Joon 10
10
Jisasol sipsip duuwatokwe sugudo toolbusuko imo'nodowodo tovinokwono
1Aki Jisasol aro kuudokaikono. “Nuu nebal'no kuunodo ikudumo'mokwono. A'mwo pwol sipsip kuurupto tovuro noullo tovi'aro maullo'mo kuruv yiulo tomuu'aro pologa'nyo kwolodukwopiyawo'ji su tool a'mwo kuuko pwekono. Aki toro tool povipolomato to'no yodowodekono. 2Toro kuvi kuruv a'mwo pwolno'gwowi noullo tovi'aro sipsip kuurupto tovi anakuuto tomuu kuulodawodekono. A'mwo su tool sipsip duuwatokwe tookono.
3Aki a'mwo pwol sipsip kuurupto tovuro noullo tovi mollomwalodowodekono. Toro te a'mwo noullo tovi mollomwalokwe su tool a'mwo duuwatokwe toollo'mo kudo'aiko tovi kuusubweyodowodekono. Toro te a'mwo sipsip duuwatokwe tool noullo su tovi'aro kuulawo'ji kuurupto toruda'ai gami sipsip toorai deko kuuloduuwopiyodawodekono. Toro kuuloduuwopiyodowo'jure tovi sipsip tooro gamoro yogaimaguurai tovino me'no iworovomaropi kwollomno bodupudorogano. Aki duuwatokwe tool sipsip go'no go'nodo tooravuro yovo tonyu domarowo'ji sipsip kuurupto tovida'ai bomogaibworomokalokwodowodekono. 4Toro tool gami yiuwi'nokai sipsip toorai me'no abomogaibworomokalokwo'ji toga sumdomgu wanonekono. Toro tool wanowo'ji gamoro yogaimaguurai mujodumovla'mdowo'jure tovi sipsip tooro me'no iworovoma'dupudo tovino tov kemi duuwatokwe su toollu uumjunodupudorogano. 5Toro kuvi kuruv sipsip su tooro a'mwo pumuuda'ai gabovo pwollu muumjunpinorogano. Aki gamoro yogaimaguurai tovi miworovoma'dupudo tovino tov a'mwo gabovo su toolluda'ai lukado novlapinorogano.” 6Jisasol yovekurajo su tokwe kuudoka tovi a'mwo tooro wuu'no'mno kworo kuruv kavlo tovino kuudo miyouromaroporogano.
7Jisasol toro wuujuno sumaiyokwe aki aiko te aro kuudokaikono. “Nuvu nebal'no kuunodo ikudumo'mokwono. Sipsip tooravuro kuulabiyo'moneyokwe noullo tov, nuu kwonyugono. 8Nuvu yere mwolabodore toga yiuwi'nokai a'mwo sumdomguda'ai abopo tooro kuuko'mo to'no aboporogano. Toro tooro yogalo wuudodopure kuvi kuruv sipsip tooro kaduko mwiyajuporogano. 9Nuvu sipsip noullo kuunodonyugono. Toro te a'mwo pwol mi'aro aulabwo'ji su toollu Gooti tool nuuwiyo'mwojonekono. Toro tool kuulno lokabino yowo'ji yiuwi'nokai toga wosamujuko ton yo'mgonoma'mwalonekono.
10Kuuko pwol abwo'ji tov yiuno kuuko'mo tokwe'aro noromiyoso'mo tokwe'aro kaiyako mollounapiyo'mo tokwe'aro tonyu yo'moneyokwe bodowodekono. Toro kuvi kuruv nuvno'gwowi a'mwo abolo ton aiyo yiunokuudo mujomwekovla'mwalpino tovi mapino'moneyokwe abonyugono. Aiyo mapino su tov aiyowomno kuullutovaikwopimwalonokwono. 11Sipsip duuwatokwe sugudo pwol gami sipsip toorai wiyo'mwojo'mo yogaina'dowodekono. Toro tool gavnokweyol bollunyo'mo uubwenodowodekono. Nuvu sipsip duuwatokwe sugudo su toolbusukonyugono. 12Toro kuvi kuruv a'mwo pwolno'gwowi sipsip duuwatokwe kuunodo mimo'nodowodekono. Su tool nuugwiyo mallo'mo to'no kuudo yaurowo'ji sipsip toorai moduvomwalonekono. Toro tool sipsip tooravuro jukwo kuunodolmaiyo. A'mwo su tool kuullujuluko pwol abwo'ji toga kwono'ji tov sipsip toorai wuugollu'movowo'ji lukado to'no plawonekono. Aki kuullujuluko su tool sipsip toorai ipolodovanyo'mo yodowo'jure tovino tov sipsip tekwojo gomno gomno lukado younopiyodupudorogano. 13A'mwo nuugwiyo mallo'mo duuwato womdo yodowodo su tool nuugwiyo ki'nomallo'moneyokwe tovino to'no kuudo yaullokwekono. Aki toro tool sipsip toorai pi'mwono mamollumwojokwekono. Toro tovino tov kuullujuluko tool bodowo'jure toga lukado to'no pla'mdowodekono.
14 #
Mt. 11:27; Lk. 10:22 Nuvno'gwowi sipsip duuwatokwe sugudo toolbusukonyugono. Nuvnokwenyuro a'mwo abolo kuunodo tonyuno kuudo youroma'dumdonyugono. Aki moro a'mwo abolo kuunodo kun kuruv mino kuudo youronuma'dupudogano. 15Su toro to'busuko kubalno mi Nyunumiyago tool mino kuudo me'no yanuu'dowodekono. Aki nuu kwonyu kuruv mi Nyunumiyago su toolluno kuudo me'no youroma'dumdekono. Toro te nuvu sipsip toorai wiyo'mwojo'moneyokwe yogainaro'mi nuvnokwe toonyu bollo'moneyokwe wimonyugono. 16Aki nuvu sipsip pworogai'aro kurukwenyugono. Sipsip su tooro sipsip kuurupto tovi anakuuto tomuu mamwalodupudorogano. Toro kuvi kuruv sipsip gabovo su toorogai'aro mokabo'mi sumdomguda'ai sipsip toorogai neya moguro'mwojosumonyugono. Toro amokami su tooro moro yogaimaguurai tovi kaduko nyumwalpinorogano. Aki yiuwi'nokai sipsip amoguro'mwojosumi su tooro mollu'bwoto yiuno puru'mono imo'nupinorogano. Yiuwi'nokai sipsip su toorai duuwatokwe tool yiuno pwolnodonyugono.
17Moro Nyunumiyago tool mino kalo buuropino winodowodo tovuro kavlo tov aro tovinokwono. Nuvnokwe toonyu bollo'moneyokwe nomorubwemonyugono. Aki toro toonyu aiyo aiko te noduka'monyugono. 18A'mwo pwolnodo kwol kuruv moro aiyo mwalodumdo tovi mavipolonumaronekono. Yiuno nuvnokwe toonyu wonyapino yodo'mure toga nokwo romiyanubwepinonyugono. Toro te nuvnokwenyuro jurogudo tovida'ai to'no nokwo bolmonyugono. Aki nuvnokwenyuro jurogudo tovida'ai to'no aiyo aiko te duka'monyugono. Nuu su toro yo'moneyokwe tovino mi Nyunumiyago tool amonuwopiyabokanyugono.”
19Jisasolluro yogalo kuudoka su tovi Juu tooro wuu'no'mno go'no go'no amdukuu'noporogano. 20Toro amdukuu'nopo su tooravuro bwotonyago tooro Jisasolluno aro adoporogano. “Oo kuullo ma'no ma'nodo tool kuuluumwaloduke tovino tov amomo ajadopiyo. Toro toollu nevu kaduko ku'nono mwiyanekono.” Adoporogano. 21Aki pworono'gwowi aro adoporogano. “Yogalo su tov a'mwo kuullo ma'no ma'no kuuluumwaloduke toolluro yogalo to'busuko'maiyo. Aki kuullo ma'no ma'nodo pwolluro jurogudo wiyodowo'jure tokwe a'mwo pwol sumnowojokwe toollu aki aiko te kinyo'moneyokwe ku'nono mikulonekono.” Adoporogano.
Juu tooro Jisasollu kisuvolo kwiyajupo tovinokwono
22Su toro toga Juu a'mwo abolo tonyuro iruko aguto pullugwo abai'movokakwono. Iruko su tollugwo Jeruusalemda'ai Gooti toollu ilomoropiyo'moneyokwe ago tovi muudu'no ausopo tovino aki aiko te kuudo yaullo'moneyokwe lubullu doto sanyajupogakono. Aki iruko aguto su tollugwo lukuu'wuulo toga abai'meyajukokwono. Su toro toga 23Jisasol Jeruusalemda'ai Gooti toollu ilomoropiyo'moneyokwe ago tovuro agwapto towai roukuuropi ago tovi anakuuto tomuu somollokaikono. Roukuuropi ago su tovino yovo tov, Sooloomonollurokwono, dodupudokwono. 24Toro te Jisasol su toru yomolloduke toga Juu a'mwo abolo ton bomwodovomaro'mno aro kuudopogano. “Guu nemi kuu'maiyo toru manekudodumdo tookujuno noo'nookwo kuuno yodowadonogano. Toro te guu Gooti toolluro nekullo'mwojo'moneyokwe ajesoka Krais tookuno'juki kuu'maiyo toru yere neya donekudono.” Kuudopogano.
25Toro kuudopo tovi Jisasol kuudokaikono. “Nuu kemi me'no ikudodumdo kuvi kuruv kevu mino kuudo manubwemwakovo. Moro womdo yodumdo ton mi Nyunumiyago toolluro yovo tovida'ai yodumdonyugono. Su tov nuvnokwe toonyuno kuu'maiyo toru dodoluwosunodumdonyugono. 26Toro kuvi kuruv kevu moro sipsip manyumo'nadokwopo togaikulluno tov mino kuudo manubwemwakopogaikikono. 27A'mwo abolo moro sipsip tonbusuko nonyumo'nodupudo tono'gwowi moro yogaimaguurai tovi kaduko yodupudogano. Nuvu su toro tonyuno kuudo me'no youroma'dumdonyugono. Aki toro ton mi numjunodupudogano.
28 #
Jn. 3:16, 14:6 Nuvu su toro tonyu aiyo yiunokuudo mujomwekovlaiyo'moneyokwe tov wiyodumdonyugono. Moro aiyo wiyodumdo su tov yiunokuudo mamjobolmovla'mwalpinogano. Aki a'mwo abolo moro ato tovi me'no mwora'dumdo su tonyu a'mwo pwolnodo kwol kuruv ku'nono mipolonumokavlawonekono. 29Su tov aro tovinokwono. Moro Nyunumiyago tool a'mwo abolo su tonyu miyo'mo me'no anyabokagano. Aki toro anyaboka su tool yiuwi'nokai noonyumwonyu punyu uuwolo'mdowodekono. Toro tonyu moro Nyunumiyago toolluro ato tovida'ai a'mwo pwolnodo kwol kuruv ku'nono mipolomaronekono. 30Moro Nyunumiyago su tooke'aro nuvnokwe toonyuge'aro toonal yiuno pwolnodonakono.” Kuudokaikono.
31Jisasol toro kuudoka toga Juu a'mwo abolo su ton Jisasollu romiyoso'moneyokwe sulo pworo aluvomaropogano. 32Toro yodopure toga Jisasol aro kuudokaikono. “Mi Nyunumiyago toolluro womdo sugudo go'no go'nodo tonyu kuu'maiyo ikuduuwallodumdonyugono. Womdo sugudo ikuduuwallodumdo su tonyuda'ai puvino kevu sulo togai luvanyuromiyo'mo sadokwoporekikono. Womdo su tov gado'mdeyo?” Kuudokaikono. 33Toro kuudoka tovi Juu tooro aro kuudoporogano. “Nevu gumi sulo togai luvaguromiyo'mo sumwakuuwo tov womdo sugudo puvino'maiyo. Toro kuvi kuruv guvno'gwowi Gooti toolluno yovo tovi bwolomorumwogapiyodamdo su tovino sulo togai luvaguromiyo'mo sumwakuuwono. Guvu yiuno a'mwo yasuwa'nodo pwekugono. Toro tookujuno aro dodumdekugono. “Nuu Gooti toonyugono.” Su toro dodumdekugono.” Kuudoporogano.
34Toro kuudopo tovi Jisasol aro kuudokaikono. “Kemoro ato tovi mwora'dupudo Gooti toolluro loowo puruv aro sakwollungikokwono. “Nuu aro me'no aikudonyugono. Kevu toorekul gooti toorekulbusuko imo'nodupudorekikono.” Sakwollungikokwono.” Kuudokaikono. 35Su toro sakwollungiko tovino Jisasol aro kuudokaikono. “A'mwo abolo Gooti toolluro yogalo ma'dopure su tonyuno, “Kevu gooti toorekulbusuko imo'nodupudorekikono,” Gooti tool me'no adokaikono. Aki yiuwi'nokai Gooti toolluro yogalo sakwollungiko ton judo pumgu'aro ku'nono mimo'nyokweyogano.
36Aki moro Nyunumiyago su tool gavnokwelluro womdo tovi yo'moneyokwe mi janubweno sumaiyokwe kwako akavi kwolomonuwopiyabokanyugono. Toro tovino tov nuu, “Gooti toolluro Kwolaiyonyugono,” aikudumi toga kevu mi aro nonyudumwalpiyo. “Guu Gooti toolluno kaiya'no yogalo abwolomorumwogapimwolano,” nonyudumwalpiyo.
37Nuu mi Nyunumiyago su toolluro womdo tonyu ku'nono miyo'mujuko'mno'juki kevu mino kuudo manubwepinono. 38Toro kuvi kuruv nuvu gamoro womdo su tonyu kuvinono sumi to'gwowi kuudo neya donubweyogaulo. Aki kevu moro yogalo tonyu kuudo muubweyo'mo aikulluno'ji tov moro duuwallo jurogudo ikuduuwallodumdo tonyuno'gwowi kuudo neya duubweyogaulo. Su toro kuubwepi toga mino aro kuudo nyouronumapinogaikikono. Oo su tooke'aro Ganumiyago Gooti tooke'aro tonumdal yiuno aval'no guro'mwonyodubuloraldeyo. Mino su toro kuudo nyouronumapinogaikikono.” 39Jisasol toro wuujuno sumaiyokwe toga a'mwo abolo ton Jisasollu aki aiko te galomworallo'mo sopo kuvi kuruv Jisasolno'gwowi irukuruwolovo'no kuugollu'movokaikono.
40 #
Jn. 1:28
Toro wuugollu'mo'mno sumaiyokwe wonyo Joodanovi igo'mguuno avlavokaikono. Toro avlavoka su tomuu muudu'nodo toga Joonol wonyo agaluvollajuko tomuugono. Toro tomuu Jisasol amwallajukekono. 41Toro mwaloduke toollomno a'mwo abolo bwotonyago ton bo'mno aro sajunopogano. “Joonol duuwallo jurogudo puru'monodo kuruv miyajukekono. Toro kwol kuruv yiuwi'nokai yogalo a'mwo akalluno anekujajuko su ton yiuno nebal'nodo to'no imo'nodupudogano.” Sajunopogano. 42Aki su toro tomuu a'mwo abolo bwotonyago ton Jisasolluno kuudo kuubweyopogano.
Currently Selected:
Joon 10: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
