kay Jesus. Halimbawa sa Gen 3:15; 9:26; 22:18; 49:10; Num 24:17; Deut 15:18, ag iba pa. 47Pero sa minatuod hay owa't-a kamo gapati sa anang ginsueat ngani paalin man kamo magpati sa akong ginahambae?”

Currently Selected:

Juan 5: akl

Highlight

Copy