Muuduko 13
13
Eburameke Looteke tooral somuudeyapinolo tovinokwono
1To'no'gwowi Eburam kwolaboleyauke'aro yiuwi'nokai gami kuunodo togai'aro Looteke'aro ton kwako Negev'no illo'mo ton Ijupda'ai sulapogano. 2Toro ilno sumaveyokwe Eburamol kuto ivito bwotonyagokwe tool gamoro silva togai'aro gool togai'aro sipsip buulmokauworodeyo wuulo ki'duvolodowodo togai'aro togai amokailokaikono. 3Toro te Eburameke ton kwako Negev toru wuugollu'mo'mno avlavopogano. Toro ton plaino sumaveyokwe go'no go'nodo tomuu amjo'movlaiyajupogano. Toro mujo'movla'mno sumaveyokwe wagwolago Betel wobo toru ai'movopogano. Toro ai'movopo su toru muudu'nodo togasuro kemi sel ago abwolomodaropo aiko toru ai'movopogano. Toro ai'movopo su toru wagwolago Betelke Eyaike tovallu akuuto torukono. 4Aki toro ai'movopo su towai muudu'nodo toga Eburamol Gooti Yawellu wiroudapiyo'moneyokwe dukwagupto puruv luvagilovo'no me'no sulomoropiyokaikono. Toro towai ki'mo'mno sumaiyokwe Gooti Yawellu aki aiko te sulomoropiyokaikono.
5To'no'gwowi Lootol Eburameke somollajuko tool kuto ivito bwotonyagokwe sumo'nyajukekono. Aki Lootol kwol kuruv sipsip buulmokau wuulo togai'aro womdo wimwalpino'moneyokwe a'mwo abolo togai'aro gami julkwolaiyo togai'aro ton bwotonyagokwekono. 6Toro te Eburameke Looteke yiuwi'nokai tooral kwako avalo toru amwallajulorakono. Toro amwallajulo kuvi kuruv yiuwi'nokai tooral kuto ivito bwotonyagokwe tooralluno tov kwako tov ku'nono mwiyajukokwono. 7Toro te Eburameke'aro Looteke'aro tooralluro sipsip buulmokauworodeyo toorai ki'duvolodupudo tooro mebweyogalo kuullajuno'mno molo soporogano. Toro toga Kenanda'ai toorogai'aro Peresoda'ai toorogai'aro tooro kuuno mwalodopure toga su toro aullajunoporogano.
8Toruda'ai Eburamol Lootollu aro kuudokaikono. “Navu avalo toonakono. Toro toonal molo nyoso. Aki namoro a'mwo sipsiporodeyo oo buulmokauworodeyo ki'duvolodupudo kworo kuruv molo nyupiyo. 9Toro tovino tov navu gomno gomno yomuudeyapinolo. Guu yiuwi'nokai kwako tonyu doonomollono. Toro wonomollo'bi kwonamomguda'ai kwako tovi ama'bi tov nuvno'gwowi anatomguda'ai kwako tovino pla'monyugono. Aki guu anatomguda'ai kwako tovi ama'bi tov nuvno'gwowi kwonamomguda'ai kwako tovino pla'monyugono.” Eburamol Lootollu toro kuudokaikono.
10 #
Mdk. 2:10
Toruda'ai Lootol wonomolluno sumaiyokwe Soowar tomgu kwonoka tov kwako wora'maluko puruv wonyo Joodanov kwolmoka tomgu wolo'duke tovi kwoloonyopiyokaikono. Toro woloonyopino sumaiyokwe aro adokaikono. “Kwako akaibiv Gooti Yawelluro womdo Iden to'busukorukono. Wonyo kwolmoka tovi wobo toru wo'dowodo tovino tov woguulkwako bwotonyokweyorukono. Aki Ijupda'ai kwako to'busukorukono.” Adokaikono. Su toro toga Gooti Yawel wagwolago Soodoomke Goomoorake tovallu kaiyako yere mamollounapiyoduke toga kwonokaikono. 11Toro te Lootol gamiyo'mo kwako tovi deroso'mo tool adokaikono. “Kwako akaibivi ma'monyugono. Wonyo Joodanov kwolmoka tomguda'ai yiuwi'nokai kwako wo'dowodo akaibiv numiyo'mokwono.” Adokaikono. Toro juno sumaiyokwe Lootol gami kwako aderosoka towai'no plaiyo'moneyokwe gami yiuwi'nokai togai momwora'no sumaiyokwe kuujo tool sulopiyamoka tomgu amollubworomokwolokaikono. Looteke Eburameke tooral toro somuudeyapinolorakono.
12Toro yomuudeyapinyuno sumaleyokwe Eburamol kwako Kenan toru amwalokaikono. Lootolno'gwowi wonyo Joodanov kwolmoka worato tomuuno wolno sumaiyokwe wagwolago wo'dupudo tonyu kwolomwalokaikono. Toro tool mujomwekwino sumaiyokwe wagwolago Soodoom'no wobo toru ai'movokaikono. Toro ki'mo'mno sumaiyokwe gami sel ago tov mojudapiyo'no amwallajukekono. 13Wagwolago Soodoomda'ai mwalodupudo tooro a'mwo kirovanyuvanyu kuumwiyo sumo'nyajuporogano. Toro tooro Gooti Yawelluro sumdo tovi ma'no ma'no bwotonyo sajuporogano.
Eburamol wagwolago Hibroon'no avlavoka tovinokwono
14To'no'gwowi Lootol Eburamollu me'no kuugollu'movoka toga Gooti Yawel Eburamollu aro kuudokaikono. “Guu akawaida'ai yiuwi'nokai tomuu sumdo doonomollono. Wonyo sumdo tov alokamoka noot tomge'aro aki wonyo tov kwolmoka saut tomge'aro aki kuujo tool sulopiyamoka is tomge'aro aki kuujo tool kwolomwolmoka wes tomge'aro yiuwi'nokai su tomuu doonomollono. 15#Krt. 7:5Yiuwi'nokai kwako kwonmodo su ton guuge'aro gumi jukweyago kwolaiyo taiyo togai'aro togaikullo'mo yiunokuudo ikullamonyugono. 16Aki lukomgu amollagubwemi toga gumi jukweyago kwoloraiyo ton kula'nyo yawosunpinonmaiyo. Toro kun kuruv bwotonyago kuunodo ton yawosunopi ku'nono majagilpinorogano. Yiuwi'nokai kwako akavida'ai sullugullugulludo tobuurai ku'nono majagilpino to'busuko kubalno gumoro jukweyago kwoloraiyo kunyu kuruv ku'nono majagilpinogano.” Kuudokaikono. 17Toro wuujuno sumaiyokwe aro amodapiyokaikono. “Mekono. Aga guu ilodavo'bi yiuwi'nokai kwako nogujamo tonyu jouroonomollono.” Amodapiyokaikono.
18Toro modapino sumaiyokwe Eburamol wuugollu'mo'mno sumaiyokwe a'mwo pwolluro iko aburaudoka tooraiyomno avlavokaikono. Iko su tooro Mamureyolluro aburaudokarogano. Toro tooro wagwolago Hibroon'no wobo toru da'mdupudorogano. Toro towai Eburamol bomwalno sumaiyokwe Gooti Yawellu wiroudapiyo'moneyokwe dukwagupto puruv sulo tokwe aluvagilovokaikono.
Currently Selected:
Muuduko 13: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
