Muuduko 20
20
Eburaiyameke Abimelekeke toorallunokwono
1To'no'gwowi Eburaiyamol Mamure toru wuugollu'mo'mno sumaiyokwe Negev tomuuno avlavokaikono. Toro plavo'no wagwolago Kadeseke Suuruke tovallu akuuto toru abomwalokaikono. Toro bomwalo'no aki lukomgu kwako su toru wuugollu'movo'no wagwolago Gerar tovino plavo'no su towai bomwallo sumo'nokaikono. 2#Mdk. 12:13, 26:7Bomwallo toro imo'nodowo Eburaiyamol gami abolo Saravino aro ajajukekono. “Mi nyo'mwokwono.” Toro doduke tovi Geraroda'ai a'mwo aguto kig Abimelekol wuu'no'no gami womdokwe toorai modapino sumaiyokwe Saravi gamiyo'mo kuumokabopokwono. 3Toro kuumokabopo kuvi kuruv surakuuto su tollugwoji Gooti tool Abimelekollu wojo tovi'aro bwiyalo'no'no aro kuudokaikono. “Abolo ama'mwakudo su tov a'mwo pwollurokwono. Toro tovi guu ama'bi tov nobolbinekugono.” Kuudokaikono. 4Toro kuudoka kuvi kuruv Abimelekol abolo tokwe sumwonyo yere miyodole tovino tov aro kuudokaikono. “Agutoloo, guu su toro tov ku'nono mibinekugono. Nevu ma'no ma'no mimawo tonollu buro'nyo'mo nekuromibinekudeyo? 5Eburaiyamol gami abolo akavino, “Mi nyo'mwokwono,” anyudokaikono. Aki abolo tov gami kwolo toolluno, “Mi nyo'mwekono,” anyudokakwono. Toro te nuu kuu'maiyo to'nodo toonyu yiuno sugudo to'no sumonyugono.” Kuudokaikono.
6Toro kuudoka kuvi kuruv Gooti tool wojo tovida'ai aro kuudokaikono. “Tade, guu ma'no ma'no miyodum sugudo sumodo tovino kuudo nyau'mwakono. Toro kuvi kuruv guu abolo tovi ato nuubogai'nubiyokweyo'mo gwonyapino miyodum gumjukuto sadokwono. 7Toro te aga guu abolo su tovi gami kwolo toollomno aikomgu neya domorapiyono. Gamoro kwolo tool moro proofet pwekono. Toro tool guu nobolbiyokweyo'mo mi subusu'nyogalo anyudo'ji tov mabolbinekugono. Toro kuvi kuruv guu abolo tovi aikomgu mamorapibi to'gwowi nobolbinekugono. Aki guuge avalo kugai'aro yiuwi'nokai togaikul nobolpinogaikikono.” Kuudokaikono.
8Toro wuujuno sumaiyokwe Abimelekol lomwo iru'mago toga dukaino sumaiyokwe gami yiuwi'nokai womdokwe toorai ju'bworomaro'no wojo tovida'ai yiuwi'nokai kuuguudo su ton sodubwasokaikono. Toro sodubwasoka tovi wuu'no'mno luko bwotonyo sopogano. 9Toruda'ai Abimelekol Eburaiyamollu doma'no sumaiyokwe aro kuudokaikono. “Guu nuuge'aro mi dolago tomuu mwalodupudo togai'aro tonollu buro'nyo'mo kaiyako sugolanekumovodekudeyo? Nuu gumi ma'no ma'nodo puruv mollugolagumo'mdumdonyudukono oo buro'nyo'mo jul'nyo bwotonyo akav donekubweyadokuuno? Gumoro kaiya'no su toro sanyugolodo tov ilaiyo'maiyo. Toro kweku kuruv guu tookuno'gwowi kuvinono sanyugolodekugono.” Kuudokaikono. 10Toro wuujuno sumaiyokwe Abimelekol Eburaiyamollu aro kuudokaikono. “Guu su toro sanyugolodo tov buro'nyo kavlo tovino sodekudeyo?”
11Abimelekol Eburaiyamollu toro kuudoka tovi Eburaiyamol aro kuudokaikono. “Nuu su toro so tov aro tovinokwono. A'mwo akaruda'ai tooro Gooti toolluno luko miyodupudorogano. Toro tooro moro abolo tovi ipolomallo'mo tooro mi noromiyanubwepiyo. Toro kuudo yaurono sonyugono. 12Aki toro so kuvi kuruv nuu kuunano miyoukuu'naikudonyugono. Nebal'no aikudonyugono. Abolo su tov mi nyo'mwo kuvi amaronyugono. Nami nallunumiyago tool avalo pwolluro'makono. Toro kuvi kuruv ganeyago to'gwowi puvurokwono. Toro tovi amaronyugono. 13Toro te Gooti tool mi nyunumiyago toolluro ago tomuuda'ai amonuwapiyoka toga mi abolo tovi aro kuudonyugono. “Guu mi ilaiyo yanyugollo'moneyokwe aro ibino'guugono. Navu buro'nyo buro'nyomuudeyo tomuu ai'mowosi toga a'mwo tooro mi nonyuromipiyokweyo'mo tov aro duudogawono. “Akal mi nyo'mwekono.” Duudogawono.” Mi abolo tovi toro kuudonyugono.” Eburaiyamol Abimelekollu toro kuudokaikono.
14Toro wuujuno sumaiyokwe Abimelekol Saravi Eburaiyamollu aikomgu kuumallokaikono. Aki sipsip pworogai'aro buulmokau pworogai'aro a'mwo abolo ki'nato womdokwe pugai'aro ton Eburaiyamollu kuumallokaikono. 15Toro wino sumaiyokwe Abimelekol aro kuudokaikono. “Moro yiuwi'nokai kwako tomuu nooso. Toro kwosuko tonyuda'ai puvi guu gumi kuudo tovida'ai puruv maro'bi nokwo mwalmwalbinekugono.” 16Eburaiyamollu toro wuujuno sumaiyokwe aki Saravi aro kuudokaikono. “Guu kaiya'no mimado to'guu wogulo'mo mibinono. Aki a'mwo abolo ton gumino kaiya'no kuudo nyaguupiyokweyo'mo tov nuu gumi jo'mwo toollu 1,000 silva nuugwiyo tov kuu'maiyo akaru kwimono.” Kuudokaikono.
17-18Abimelekol toro me'no wuujuno sumaiyokwe Eburaiyamol Abimelekollu wiyo'mwojo'moneyokwe subusu'nyogalo tov Gooti toollu kuudokaikono. Toro wuujuno sumaiyokwe Gooti tool Abimelekollu sukulokaikono. Muudu'nodo toga Abimelekol Saravi kaiyako igollo'mo yoduke toga Gooti Yawel Abimelekeke gami abolo tokwe teyaullu kwolaiyo nyawosunbullokweyo'mo kuullukurokaikono. Aki Abimelekolluro ki'nato womdokwe abolo kunyu kuruv kwolaiyo nyawosunpiyokweyo'mo kuullukurokaikono. Muudu'nodo toga Gooti tool toro me'no kuullukuroka kuvi kuruv Eburaiyamol subusu'nyogalo kuudoka toga'no'gwowi Gooti tool Abimelekollu sukulokaikono. Aki Abimelekolluro abolo tokwe'aro gamoro ki'nato womdokwe togai'aro tonyu kwolaiyo sumwoluko imo'nopureyokwe iroto kwiyokaikono.
Currently Selected:
Muuduko 20: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
