Luuk 21

Abolo kanyu pubuul Gooti toollu wiyo'moneyokwe nuugwiyo surosoka tovinokwono

(Mak 12:41-44)

1Toruda'ai Jisasol Jeruusalemda'ai Gooti toollu ilomoropiyo'moneyokwe ago tovi kuulno sumaiyokwe aro tovi amuugonallajukekono. A'mwo abolo kuto ivito nuugwiyo bwotonyagokwe ton nuugwiyo iroso'mo bookis tovi irosodopure tonyu amuugonallajukekono. 2Toro boullurosodopure toga abolo kanyu pubuul nuugwiyo sulo sallukwa'jo pullal aullurosokakwono. 3Abolo kanyu su tobuul nuugwiyo bookis tovi toro kuullurosoduke toga Jisasol wono'no gami uumjunyokwe toorai aro kuudokaikono. “Nebal'no ikudumo'mokwono. Abolo kanyu akabuulluro nuugwiyo surosumoka su tov yiuwi'nokai nuugwiyo aboullurosumapo gabovo tonyu kuuwolo'mwallo. 4Su toro aikudumo tov aro tovinokwono. Pworo nuugwiyo bwotonyagokwe kworo kuruv yiuno pwekwono aboullurosumaporogano. Toro kuvi kuruv abolo kanyu su tobuulno'gwowi gamoro yiuwi'nokai tov aboullurosumokakwono. Gami nonomwallo'moneyokwe nuugwiyo kurukwe'aro aboullurosumokakwono. Toro tovinokwono.” Kuudokaikono.

Jeruusalemda'ai Gooti toollu ilomoropiyo'moneyokwe ago tov nomouropipino tovinokwono

(Matyuu 24:1-2; Mak 13:1-2)

5Aki a'mwo uumjunyokwe pworo Jeruusalemda'ai Gooti toollu ilomoropiyo'moneyokwe ago su tovino aro sajunoporogano. “Oo ago su tovi sulo kuuroollo togai'aro a'mwo abolo tonyuro Gooti toollu kwingiko sugumaluko togai'aro togai yovaisodupudokwono.” Sajunoporogano. Toro yajunodopure toga Jisasol wuu'no'no aro kuudokaikono. 6“Ago su tovida'ai sugumaluko tonyu kwonmwakopo kuvi kuruv puga yiuwi'nokai ago su tonyu nomourodukwopipinogano. Yiuwi'nokai sulo bwaku bwakuto amojungellungiko kunyu kuruv mourodukwopiyopi yiuno pwolnodo kwol kuruv mworonokwono. Yiuwi'nokai ton nomourodukwopipinokwono.” Kuudokaikono.

Tabunyuwuulo bwotonyago pun nobai'mopino tovinokwono

(Matyuu 24:3-14; Mak 13:3-13)

7Aki a'mwo uumjunyokwe tooro Jisasollu yamuugojo aro kuudoganoporogano. “Guu donekudono. Gumoro yiuwi'nokai anekudumado su ton adoga kuunodo bai'mopinodeyo? Aki burowo'nyo duuwallo jurogudo tovi wonowa'ji kuudo yauranonoldeyo? Oo su tov kuvinono dobai'mo'mwallo.” Samuugojoporogano. 8Toro samuugojopo toorai Jisasol kuudokaikono. “A'mwo pwol kuunano nyoukuu'naikudo'jokwe tovino kevu wako neya dou'nogaulo. Lukomgu a'mwo bwotonyago tooro kemi youkuu'naikujo'mo tooraida'ai pwol bowo'ji ikudonekono. “Nuu Krais toonyugono.” Aki pwol puga bowo'ji aval'no baikudonekono. Bwotonyago tooro tono tono biyoukuu'naikudupinorogano. Toro tooro moro yovo tovida'ai a'mwo abolo bwotonyago tonyu su toro youkuu'nuudupinorogano. 9Aki puga molo bomjunugoulodopure tokwe'aro gavman pworai ga'gaivolo molo binugoulodopure tokwe'aro tovalluno kevu kuu'nupi toga luko mipinono. Su toro tov neya abai'mowono. Toro abai'mowo'ji kuvi kuruv su toro toga aiyowo'mo'maiyo.” Kuudokaikono.

10Toro wuujuno sumaiyokwe aki aro kuudokaikono. “Su toro toga a'mwo kwako pumuuda'ai pworo kwako pumuuda'ai pworogai molo inpinorogano. Aki a'mwo aguto kig pworavuro kantri pun a'mwo aguto kig gabovo tooravuro kantri togai molo inpinorogano. 11Su toro inodopure toga aki wunyu wunyu bwotonyo pun go'no go'nodo tomuu nobai'mopinogano. Aki go'no go'nodo tomuu muju'wuulo togai'aro nobolluwuulo togai'aro ton nobai'mopinogano. Aki sulugumdo muunyu kai'muuda'ai luko irugollo'moneyokwe aguto pun imo'nopi aki duuwallo jurogudo pugai'aro ton nyumo'nupinogano.

12Toro kuvi kuruv yiuwi'nokai su ton yere mimo'nodopure toga a'mwo pworo kevu mino kuudo nubweyodopure toorekullu kaiyako nyaikullugolpinorogano. A'mwo su tooro galekumworaropi kooti yogalo daikullo'moneyokwe Juu tooravuro i'bwo'nyago tonyu galekumokaulapinorogano. Aki wuulo killo'mo ago tonyu merekumwallupinorogano. Aki toro toorekullu a'mwo aguto kig pworogai'aro a'mwo aguto gavona pworogai'aro tooravuro sumdollu toru kooti yogalo daikullo'mo nomekudapipinorogano. 13Su toro amekudapipi toga kevu moro toorekulluno tov mino ibwosunyo kuuguudo tov nokwo wuudupinorekikono. 14Aki su toro amekudapipi toga kevu burowo'nyovo wuudanonoldukoneyokwe tovino kuudo kwolallo miyourukwapipinono. 15Nuu kemoro mago tonyu davo'mi aki pi'mwo kuudo ton nekullamonyugono. Moro yogalo aikullami su togai kevu nokwo wuudupinorekikono. Moro yogalo tokwe kuudupi su tovi kemoro yiuwi'nokai ikomago tooro ku'nono muuwolopinorogano. Aki kemoro yogalo su tovi ikomago kworo kuruv ku'nono mabwolomorumwogapiyapinokwono.#Lk. 12:11-12

16Kemi tellunumiyagorodeyo telludai'yagorodeyo tellugwai'yagorodeyo kemi avalorodeyo kemi ibwoto'nyorodeyo tooro kemi noromiyaikubweyo'moneyokwe a'mwo gabovo pworai nomaikubwepinorogano. Toro amaikubwepi toga pworekullu yiuno'no noromiyaikubwepinorogano. 17Kevu mi numjunodupudo toorekulluno tov yiuwi'nokai a'mwo abolo ton kemino surodo'mo imwalpinogano. 18Toro kuvi kuruv kemoro midoto puru'monodo kuruv kaiyako mi'nopiyonokwono. Yogalo su tovino kavlo tov arokwono. Kevu kaiyako puru'monodo kuruv mi'nopipinorekikono. 19Kevu mi numjunyuno numjunyuno supi tovi'aro aiyo yiunokuudo mujomwekovlaiyo'moneyokwe tov nomapinorekikono.”

Wagwolago Jeruusalem tovi kaiyako nomollounapiyono tovinokwono

(Matyuu 24:15-21; Mak 13:14-19)

20“A'mwo mollurogudo tooro wagwolago Jeruusalem tovi bomwodovoma'dopure toga aro kuudo yaupinokwono. Oo wagwolago akavi kaiyako mollounapiyo'moneyokwe tov wobo toga nobai'mwono'mdeyo, kuudo yaupinokwono. 21Su toro toga yiuwi'nokai Juudiyada'ai mwalodupudo ton muumuudo tooraiyomno lukado neya avlapuro. Aki a'mwo abolo wagwolago Jeruusalem tovi anakuuto tomuu amwalpi kun kuruv lukado neya avlapuro. Aki a'mwo abolo womnago tomuu amwalpi ton wagwolago su tovi noulapiyo. 22Su toro toga Gooti tool ma'no ma'no pasudo tonyu kirumwallo'moneyokwe mido noma'mwalonekono. Su toro imo'nono ton yiuwi'nokai Gooti toolluro yogalo ajakwollungiko tonyu suuwiyo imwojo'mogano.

23Aki su toga abolo sumwolukokweyodeyo oo abolo kwoloraiyo amdo manarukuu'nyokweyodeyo tobuuro lukado plaiyo'mo tov tabunyu kuunodo wimo'nonobuurogano. Neya duu'nyulo. Gooti tool a'mwo abolo kwako akavi mwalodupudo tonyuno surodo bwotonyo wuunonekono. Aki Isuraiyolda'ai a'mwo abolo kunyu kuruv tabunyu bwotonyo kuunodo pun nobwi'mopinogano. 24A'mwo abolo su tonyuro pun a'mwo pworavuro molo'mo kwallu'mopto togai do'mdopure tovida'ai wolorapinogano. Aki yiuwi'nokai kantri pumuuda'ai tooro molo buuwolovopi kemi kantri go'no go'nodo tomuuno pipolomokavlapinorogano. Su toro avipolomokavlapi toga a'mwo abolo Juu miyawosunodupudo ton wagwolago Jeruusalem tovi suvlo nyulomaveku'mwalpinogano. Juu miyawosunodupudo tonyuro iruko aiyowo'mo tollugwo yere mimo'nodowo'jure toga tono tono nuuwimo'numwalpinogano.”

A'mwo Kwolaiyo Kuunodo toolluro lukomgu wolabwono tovinokwono

(Matyuu 24:29-31; Mak 13:24-27)

25 # Ado. 6:12,13 Jisasol toro wuujuno sumaiyokwe aki aro kuudokaikono. “Duuwallo jurogudo pun kuujo tooke'aro lobako tooke'aro sullugabwo togai'aro tonyu nobai'mopinogano. Aki soolwara tov guureji ki'nugobowo'ji luwagu luwaguto bwotonyo yonokwono. Su toro yodowo'jure tovino yiuwi'nokai kantri tonyuda'ai a'mwo abolo kwako akavi mwalodupudo ton luko bwotonyo ipinogano. Aki toro ton adado yanonoldukoneyokwe tovino kuudo noo'nookwo to'no yaupinogano. 26Aki a'mwo abolo kwako akavi mwalodupudo su ton kuudo kwolallo aro yourukwapipinogano. Oo buro'nyo buro'nyo tabunyuwuulo pworogai'aro tooro bai'mopinorodukono? Toro tovino kuudo kwolallo yourukwapipinogano. Su toro yourukwapiyopi toga luko bwotonyo yopi kuruwiyo bolpinogano. Neya duu'nyulo. Su toro toga sulugumdo tovida'ai jurogudokwe kwokopo ton yaudo yaudo nyunuuguupinogano. 27#Ado. 1:7Su toro imo'nodowo'jure toga A'mwo Kwolaiyo Kuunodo toonyu moro jurogudo tokwe'aro bako bwotonyo tokwe'aro tovake sulu'wo tovi wolabodo'mure nonuwonpinonyugono. 28Yiuwi'nokai su ton kuvinono imo'nodopure tonyu kwonpi toga kevu aro kuudo yaupinokwono. Oo Gooti tool nemi nonekumokailawono'mo tov wobo toga'deyo, kuudo yaupinokwono. Toro tovino tov kevu tabunyu su tonyu kwonpi toga guureji davopi muunyu kai'muuno to'no juloonyopiyogaulo.”

Iko fik toolluno yovekurajo tovida'ai kuudo youromallo'mo tovinokwono

(Matyuu 24:32-35; Mak 13:28-31)

29Toruda'ai Jisasol yovekurajo puruv aro kuudokaikono. “Kevu iko fik tooke'aro yiuwi'nokai iko pworogai'aro toorai doonogaulo. 30Iko tooro kuuwopto tov inowiyoku'bworosodopure tovi kevu kwonpi toga aro kuudo yaupinogaikikono. Oo kuujo atamdo tov nobai'mowono'mo wobo toga'deyo. Kuudo yaupinogaikikono. 31Yovekurajo su to'busuko kubalno moro yiuwi'nokai duuwallo nyumo'nupino aikudumo su ton kuvinono nobai'mopinogano. Toro bai'mo'mdopure tonyu kwonpi toga kuudo youromapinokwono, Oo aguto kig Gooti toolluro mido mollomwalo tov nobai'mowono'mo wobo toga'deyo, kuudo youromapinokwono.” Kuudokaikono. 32Jisasol toro wuujuno sumaiyokwe aki aro kuudokaikono. “Nuvu nebal'no ikudumo'mokwono. Su toro togasuro a'mwo tooro yiunokuudo miyemnopiyodopure toga yiuwi'nokai aikudumo su ton nobai'mopinogano. 33Toro te sulugumdo tokwe kwako tokwe toval guureji mamjomwekovlavo'bullu kuruv moro yogalo to'gwowi yiunokuudo mujo'movla'mwalonokwono.” Jisasol toro kuudokaikono.

Jisasolluro uumjunyokwe tooro wako neya kuu'numwalpino tovinokwono

34-35Aki Jisasol aro kuudokaikono. “Kevu wako neya kuu'nomwalopi kemoro poowokalago ton jul'nyo nyubwosunmwalpiyo. Jul'nyo subwosunpi kuruv aro nyumwalpiyo. Kevu lubullu doto yonomwallo'mo tokwe'aro imo'wonyo nopi amomo kiroungovlaiyo'mo tokwe'aro kwako akavida'ai noonyumwonyu tonyuno kuudo kwolallo yourukwapiyo'mo tokwe'aro su tonyu nyumwalpiyo. Kevu noonyumwonyu su tonyuno kuudo kwolallo yourukwapiyopi neya miyovraimwonyodopure toga Aguto toolluro iruko tollugwo yere nobaiki'mowo'jo. Aguto toolluro iruko su tollugwo abai'mowo'ji tov yiuwi'nokai a'mwo abolo kwako akavi mwalodupudo tonyu bu'duvolomarowo'ji wuulo tovibusuko nowapinogano. 36Toro te kevu wako neya kuu'nomwalopi aki Gooti toolluro jurogudo tovi mallo'moneyokwe subusu'nyogalo neya duudogaulo. Yiuno jurogudo ikubweyodowo'jure tokwe to'no yiuwi'nokai bai'mo'mdowo'jure su tonyu nokwo irukuruwolovopi A'mwo Kwolaiyo Kuunodo toonyu abwoloda'mi kuga kuruv moro sumdollu toru nokwo boulodapinogaikikono.” Jisasol toro kuudokaikono.

37Toruda'ai Jisasol yiuwi'nokai iruko toga wagwolago Jeruusalem tovi kuulodawo Gooti toollu ilomoropiyo'moneyokwe ago tovuro agwapto tovi anakuuto tomuu kuuguudo sodubwasajukekono. Toro kwol kuruv surakuuto toga'no'gwowi wagwolago su tovida'ai bolokwodowo muumuudo Oolipolo dodupudo tomuu ago puvi sa kwollajukekono. 38Aki yiuwi'nokai lomwo iru'mago toga a'mwo abolo bwotonyago ton Jisasolluro kuuguudo tovi wuu'nyo'moneyokwe Gooti toollu ilomoropiyo'moneyokwe ago tovuro agwapto toru abuuru'mallajupogano.

Currently Selected:

Luuk 21: SMB

Highlight

Copy