Lucas 17

Indi Naton Pagtentaron ro Iba nga Magpakasaea ag Patawaron Naton ro Nagakasaea Katon

(Mat 18:6-7, 21-22; Mar 9:42)

1Naghambae si Jesus sa anang mga sumueunod, “Indi gid malikawan nga nagaabot ro mga tentasyon pero makangingidlis gid ro matabo sa ulihi sa nagatentar sa anang isigkatawo nga magkasaea. 2Mas mayad pa't-a nga hinigtan imaw it mabahoe nga galingan nga bato sa liog ag tinagbong sa eawod kaysa sa masamitan na ro pina it Dyos sa ulihi kon makatentar imaw nga magkasaea ro bisan sambilog eang sa mga bukon pa it malig-on ro pagtuo kakon.#17:2 Sa Griniyego raya hay “isaea sa mga maisot ngara.” 3Ngani bantayi ro inyong hueag.

“Kon magkasaea kimo ro imong igmanghod, hambaei imaw, ag kon magpangayo imaw it patawad hay patawara. 4Bisan magkasaea pa imaw kimo it pitong beses sa sang adlaw ag magbinalik ag magpinangayo imaw it patawad sa kada pagkasaea nana kimo hay dapat nimo imaw nga patawaron.”

5Pagkabati ku mga apostoles sa ginhambae ngato ni Jesus, naghambae sanda kana, “Dugangi pa gid ro among pagtuo.” 6Nagsabat ro Ginuo, “Kon may inyo nga pagtuo nga bisan mat busoe eang it mustasa#17:6 Sa andang lugar ro busoe it mustasa hay kaisot-isot gid ag ro mustasa hay tanom nga nagataas it mga 3 o 4 nga metro. it bahoe, ag halimbawa nga ginsugo ninyo ro mabahoe ngara nga kahoy nga gabuton nana ro anang kaugalingon ag itanom sa eawod hay tumanon 't-a kamo karon.”

Dapat nga Mapainubuson Kita sa Pagtuman sa Dyos, Bukon Eang it Para Dayawon

7Naghambae pa gid si Jesus, “Halimbawa abi nga may imong ulipon. Gaarado imaw o gabantay it karnero. Pagkauli nana halin sa anang obra, ginahambae baea nimo imaw nga magkaon eagi ag ikaw nga anang amo hay owa pa ngani kakaon? 8Bukon abi it imo anay imaw nga ginahambae, ‘Mag-ilis ka anay ag hikutan mo dayon ako it ihapon. Pagkatapos hay serbihan mo ako it pagkaon ag mainom. Kumaon ka dayon kon tapos eon ako.’ 9Dapat baea nga magpasaeamat ro amo sa ulipon dahil gintuman ro anang sugo? Indi't-a dapat ron ay ruyon ma't-a ro obligasyon it ulipon. 10Makaruyon man kamo. Kon gintuman ninyo ro tanan nga ginsugo kinyo it Dyos, ayaw kamo mag-isip nga dapat kamo nana nga dayawon kundi butangan sa inyong isip nga, ‘Mga ulipon man lang kami it Dyos. Gin-obra man lang namon ro among obligasyon.’ ”

Sambilog Eang ro Nagpasaeamat kay Jesus sa Napueo nga Ginpamayad Nana

11Tag nagapadayon si Jesus sa anang pagpamanawon paadto sa Jerusalem,#17:11 Ro anang pagpamanawon ngara hay nag-umpisa sa kapitulo 9:51. idto imaw nag-agi sa may dueunan it probinsya it Samaria ag probinsya it Galilea. 12Tag nagapasueod eon imaw sa sangka baryo, may napueong ka aruon idto nga nagsueang-sueang kana pero pumundo sanda tag maeayo-eayo pa sanda kay Jesus#17:12 Owa sanda nagpaeapit kay Jesus ay suno sa andang kultura hay indi puydi magpaeapit ro mga aruon sa ibang tawo ay basi hitapnan sanda. 13ag nagsinggit, “Jesus! Sir! Maeuoy ka kamon!” 14Pagkakita kanda ni Jesus hay naghambae imaw, “Adto kamo sa mga saserdote#17:14 Kon nagmayad eon ro sangka tawo sa anang baeatian sa panit hay dapat nga mag-adto imaw sa saserdote ag magpatan-aw. Ro saserdote ro gahambae kon ro tawo hay nagmayad eon sa anang baeatian ngato (Lev 14:1-32). ag magpatan-aw.” Nagpanaw sanda ag tag sa daean pa eang sanda hay nagmayad ro andang aro. 15Pagkapan-o it sambilog kanda nga nagmayad eon imaw hay bumalik imaw ag nagsininggit it pagdayaw sa Dyos. 16Naghapa imaw sa atubang ni Jesus ag nagpinasaeamat kana. TagaSamaria pa gali ro tawo ngato. 17Naghambae si Jesus, “Bukon abi it napueo ro nagmayad? Hay siin 't-a ro siyam? 18Ham-an it daya eang nga bukon pa it Judio ro nagbalik agod magdayaw sa Dyos?” 19Ginhambae dayon ni Jesus ratong tawo, “Tindog ag pumanaw ka eon. Naeuwas ka tungod nagatuo ka kakon.”

Pagturo Parti sa *Paghari it Dyos ag sa Pagbalik ni Jesus Iya sa Kalibutan

(Mat 24:23-28, 37-41)

20May mga Pariseo nga nagpangutana kay Jesus kon hin-uno eon magahari ro Dyos sa kalibutan. Nagsabat si Jesus, “Indi makita it mata ro pag-abot ku paghari it Dyos 21tungod ro paghari it Dyos hay ro anang paghari sa inyong tagipusuon. Ngani owa it makahambae nga iya eon o idto mana dikato.” 22Tapos ginhambae nana sa anang mga sumueunod, “Maabot ro tyempo nga inyong handumon nga makasamit bisan sang adlaw eang ku daeayawon nga paghari nakon nga Unga it Tawo, pero indi pa ron puydi. 23May mahambae kinyo nga idto mana imaw o hara mana, iya imaw. Ayaw kamo it pati ag munot kanda, 24tungod ro pagbalik nakon nga Unga it Tawo hay pareho it kilat nga gaguhit ro hayag sa bilog nga kaeangitan ag makita it tanan nga tawo. 25Pero bago ako magbalik hay dapat mag-antos anay ako it abo nga kalisod, ag indi pagpatihon ku mga tawo sa makaron nga tyempo.

26“Ro ginaobra ku mga tawo sa tyempo nga magbalik ako nga Unga it Tawo hay pareho man sa ginaobra ku mga tawo sa tyempo anay ni Noe. 27Bangod kato, bago nagbaha hay owa sanda mag-inato ku maabot nga kaeaeat-an kundi sa adlaw-adlaw hay normal ma't-a gihapon ro andang pagpangabuhi nga nagakaon, nagainom, ag nagaaeasawa hasta sa oras nga nagsueod sanday Noe sa arka. Nagbaha dayon ag nagkaeaeumos sanda tanan. 28Makaruyon man kato ro hilimuon it mga tawo sa tyempo ni Lot tag idto imaw nag-istar sa Sodoma. Nagakaon, nagainom, nagapamakae, nagabaligya, nagatanom, ag nagapatindog sanda it baeay, pareho gid it normal nga pagpangabuhi. 29Pero sa adlaw nga naghalin sanday Lot sa Sodoma hay ginpaueanan it Dyos it kaeayo ag nagadaba-daba nga asupre ro ratong lugar ag nagkaeamatay ag nagkaeasamad ro tanan idto. 30Makaruyon man nga bukon it haom ro mga tawo kon magbalik ag magpakita eon ako nga Unga it Tawo.

31“Pag-abot ku adlaw ngaron, kon may tawo nga idto sa atop#17:31 Sa lugar it Israel ku rato nga tyempo it pagsueat ku Bibliya, ro atop it baeay hay matapan ag human sa pinatig-a nga eapok. Rato hay puyding bueun-agan ag taeaguan it trigo ag iba pa nga eamigas ag puydi man nga paeahuway-huwayan. ku anang baeay hay dapat nga magpaeagiw eagi imaw ag indi eon magsueod sa baeay agod bue-on ro anang pagkabutang. Ag ro nagaobra sa eanas hay indi eon dapat nga mag-uli. 32Dumduma ninyo ro natabo sa asawa ni Lot.#17:32 Ro asawa ni Lot hay nangin haligi nga asin paglingot nana sa nagakasunog nga mga syudad it Sodoma ag Gomora (Gen 19:26). 33Ro bisan sin-o nga naila nga magsunod sa ana eang nga gusto sa anang kabuhi hay mamatay man gihapon ag pinahan sa impyerno. Pero ro bisan sin-o nga magsakripisyo ku anang gusto agod sundon ro akong pagbuot hay makabaton it kabuhi nga owa it katapusan.

34“Ginahambae ko eagi kinyo nga kon gabii ako magbalik, kon may daywa nga nagahulid sa katri pero sambato eang kanda ro akong sumueunod hay bue-on ro sambato kanda ag hiaywanan ro anang kaibahan. 35Kon may daywang ka bayi nga nagabayo pero sambato eang kanda ro akong sumueunod hay bue-on kanda ro sambato ag hiaywanan ro sambato.”#17:35 Owa gintapean ro bersikulo 36 sa ibang kopya it Sagradong Kasueatan: “Kon may daywang ka tawo nga gaobra sa eanas hay bue-on ro sambilog ag hiaywanan ro sambilog.” 37Nagpangutana dayon ro anang mga sumueunod, “Siin ra matabo, Ginuo?” Nagsabat si Jesus, “Matabo gid ra pareho it haeambaeunon nga madali hikita kon siin kampi ro may patay nga eawas tungod idto ro mga pispis nga buwitri nagadaeapo agod magtuka.”

Currently Selected:

Lucas 17: akl

Highlight

Copy