Muuduko 40
40
Joosepol wojo tonyuro kavlo ton kuu'maiyo kuujajuko tovinokwono
1-2Joosepol wuulo killo'mo ago tovi kuuno mwalno sumaiyokwe lukomgu aro sumo'nokakwono. Ijupda'ai a'mwo aguto kig Feroo toolluro womdokwe pworal kemi aguto Feroo toollu ilaiyo migololorakono. Toro tooral pwol Feroo toollu wain wonyo tov kapwo tovi iromokabiyokwe a'mwo aguto pwekono. Pwol Feroo toolluro bret ton doto killokwe a'mwo aguto pwekono. Toro tooralluno Feroo tool surodo kuunokaikono. 3Toro wuunyuno sumaiyokwe a'mwo toorallu wuulo killo'mo ago tovi aulomerosokarakono. Wuulo killo'mo ago su tov Feroo toolluro duuwato womdokwe toorai mido mollomwalokwe toolluro wuulo killo'mo agokwono. Aki wuulo killo'mo ago avalo su tovi Joosepol ai'nallajukokwono. 4Toro tovi a'mwo toorallu kuulomerosuno sumaiyokwe duuwato womdokwe tooravuro mollomwalo tool Joosepollu a'mwo su toorallu mollomwallo'mo ajesokaikono. Toro tooral wuulo killo'mo ago tovi manyu toga ai'nallajulorakono.
5A'mwo su tooral surakuuto pullugwoji wuulo killo'mo ago tovi kuuno kuule'narolno yiuwi'nokai tooral wojo suwo'nolorakono. Ijupda'ai a'mwo aguto kig Feroo toolluro wain wonyo willodowodo tooke'aro bret doto yodowodo tooke'aro tooral wojo puruval kavlo go'no go'nodokwe tovallu suwo'nolorakono. 6Toro iwo'nyuno sumaleyokwe lomwo toga Joosepol abuuru'marokaikono. Toro buuru'ma'no sumaiyokwe a'mwo tooral kemoro sumdomago tov irorako mimwanyodole toorallu abwonokaikono. 7Toro te Feroo toolluro womdokwe toorallu bwonyuno sumaiyokwe aro samuugojokaikono. “Kevu lomwo akallugwoji kemi sumdomago irorako miyadokuulo tov buro'nyo'mo'mdeyo?” Samuugojokaikono. 8Toro samuugojoka tovi aro kuudolorakono. “Nami wojo suwo'numawolo tovalluno kavlo tov a'mwo nonakujo'mo pwol nonagutomuugono.” Kuudolorakono. Toro wuujuno sumaleyokwe Joosepol kuudokaikono. “Yiuno Gooti toolno wojo tovuro kavlo tov kuu'maiyo toru'no nokwo mollouruudonekono. Toro te kemoro wojo suwo'numalo tovalluno mi nokwo nyudubullunorakikono.” Kuudokaikono.
9Joosepol toro kuudoka tovi Feroo toolluro wain wonyo willokwe a'mwo aguto tool gamoro wojo suwo'noka tovino Joosepollu aro sodubwasokaikono. “Moro wojo suwo'numo tov arokwono. Wain iko pwol da'mduke toollu kwonmono. 10Iko su tool pilato tov puruvapurukwekono. Toro tool sodolo billuru'mno yodowo pwopto ai'numokaikono. Toro te wain ikulsulo ton ki'nodupu miko ailmapogano. 11Toro ailmapo tonyu nuu Feroo toolluro kapwo tov muunyu toru'aro mwora'dum wain ikulsulo su tonyu amwojuroma'monyugono. Wain wonyo tov kapwo tovi me'no mwojuromwora'dum Feroo toollu kwimonyugono. Nuu wojo toro tovi suwo'numonyugono.” Kuudokaikono.
12Toro kuudoka toollu Joosepol kuudokaikono. “Gumoro wojo su tovuro kavlo tov aro tovinokwono. Wain iko toolluro pilato puruvapuruv kwonmado tov iruko pullapullu tobuullunokwono. 13Iruko su tobuul me'no bawo'ji toga Feroo tool gumi wuulo killo'mo ago akavida'ai bomollurolovogumokalokwonekugono. Yowo'ji gumi aiyogasuro womdo sajudo tov aiko te mogumwallonekugono. Toro tooku wain wonyo tov kapwo tovi iromworaro'bi Feroo toollu wimwalbinekugono.” Joosepol wojo tovuro kavlo tovino toro kuudokaikono. 14Toro wuujuno sumaiyokwe aki aro kuudokaikono. “Toro te guu lukomgu ilaiyo mwalo'bi toga mino kuudo nyallulo'gwonbiyo. Toro kweku kuruv mino kuudo yanuuro'bi wuulo killo'mo ago akavida'ai bomollurolovonumokalokwiyo'mo a'mwo aguto Feroo toollu neya wuudoganbinekugono. 15Guu mi anyumo'noka tovino duu'nono. Nuu sumdomgu Hibruuda'ai tooravuro kwako tomuu mwalono toga ma'no ma'no miyodore kwonyu kuruv a'mwo pworo ameronumokaboponyugono. Aki toro toonyu Ijup akaru abomwalo toga ma'no ma'nodo puruv miyodore kwonyu kuruv wuulo killo'mo ago akavi yasuwa'no ameranubweyoponyugono.” Joosepol toro kuudokaikono.
16Joosepol a'mwo muudu'nodo toolluro wojo tovuro kavlo tovino wuudoduke toga Feroo toolluro bret doto sajuko a'mwo aguto tool wuu'no'no kuudo saurokaikono. Oo a'mwo akallu ilaiyo kwimo'no'ji kubalno nuu kwonyu kuruv ilaiyo aval'no neya anyumo'nono. Kuudo yau'no sumaiyokwe Joosepollu gamoro wojo tovino kuuguudo wuujo'mo kwinokaikono. Toro tool aro kuudokaikono. “Nuu kwonyu kuruv wojo puruv aro suwo'numonyugono. Nuu bret biyokweyo basket puruvapuruv ton moro mido tovi ilobwokurosodum amokavla'monyugono. 17Basket amokavla'mo su tonyuro muunyuruda'ai tovi Feroo toollo'mo bret judo'no judo'nodo kula'noka aillungiko ton amullosungikokwono. Toro kuvi kuruv basket tov moro mido tovi muunyu toru wo'duke tovida'ai dokato pworo bodupu bret su tonyu bwolomanodopure toorai kwonmonyugono. Nuu wojo toro tovi suwo'numonyugono.” Sodubwasokaikono.
18Toro sodubwasoka toollu Joosepol kuudokaikono. “Gumoro wojo tovuro kavlo tov aro tovinokwono. Basket puruvapuruv kwonmado tobuul iruko pullapullu tobuullunokwono. 19Iruko pullapullu su tobuul me'no bawo'ji toga Feroo tool wuulo killo'mo ago akavida'ai bomollurolovogumokalokwonekugono. Toro abomollurolovogumokalokwo'ji kwekuji kuruv gumoro mido tovi modovolugipuuropiyowo'ji gumoro kulako pumgu i'noboukuullo tovi ilomejukuragubweyonekugono. Toro sulomejukuragubweyo'ji tookuji dokato tooro wolabopi gumoro kulako tovi bwolomanpinorogano.” Joosepol wojo tovuro kavlo tovino toro kuudokaikono.
20Toruda'ai iruko pullapullu tobuul me'no abawoka toga Feroo tool gami ganeyago tov somaroka iruko tollugwojuno lubullu doto yanyo'moneyokwe gamoro womdokwe toorai ju'bworomaro'no lubullu doto tov sanoporogano. Toro yonomwalodopure tooravuro sumdo tovida'ai Feroo tool gamoro womdo kwiyajulo wain wonyo kwillajuko tooke bret doto sajuko tooke toorallu wuulo killo'mo ago tovida'ai abomollurolovomokalokwokarakono. 21Toro ino sumaiyokwe Feroo tool a'mwo wain wonyo kwillajuko toollu gami womdo sajuko su tov aiko tovi kuumwallokaikono. Toro tool Feroo toollu wain wonyo tov kapwo tovi suromokabiyajukekono. 22Feroo tool toro soka kwol kuruv a'mwo bret doto sajuko toolluno'gwowi noromiyoso'moneyokwe i'noboukuullo tovi sulomejukurosokaikono. A'mwo su tooralluro wojo tovalluno Joosepolluro me'no kuudoka su tov kuvinono kwimo'nokarakono. 23Toro kuvi kuruv a'mwo wain wonyo willokwe tool Joosepolluno kuudo sallulo'gwonyajukekono.
Currently Selected:
Muuduko 40: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
