Joon 7

Jisasol a'mwo abolo lubullu doto puvi yonomwalodopure tonyu kuuguudo sodubwasoka tovinokwono

1Toruda'ai lukomgu Jisasol kwako Galili tomuuno to'no somollajukekono. Su tov aro tovinokwono. Kwako Juudiya tomuuda'ai Juu tooro Jisasollu romiyoso'moneyokwe puuto tovino a'mgono yodupudo tovino tov Jisasol kwako Juudiya tomuuno yomollo'mo mwinokaikono. 2Su toga Juu tooravuro lubullu doto bwotonyo puruv yanyo'mo togakono. Lubullu doto su tov Sel Ago tonyu amwallajupo tovino aki aiko te kuudo yaullo'moneyokweyokwono.

3Aki su toro toga Jisasolluro gagwai'yago tooro Jisasollu aro kuudoporogano. “Guu akawai wuugollu'movo'bi gumi gumjunyokwe pworo gumoro duuwallo jurogudo wuuduuwallodo'bure tonyu nokwo muugona'mwalpino'moneyokwe kwako Juudiya tomuuno dovlavono. 4Aro tovinokwono. A'mwo pwol aro kuudo sauro'ji tov, A'mwo abolo pun mino kuu'maiyo toru neya wononumapuro, a'mwo su toro kuudo sauro'ji tool gamoro womdo tov yiulo tomuu'aro mimovla'mwalonekono. Toro tovino tov guu womdo jurogudo subi tov yiuwi'nokai a'mwo abolo kwako akavi mwalodupudo tonyuro sumdo tovi kuu'maiyo toru neya duuduuwallunogawono.” Kuudoporogano. 5Gami gagwai'yago su to kworo kuruv Jisasolluno kuudo muubweyajupo tovino tov su toro kuudoporogano.

6Toro toorai Jisasol aro kuudokaikono. “Moro novlaiyo'moneyokwe kuunodo toga yere mabai'mo'mwallo. Toro kuvi kuruv kevnokwe toorekul lubullu doto plaiyo'moneyokwe to'gwowi kemi aikuuwoso. Burowo'nyo toga plaiyo'mo aikulluno'ji tov nokwo pla'mwalpinorekikono. 7Neya duu'nyulo. Kwako akavida'ai a'mwo abolo mwalodupudo ton kemino surodo yo'moneyokwe kavlo puruv nonagutogano. Toro kuvi kuruv nuu toonyuno'gwowi a'mwo abolo su tonyuro ma'no ma'no pasudo mujumovla'mdopure tonyu kuu'maiyo toru dodolubweyodumdonyugono. Su toro tovino tov numino surodo wuunodupudogano. 8Toro te kevu lubullu doto yanyo'moneyokwe iruko aguto akallugwoji nokwo plapinorekikono. Toro kuvi kuruv nuvno'gwowi moro novlaiyo'moneyokwe kuunodo toga yere mabai'mo'mwallo. Toro tovino tov nuu kevuge kwako Juudiya tomuuno lubullu doto su tovino mavla'monyugono.” Kuudokaikono. 9Jisasol toro wuujuno sumaiyokwe kwako Galili su toru kuuno amwallajukekono.

10Toruda'ai gami gagwai'yago tooro lubullu doto tovi yanyo'moneyokwe avlavoporogano. Toro tooro me'no plaino sumaveyokwe Jisasol kwol kuruv kumuuno avlavokaikono. Toro tool a'mwo abolo tonyuro sumdo kuu'maiyo toru'aro mavlavokaikono. Toro kwol kuruv yiulo tomuu'aro avlavokaikono. 11Toro te a'mwo abolo ton lubullu doto su tovi yanodopure toga Juu tooravuro a'mwo aguto tooro Jisasolluno a'mgono soporogano. A'mgono ino ino sumaveyokwe a'mwo abolo tonyu aro kuudoganyajuporogano. “A'mwo su tool gadomuu domwallo?” Kuudoganyajuporogano. 12Lubullu doto sanopo su toga a'mwo abolo bwotonyago ton Jisasolluno bweyogalo sajunopogano. Toro tonyuro pun, “Oo a'mwo su tool sugudekono,” adopogano. Toro kuvi kuruv puno'gwowi aro adopogano. “A'mwo su tool yiuno kuunanekono. Aki toro tool a'mwo abolo tonyu youkuu'nuujokwekono.” Bweyogalo su toro sajunopogano. 13Toro sajunopo kun kuruv Juu a'mwo aguto tooraino luko sajupogano. Toro tovino tov a'mwo pwolnodo kwol kuruv Jisasolluno yogalo jo'moneyokwe kemi mago tokwe kuu'maiyo toru maraiyajupogano.

14Lubullu doto su tovi akuuto toga Jisasol Jeruusalemda'ai Gooti toollu ilomoropiyo'moneyokwe ago tovuro agwapto toru'no kuulno sumaiyokwe kuuguudo sodubwasokaikono. 15Toro yodubwasoduke tovi Juu a'mwo abolo ton wuu'nyuno sumaveyokwe toga mollolokurosi yo'mno aro sajunopogano. “A'mwo pwolnodo kwol kuruv a'mwo akallu miyodubwasungikekono. Toro toolluno tov pi'mwo kuudokwe pwolbusuko adado sumo'nokaldukono?” Sajunopogano. 16Toro yajunodopure tovi Jisasol aro kuudokaikono. “Yogalo yodekubwasodumdo tov numoro'maiyo. Yogalo su tov mi amonuwopiyaboka Gooti toolluro abingikokwono. 17Toro te a'mwo pwol Gooti toolluro ilaiyo winodowo'jure tovi uumjunyo'mo kwino'ji su tool aro tovino kuudo youreyo'mgonomaronekono. Moro yodubwasodumdo tov Gooti toolluda'aiyo'mdukono oo nuvnokwenyuro kuudo tovida'aiyo'mdukono, su toro tovalluno kuudo tov kuvinono nyouromaronekono. 18Neya duu'nyulo. A'mwo pworo kevnokweravuro kuudo tovida'ai moruudodupudo su tooro yovo aguto mallo'mo winodupudorogano. Toro kuvi kuruv a'mwo pwol gami amoropiyaboka toolluno yovo aguto wiyo'mo kwino'ji su toolno'gwowi kuunano yogalo tokwe mamoruujokwekono. Toro tool yiuno nebal'no yogalo to'no moruujokwekono.

19Moosesol Gooti toolluro loowo tov kemi aikullabokaikono. Toro kuvi kuruv kemida'ai yiuno pwolnodo kwol kuruv loowo su tonyu ku'nono muumjunodowodekono. Kevu kisuvolo yodupudo su toorekul mi romiyanubweyo'mo puuto tovino a'mgono somolladokwoporekikono.” Kuudokaikono. 20Toro kuudoka tovi a'mwo kwolallo abi'bwo'nyajupo tooro aro kuudoporogano. “Ala'mworuvo gumi romiyagubweyo'mo a'mgono jomolladokwovo? Nevu gumi romiyagubweyo'mo a'mgono mimwakuuwono. Aga gumino aro kuudo saguu'mwakuuwono. Kuullo ma'no ma'nodo pwol gumi me'no kuulogumwalodowodekugono. Saguu'mwakuuwono.” Kuudoporogano.

21Toro kuudopo tovi Jisasol aro kuudokaikono. “Sabat toga nuu duuwallo jurogudo puru'monodo tov aikuduuwallumwa'jo tovi kevu wonyuno sumaveyokwe yiuwi'nokai toorekul mollolokurosi sumwakoporekikono. 22#Mdk. 17:10Toro kworekul kuruv iruko Sabat toga aro womdo yodupudorekikono. Kevu Moosesolluro loowo tovi uumjunyo'moneyokwe iruko Sabat toga lakulkulako do'mdupudorekikono. Kuudo neya jaullulo. Lakulkulako do'nyo'moneyokwe pasudo su tov Moosesolluro loowo tov yere mimo'noduke kuga kuruv aiyoga tellukweyago tooravuro togada'ai pasudo su tov sumo'nokakwono. 23#Jn. 5:9Toro te kemi kwolaiyo tooravuro lakulkulako deyo'moneyokwe iruko tov Sabat tollugwoji abai'mowo'ji tov kevu Moosesolluro loowo su tovi kisuvolo nuuwipiyokweyo'mo toorekul iruko Sabat kuga kuruv kuvinono do'mdupudorekikono. Toro tovino tov Sabat toga nuvu a'mwo pwolluro kulako tovi yiuno'no sukulmwa'jo toonyuno surodo'mo sadokwopo tov buro'nyo'mo'mdeyo? 24Kevu kevnokwerekulluro sumdo tokwe anuwonpi tomgu'aro to'no mi nogallainyubwo'mwalpiyo. Toro kworekul kuruv po'dogalo tomgu'aro to'gwowi mi neya dogallainyubworogaulo.”

A'mwo abolo ton Jisasolluno tov, “Krais tooldukono,” sajunopo tovinokwono

25Toruda'ai wagwolago Jeruusalemda'ai a'mwo abolo pun aro sajunopogano. “A'mwo aguto tooro a'mwo noromiyoso'mo a'mgono sadokwopo tool akal kwekono. 26Aki toro tool kuu'maiyo toru'no moruudoduke kwollu kuruv a'mwo aguto su tooro yogalo puru'monodo kuruv muudumwakoporogano. A'mwo aguto su tooro a'mwo akalluno aro kuudo jukiyau'mwakovo. Oo a'mwo su tool Gooti toolluro nekullo'mwojo'moneyokwe ajesoka Krais tooldeyo, su toro kuudo jukiyau'mwakovo oo miyouromallu jukimwakovo? 27A'mwo akal toro tomuuda'ai abokaldeyo tov kuudo me'no youroma'dowadekono. Toro kuvi kuruv Gooti toolluro nekullo'mwojo'moneyokwe ajesoka Krais toolno'gwowi abwo'ji toga yiuwi'nokai a'mwo abolo tonol kuudo miyau'dowa'jure tomuuda'ai yasuwa'no biyanekulo'nonekono.” Sajunopogano.

28Toro yajunodopure toga Jisasol Jeruusalemda'ai Gooti toollu ilomoropiyo'moneyokwe ago tovuro agwapto toru yodubwaso'no yogalo guureji aro amoruudokaikono. “Kevu numino aro kuudo yanuu'dupudogaikikono, Oo a'mwo su tool kwoldeyo. Aki toro tomuuda'ai abokaldeyo. Kevu mino su toro kuudo yanuu'dupudo kuvi kuruv nuvnokwenyuro kuudo tovida'ai abonyumaiyo. Mi Nyunumiyago toolno'gwowi amonuwopiyabokanyugono. Su tool nebal'nodekono. Toro toolluno kevu kuudo miyau'dupudogaikikono. 29Nuvno'gwowi mi amonuwopiyaboka su toolluno kuudo me'no youroma'dumdonyugono. Su tool mi kemiyomno amonuwopiyabokanyugono.” Jisasol toro amoruudokaikono.

30Toro moruujuno sumaiyokwe a'mwo aguto tooro Jisasollu galomworallo'mo puuto tovino a'mgono sajuporogano. Toro kuvi kuruv gami wimo'nyo'mo kuunodo toga yere mabai'mo'mduke tovino tov a'mwo su tooro yere magalomworallajupekono. Aki Jisasollu nogalomworallo'moneyokwe a'mwo pwolnodo kwol kuruv ato tokwe yere muubogai'nyajukekono. 31Jeruusalemda'ai Gooti toollu ilomoropiyo'moneyokwe ago tovuro agwapto toru kwolallo abi'bwo'nopo su tonyuda'ai a'mwo abolo bwotonyago ton aro sajunopogano. “Krais tool abwo'ji toga gamoro duuwallo jurogudo pun nekuduuwallonekono. Toro anekuduuwallo'ji su ton a'mwo akalluro duuwallo jurogudo bwotonyago tonyu nokwo uuwolopinodukono? Awiyo, ku'nono muuwolopinogano.” Su toro yajunyuno sumaveyokwe Jisasolluno tov, Krais tooldeyo, kuudo kuubweyopogano.

32A'mwo abolo bwotonyago su ton bweyogalo bomjojunugoulodopure tovi Farasi tooro wuu'nyuno sumaveyokwe Jisasollu nogalomworallo'mo kuudo sauroporogano. Toro te Farasi toorogai'aro pris mido mollomwalokwe toorogai'aro tooro Jisasollu galomworallo'moneyokwe a'mwo mollurogudo pworai amorapiyoporogano. 33Toro yodopure toga Jisasol a'mwo abolo tonyu aro kuudokaikono. “Nuu kula'nyo toga'gwo kevuge mwalmonyugono. Yo'mi lukomgu mi amonuwopiyaboka toollomno aiko te novla'monyugono. 34Kevu numino a'mgono ino ino yopi kuvi kuruv ku'nono manuwonpinogaikikono. Aki nuu lukomgu amwalmi su tomuu kevu ku'nono mavlapinogaikikono.” Kuudokaikono.

35Jisasolluro toro kuudoka tovi Juu tooravuro a'mwo aguto su tooro aro sajunoporogano. “A'mwo su tool Grik tooravuro kantri go'no go'nodo tomuuno plavowo'ji Grikda'ai a'mwo pworai yodubwasonoldukono? Kantri go'no go'nodo su tonyu Juu pworo me'no ajo'bworapingopogano. Toro te a'mwo su tool kantri su tonyomno pla'mdowo'jure toollu nevu ku'nono mwonanoldukono? 36Aki a'mwo su toolluro yogalo puruv aro adumokaikono. “Kevu numino a'mgono ino ino yopi kuvi kuruv ku'nono manuwonpinogaikikono. Yopi nuu amwalmi tomuu kevu ku'nono mavlapinogaikikono.” Yogalo su tovalluro kavlo tov buro'nyo tovino'mdukono?” Sajunoporogano.

Aiyo yiunokuudo mujomwekovlaiyo'moneyokwe wonyo tovinokwono

37Toruda'ai lubullu doto tovuro aiyowo'mo iruko aguto tollugwoji Jisasol iloda'mno sumaiyokwe guureji aro amoruudokaikono. “A'mwo pwol wonyo'mo kuuleyaluko kwino'ji su tool miyomno neya abwono. Toro abwo'ji toollu nuu wonyo tov nuuwimonyugono. 38A'mwo pwol mino kuudo anubweyo'ji toolluno Gooti toolluro yogalo puruv aro sakwollungikokwono. “Gamoro poowokalago tovi anakuuto tomuuda'ai aiyo yiunokuudo mujomwekovlaiyo'moneyokwe tov wonyo sumdo to'busuko ilowilovabowo'ji wonyo aguto to'busuko lokuumwalonokwono.” Sakwollungikokwono.” 39Jisasol su toro amoruudoka tov Gooti toolluro Kuullo toollunokwono. Lukomgu a'mwo abolo Jisasolluno kuudo kuubwepi ton Gooti toolluro Kuullo su toollu kuvinono nomapinekono. Sumdomgu Gooti tool gamoro Kuullo toollu yere mwiyajuko tov aro tovinokwono. Su toro toga Jisasol Gooti toolluro bako bwotonyokwe tomuu yere maulomwaloduke tovinokwono.

A'mwo abolo ton Jisasolluno go'no go'no kuudo yauro'mno somuudeyapinopo tovinokwono

40Jisasolluro toro amoruudoka tovi kwolallo ton wuu'nyuno sumaveyokwe a'mwo abolo pun aro adopogano. “Oo aiyoga Gooti tool Proofet pwollu nomoropiyabiyo'mo subuu'yamju sajuko tool akal kwekono.” 41Aki a'mwo abolo pun aro adopogano. “Gooti toolluro nekullo'mwojo'moneyokwe ajesoka Krais tool akal kwekono.” Toro adopo kuvi kuruv a'mwo abolo puno'gwowi aro adopogano. “Awiyo, a'mwo akal kwako Galili tomuuda'aiyekono. Toro toolluno tov Kraisolmaiyo. 42#Mka. 5:2; Krt. 2:30-31Gooti toolluro yogalo puruv aro sakwollungikokwono. “Krais tool a'mwo aguto kig Devitolluro sawosuno'ji tovida'ai imo'nonekono. Aki Krais su tool Devitolluro ajumiyo Betelemda'ai bwonekono.” Toro sakwollungikokwono.” A'mwo abolo pun toro adopogano. 43Toro te a'mwo abolo su ton Jisasolluno kuudo go'no go'no yau'no sumaveyokwe amuudeyapinopogano. 44A'mwo abolo su tonyuda'ai pworo Jisasollu wuulo galeromworallo'mo kwinoporogano. Toro kworo kuruv a'mwo su tooraida'ai pwolnodo kwol kuruv kemi ato tokwe Jisasollu ku'nono mamogaleromworaropekono.

Juu mido mollomwalokwe tooro Jisasolluno kuudo muubweyajupo tovinokwono

45Toruda'ai Farasi toorogai'aro Pris mido mollomwalokwe toorogai'aro tooravuro sumdomguda'ai a'mwo mollurogudo amorapiyopo tooro aikomgu aboporogano. Toro abopo su toorai Pris mido mollomwalokwe toorogai'aro Farasi toorogai'aro tooro aro kuudoganoporogano. “Kevu a'mwo su toollu mamokamapo tov buro'nyo'mo'mdeyo?” Kuudoganoporogano. 46Toro kuudoganopo tovi a'mwo mollurogudo tooro kuudoporogano. “A'mwo su toolluro yogalo moruudoduke tov pumgu'arokwono. Gamoro yogalo su tov yiuwi'nokai a'mwo pworavuro yogalo moruudodupudo tonbusuko'maiyo.” Kuudoporogano. 47Toro kuudopo tovi Farasi tooro a'mwo mollurogudo su toorai aro amollovakuroporogano. “Oo a'mwo su tool a'mwo abolo tonyu mode'nomokavla'mdowodo to'busuko kubalno kev kworekullu kuruv aval'no amode'nekumokavla'mwallo. 48Kuudo neya jaullulo. Nevu mido mollomwalokwe toonogai'aro Farasi toorogai'aro toonolluda'ai pwolnodo kwol kuruv a'mwo su toolluno kuudo muubweyodowadonogano. 49Toro kuvi kuruv kwolallo bwotonyago ton a'mwo su toolluno kuudo uubweyodupudo tono'gwowi Moosesolluro loowo tovino kuudo po'dogalo miyouroma'dupudogano. Su toro tonyu Gooti tool jul'nyo nuubweyonekono.” Kuudoporogano.

50 # Jn. 3:1,2 Toro wuudodopure toga Farasi tooraida'ai a'mwo pwolluno yovo tov Nikoodimasolekono. A'mwo su tool sumdomgu Jisasollu wonyo'moneyokwe me'no kuuru'marokaikono. Toro tool aro kuudokaikono. 51“Nevu a'mwo pwollu kooti yogalo yere maduuwiyodowa'jure toga gamoro pasudo tonyuno yasuwa'no ajainyubwora'ji tov nevnokwenolluro loowo tovi kisuvolo yanonogano. Toro kuvi kuruv a'mwo tool gamoro pasudo tonyuno me'no adodowiyoku'bworoso'ji toga'no'gwowi kirumwallo'mo yogalo tov nokwo duubweyanekono.” Kuudokaikono. 52Toro kuudoka tovi aro kuudoporogano. “Oo guu kweku kuruv kwako Galili tomuuda'aiyekudukono? Guvnokwe tooku Gooti toolluro yogalo sakwollungiko tonyu ajagilbi tov aro kuudo youroma'binekugono. Kwako Galili su tomuuda'ai proofet pwolnodo kwol kuruv mabimo'nonekono. Su toro kuudo youroma'binokwono.” Kuudoporogano.

53Toro wuujuno sumaveyokwe yiuwi'nokai a'mwo abolo ton wuugollu'movo'mno kemi ago tomuuno avlavopogano.

Currently Selected:

Joon 7: SMB

Highlight

Copy