Joon 12

Mariyav Jisasolluro suvlo tovi wobeya sudo kuunyokwe wonyo tov aimovobweyoka tovinokwono

(Matyuu 26:6-13; Mak 14:3-9)

1Toro te Muunyu Toru'aro Surukuruwolovoka lubullu doto nobai'meyo'moneyokwe tov 6-pela iruko tobuul kuuno wo'duke toga Jisasol wagwolago Betani toru abai'movokaikono. Wagwolago su toru a'mwo Lasarosol mwalodowodorukono. Sumdomgu Lasarosol me'no aboloka kwollu kuruv Jisasol aiyo aiko te amodukavokarukono. 2Toro te Jisasol wagwolago su tovi bai'mo'mduke toolluno ilaiyo mollomallo'moneyokwe wosamujuko pun sovrowosopogano. Aki Martav wosamujuko tonyu yado uumwodeyo'moneyokwe womdo tov sokakwono. Toro uumwodeno sumaiyokwe Jisaseke'aro a'mwo pworogai'aro tooro noluuleyo tovi wolomwalo'mno wosamujuko ton anomwaloporogano. Aki Lasarosol kwol kuruv kworogai wosamujuko anomwalokaikono.

3 # Lk. 7:37,38 Jisasol toro toorogai kuulonomwaloduke toga Mariyav wobeya sudo kuunyokwe wonyo puruv wan hap kiloo tov amokabokakwono. Wobeya sudo kuunyokwe wonyo su tov kuunodokwono. Toro tovino tov nuugwiyo bwotonyo tokwe abingikokwono. Mariyav wobeya sudo kuunyokwe wonyo su tov mokabino sumaiyokwe Jisasolluro suvlo tovi aimowobweyokakwono. Toro kimovobweno sumaiyokwe abolo su tov gavnokweyovuro midoto tokwe maro'no guruko amollaurokakwono. Toro kimovobweyoduke toga wonyo su tovida'ai wobeya sudo tov bwotonyo wuuno'no yiuwi'nokai ago su tovi anakuuto tomuu aullo'mowopiyokakwono.

4Toro kuullo'mowopino sumaiyokwe Jisasolluro uumjunyokwe tooraida'ai pwolluno yovo tov Juudas Iskeriyootol lukomgu Jisasollu ikomago tooravuro ato tovi wobo toga morubweyono su tool kwekono. Toro tool aro adokaikono. 5“Wobeya sudo kuunyokwe aimowosadopiko su tov buro'nyo'mo meko jukiyadopiyo? Wobeya sudo kuunyokwe wonyo su tov nemi anekullabowo'jujuko'mno'juki nevu nuugwiyo bwotonyo nokwo amarowa'jujukonogano. Aki wobeya sudo kuunyokwe wonyo su tovi a'mwo pworo anekubiyopujuko'mno'juki 300 silva nuugwiyo tomgu'aro nokwo amarowa'jujukokwono. Toro te nuugwiyo su tokwe a'mwo abolo apoo'nyaiyo pubuurai nokwo kwiyo'mwojowa'jujukokwono.” Adokaikono. 6Juudasolluro yogalo adoka su tov apoo'nyaiyo tobuuraino kalo wino'no adokalmaiyo. Toro kuvi kuruv a'mwo su toolno'gwowi kuukokwekono. Aki toro tool a'mwo Jisasollu uumjunyokwe tooravuro nuugwipweyo tovi mollomwalodowo gavneyokweyollo'mo pun kuuko amallajukekono. Su toro tovino'mo adokaikono.

7Toro adoka tovi Jisasol aro kuudokaikono. “Guvu abolo su tovi nokwo wonyapino jono. Nuu lukomgu abolmi toonyu moro kulako tov buuso tovi wolomonuwopiyapinonyugono. Su toro toga yovrovanubweyo'moneyokwe tov nuu aiyo kuuno mwalodore akagada'ai abolo su tov wobeya sudo kuunyokwe wonyo tokwe yiuno'no aimovo'dogalanubwemokakwono. 8A'mwo abolo apoo'nyaiyo tobuuro kevuge yiuwi'nokai toga nomjomwekovla'mwalpinogano. Su tobuurai kevu buro'nyo buro'nyoga'deyo toga ilaiyo nokwo mollumwalpinorekikono. Toro kuvi kuruv nuu toonyuno'gwowi kevuge yiuwi'nokai toga mamjomwekovla'mwalanonyugono.” Kuudokaikono.

Pris aguto tooro Lasarosollu romiyoso'moneyokwe yogalo adomdukuurosopo tovinokwono

9Jisasol wagwolago Betani toru bai'mo'mduke toolluno Juu a'mwo abolo kwolallo bwotonyago ton wuu'nyuno sumaveyokwe abopogano. Aki yiuno Jisasollu wonyo'mo to'no aboponmaiyo. Toro kun kuruv Lasarosolluda'ai wonyo'moneyokwe abopogano. A'mwo su tool sumdomgu me'no aboloka toollu Jisasol aiyo aiko te amodukavokaikono. 10Toro te pris aguto tooro Lasarosollu kweke'aro romiyoso'moneyokwe yogalo tov adomdukuurosoporogano. 11Toro adomdukuurosopo su tov aro tovinokwono. Juu a'mwo abolo bwotonyago ton pris aguto su toorai uugollu'mo'mdupu Jisasolluno kuudo kuubweyajupogano. Pris Aguto tooro Lasarosollu romiyoso'mo adomdukuurosopo tov su toro tovinokwono.

Jisasol a'mwo aguto kig pwolbusuko wagwolago Jeruusalem tovi auloka tovinokwono

(Matyuu 21:1-11; Mak 11:1-11; Luuk 19:28-40)

12Iruko aikomguda'ai tollugwoji kwolallo bwotonyago ton lubullu doto yanyo'moneyokwe wagwolago Jeruusalem toru me'no abomwallajupo su ton aro kuu'nopogano. “Oo Jisasol wagwolago Jeruusalem akavi wobo toru me'no abai'mo'mokaikono.” 13Su toro tovi wuu'nyuno sumaveyokwe wonoweyo pilo pun do'movomworaro'mno Jisasol puuto tovi kuulaboduke toollu wuuru'mallo'moneyokwe abolokwopogano. Toro bolokwino sumaveyokwe guureji aro amoderomaropogano. “Anekullo'mwojonoo! Ilaiyokwono. Gooti toolluro sugumaluko to'no kwosungiko akallu amonekwopiyabokaikono. Toro tool Aguto toolluro yovo tovida'ai abumokaikono. Isuraiyol tonolluro a'mwo aguto kig su toolluno ilomoropiyowanoo!” Amoderomaropogano.

14Aki Jisasol doonki muugunyo pwollu maro'no muunyu toru sulomwalokaikono. Su toro tovino Gooti toolluro yogalo sakwollungiko puruv kuvinono sumo'nokakwono. Yogalo su tov arokwono. 15#Sek. 9:9“Kevu wagwolago Jeruusalemda'ai a'mwo abolo togaikul luko mipinono. Kemi aguto kig abadopiko toollu denomallulo! Su tool a'mwo yovomaiyokwe pwolbusuko doonki pwollu muunyu toru ilomwalodowo abadopiko toollu denomallulo!” Sakwollungikokwono. 16Su togasuro Jisasollu toro wimo'noduke tonyuno gamoro uumjunyokwe tooro kavlo tovino kuudo miyouromallajuporogano. Toro kworo kuruv lukomgu Jisasol muunyu kai'muuno me'no suloka toga'no'gwowi Jisasollu kwimo'numoka su tovino aki aiko te kuudo yau'no sumaveyokwe aro adoporogano. “Oo nebalo'mdeyo. Gami kwimo'noka su tovino proofet yogalo puruv Gooti toolluro yogalo tovi sakwollungiko tov dooso.” Adoporogano.

17Toruda'ai a'mwo abolo bwotonyago ton Jisasol Lasarosollu a'mwo buuso sulpuuto tomuuda'ai me'no aboloka toollu aiyo aiko te doduka'mduke toga me'no amuugonaropogano. Toro ton Lasarosollu kwimo'noka tovino a'mwo abolo punyu kuu'maiyo toru adodoluwosomollajupogano. 18Jisasolluro duuwallo jurogudo soka su tovino dodoluwosomollodopure tovi a'mwo abolo bwotonyago ton me'no kuu'nyajupo tovino tov Jisasollu kuuru'maropogano. 19Su toro toga Farasi kevnokwe tooro aro sajunoporogano. “Kevu doonyulo. Yiuwi'nokai a'mwo abolo kwako akavi mwalodupudo ton a'mwo su toollu kuumjunmwakovo. Toro kuumjunmwakopo su tonyu nevu ku'nono muumjukuranonogano.” Sajunoporogano.

Kantri Grikda'ai a'mwo abolo pun Jisasollu a'mgono sopo tovinokwono

20Juu tooravuro lubullu doto tov abai'movoka toga a'mwo abolo Gooti toollu ilomoropiyo'moneyokwe abopo tonyuro pun kantri Grikda'aiyogano. 21Grikda'ai a'mwo abolo su ton Filipollomno abopogano. Filipol kwako Galili tomuuda'ai wagwolago Betisaida tovida'aiyekono. Toro toollomno Grikda'ai a'mwo abolo ton bo'mno aro kuudopogano. “A'mwo agutoloo, nevu Jisasollu sumdo wonyo'mo anekullunadopiyo.” Kuudopogano. 22Toro kuudopo tovi Filipol plavo'no Adruu'wollu kuudokaikono. Toro te Adruu'weke'aro Filipeke'aro tooral plaino sumaleyokwe Jisasollu kuudolorakono. 23Toro kuudolo tovi Jisasol aro kuudokaikono. “A'mwo Kwolaiyo Kuunodo toonyu yovo aguto mallo'moneyokwe tov aga nobai'meyo'mo sadopiyo. 24Toro te nuu nebal'no kuunodo ikudumo'mokwono. Wit sulo pullugwo kwako tovi bwolorawo'ji mabolo'ji tov wit sulo su tollugwo no ki'nyo'moneyokwe ku'nono mabilarowiyonokwono. Toro kuvi kuruv wit sulo tov abolo'ji to'gwowi bilarowiyowo'ji no bwotonyago ki'nonokwono.

25 # Mt. 10:39, 16:25; Mk. 8:35; Lk. 9:24, 17:33 Aki a'mwo pwol gavnokweyolluro kulako tovida'ai aiyo mwallo'mo tovino kalo buuropino winmwalonekono. Toro kwino'ji su tool aiyo yiunokuudo mujomwekovlaiyo'moneyokwe to'gwowi ku'nono mamaronekono. Toro kuvi kuruv a'mwo pwolno'gwowi gavnokweyolluro kulako tovida'ai aiyo tov biyolo to'no uu'mwojonekono. Toro kuu'mwojo'ji kwol kuruv aiyo yiunokuudo mujomwekovlaiyo'moneyokwe to'gwowi nomaronekono. 26Aki a'mwo pwol moro womdo anyo'ji tool numi neya numjunmwalonekono. Aki nuu buro'nyo buro'nyomuudeyo tomuu amwalmi kuruv moro womdokwe su tool nuuge nomwalosunekono. Aki a'mwo pwol moro womdo tovi anyo'ji su toollu moro Nyunumiyago tool yovo aguto nuuwiyonekono.” Kuudokaikono.

A'mwo Kwolaiyo Kuunodo toollu iko tovi nyulomolluruubipino tovinokwono

27Aki Jisasol aro adokaikono. “Aga toga moro poowokalago tovi jul'nyo subwosunmwakono. Toro ibwosunodumdo toonyu aro muudumonyugono. “Nyunumiyagoloo, nuu tagunyo nyubwosunmiyokwe tovino guu nokwo bomollurolovonumokalokuubinekudeyo?” Awiyo. Nuu su toro ku'nono muudumonyugono. Aro tovinokwono. Nuu kwako akavi kwolabo tov tagunyo mi neya anyumo'noneyokwe tovino kwolabonyugono. 28Toro kuvi kuruv aro to'gwowi nuudumonyugono. “Nyunumiyagoloo, guu a'mwo abolo tonyu guvnokwekujuro yovo aguto tovino kuu'maiyo toru duuduuwallono.” Nuudumonyugono.” Kuudokaikono.

Jisasol toro wuujuno sumaiyokwe toga Gooti toolluro ago muunyu kai'muuda'ai yogaimaguurai puruv aro adokakwono. “Moro yovo aguto tovino kuu'maiyo toru me'no kuuduuwallonyugono. Toro toonyu aga aki aiko te kuvinono nuuduuwallumonyugono.” Adokakwono. 29Toro doduke su towai kwolallo adaiyajupo ton yogaimaguurai su tovi wuu'no'mno aro adopogano. “Oo kuuloulo tov ai'nugobadopiyo.” Aki a'mwo abolo puno'gwowi aro adopogano. “Oo ensel pwol su toollu kuudadopiyo.” Adopogano.

30Toro dodopure tonyu Jisasol aro kuudokaikono. “Yogaimaguurai adumoka su tov mi nonyo'mwojo'mo'maiyo. Toro kuvi kuruv kemino'gwowi ikullo'mwojo'moneyokwe adumokakwono. 31Toro te Gooti tool a'mwo abolo kwako akavi mwalodupudo tonyu kooti yogalo jainyubwollo'mo tov aga nobai'meyo'mo sadopiyo. Aki kwako akavi mido mollomwalodowodo toollu nomodukwopiyo'mo kuruv aga nobai'meyo'mo sadopiyo. 32Nuu kwako akavi mwalodumdo toonyu lukomgu i'noguropte tovi nyulomanyuruubipinonyugono. Su toro sulomanyuruubupi toga yiuwi'nokai a'mwo abolo tonyu miyomno ki'nomokamonyugono.” Kuudokaikono. 33Jisasolluro yogalo kuudoka su tov gavnokweyolluro yabolono tovino kuu'maiyo wuuduuwallo'moneyokwe adokaikono.

34 # Ais. 9:7 Jisasol toro kuudoka tovino tov a'mwo abolo kwolallo su ton aro kuudopogano. “Moosesolluro loowo tovida'ai Gooti toolluro nekullo'mwojo'moneyokwe ajesoka Krais toolluno aro wuu'nodowadonogano. Krais su tool aiyo yiunokuudo mujomwekovla'mwalonekono. Toro wuu'nodowado kuvi kuruv guvno'gwowi aro anekudumodekugono. “A'mwo pworo A'mwo Kwolaiyo Kuunodo toollu i'noguropte tovi neya ilomolluruubipinekono.” Su toro anekudumodo tov adado tovino'mdeyo? Aki A'mwo Kwolaiyo Kuunodo su tool ala'mwoldukono?” Kuudoganopogano.

35Toro kuudoganopo tovi Jisasol aro kuudokaikono. “Nuu bako to'busuko toonyu kevuge yiuno kula'nyo toga'gwono mwalmonyugono. Toro te nuu kevuge kuuno mwalo'mi bako pwopiyodo'mure tovi anakuuto tomuu kevu neya jomjomwekovlavogaulo. Su tov aro tovino'mokwono. Dugumdo tov kemi nobu'duvolekuma'mwalo'jokweyo'mokwono. A'mwo pwol dugumdo tovi somjomwekovlawo'ji to'gwowi gamoro novlawono tomuuno kuudo nonagutekono. 36Toro te nuu bako toonyu kevuge kuuno mwalodo'mure toga kevu kuudo neya donubweyogaulo. Su tov aro tovinokwono. Kevu bako toonyuno kuudo anubwepi tov bako toonyuro kwoloraiyo nyumo'nupino tovinokwono.” Jisasol a'mwo abolo tonyu su toro wuujuno sumaiyokwe su towai wuugollu'movo'no a'mwo abolo tonyuro sumdo tovi yiulo apuu'narokaikono.

A'mwo abolo bwotonyago ton Jisasolluno kuudo neya muubweyajupo tovinokwono

37Jisasol a'mwo abolo tonyuro sumdo tovi duuwallo jurogudo bwotonyago ton kuuduuwallajuko kuvi kuruv a'mwo abolo su ton Jisasolluno kuudo muubweyajupogano. 38#Ais. 53:1Jisasolluno kuudo muubweyajupo su tov proofet Aisaiyalluro yogalo ajakwolloka puruvi suuwiyo sumwojokakwono. Yogalo su tov arokwono.

“Agutoloo, nemoro kuuguudo amoruudumwakuuwo akavi a'mwo abolo bwotonyago ton kuudo neya muubweyajupogano. Aki Gooti Aguto toolluro duuwallo jurogudo ton a'mwo abolo tonyu wuuduuwalloduke kuvi kuruv bwotonyago ton, “Nebalo'mdeyo,” majajupogano.” Sakwollungikokwono.

39Aki kuudo ku'nono muubweyajupo su tovino Aisaiyal aro ajakwollokaikono.

40“A'mwo abolo ton sumdo noonpiyokwe Gooti tool kemoro sumdo tonyu galomjurowosodowodekono. Aki a'mwo abolo ton kemoro poowokalago togai kuudo nyouragunyumo'nupiyokwe Gooti tool kemoro poowokalago su tonyu kudo'aiko kuujugurokaikono. Su tov aro tovinokwono. A'mwo abolo su ton miyomno yadu'mwonyo'mo mwinodupudo tovino tov nuu a'mwo abolo su tonyu ku'nono mikulmonyugono. Su toro tovinokwono.”

41Aisaiyalluro kuuguudo ajakwolloka su tov Jisasollunokwono. Jisasol yovo aguto yere mama'duke kugada'ai Aisaiyal me'no kwonomallajukekono. Su toro tovino ajakwollokaikono.

42Nebal'no ajakwolloka kuvi kuruv a'mwo abolo togai'aro aki kemoro a'mwo aguto tooravuro pworogai'aro bwotonyago tono'gwowi Jisasolluno kuudo kuubweyajupogano. A'mwo aguto su tooro kuudo kuubweyajupo kuvi kuruv Farasi tooraino luko yodupudo tovino tov kemoro kuudo kuubweyajupo su tovino kuu'maiyo toru madodowiyoku'bworosunyajuporogano. Su tooro aro kuudo saullajuporogano. Farasi tooro nemi i'bwo'nyago tovida'ai kwa'mgu tomuu nobilomanekudukwopipiyokwe tovino kuudo yau'dupu luko sajuporogano. 43Juu tooravuro a'mwo aguto su tooro kwako akavida'ai a'mwo abolo tonyuro mago tovida'ai yovo aguto mallo'moneyokwe tovino kalo buuropino kwinyajuporogano. Toro kworo kuruv Gooti toolluda'ai yovo aguto mallo'moneyokwe to'gwowi kuudo neya miyaullajuporogano.

Jisasolluro yogalo tov lukomgu a'mwo abolo tonyu jainyubworono tovinokwono

44Jisasol a'mwo abolo kwolallo tonyu deko aro kuudokaikono. “A'mwo pwol numino kuudo anubweyo'ji tov yiuno nuvu judo toonyuno to'no nubweyodowodolmaiyo. Toro kwol kuruv Gooti amonuwopiyaboka su to kwolluda'ai kuudo uubweyodowodekono. 45Aki a'mwo pwol numi anuwono'ji su tool mi amonuwopiyaboka Gooti kwolluda'ai kuruv me'no wonodowodekono. 46Nuu kwako akavi bako to'busuko pwopiyo'moneyokwe abonyugono. Toro toonyuno a'mwo abolo kuudo anubwepi su ton dugumwuulo tomuu ku'nono miyomjomwekovla'mwalpinogano. 47A'mwo pwol moro yogalo tovi wuu'nowo'ji kuvinono muumjuno'ji tov nuvu kooti yogalo mollomwalokwe toonyubusuko a'mwo su toollu ku'nono majainyubwo'monyugono. Su tov aro tovinokwono. Nuvu a'mwo abolo kwako akavi mwalodupudo tonyu jainyubwollo'moneyokwe abonyumaiyo. Toro kwonyu kuruv a'mwo abolo kwako akavi mwalodupudo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe abonyugono.

48Toro kuvi kuruv a'mwo pwol mi buulo nuugunyumopiyowo'ji moro yogalo tovi kisuvolo nyonekono. Moro yogalo moruudodumdo ton a'mwo kisuvolo so'ji su toollu nojainyubwopinekono. Toro te iruko aiyowo'mo toga moro yogalo ikudodumdo su ton kooti yogalo mollomwalokwe to'busuko nuuwimo'nupinogano.

49Neya duu'nyulo. Moro yogalo ikudodumdo tov nuvnokwenyuro kuudo tovida'ai ikudodumdonyumaiyo. Toro kuvi kuruv mi Nyunumiyago amonuwopiyaboka su toolno buro'nyo buro'nyo yogalodeyo ikujo'mo tovino me'no anyabokaikono. 50Toro toonyu aro tovino kuudo me'no youroma'dumdonyugono. Gamoro yogalo danubweyodowodo su tov kevu a'mwo abolo togaikul aiyo yiunokuudo mujomwekovlaiyo'mokwono. Toro tovino tov yiuwi'nokai yogalo ikudodumdo ton yiuno mi Nyunumiyago toolluro nyaboduke togai to'no ikudodumdonyugono.” Kuudokaikono.

Currently Selected:

Joon 12: SMB

Highlight

Copy