Muuduko 25
25
Eburaiyamolluro jukweyago kwolaiyo pworainokwono
1To'no'gwowi Eburaiyamol abolo puruv amarokaikono. Abolo amaroka su tovino yovo tov Ketuuravokwono. 2Toro tokwe Eburaiyamolluro kwolaiyo amollawosunoka tooraino yovo tov Simiraneke Jookisaneke Medaneke Midiyaneke Isibakeke Suuwaike toorai amollawosunokaikono. 3Aki gami muugunyo Jookisanol Sibaike Dedaneke toorallu sawosunokaikono. Aki toro sawosunoka Dedanolluro kwolaiyo tooraino yovo tov Asuureke Letuuseke Leyuumeke toorai sawosunokaikono. 4Aki Midiyanolluro kwolaiyo tooraino yovo tov Efaike Efereke Hanookeke Abidaike Eldaike toorai sawosunokarogano. Yiuwi'nokai Eburaiyamolluro kwikweyago su tooro gamoro abolo Ketuuravida'ai aboporogano.
5To'no'gwowi Eburaiyamol gamoro yiuwi'nokai kuto ivito ton Aisakollu kuubweyokaikono. 6Toro kuubweyoka kwol kuruv Eburaiyamol gamoro abolo punyuro muugunyo go'no go'nodo tooraino'gwowi kuto ivito pun yasuwa'no kwiyokaikono. Toro wino sumaiyokwe gami kwolaiyo Aisakollu wobo toru nomwalpiyokweyo'mo tov kuujo tool sulopiyamoka is tomgu amorapiyokarogano.
Eburaiyamol aboloka toollu amolsosopo tovinokwono
7To'no'gwowi Eburaiyamol 175 kworomo tobuul me'no amwalokaikono. 8Eburaiyamol kworomo bwotonyago tobuul mwalno sumaiyokwe yadaiyo kuunodo imo'no'no abolokaikono. Toro bolno sumaiyokwe gavuge avalo me'no abolopo toorai tomuu kuuru'marokaikono. 9Toro te gamoro muugunyo Aisakeke Isumaiyoleke tooral kemi kuunumiyabwiyo toollu Makpela sumago tovi amolsosolekono. Sumago su tov Hitda'ai a'mwo Sooharolluro muugunyo Efroonolluro kwako tovi wo'dowodokwono. Aki wagwolago Mamure toru kuujo tool sulopiyamoka is tomgu wo'dowodokwono. 10#Mdk. 23:3-16Kwako su tov Eburaiyamol Hitda'ai tooravuro tovi abiyomarokakwono. Toro te kwako su to kuvi Eburaiyameke Sarakwe teyaullu amolsosoporukono. 11Toruda'ai Eburaiyamol me'no aboloka toga lukomgu gamoro muugunyo Aisakollu Gooti tool sugudo pun kuubweyajukekono. Toro uubweyodowo aki Aisakol wonyo buugo alsovomwollosungiko puvi wobo toru amwallajukekono. Wonyo buugo su toolluno yovo tov Biyalairoowiyovokwono.
12To'no'gwowi Eburaiyamolluro muugunyo Isumaiyolol kwolaiyo pworai sawosunokaikono. Muugunyo su tool Ijupda'ai abolo Hegaiyov Saravuro ki'nato womdokwe tovuro somarokaikono. 13Toro toolluro kwolaiyo sawosunoka tooraino yovo tov muudu'nodo toolluda'ai yiuno aiyowo'mo wuullako toolluno tooro arorogano. Nebaiyootol Isumaiyololluro kwolaiyo muudu'no sawosunokaikono. Aki gagwai'yago tooro Kedareke Atipeleke Mipsameke 14Mismaike Duumaike Masaike 15Hadateke Temaike Jetuureke Nafiseke Kedemaike toorogano. 16Isumaiyololluro 12-pela muugunyo su tooro a'mwo aguto sumo'nyajuporogano. Aki a'mwo su tooraida'ai 12-pela iko tovasuda'ai sumo'noporogano. Aki kemoro wagwolago togai'aro woromollo'mo sel ago togai'aro tonyu kevnokweraino yovo ton sowallajuporogano. 17Toruda'ai Isumaiyolol 137 kworomo tobuul mwalo'no abolokaikono. Toro aboloka tool gavuge avalo me'no abolopo toorai tomuu kuuru'marokaikono. 18Lukomgu Isumaiyololluro jukweyago kwolaiyo tooro kwako Havilaike'aro Suuruke'aro tovallu akuuto toru abomwaloporogano. Kwako Suur su tov Ijup wobo toru Asiriya'no puuto tomuu wo'dowodorukono. Toro tooro kwako Havilaike'aro Suuruke'aro tovallu akuuto toru abomwalopo kworo kuruv Isumaiyololluro jukweyago kwolaiyo su tooro Aisakolluro jukweyago toorogai molo sunoporogano. Toro inyuno sumaveyokwe judo pumgu somuudeyomwaloporogano.
Jekoopeke Isoo'weke todorallu somaroka tovinokwono
19Kuuguudo akav Eburaiyamolluro kwolaiyo Aisakollunokwono. 20Aisakol 40-pela kworomokwe tool Rebekavi amarokaikono. Rebekav Betuuwelolluro taiyokwono. Aki Lebanollu jo'mwokwono. A'mwo su tooral Arameyoda'aiyorakono. Aram toru Mesoopootemiya tomuu wo'dowodorukono. 21Rebekav kwollukokwono. Toro tovino tov Aisakol gami abolo tovino Gooti Yawellu subusu'nyogalo kuujajukekono. Subusu'nyogalo kuujajuko su tovi Gooti Yawel wuu'no'no Aisakolluro abolo tovi kwiyo'mwojokaikono. Toro kwiyo'mwojoka tovida'ai Rebekav kwolaiyo sumwoluko sumo'nokakwono. 22Toro sumo'noka tovi kwolaiyo pworal tooral aulomnallajulokwono. Toro tooral yere miyoma'duke toga kemi kuuneyago tovuro sumwoluko tovi molo aullajulodorakono. Toro kuullodole tovi ibwosunyuno sumaiyokwe Rebekav aro sajunokakwono. “Awi, buro'nyove tov dukonyumo'nadopiyo?” Toro yajunyuno sumaiyokwe Gooti Yawellu wuujo'mo tov uuwo'no kuudoganokakwono. 23#Rm. 9:12Toro kuudoganoka tovi Gooti Yawel aro kuudokaikono. “Gumoro sumwoluko tovi aulomunakulo tooral go'no go'no iko tovasuda'ai imo'nubullunorakono. Toro imo'no'bullu lukomgu kantri go'no go'no puruval yomwalo'bullu molo ingovla'bullunorakono. Toro ingovlavo'bullu kuval kuruv kantri puvuro jurogudo tov puvuro tovi uuwolowonokwono. Toro te gumoro kwolaiyo sumdomguda'ai soma'bi tool lukomguda'ai soma'bi toollu iwapiyo yowo'ji womdo wimwalonekono.” Gooti Yawel toro kuudokaikono.
24Rebekav mwalno sumaiyokwe kwolaiyo nyomallo'mo kuunodo toga guno amollokakwono. Toro molluno sumaiyokwe Gooti toolluro kuudoka kuvinono kwolaiyo pworallu somarokakwono. 25Kwolaiyo muudu'no somaroka tool muja'wuulo kula'nokakwekono. Aki toro tool kula'waro kuumwiyokwe toollu sosokakwono. Toro toolluno tov Isoo'wolo sowaropekono. 26Aki toruda'ai lukomgu gagwai'yago tool gami gadai'yago Isoo'wolluro suul wuuduwago tovi ato gudupola'duke toga somarokaikono. Suul wuuduwago tovi ato agudopolaroka tovino tov Jekoopolo sowaropekono. Aisakol 60 kworomokwe tool mwaloduke toga Rebekav toro toorallu somarokakwono.
Isoo'wol gami ganumiyago toolluro aiko toru mallo'mo tovino ilaiyo mwinoka tovinokwono
27Toruda'ai kwolaiyo tooral aguto gulluno sumaleyokwe toga Isoo'wol i'womdo tomuu yomollodowo ibesa'aiyo molo sumo'nyajukekono. Toro kuvi kuruv Jekoopolno'gwowi gami sel ago toru kavo nokwo amwallajukekono. 28Toro toorallu kuunumiyago Aisakolluro kuu'dello tool Isoo'wekono. Isoo'wolluro noonyumwonyu ibesa'aiyo romiyomokabodowodo tonyu ilaiyo nodowodo tovino tov kwolluno kuu'dello kwimo'nyajukekono. Toro kuvi kuruv Rebekavuro kuu'dello toolno'gwowi Jekoopekono.
29To'no'gwowi iruko pullugwoji Jekoopol magurallo buuleljo pun iraloduke toga Isoo'wol i'womdo tomuuda'ai bino sumaiyokwe mujuko bwotonyo winoduke tool Jekoopollu abuuru'marokaikono. 30Toro buuru'ma'no sumaiyokwe Jekoopollu aro kuudoganokaikono. “Nuu mujuko'mo kuruwi yamju sadokwono. Toro te gumoro wosamujuko buuleljo su ton nuu nonyo'moneyokwe pun donyabono.” Kuudoganokaikono. Isoo'wol su toro soka toolluno yovo puruv Idoomolo sowaropekono. 31Isoo'wol toro kuudoganoka tovi Jekoopol aro kuudokaikono. “Moro wosamujuko akan yasuwa'no magujamonyugono. Toro kuvi kuruv guu yodolovomallo'moneyokwe aro anyudubi tov nokwo gujamonyugono. “Nuu kwolaiyo muudu'nodo toonyu nallunumiyago toolluro aiko toru mallo'moneyokwe tov gumi agujamono.” Toro anyudubi tov moro wosamujuko akan nokwo gujamonyugono.” Jekoopol toro kuudokaikono.
32Toro kuudoka tovi Isoo'wol kuudokaikono. “Nuu mujuko'mo nobollo'mo sadokwono. Mi nyunumiyago toolluro aiko toru mallo'moneyokwe tov ku'nono manyo'mwojononyugono.” Kuudokaikono. 33#Hib. 12:16Toro kuudoka tovi Jekoopol kuudokaikono. “Guu toro anyudadokuudo kuvi kuruv subuu'yamju me'no danyo'bi gujamonyugono.” Toro kuudoka tovi Isoo'wol subuu'yamju duuwino sumaiyokwe gami ganumiyago toolluro aiko toru mallo'moneyokwe tov Jekoopollu kwiyokaikono. 34Toro kwiyoka toga Jekoopol magurallo buuleljo surallajuko pugai'aro bret pugai'aro ton Isoo'wollu kwiyokaikono. Toro te Isoo'wol wosamujuko togai wonyo togai me'no nopino sumaiyokwe nokwo plaino sokaikono. Toro te Isoo'wol gami ganumiyago toolluro aiko toru mallo'moneyokwe tovino ilaiyo mwinoduke tool kuu'maiyo toru'no toro amolluduvolosumovlavokaikono.
Currently Selected:
Muuduko 25: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
