Luuk 19

Jisasol Sakiyasolluro ago tovi aulonomwaloka tovinokwono

1Aki Jisasol wagwolago Jerikoo tovi ki'mo'mno sumaiyokwe wagwolago su tovi akuuto toru'aro aulokaikono. 2Wagwolago su tovida'ai a'mwo amwallajuko pwolluno yovo tov Sakiyasolekono. A'mwo su tool takis nuugwiyo ma'dupudo tooraida'ai a'mwo aguto pwekono. Aki toro tool kuto ivito nuugwiyo bwotonyagokwe sumo'nyajukekono. 3Toro te Jisasol wagwolago su tovi akuuto toru'aro kuuloduke toga a'mwo su tool Jisasolluno tov, adadoldukoneyokwe, wonomallo'mo kwinyajukekono. Toro kuvi kuruv a'mwo su tool kumikolmaiyo. Suptekono. Toro tovino tov a'mwo abolo kwolallo ton mobwi'buullopimovla'mdopure toga a'mwo su tekwo Jisasollu ku'nono mwonomarokaikono. 4Toro tool puuto su tovi sumdomgu kano kano kwanokaikono. Jisasol puuto su tovi'aro plavo'no iko fik pwollu wobo toru ai'movokaikono. Aki iko fik su toollu uuwoleyo'mo sokaikono. Toro te Sakiyasol sumdomgu wanyuno sumaiyokwe Jisasollu wolomuugonorabiyo'moneyokwe iko fik su toollu sulokaikono. 5Iko su toollu me'no ilomwalno sumaiyokwe Jisasol su to kuwai abai'movokaikono. Toro bai'mo'mno sumaiyokwe Jisasol iko su toollu iloonyopiya'no aro kuudokaikono. “Sakiyasoloo, anuugwo toga nuvu gumoro ago tovi neya mwalmonyugono. Toro te guu yere doolabono.” Kuudokaikono. 6Toro kuudoka toga Sakiyasol yere wolabino sumaiyokwe Jisasollu ilaiyo mollomaro'no gamoro ago tovino amokavlavokaikono. 7Toro mokavla'mduke tovi yiuwi'nokai a'mwo abolo amuugonallajupo ton su toro wonyuno sumaveyokwe burolyogalo aro aduu'mwojopogano. “Oo Jisasol a'mwo ma'no ma'nodokwe pweke mwallo'moneyokwe gamoro ago tovino avla'mwalluko su tov ilaiyo'maiyo.”

8Toro duu'mwojodopure kuvi kuruv Sakiyasol gami ago tovi anakuuto tomuu iloda'mno sumaiyokwe Aguto toollu aro kuudokaikono. “Agutoloo, duu'nono. Nuu moro yiuwi'nokai kuto ivito mollu'bworosodumdo ton puruval dovorojosumonyugono. Toro adovorojosumi su tovalluda'ai puruv maro'mi a'mwo abolo apoo'nyaiyo tobuurai yasuwa'no wimonyugono. Aki nuugwiyo kwalo tovida'ai pwekwo a'mwo kaiyako sugollajo toorai neya wimonyugono. A'mwo abolo punyuro nuugwiyo tov kuunano ade'nomallajo su ton pugai'aro aiko te neya wimonyugono. Toro toonyu kemoro nuugwiyo pwolno pwolnodo ai'nomallajo su tov aki aiko te aval aval neya wimonyugono.” Kuudokaikono.

9Toro kuudoka tovi Jisasol kuudokaikono. “Anuugwo Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'mo tov gumoro ago akavi me'no aboulai'mo'mokakwono. Aro tovinokwono. Guu kweku kuruv Eburaiyamolluro kwolaiyo imo'nodumdo tovinokwono. 10#Mt. 18:12-14Toro te neya duu'nono. A'mwo Kwolaiyo Kuunodo toonyu kwako akavi aro tovino'mo abonyugono. Nuu a'mwo abolo me'no sounopingopo tobuurai yo'mgonomaro'mi du'muudo tovida'ai bomollurolovomokalokuumonyugono.” Kuudokaikono.

A'mwo womdokwe atousal tooro nuugwiyo maro'mno womdo amjumovlaiyajupo tooraino yovekurajokwono

(Matyuu 25:14-30)

11A'mwo abolo ton Jisasolluro yogalo wuudoduke tovi wuu'nyuno sumaveyokwe toga Jisasol yovekurajo purukwe'aro kuudokaikono. Yovekurajo su tov kavlo puruval tovallunokwono. Kavlo puruv Jisasol wagwolago Jeruusalem tovi wobo toru me'no abai'movoka tovinokwono. Aki puruv a'mwo abolo ton, Oo aguto kig Gooti toolluro mido mollomwalo tov nyumo'nyo'mo wobo toga'deyo, kuudo saullajupo tovinokwono. 12Kavlo su toro tovalluno yovekurajo kuuguudo tov Jisasol aro kuudokaikono. “A'mwo aguto pwol a'mwo aguto kig imo'nono'moneyokwe kantri manyu pumuuno yogalawonekono. 13Toro tool yere mavla'mduke toga gami a'mwo womdokwe atousal toorai doma'no sumaiyokwe pwolno pwolnodo toorai nuugwiyo tov twenti kina twenti kina yado kuumwodeyokaikono. Toro uumwodeno sumaiyokwe aro kuudokaikono. “Nuu aikomgu yere mabai'mo'mdo'mure toga kevu nuugwiyo aikullamo tokwe bisnis womdo neya jogaulo.” Kuudokaikono.

14Toro kuvi kuruv a'mwo aguto su toolluro kantri tovida'ai mwalodupudo ton a'mwo aguto su toolluno surodo wuunodupudogano. Toro ton a'mwo aguto su tool aguto kig imo'nyo'moneyokwe kantri pumuuno pla'mduke toga a'mwo nenamjo'moneyokwe pworai amorapiyopogano. Toro amorapiyopo su tooro kantri su tomuu ki'mo'mno sumaveyokwe kumuuda'ai gavman toorai aro kuudoporogano. “Oo a'mwo akal nemi aguto kig mollonekumwallo'moneyokwe ilaiyo manekullunadopiyo.” Kuudoporogano. Toro kuudopo kuvi kuruv gavman tooro kaduko mwiyo'mno a'mwo aguto kig kuvinono amolludapiyopekono.

15A'mwo su tool gamoro aguto kig mido mollomwalo tovi me'no malluno sumaiyokwe aikomgu abokaikono. Me'no bai'mo'mno sumaiyokwe toga a'mwo pworai aro amodapiyokaikono. “A'mwo womdokwe nuugwiyo kwiyo su tooro miyomno abupureyokwe kevu neya dodomallulo. Su tov nuvu aro tovino kuudo youroma'mo'monyugono. Moro nuugwiyo kwiyo su tovi muunyu toru nuugwiyo pugai'aro mollu'bworosodupudorodukoneyokwe tovino kuudo youroma'mo'monyugono.” 16Toro modapino sumaiyokwe a'mwo womdokwe muudu'nodo tool a'mwo aguto toollomno bo'no aro kuudokaikono. “Agutoloo, gumoro nuugwiyo twenti kina anyabodo tokwe womdo mollodumdo tovida'ai nuvu 200 kina purukwe'aro me'no kuuwolovonyugono.” Kuudokaikono. 17Toro kuudoka toollu a'mwo aguto tool kuudokaikono. “Oo guu moro ki'nato womdokwe ilaiyekugono. Aki moro womdo tovi pi'mwono to'no yodumdekugono. Guu womdo kula'nyo tovi pi'mwono yodumdo tovino tov aga'no'gwowi nuvu womdo aguto puruv wagwolago atousal tonyu mido mollomwalmwalbino'moneyokwe tov nogubwemonyugono.” Kuudokaikono.

18Toro wuujuno sumaiyokwe aki a'mwo womdokwe lukomguda'ai pwol a'mwo aguto toollomno bo'no aro kuudokaikono. “Agutoloo, gumoro nuugwiyo twenti kina anyabodo tokwe womdo mollodumdo tovida'ai nuvu 100 kina purukwe'aro me'no kuuwolovonyugono.” Kuudokaikono. 19Toro kuudoka toollu aguto tool kuudokaikono. “Guu wagwolago atobuul tonyu mido mollomwalmwalbino'moneyokwe tov nogubwemonyugono.” Kuudokaikono.

20Aki a'mwo womdokwe lukomguda'ai gabovo pwol a'mwo aguto toollomno bino sumaiyokwe aro kuudokaikono. “Agutoloo, ma. Gumoro twenti kina anyabodo tov akav kwoso. Nuvu nuugwiyo su tov dukwogulo'mo youro puusi anakuuto tomuu pweyo aweyomgurosokwono. 21Su tov aro tovinokwono. Nuvu gumino kuudo me'no yaguu'dumdonyugono. Oo mi aguto tool womdo guureji imo'nallo'mo dumuurolo'mdowodoldeyo. Su toro tookujuno luko sonyugono. Aki guvu nuugwiyo mwosodumdo kumuuda'ai kuruv nuugwiyo ton ma'dumdekugono. Aki womdo pun maburaudodumdo tonyuda'ai wosamujukuto ton muloma'dumdekugono. Toro tookujuno kuudo sauronyugono. Mi aguto toolluro nuugwiyo tov yasuwa'no nyounapimiyo. Su toro tovino luko sonyugono.” Kuudokaikono.

22Toro kuudoka toollu a'mwo aguto tool aro kuudokaikono. “Guu ki'nato womdokwe akaiku kirovanyuvanyekugono. Guvnokwekujuro yogalo anyudumodo su tokwe gumi nomodagujurugolmekugono. Guu mino tov aro me'no yanuu'dumdekugono. Oo mi aguto tool womdo guureji imo'nallo'mo tovino dumuuroleyokweyoldeyo. Aki nuugwiyo mwosodowodo kumuuda'ai kuruv nuugwiyo ton ma'dowodoldeyo. Aki wosamuju'womdo pun maburaudodowodo tonyuda'ai wosamujukuto ton muloma'dowodoldeyo. Mino su toro kuudo me'no youronuma'dumdekugono. 23Toro tooku moro nuugwiyo agujabo tov benk puvi buro'nyo'mo mwosodumdekudeyo? Guvu nuugwiyo su tov benk tovi kwoso'bujuko'mno'juki nuvu nuugwiyo pugai'aro nokwo amaro'mujukonyugono.” Kuudokaikono. 24Toro wuujuno sumaiyokwe a'mwo aguto kig su tool a'mwo wobo toru adaiyajupo pworai aro aduuwiyokaikono. “Kevu a'mwo ki'nato womdokwe su toolluro ato tovida'ai nuugwiyo twenti kina su tov jupolomallulo. Yopi nuugwiyo su tov a'mwo ki'nato womdokwe pwol 200 kina amworasuko su toollu duumallulo.” Aduuwiyokaikono. 25Toro aduuwiyoka kuvi kuruv a'mwo tooro kuudoporogano. “Agutoloo, a'mwo womdokwe su tool 200 kina tov me'no mwora'dowodo su tool suptolmaiyo.” Kuudoporogano.

26 # Mt. 13:12; Mk. 4:25; Lk. 8:18 Toro wuujuno sumaveyokwe a'mwo aguto kig tool kuudokaikono. “Nuu aro ikudumo'mokwono. A'mwo pwol noonyumwonyu pun kurukweyolno'juki bwotonyago pugai'aro nuuwimonyugono. Toro kuvi kuruv a'mwo pwol nonagutoldeyokwe to'gwowi gamoro kula'nyo mwora'dowodo tobuurai nomodukwopimonyugono. 27#Mt. 25:14-30Toro te nuu aguto kig wimo'nodo'mure toonyuno a'mwo ilaiyo mwinodupudo su tooro moro ikomago nyumo'nodupudorogano. Su toro tooraino aro aduuwiyokaikono. “Kevu a'mwo su toorai moro sumdollu toru'no neya mokabopi doromiyosulo.” Aduuwiyokaikono.” A'mwo aguto kig tool kuudokaikono.” Jisasol yovekurajo su tov toro kuudokaikono.

28Jisasol yovekurajo su tov me'no wuujuno sumaiyokwe toga gami uumjunyokwe toorai sumdomgu wano'no wagwolago Jeruusalem'no sulokaikono.

Jisasol a'mwo aguto kig pwolbusuko wagwolago Jeruusalem tovi auloka tovinokwono

(Matyuu 21:1-11; Mak 11:1-11; Joon 12:12-19)

29Jisaseke'aro gami uumjunyokwe toorogai'aro tooro ilno sumaveyokwe wagwolago Betifejokwe'aro wagwolago Betanike'aro tovallu wobo toru ai'movoporogano. Wagwolago su toval Muumuudo Oolip toollu do'gwapiyo tomuu wo'dubulovakono. Toro tovallu wobo toru ki'mo'mno sumaveyokwe Jisasol gami uumjunyokwe pworallu aro amodapiyokaikono. 30“Kevu wagwolago akaijuvi kuulabullunorakikono. Toro kuula'bullu toga doonki muugunyo pwol a'mwo pwolnodo kwol kuruv milomwallungiko toollu yere wonbullunorakikono. Toro toollu wuulo tovi ikwolapiyo'bullu akawai'no donumokabilo. 31Kevu su toro yodo'bule toga a'mwo pwol, “Buro'nyo'mo jadokuulo?” Yamuugojo toro aikullo'ji tov aro duujulo. “Aguto Jisasol womdo yono'mekono.” Duujulo.”

32Toro amodapiyoka tooral plaino sumaleyokwe Jisasolluro yiuwi'nokai yogalo kuudoka ton kuvinono kwonolorakono. 33Toro wonyuno sumaleyokwe doonki muugunyo toollu wuulo tov ikwolapiyodole toga jukwo tooro wono'mno aro kuudoganoporogano. “Kevu doonki muugunyo su toollu buro'nyo ibulluno'mo toorakul jukwolapiyadokuulo?” 34Toro kuudoganopo toorai aro kuudolorakono. “Aguto Jisasol womdo yono'mekono.” Kuudolorakono.

35Toro tooral doonki muugunyo su toollu mollukwolomwora'no sumaleyokwe Jisasollomno amokabolorakono. Toro tooral kemoro nobwaiyo tov doonki muugunyo su toolluro buulo tovi ilolobiyosolno Jisasollu muunyu toru sulomorumwallolorakono. 36Toro ilomorumwalluno sumaleyokwe Jisasol doonki muugunyo su toollu ilomwalo'no pla'mduke toga a'mwo abolo ton kemi nobwaiyo togai puuto kuullo'moneyokwe tovi alobiyosumoulapogano. 37Toro lobiyosodopure toga Jisaseke tooro Muumuudo Oolip tomuuda'ai wolabo'mno puu'nyarojunyo wobo toru abwolai'movoporogano. Toro bwolai'mo'mno sumaveyokwe yiuwi'nokai kwolallo kuumjunyajupo ton Jisasolluro womdo jurogudo kuuduuwallajuko tonyuno ilaiyo sopogano. Toro ton yiuwi'nokai kwonyajupo su tonyuno kemi yogaimaguurai bwotonyo tokwe Gooti toollu sulomodomoropiyapogano.

38Toro ton aro aduumjunopogano. “Ilaiyokwono! Gooti toolluro sugumaluko to'no kwosungiko akallu amonekwopiyamokaikono. Aguto kig su tool Aguto toolluro yovo tovida'ai abumokaikono. Toro tool nevu sumwoluko kavo wosunyo'moneyokwe tovino Gooti toolluro ago muunyu kai'muuda'ai abadopiyo. Aki Gooti toolluno yovo tovi muunyu toru'aro ilomoropiyowanoo!” Aduumjunopogano.

39Deko su toro duumjunodopure toga Farasi pworo kwolallo su tonyu anakuuto tomuuda'ai Jisasollu aro kuudoporogano. “Ibwasokweyoloo, guu gumi gumjunyokwe tooro ilomogwopiyodopure su toorai yogalo neya domojurugolono.” Kuudoporogano. 40Toro kuudopo kuvi kuruv Jisasol aro kuudokaikono. “Nuu aro ikudumo'mokwono. Moro numjunyokwe ton deko madopujuko'mno'juki sulo akarono'gwowi mino yovo tovi nokwo sulomodomoropiyapujukorogano. Toro tovino tov nuu su toorai yogalo mamojurugolmonyugono.” Kuudokaikono.

Jisasol a'mwo abolo wagwolago Jeruusalem mwalodupudo tobuuraino kumdo adoka tovinokwono

41Aki Jisasol wagwolago Jeruusalem tovi wobo toru bai'movo'no igo'mgu iloonyopino sumaiyokwe wagwolago su tovi mwalodupudo tobuuraino kumdo adokaikono. 42Toro tool aro sajunokaikono. “Oo Jeruusalemda'aiyobuuravoo, iruko akallugwoji kevu kugaikul kuruv sumwoluko noullo wosunmwalpino'moneyokwe puuto tovino kuudo suworovomaropujuko'mno'juki nuvu ilaiyo so'mujukonyugono. Toro kuvi kuruv aga'no'gwowi puuto su tovino kemoro sumdo tovi yiulo apuu'naso.

43Neya duu'nyulo. Iruko pullugwoji kemi ikomago tooro bopi kemi aiyowomno nobomwodovekumapinorogano. Toro bomwodovekumaropi kemoro yiuwi'nokai puuto imgu amgu wo'dupudo tonyu nekumjukupinorogano. 44Aki kemoro wagwolago tovi yiunokuudo kirowo'dolapiyopi kemoro kwoloraiyo kubuurai kuruv wagwolago su tovuro kuurupto anakuuto tomuuda'ai mwalodupudo tobuurai noromiyebuuropipinorogano. Aki wagwolago su tovuro yiuwi'nokai sulo bwaku bwakuto amjomodumellungiko kunyu kuruv kirowo'dolapiyopi sulo yiuno pwolnodo kwol kuruv mworonokwono. Yiuwi'nokai tooro nerowo'dolapipinorogano. Su toro ikullumo'nono tov aro tovinokwono. Gooti tool kemi ikullo'mwojo'mo bekuru'ma'duke su toga'no kevu kuudo miworovomaropo tovinokwono.”

Jeruusalemda'ai Gooti toollu ilomoropiyo'moneyokwe ago tovi a'mwo abolo maket wosodopure tonyu Jisasol abilomodovomjopiyoka tovinokwono

(Matyuu 21:12-17; Mak 11:15-19; Joon 2:13-22)

45Aki Jisasol Jeruusalemda'ai Gooti toollu ilomoropiyo'moneyokwe ago tovi aulokaikono. Toro kuulno sumaiyokwe a'mwo abolo ton maket wosodopure tonyu abilomodovomjopiyokaikono. 46Toro ino sumaiyokwe aro kuudokaikono. “Gooti toolluro kuuguudo tovi aro sakwollungikokwono. Moro ago tov subusu'nyogalo kuulajo'moneyokwe agokwono. Moro ago tovino su toro neya adogapuro. Toro kuvi kuruv aga'no'gwowi a'mwo kuukokwe tooravuro yiulo kupuu'nallo'moneyokwe ago to'busuko aikullumo'nadopiyo.” Sakwollungikokwono.

47Jisasol toro wuujuno sumaiyokwe aki yiuwi'nokai iruko toga Jeruusalemda'ai Gooti toollu ilomoropiyo'moneyokwe ago su tovi anakuuto tomuu kuulodawo kuuguudo sodubwasajukekono. Toro yodubwasoduke tovino pris mido mollomwalokwe toorogai'aro loowo tovino pi'mwo kuudokwe toorogai'aro a'mwo yovo agutokwe toorogai'aro tooro wonodupu Jisasollu romiyoso'moneyokwe puuto tovino soureya'mgonyajuporogano. 48Toro kuvi kuruv noromiyoso'moneyokwe puuto puvino ku'nono miyo'mgonomallajuporogano. Su tov aro tovinokwono. Yiuwi'nokai a'mwo abolo ton Jisasolluro kuuguudo yodubwasoduke tovi wuu'nodupudo toga gamoro yogalo su tonyu avorugwo'mo'nallajupogano.

Currently Selected:

Luuk 19: SMB

Highlight

Copy