Muuduko 27
27
Aisakol yadaiyo amwaloka toga sugudo tov Jekoopollu adubweyoka tovinokwono
1Toruda'ai Aisakol yadaiyo sumo'noka toga gamoro sumdo tov ilaiyo mwonyajukekono. Toro tool gami muugunyo muudu'nodo Isoo'wollu gamiyomno abwoneyokwe modoma'no sumaiyokwe aro kuudokaikono. “Mi muugunyoloo.” Toro kuudoka toollu Isoo'wol kuudokaikono. “Anyu amwakono.” Kuudokaikono. 2Toro kuudoka tovi Aisakol kuudokaikono. “Aga nuu yago tekwonyu nobolmo'mo tekwonyugono. Toro te guu neya donuu'nono. 3Nuu allu kuulolorodeyo pwol numo'moneyokwe gumi iro'mwomido ton momworaro'bi yamwikaiyo'mo i'womdo tomuuno dovlavono. 4Yo'bi pwollu abolo'bi tov donumokabono. Gamoro wuullo tov nuu ilaiyo nodumdo to'busuko kubalno guu doto ailomokabi tovi nomwalmonyugono. Nuu me'no no'mi yere mabolodo'mure toga moro sugudo tov dagubwemonyugono.” Kuudokaikono.
5Toro wuujuno sumaiyokwe Isoo'wol gami ganumiyago toollo'mo allu kuulolorodeyo pwol romimokabiyo'moneyokwe i'womdo tomuuno avlavokaikono. Sumdomgu Aisakol gami muugunyo Isoo'wollu toro wuudoduke toga Rebekav me'no au'nallajukokwono. 6Rebekav toro tovi wuu'nyuno sumaiyokwe gami muugunyo Jekoopollu aro abuudokakwono. “Gumi junumiyago tool gumi judai'yago Isoo'wollu aro wuudoduke kuu'nume'gono. 7Nuu allu kuulolorodeyo wuullokwe ton nonumo'moneyokwe guu pwollu romimokabo'bi doto jonumokabono. Toro tovi me'no no'mi yere mabolodo'mure toga Gooti Yawelluro sumdo tovi sugudo tov gumi dagubwemonyugono. Aisakol Isoo'wollu toro wuudoduke tovi kuu'nume'gono.” Rebekav Jekoopollu toro abuudokakwono. 8Rebekav toro wuujuno sumaiyokwe aki Jekoopollu aro amadokakwono. “Mi muugunyoloo, moro agudumi akavi neya duumjunono. 9Guu meme ki'duvolodupudo tomuuno plavo'bi meme bwopto pworal galomokabo'bi mi bonyabono. Nuu gumi junumiyago toolluro wuullo wiyodowodo to'busuko kubalno doto ime'gono. 10Doto me'no sosumi tovi guu momworaro'bi gumi junumiyago toollu uumollabinokwono. Toro kwibi tovi nowo'ji yere mabolodowo'jure toga sugudo tov nokwo dagubweyonekugono.” Amadokakwono.
11Toro kuudoka tovi Jekoopol ganeyago Rebekavi aro kuudokaikono. “Toro anyudumado kuvi kuruv mi nyudai'yago Isoo'wol kula'waro kuumwiyokwekono. Nuu toonyuno'gwowi kula'warotomaiyokwenyugono. 12Toro toonyu mi nyunumiyago tool moro kulako tovi numworarowo'ji mino tov aro kuudo nyanuuro'jo. Oo Jekoopol dobiyoukuu'nanyudadopiyo. Toro sanuuro'ji tov sugudo tov manubweyowo'ji kwol kuruv tabunyu puno'gwowi nonubweyo'jo.”
13Jekoopol toro kuudoka tovi gami ganeyago tov aro kuudokakwono. “Gumi junumiyago toolluro tabunyu agubweyo'ji tov yiuno nuuno ma'mokwono. Toro te guu moro agudumo tovino to'no neya duumjunono. Aki meme bwopto toorallu galomora'bi donumokabono.” Kuudokakwono.
14Toro kuudoka tovi Jekoopol kaduko wino sumaiyokwe meme bwopto pworal gami ganeyago toviyo'mo agalomworarokaikono. Toro galomolluno sumaiyokwe Rebekav Aisakolluro wuullo wiyodowodo to'busuko kubalno doto sokakwono. 15Toro ino sumaiyokwe Rebekavuro muugunyo muudu'nodo Isoo'wolluro youro pun gami ganeyago Rebekavuro ago tovi wo'dupudogano. Toro te Rebekav Isoo'wolluro youro sugumaluko kuunodo puul malluno sumaiyokwe gami kwolaiyo wuullako Jekoopollu amollubweyokakwono. 16Toro mollubweno sumaiyokwe aki meme bwopto tooralluro kulako adovailowiyoka tov Jekoopolluro ato tovake'aro boruko tokwe'aro worato nonagutokwe su tonyu aweyomgurosokakwono. 17Toro ibweno sumaiyokwe Rebekav wuullokwe meme muugupto tokwe'aro bret pugai'aro doto sosoka ton Jekoopollu kuumallokakwono.
18Jekoopol wosamujuko su tonyu momwora'no sumaiyokwe gami ganumiyago toollomno mokaula'no aro kuudokaikono. “Mi nyunumiyagekwonoo.” Toro kuudoka tovi Aisakol wuu'nyuno sumaiyokwe aro kuudoganokaikono. “We, anyugeyo. Guu moro muugunyo ala'mwekudukono?” Kuudoganokaikono. 19Toro kuudoganoka tovi Jekoopol aro soukuu'nuudokaikono. “Nuu gumoro kwolaiyo muudo'nodo sanuwosunodo Isoo'wonyugono. Toro toonyu gumoro yiuwi'nokai anyudumado tov me'no sovrovogumokamonyugono. Toro te guu dukovomwalo'bi wosamujuko akan no'bi sugudo tov nubwebinonyugono.” Kuudokaikono.
20Jekoopol toro kuudoka kuvi kuruv Aisakol aro kuudoganokaikono. “Awi moro muugunyoloo, allu kuulolo tov adadomgu'aro yere aromiyomo'madekudeyo?” Toro kuudoganoka tovi Jekoopol aro soukuu'nuudokaikono. “Gumoro Gooti Yawel anyo'mwojumoka tovino tov nuu yere aromiyomo'monyugono.” Kuudokaikono. 21Toro kuudoka tovi Aisakol Jekoopollu aro kuudokaikono. “Guu moro muugunyo Isoo'wol kwekudukoneyokweyo'mo tov wobo akaru bo'bi gumoro kulako tovi agubogai'numo.” Kuudokaikono. 22Toro wuujuno sumaiyokwe toga Jekoopol gami ganumiyago toollu wobo toru abodavokaikono. Toro abodavoka toollu Aisakol uumworoga'nyuno sumaiyokwe kuudokaikono. “Gumoro yogaimaguurai tov Jekoopolbusuko guu'nodumdo kuvi kuruv gumoro ato to'gwowi Isoo'wolbusukekugono.” Kuudokaikono. 23Toro tool aro kuudo miyaurokaikono. Oo Jekoopoldeyo. Kuudo miyaurokaikono. Isoo'wolluro kula'waroto to'busuko tovi kuumworogai'noka tovino tov, Jekoopoldeyo, kuudo miyauro'no sugudo tov uubweyo'mo kwinokaikono. 24Toro tool aki aiko te kuudoganokaikono. “Guu moro muugunyo Isoo'wol kwekudukono?” Toro kuudoganoka toollu Jekoopol soukuu'nuudokaikono. “Tade, nuu kwonyugono.” Soukuu'nuudokaikono.
25Toro soukuu'nuudoka tovi Aisakol kuudokaikono. “Yowa'nogano. Moro muugunyo tookujuro muugupto aromiyonumokamado tov nyabo'bi nuu anmo. Toro toonyu me'no no'mi toga sugudo tov dagubwemonyugono.” Kuudokaikono. Toro wuujuno sumaiyokwe Jekoopol wosamujuko tov mokabo'no abuuwiyoka tovi Aisakol amanokaikono. Aki wain wonyo pugai'aro abuuwiyoka tovi amanokaikono. 26Aisakol me'no nopino sumaiyokwe toga kuudokaikono. “Mi muugunyoloo, guu akaru bo'bi mi suwado tovi molluduuduulo bomanyono.” Kuudokaikono. 27#Hib. 11:20Toro kuudoka tovi Jekoopol bino sumaiyokwe gami ganumiyago toolluro suwado tovi molluduuduulo amollokaikono. Toro molloduke toga Aisakol Jekoopolluro youro tovi sudo uumuuro'gwonyuno sumaiyokwe sugudo tov uubweyo'mo tool aro adubweyokaikono. “Moro muugunyo tookujuro sudo anuunmoka akav Gooti Yawelluro sugudo kwosungiko i'womdo tomuuda'ai sudo nuunodowodo to'busukokwono.” 28Toro wuujuno sumaiyokwe aro kuudokaikono. “Gooti tool muunyu kai'muuda'ai sulluluko ton gumi gubweyowo'ji gumoro womdo tonyu iminyo nokwo uubwemwalpinogano. Aki woguulkwako bwotonyago ton gujabowo'ji wit sulo togai'aro wain ikulsulo togai'aro ton ilaiyo ki'nopi bwotonyago nokwo muudonugovla'mwalbinekugono. 29#Mdk. 12:3Aki go'no go'no iko tovasuda'ai tooro gumoro womdokwe neya agujumo'nogapuro. Aki go'no go'no kantri ton gumi dolago tomuu amwalpuro. Aki guuge avalo toorai mido mollomwalmwalbinekugono. Aki gumi juneyago tovuro kwikweyago tooro gumi dolago tomuu mwalpinorogano. Aki toro tookuji a'mwo pworo tabunyu agubwepi tov Gooti tool a'mwo su toorai tabunyu tov nuubweyonorogano. Toro kuvi kuruv a'mwo pworo gumi sugudo agubwepi tooraino'gwowi Gooti tool sugudo tov nuubweyonorogano.” Aisakol Jekoopollu toro kuudokaikono.
30Aisakol Jekoopollu sugudo tov me'no dubweno sumaiyokwe Jekoopol kuugollu'movokaikono. Toro kuugollu'movoka kuga'gwo kuuno Isoo'wol yamwikaiyo surovodaiyajuko tool aikomgu abai'movokaikono. 31Toro bai'mo'mno sumaiyokwe Isoo'wol kwol kuruv muugupto wuullokwe ton doto me'no yomwora'no sumaiyokwe gami ganumiyago toollomno amokabokaikono. Toro mokabino sumaiyokwe aro kuudokaikono. “Mi nyunumiyagekwono, guu dukovomwalo'bi muugupto me'no aromiyogumokamo akan donono. Me'no no'bi sugudo tov danubwebinonyugono.” Kuudokaikono. 32Toro kuudoka tovi gami ganumiyago Aisakol kuudoganokaikono. “Guu moro muugunyo ala'mwekudukono?” Toro kuudoganoka tovi Isoo'wol kuudokaikono. “Nuu gumoro kwolaiyo muudu'nodo Isoo'wonyugono.” Kuudokaikono.
33Toro kuudoka tovi Aisakol wuu'no'no gamoro kulako tov bu'buto bwotonyo ino sumaiyokwe samuugojokaikono. “Awi, numi soukuu'nanyudumoka tool ala'mwoldeyo? Nuu a'mwo su toolluro allu kuulolo aromiyomokamoka tonyu nodum sugudo tov me'no kuubwemonyugono. Toro te sugudo kuubwemo su tov a'mwo me'no kuubwemo toollu kuvinono wimo'nonekono.” Kuudokaikono. 34Toro kuudoka tovi Isoo'wol wuu'nyuno sumaiyokwe toga kumdato bwotonyo yo'no gami ganumiyago toollu aro kuudokaikono. “Oo mi nyunumiyagoloo, nuu kwonyu kuruv sugudo pun neya donubweyono!” 35Toro kuudoka kuvi kuruv Aisakol aro kuudokaikono. “Gumi jugwai'yago tool kuunano yogalo biyoukuu'nanyudodowo sugudo tov guu mallo'moneyokwe tovi me'no ama'mokakwono.” Kuudokaikono.
36 #
Mdk. 25:29-34
Toruda'ai Isoo'wol aro kuudokaikono. “Jekoopolluro yovo tovino kavlo tov, youkuu'nuujoleyo'mokwono. Toro tool mi youkuu'nanyudoduke tov pugasal sumo'numaiyo. Muudu'nodo tov nami nallunumiyago tookujuro aiko toru nuu amaro'mujuko tovi me'no amarokaikono. Aki aga kuga kuruv sugudo tov mi adanubweyo'bujuko tovi me'no ama'mokaikono. Toro toolluno tov Jekoopolo yovo tov kuvi kuuno sowaropekono.” Toro wuujuno sumaiyokwe aki aro samuugojokaikono. “Mi sugudo nubweyo'mo puruv dukwoso?” Samuugojokaikono. 37Toro yamuugojuno sumaiyokwe Aisakol Isoo'wollu kuudokaikono. “Awiyo, aro ton me'no kuubwemonyugono. Gumi mido mollogumwallo'mo imo'nonekono. Aki gamoro yiuwi'nokai avalo toorekul kwollu dolago tomuu mwalopi womdo wimwalpinorekikono. Aki wit togai wain ikulsulo togai bwotonyago mujonugovlaiyo'moneyokwe tov me'no kwiyo'mwojumekono. Toro me'no kuubwemo tovino tov mi muugunyoloo, adado gujumonyudeyo?” Aisakol toro kuudokaikono.
38 #
Hib. 12:17
Toro kuudoka tovi Isoo'wol kuudokaikono. “Mi nyunumiyagoloo, gumoro sugudo tov yiuno puru'monodo'mdukono? Sugudo pun nuu kwonyu kuruv neya donubweyono.” Toro wuujuno sumaiyokwe toga kumdo adokaikono. 39#Hib. 11:20Toro doduke toollu gami ganumiyago Aisakol aro adubweyokaikono. “Neya duu'nono. Guu woguulkwako wo'dowo'jure wobo toru mamwalbinekugono. Aki muunyu kai'muuda'ai sulluluko tov gumoro womdo tonyu iminyo mabwolbwemwalonokwono. 40Aki toro tekwogu gumi kwallu'mopto tokwe a'mwo pworogai molo ingovla'mwalbinekugono. Yo'bi gumi jugwai'yago toollu dolago tomuu mwalo'bi womdo wimwalbinekwogugano. Toro kwekwogu kuruv puga kisuvolo wiyo'bi birolo'nugolokuubinekugono. Toro me'no abirolo'nugolokuubi toga'no'gwowi aki aiko te mido mamollogumwalonekugono.” Aisakol Isoo'wollu toro kuudokaikono.
41Toruda'ai Isoo'wol Jekoopolluno surodo kuunyajukekono. Gami ganumiyago tool sugudo kuubweyoka tovino tov Jekoopollu romiyoso'moneyokwe aro sajunokaikono. “Mi nyunumiyago tekwo nobollo'mo wobo togakono. Toro tekwo abolo'ji toolluno kanyu sa me'no woro'mi toga mi nyugwai'yago Jekoopollu noromiyosumekono.” Sajunokaikono.
42Toro kuvi kuruv Rebekav gami muugunyo muudu'nodo Isoo'wolluro adoka tovino me'no kuu'nokakwono. Toro tov gami kwolaiyo wuullako Jekoopollu doma'no sumaiyokwe aro kuudokakwono. “Neya duu'nono. Gumi judai'yago Isoo'wol gumoro sugolmwa'judo tovino tov noromiyagubweyo'mo kwinadopiyo.” Kuudokakwono. 43Toro wuujuno sumaiyokwe aki aro amadokakwono. “Guu moro kwolaiyo tookugono. Toro tooku moro yogalo agudumi akavi neya duumjunono. Moro nyo'mwo Lebanol wagwolago Haran amwalluko toollomno lukado yere dovlavono. 44Guu a'mwo su tooke mwalodo'bure toga gumi judai'yago toolluro surodo kuunadopiko tov dugoga nuuwollonekono. 45Toro uuwollowo'ji gumoro sugolmwa'judo tovino kuudo me'no yallulo'gwonodowo'jure toga a'mwo pwollu noguduvo'nabiyo'mo nomoropiyame'gono. Toro te guu akaru mamwalbinekugono. Kevu yiuwi'nokai todorakul iruko avalo pullugwoji abolbuleyokweyo'mo manyunadopiyo.” Kuudokakwono.
Aisakol Jekoopollu Lebanollomno amorapiyoka tovinokwono
46Toruda'ai Rebekav Aisakollu aro auluudokakwono. “Moro muugunyo Isoo'wolluro abolo Hitda'ai su tovalluno ilaiyo manyunadopiyo. Jekoopol kwol kuruv Hitolluro iko avalo su tovasuda'ai abolo puruv amaro'ji to'gwowi nuu aiyo mwallo'mo manyunone'gono.” Kuudokakwono.
Currently Selected:
Muuduko 27: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
