Luuk 11

Jisasol subusu'nyogalo jo'moneyokwe sodubwasoka tovinokwono

(Matyuu 6:9-15, 7:7-11)

1Toruda'ai Jisasol kwako pumuu mwalno sumaiyokwe Gooti toollu subusu'nyogalo kuudokaikono. Me'no wuujuno sumaiyokwe gamoro uumjunyokwe pwol Jisasollu aro kuudokaikono. “Agutoloo, Joonol gami uumjunyokwe toorai subusu'nyogalo jo'moneyokwe tovino sodubwasajukekono. Toro to'busuko kubalno guu kweku kuruv subusu'nyogalo jo'mo tovino nemi neya jodonekubwasono.” Kuudokaikono. 2Toro kuudoka tovi Jisasol gami uumjunyokwe toorai aro kuudokaikono. “Kevu subusu'nyogalo jo'mo toorekul aro neya dodumovlavogaulo.

“Nemi Nellunumiyagoloo, gumino yovo aguto neya gujamwalanonogano. Guu aguto kig tookujuro mido mollomwalo tov neya abimo'nono. 3Aki guu yiuwi'nokai iruko tollugwojavuro wosamujuko mujonugovla'mwalano tov donekubweyogawono. 4Aki nemoro ma'no ma'no yodowado tonyu yiunokuudo manekudukwopiyodo'bure toga ne kwonol kuruv a'mwo abolo nemi kaiyako sanekullugolpi tonyuro ma'no ma'nodo tonyu yiunokuudo neya modukwopimwalanonogano. Aki yamju wiyogado pun nemi nonekullumo'no'jokwe tov guu nemi wiyogado su tonyomno nomollubworonekumokavla'biyo.”

Subusu'nyogalo toro duudogaulo.” Kuudokaikono.

5Jisasol toro wuujuno sumaiyokwe aki yogalo pugai aro kuudokaikono. “Kemida'ai pweku ibwoto'nyo pwol kurukweyekuno'juki akuusuduko toga plavo'bi aro wuudubinekugono. “Oo mi ibwoto'nyoloo, guu bret pworapwol donyabono. 6Moro ibwoto'nyo gabovo pwol puukumi'yago tomuu'aro abadopiko toollu wosamujuko pun wiyo'mo nonagutonyugono.” Su toro wuudubinekugono. 7Guu su toro kuudubi tov aro nokwo gudonekono. “Guu nuumjukuto mibinono. Moro kudo'aiko tov me'no amollukurosumokwono. Aki nuuge'aro moro kwoloraiyo togai'aro tonumdotonol sa me'no kwo'mawonogano. Toro te nuu bret pworo gujabiyo'moneyokwe tov maduka'monyugono.” Gudonekono.” 8Toro kuvi kuruv Jisasol kuudokaikono. Nuu aro ikudumo'mokwono. “A'mwo su tool, Oo mi ibwoto'nyo tooldeyo, kuudo yaurowo'ji bret tov wiyonolmaiyo. Toro kuvi kuruv ibwoto'nyo su toolluro wuudoganyuno wuudoganyuno yodowo'jure tovino tov nuuwiyo'mwojonekono. Toro tool dukavowo'ji noonyumwonyu supto so'ji ton kuvinono wiyonekono.

9Toro te aro ikudumo'mokwono. Kevu Gooti toollu subusu'nyogalo kuudoganpi tov kuvinono nekullabwonekono. Kevu Gooti toolluro ilaiyo winodowo'jure kuudo tonyuno a'mgono supi tov kuvinono nyo'mgonomapinogaikikono. Aki kevu kudo'aiko tovi iwago aromipi tov Gooti tool kemiyo'mo kudo'aiko kuvinono nousaikubweyonekono. 10Su tov aro tovinokwono. Yiuwi'nokai a'mwo abolo Gooti toollu subusu'nyogalo kuudoganpi ton kuvinono ma'dupudogano. Aki a'mwo pwol Gooti toolluro ilaiyo winodowo'jure tonyuno a'mgono so'ji tov kuvinono yo'mgonoma'dowodekono. Aki a'mwo pwol kudo'aiko tovi iwago aromiyo'ji tov Gooti tool a'mwo su toollo'mo kudo'aiko kuvinono kuusubweyodowodekono.

11Kevu kuunumiyago toorekulluda'ai pweku gumi kwolaiyo tool aro agudo'ji tov, “Domwoga pwol donyabono,” toro agudogano'ji tovi guu ganumiyago tooku kwolaiyo su toollu gabakuto pwol nokwo wibinekudukono? Awiyo. 12Aki puruv, “podopto pullugwo donyabono,” agudo'ji tovi guu ganumiyago tooku kwolaiyo su toollu akullo pwol nokwo wibinekudukono? Awiyo. 13Kevu kuunumiyago ma'no ma'nodokwe kworekul kuruv kemi kwoloraiyo tobuurai yasuwa'wino sugudo ton wiyodupudorekikono. Su toro to'busuko kubalno kemi Tellunumiyago muunyu kai'muu mwalodowodo kwol kuruv yiuwi'nokai a'mwo abolo, “donyabono,” kuudoganpi togaikullu gamoro Kuullo tool kuvinono ikullabwonekono. Aki Gooti su tool kwako akavida'ai tellunumiyago toorai uuwolo'mdowodo toolluno tov kevu kuudoganpi togaikullu muunyu toru'aro kuruv nekullamwalonekono.”

A'mwo pworo Jisasolluno, “Belsebuulolluro jurogudo tokwe womdo mollodowodekono,” adopo tovinokwono

(Matyuu 12:22-30; Mak 3:20-27)

14Toruda'ai Jisasol a'mwo yogaimajokwe pwekwoji kuullo ma'no ma'nodo kuulomwalodowodo toollu amodovomjapiyokaikono. Toro modovomjapino sumaiyokwe kuullo ma'no ma'nodo tool abuugollu'mokalokwokaikono. Me'no abuugollu'mokalokwoka toga a'mwo yogaimajo su tekwo mago ravo'no yogalo adokaikono. Su toro wimo'noduke tovi a'mwo abolo ton muugona'no sumaveyokwe luko amorumoukuropiyopogano. 15#Mt. 9:34, 10:25Toro yodopure kuvi kuruv a'mwo pworono'gwowi aro sajunoporogano. “Su tool kuullo ma'no ma'nodo tooravuro aguto kuunodo mollomwalo Belsebuulolluro jurogudo tokwe kuullo ma'no ma'nodo toorai modovomjapiyokwekono.” Sajunoporogano.

16 # Mt. 12:38, 16:1; Mk. 8:11 Toro yajunodopure toga aki a'mwo pworo Jisasol abwolorawoneyokweyo'mo yamju kwiyoganoporogano. Toro tooro aro wuudoganyuno wuudoganyuno soporogano. “Nevu gumino tov Gooti toolluro amonekwopiyaboka tooldeyo gudano'mo tov guu muunyu kai'muuda'ai duuwallo jurogudo puruv neya donekuduuwallono.” Yamju wiyoganyo'mo tooro toro kuudoganoporogano. 17Toro kuudopo kuvi kuruv Jisasol kemoro kuudo tovi me'no youroonyuno sumaiyokwe aro kuudokaikono. “Kantri puru'monodo tov imgu amgu jopolosunowo'ji molo suno'ji tov ku'nono mamjomwekovlawonokwono. Aki ago puusuda'ai tonumdoto jopolosunopi molo aullunpi tov su tonumdoto nobwolorapinogano. 18Aki Satanyeke tooro imgu amgu jopolosunopi molo sunpi tov manyu toga guureji mamjomwekovlapinorogano. Yere younopipinorogano.

Toro te kuudo neya jaullulo. Kevu mino aro dodupudorekikono. “Su tool kuullo ma'no ma'nodo tooravuro aguto kuunodo mollomwalo Belsebuulolluro jurogudo tokwe kuullo ma'no ma'nodo toorai modovomjapiyokwekono.” Dodupudorekikono. 19Kuullo ma'no ma'nodo toorai nuu kuullo ma'no ma'nodo Belsebuulolluro jurogudo tokwe mamodovomjapiyodumdonyugono. Toro kuvi kuruv kevu mino yogalo aro nyudodupudorekikono. “Oo Belsebuulolluro jurogudo tokwe kuullo ma'no ma'nodo toorai modovomjapiyodowodekono.” Kevu mino su toro anyudupi to'gwowi kemi ikumjunyokwe kworai kuruv yogalo su tov nobu'duvolomaronokwono. Toro te kemoro ikumjunyokwe su tooro kooti yogalokwe toga kemi nomojokuu'naikubwepinorogano. Su tov aro tovinokwono. Kemoro ikumjunyokwe kworo kuruv kuullo ma'no ma'nodo toorai modovomjapiyodupudorogano. 20Toro kuvi kuruv nuu kuullo ma'no ma'nodo toorai yiuno Gooti toolluro jurogudo tokwe amodovomjapimi to'gwowi aro kuudo nyouromapinorekikono. Oo aguto kig Gooti toolluro mido mollomwalo tov kemi wobo tomuu me'no abekuru'ma'mwalluko'mdeyo. Kuudo nyouromapinorekikono.

21A'mwo jurogudokwe pwol gami iro'mwomido togai momworarowo'ji gavnokweyolluro agwapto toru duvomwalodowo'jure toga gamoro kuto ivito ton ilaiyo to'no wo'dupinogano. 22Toro kuvi kuruv a'mwo jurogudo kuunodokwe pwol bowo'ji molo kwiyo'ji toga ago su tovi jukwo toollu nuuwolowonekono. Toro kuuwolowo'ji toga a'mwo toolluro jurogudo amallajuko iro'mwomido tonyu novipolomaronekono. Aki a'mwo su toolluro kuto ivito kunyu kuruv ipolomarowo'ji a'mwo pworai yado uumwodeyonekono.

23 # Mk. 9:40 A'mwo pwol mino ilaiyo mwinodowodo su tool moro ikomago nyumo'nodowodekono. Aki a'mwo pwol nuuge a'mwo abolo tonyu mollu'bwollo'mo avaiwomdo miyodowodo su tool a'mwo abolo su tonyu mollovomjapiyo'moneyokwe moro ikomago tooke avaiwomdo yodubulekono.”

Kuullo ma'no ma'nodo pwol aikomgu abwo'ji tov sumdomguda'ai kaiya'nodo tovi nuuwolowono tovinokwono

(Matyuu 12:43-45)

24Aki Jisasol aro kuudokaikono. “Kuullo ma'no ma'nodo pwol a'mwo pwollu me'no abuugollu'mokalokwo'ji toga kuullo ma'no ma'nodo su tool iruko mwallo'moneyokwe kwako a'mwomaiyo kuu'maiyo puru'no yo'mgonomollonekono. Toro so'mgonomollo'ji kuvi kuruv iruko mwallo'mo pumuu ku'nono miyo'mgonomaronekono. Toro te kuullo ma'no ma'nodo su tool aro donekono. “Oo nuu ago sumdomguda'ai abuugollu'mokalokwo tovino aikomgu neya avla'mo.” 25Toro dowo'ji gami sumdomguda'ai ago abuugollu'mokalokwo'ji su tovi kuulawo'ji aro tovi wonomaronekono. Ago su tovi anakuuto tomuu wonoweyo puruullo tokwe me'no abwokuropingiko tovi wononekono. Aki ago su tovi anakuuto tomuu yiuwi'nokai ton me'no sovo'dogalosungiko tovi wonomaronekono.

26Toro wonomarowo'ji kuullo ma'no ma'nodo su tool kuullo ma'no ma'nodo 7-pela pworogai'aro toorai mokaulawonekono. 7-pela kuullo su tooravuro kirovanyuvanyu pasudo tov sumdomguda'ai kuullo ma'no ma'nodo toolluro tovi uuwolo'mdupudorogano. Toro toorai me'no mokaulawo'ji yiuwi'nokai kuullo ma'no ma'nodo su tooro a'mwo su toollu kuulomwalmwalpinorogano. Toro te sumdomgu a'mwo su tekwo kuullo ma'no ma'no pwolnodo toolluro mollugolamo'mduke tovida'ai kaiya'no amwallajukekono. Toro kuvi kuruv lukomgu yiuwi'nokai kuullo ma'no ma'nodo su tooro me'no aulomwalpi toga'no'gwowi kaiya'nodo sumdomguda'ai tovi nuuwolowonokwono. Yowo'ji kaiya'no bwotonyo wimo'nugovla'mwalonekono.” Jisasol toro kuudokaikono.

Gooti toolluro yogalo tovi wuu'nopi kuumjunpi tonyu ilaiyo bwotonyo tov uuwo'dowodo tovinokwono

27Jisasol toro wuudoduke toga a'mwo abolo kwolallo tonyu anakuuto tomuuda'ai abolo puruv Jisasollu deko aro suloduwopiyabokakwono. “Oo abolo gumi yogumaro'no amdo saguusoka tovi ilaiyo bwotonyo tov uuwo'dowodokwono.” Suloduwopiyabokakwono. 28Toro kuudoka kuvi kuruv Jisasol abolo su tovi aro kuudokaikono. “Ilaiyo bwotonyo uuwo'dowodo to'gwowi arokwono. A'mwo abolo Gooti toolluro yogalo tovi wuu'nopi kuvinono uumjunodupudo su tonyu ilaiyo bwotonyo tov uuwo'dowodokwono.” Kuudokaikono.

Joona'wolluno duuwallo tovinokwono

(Matyuu 12:38-42; Mak 8:12)

29 # Mt. 16:4; Mk. 8:12 A'mwo abolo kwolallo su togai'aro aki a'mwo abolo bwotonyago pugai'aro ton bi'bwo'nyuno sumaveyokwe Jisasol kuuguudo puruv aro kuudokaikono. “Kevu akagasuro amwakopo ma'no ma'nodokwe toorekul Gooti toollu muumjunodupudorekikono. Toro toorekul numino tov nebal'no kuunodoldukoneyokwe duuwallo puruv ikuduuwallo'mo aikullunadopiyo. Toro aikullunadopiko kuvi kuruv kevu duuwallo puvi mwonpinorekikono. Yiuno Joona'wollu kwimo'noka kubalno duuwallo tov ikuduuwallodowo'jure su tovi wonpinorekikono. 30#Jna. 3:4Joona'wol wagwolago Niniveda'ai a'mwo abolo tonyu duuwallo jurogudo kwimo'nokaikono.

Toro to'busuko kubalno A'mwo Kwolaiyo Kuunodo toonyu agasuro a'mwo abolo tonyu duuwallo jurogudo wimo'numwalmonyugono. 31Aki Gooti tool agasuro toorekullu kooti yogalo adaikullo'ji toga abolo aguto kwin puruv nobodawonokwono. Kwin su tov imomgu saut tomguda'ai kwako Siba tovi aguto imo'nodowo mido amollomwallajukokwono. Aiyoga abolo kwin su tov Sooloomonolluro pi'mwo kuudo tovi wuu'nyo'moneyokwe manyu tomuuda'ai sulabiyajukokwono. Toro kuvi kuruv aga'no'gwowi Sooloomonollu uuwolo'mdumdo toonyu akawai nomwakono. Aki moro yogalo ikudodumdo tonyu kevu muu'nyubusuko to'no sadokwoporekikono. Toro tovino tov lukomgu Gooti tool agasuro toorekullu kooti yogalo adaikullo'ji toga abolo aguto kwin su to kuruv bodavowo'ji kemi jul'nyogalo nodaikubweyonokwono.”

32 # Jna. 3:5 Jisasol toro wuujuno sumaiyokwe aki aro kuudokaikono. “Niniveda'ai ton Joona'wolluro moruudoduke tovi wuu'no'mno Gooti toollomno kuudo souragunyumo'nopogano. Toro kuvi kuruv aga nuvu Joona'wollu uuwolo'mdumdo toonyuno'gwowi akawai nomwakono. Toro toonyuro yogalo ikudodore tovi kevu muu'numwakopo tovino tov Gooti tool kooti yogalo adaikullo'ji toga Niniveda'ai a'mwo abolo ton bodavopi kemoro ma'no ma'nodo sumwakopo tonyuno jul'nyogalo nodaikubwepinogano.”

Bako tov kemi aiyowomno kuullo'movaikwopimwalono tovinokwono

(Matyuu 5:15, 6:22-23)

33 # Mt. 5:15; Mk. 4:21; Lk. 8:16 “A'mwo pwol gworeko tov amuugutowo'ji toga bu'duvoloso'moneyokwe puvi dolago tomuu maluudapiyonekono. Ago tovi dolago tomuudeyo oo soospen tovi dolago tomuudeyo tomuu maluudapiyonekono. Toro kuvi kuruv gworeko gudupolallo'moneyokwe tovi muunyu toru'no'gwowi noluudapiyonekono. Toro aluudapiyo'ji su tovuro bako tov ago tovi kuulowopiyawonokwono. Toro kuulowopiyodowo'jure tovi a'mwo abolo aulomwalpi ton nokwo wonmwalpinokwono. 34Gumoro sumdo toval gumi kulako tovuro gworeko to'busuko gujumo'nodubulovakono. Toro te gumoro sumdo su toval ilaiyo tollovaino ainamjubullu tov gumoro yiuwi'nokai kulako tovi anakuuto tomuu bako tokwe aiyowomno kuullo'mowopiyonokwono. Toro kuvi kuruv gumoro sumdo toval kirovanyuvanyu tooraino ainamjubullu to'gwowi gumoro yiuwi'nokai kulako tovi anakuuto tomuu dugumwuulo to'no kuullo'mowopiyonokwono.

35Toro tovino tov kemi anakuuto tomuuda'ai bako kuulaikwo'dowodo su tovi nebuulowosupiyokwe wako neya dou'nogaulo. 36Bako su tov kemi yiuwi'nokai tomuu aullo'mowopiyo'ji tov dugumdo pwekwonodo kuruv nonaguto woronokwono. Aki kemoro yiuwi'nokai kulako tovuro nomwallo tov yiuno gworeko tovuro bako to'busuko pwopimwalonokwono. Toro te kemoro yiuwi'nokai kulako tovi bako pwopiyodowodo to'busuko kubalno kemoro poowokalago tovi anakuuto tomuu bako tov aiyowomno kuullo'movaikwopimwalonokwono.” Kuudokaikono.

Farasi toorogai'aro loowo tovino pi'mwo kuudokwe toorogai'aro tooro kaiya'no pasudo airoungovlaiyajupo tovinokwono

(Matyuu 23:1-36; Mak 12:38-40; Luuk 20:45-47)

37Jisasol kuuno wuudoduke toga Farasi pwol aro abuudoganokaikono. “Anuugwo sulato toga guvu nuuge nokwo nomwalosunekudukono?” Toro kuudoganoka tovi Jisasol Farasi su tooke gamoro ago tovi aulonomwalokaikono. 38Toro kuulonomwalno sumaleyokwe Jisasol wosamujuko nonyo'mo toga gami ato tov sumdomgu wonyo tovi yere miyal'mo'no'no noduke toollu Farasi su tool wonyuno sumaiyokwe mollolokurosi sokaikono. 39Toro te Aguto tool Farasi su toollu aro kuudokaikono. “Aga kevu Farasi toorekul kaiya'no yodupudorekikono. Kevu kapwo tokwe'aro dis tokwe'aro tovallu yiuno kwa'mgu tomguno to'no wonyo yal'mo'mdupudo kworekul kuruv anakuuto tomuuno'gwowi kaiya'nodo tooro kuuno kuullo'mowopiyodupudorogano. Su toro to'busuko kubalno kemoro poowokalago tovi anakuuto tomuu noonyumwonyu punyu ki'nomallo'mo kuudo toorogai'aro ma'no ma'no kiroungovlaiyo'mo kuudo toorogai'aro tooro kuullo'movaikwopiyodupudorogano.

40Oo kevu kwolaiyo muudoga toorekulbusuko junoru pasudo tooro yodupudorekikono. Gooti tool kemoro kwa'mgu kulako tomgu sokwollaikubweyoka avalo su tool kemoro poowokalago anakuuto kumgu kuruv sokwollaikubweyokaikono. 41Toro te kemoro poowokalago kuullo'movaikwopiyodowo'jure tomgu'aro uumjunopi a'mwo abolo supto yodupudo tobuurai neya duuwiyo'mwojogaulo. Kevu su toro supi tov kemoro yiuwi'nokai anakuuto tomge'aro kwa'mgu tomge'aro kuruv yiuno sugudo to'no aval'no imo'numwalbullunovakono.

42Toro kuvi kuruv kevu Farasi tekwojekulno'gwowi tabunyu nomapinorekikono. Su tov aro tovinokwono. Kevu Gooti toollu wiyo'moneyokwe inomdo wuullokwe pun wosamujuko togai molla'movopi atousal momuudeyosodupudorekikono. Toro amomuudeyosupi tonyuda'ai puruv Gooti toollu wiyodupudorekikono. Toro kworekul kuruv aro tonyuno'gwowi me'no yuu'dapiyodupudorekikono. Kooti yogalo idopto'nodo tokwe'aro kalo buuropino winyo'mo tokwe'aro pasudo su tonyu me'no yuu'dapiyodupudorekikono. Kevu pasudo su tonyu po'dogalo kuumjunopujuko'mno'juki ilaiyo sopujukorekikono. Toro kuvi kuruv pasudo su tonyu me'no yuu'dapiyodupudorekikono.

43Oo kevu Farasi tekwojekul tabunyu nomapinorekikono. Su tov aro tovinokwono. Kevu i'bwo'nyago tovi aulapi toga yiuwi'nokai a'mwo abolo ton anekwonpureyokwe yiuno sumdollu toru'no kuulomwallo'mo ikullunyokwerekikono. Aki toro toorekul maket tomuu yomollodopure toga a'mwo abolo ton kwako tomuu'aro ikullopi, “Oo ibwasokweyoloo,” ilaiyo su toro amodonekumapureyokweyo'mo to'no ikullunyokwerekikono.

44Oo kevu Farasi tekwojekul tabunyu nomapinorekikono. Su tov aro tovinokwono. Kevu a'mwo buuso pun kuulo'womdo tomuu mollusodukwopiyodupudo to'busukorekikono. A'mwo buuso su tonyu a'mwo abolo pun kuudo miyouromaropi suvlo ilovekuromollodupudogano.” Kuudokaikono.

45Jisasol toro kuudoka toga loowo tovino pi'mwo kuudokwe pwol aro kuudokaikono. “Ibwasokweyoloo, gumoro yogalo adumodo su tov ne kwonolluda'ai bwolomonekumwogapiyo'moneyokwe kaiya'no yogalo adadokuuno.” Kuudokaikono. 46Toro kuudoka tovi Jisasol aro kuudokaikono. “Oo kevu loowo tovino pi'mwo kuudokwe toorekul jul'nyo nomapinorekikono. Su tov aro tovinokwono. Kevu a'mwo abolo ton neya uumjunpino'moneyokwe loowo bwotonyago ton uubweyodupudorekikono. Toro toorekul loowo su togai jul'nyo bwotonyo tov mollukwopino'moneyokwe uubweyodupudorekikono. Toro kworekul kuruv jul'nyo mollukwo'mdopure su tobuurai wiyo'mwojo'moneyokwe tov kemi pollo puru'monodo kurukwe kuruv mwiyo'mwojodupudorekikono.

47Oo kevu jul'nyo pun nomapinorekikono. Su tov aro tovinokwono. Kemoro tellukweyago tooro aiyoga proofet toorai yiuno'no aromiyosajuporogano. Toro aromiyosajupo kuvi kuruv kevu proofet tekwojavuro a'mwo buuso su tonyu kuuno modumelabodupudorekikono. 48Kevu su toro yodupudo tovino tov kevnokwe toorekulluno kuu'maiyo toru aro dodoluwosunodupudorekikono. Oo nevu a'mwo proofet toorai aromiyosajupo tooravuro kwikweyago kwolaiyonogano. Kuu'maiyo toru su toro dodoluwosodupudorekikono. Aki kemi tellukweyago tooravuro kaiya'no pasudo airoungovlaiyajupo tooraino kevu ilaiyo to'no ikullunyokwerekikono. Su tov kevu proofet aromiyosajupo tekwojavuro a'mwo buuso tonyu kuuno modumelabodupudo tovinokwono.

49Kevu toro yodupudo tovino tov Gooti tool gami pi'mwo kuudo tokwe yogalo puruv aro adokaikono. “Nuu a'mwo abolo tonyomno proofet pworogai'aro a'mwo kuurotokwe pworogai'aro toorai nomorapimonyugono. Toro amorapimi kuvi kuruv su tooravuro pwekwojai noromiyosupinorogano. Aki pwekwojai kaiyako nyugolpinorogano.” Adokaikono. 50Kevu su toro tov kuvinono me'no yodupudorekikono. Aiyoga kwako akav muudu'no sumo'noka togada'ai yiuwi'nokai proofet me'no aromiyosumelabiyajupo tekwojavuro mujako ton abwolokakwono. Toro abwoloka tovuro kirumwallo'moneyokwe jul'nyo tov kevu agasuro a'mwo abolo amwakopo togaikullu kuvinono nobaiki'mowonokwono. 51#Mdk. 4:8Ebelolluro mujako abwoloka tovida'ai romiyosumelabino romiyosumelabino yo'mno yiuno Sekoraiya'wolluro mujako abwoloka toga'no yiuwi'nokai proofet aromiyosumelabiyajupo su tekwojavuro jul'nyo tov kemi nekubweyonokwono. Sekoraiya'wollu Gooti toolluro ilomoropiyo'moneyokwe ago tokwe'aro Gooti toollu wiroudapiyo'moneyokwe dukwagupto tokwe'aro tovallu akuuto toru me'no aromiyosoporekikono. Tadeyoo, nuu aro aikudadokwono. “Yiuwi'nokai su tonyuno kirumwallo'moneyokwe jul'nyo tov kevu agasuro a'mwo abolo amwakopo togaikullu kuvinono nobaiki'mowonokwono.” Aikudadokwono.”

52Jisasol toro wuujuno sumaiyokwe aki aro kuudokaikono. “Oo kevu a'mwo loowo tovino pi'mwo kuudokwe toorekul tabunyu nomapinorekikono. Su tov aro tovinokwono. A'mwo abolo pubuuro Gooti toolluno kuudo youromallo'mo winodopure tonyu kevu uumjuku'dupudorekikono. Kevnokwe toorekul kuulapi Gooti toolluro kuudo tovi me'no souromaropujuko'mno'juki a'mwo abolo tonyu muumjukuropujukorekikono. Toro kworekul kuruv kevnokwe toorekul maullouroma'dupudo tovino tov a'mwo abolo pubuuro Gooti toolluno kuudo youromallo'mo winodopure su tobuurai uumjuku'dupudorekikono.” Kuudokaikono.

53Jisasol toro wuujuno sumaiyokwe ago tovida'ai abolokwokaikono. Toro bolokwino sumaiyokwe novla'mduke toga a'mwo loowo tovino pi'mwo kuudokwe toorogai'aro Farasi toorogai'aro tooro magu'nyogalo toorogai Jisasollu molo aduuwiyopekono. Aki toro tooro Jisasollu gamoro kuudo judo'no judo'nodo tonyuno guureji samuugojoporogano. 54A'mwo su tooro Jisasolluno aro kuudo saullajuporogano. Oo nevu su toollu yourowabworanekono. Toro yourowabwo'dowa'jure tovida'ai kaiya'no yogalo ado'ji toga nevu nogalomworaranekono. Su toro kuudo saullajuporogano.

Currently Selected:

Luuk 11: SMB

Highlight

Copy