Luuk 5

Jisasol gamoro uumjunyokwe muudu'nodo toorai adomaroka tovinokwono

(Matyuu 4:18-22; Mak 1:16-20)

1 # Mt. 13:1,2; Mk. 3:9,10, 4:1 Iruko pullugwoji Jisasol wonyo buugo Genesaret tovi wolo toru da'mduke toga a'mwo abolo kwolallo ton Gooti toolluro yogalo tovi wuu'nyo'moneyokwe Jisasollu wobo toru gulluto'nyo gulluto'nyo abiyopogano. 2Toro yodopure toga Jisasol boot puruval wonyo buugo su tovi wolo toru wo'dole tovallu kwonokaikono. Toro kwonoka kuvi kuruv a'mwo domwoga ki'noma'dupudo tooro me'no bwolodukwopino sumaveyokwe kemi domwoga kuurowabwollo'moneyokwe kuto tonyu wonyo tovi kuuno sal'meyajuporogano. 3Jisasol toro tovi wonyuno sumaiyokwe toga boot puvi sulomwalokaikono. Boot sulomwaloka su tov Saimoonollurokwono. Toro te Jisasol Saimoonollu doma'no sumaiyokwe wonyo buugo tovi wobo kuru'gwo movurebwo'mawono'moneyokwe kuudoganokaikono. Aki Jisasol boot su tovi anakuuto tovi wolomwalno sumaiyokwe a'mwo abolo wonyo buugo tovi wobo toru mwalodopure tonyu kuuguudo sodubwasokaikono.

4Jisasol toro yodubwasuno sumaiyokwe toga Saimoonollu aro kuudokaikono. “Guvu boot akavi wonyo buugo tovuro akuuto toru'no movurebworomokavlavo'bi kemoro domwoga kuurowabwollo'moneyokwe kuto tonyu doolowopiyawono.” Kuudokaikono. 5#Jn. 21:3Toro kuudoka tovi Saimoonol aro kuudokaikono. “Agutoloo, nevu sula'dugumdo togada'ai yiuno lomwo iru'mago toga'no womdo su tov sumawo kuvi kuruv domwoga pwolnodo kwollu kuruv maluve'noma'mawonogano. Toro kuvi kuruv gumoro yogalo anyudumodo tovi uumjuno'mi kuurowabwollo'moneyokwe kuto tonyu kuvinono noolopiyamonyugono.” Kuudokaikono. 6#Jn. 21:6Toro wuujuno sumaiyokwe Saimooneke tooro domwoga kuurowabwollo'moneyokwe kuto ton wonyo buugo tovi kwolopiyaporogano. Toro wolopiyodopure tovi domwoga bwotonyago toorai aurowabworoporogano. Toro tovino tov kemoro domwoga kuurowabwollo'moneyokwe kuto ton noboguropiyo'mo sopogano. 7Toro te kemi avaiwomdokwe pworo buuwiyo'mwojupino'moneyokwe adomaroporogano. Avaiwomdokwe su tooro boot puvi amwallajuporogano. Toro tooro bo'mno yiuwi'nokai boot su tovallu domwoga toorogai aluvitowosoporogano. Me'no aluvitowosopo toga boot su toval wonyo buugo tovi anakuuto tomuu wollo'mo solovakono.

8Toro yodole tovallu Saimoon Pital wonyuno sumaiyokwe toga Jisasolluro suvlo tovi dolago toru bomuulo'naro'no aro kuudokaikono. “Agutoloo, nuu ma'no ma'nodokwe tekwonyuno tov mi donyugollu'movono.” Kuudokaikono. 9Su toro kuudoka tov aro tovinokwono. Saimoonol gavnokwe tooke'aro yiuwi'nokai a'mwo gavuge amwallajupo toorogai'aro su tooro kemoro domwoga bwotonyago aluve'nomaropo su tovino luko amorumoukuropiyoporogano. 10Aki su toro toga Sebediyolluro muugunyo Jemseke Jooneke kworal kuruv luko amorumoukuropiyolorakono. Toro tooral Saimooneke avaiwomdo sajulorakono. Toro te Jisasol Saimoonollu aro kuudokaikono. “Guvu luko mibinono. Guvu domwoga ai'noma'mwakudo to'busuko kubalno agada'ai a'mwo abolo tonyu de'noma'mwalbinekugono.” Kuudokaikono. 11Toro wuujuno sumaiyokwe yiuwi'nokai tooro kemi boot tovake wonyo buugo wolo tovi aiko te avurebwo'maboporogano. Toro purebwo'mabino sumaveyokwe toga kemoro yiuwi'nokai kuto ivito tonyu yogallu'movo'mno Jisasollu kuumjunoporogano.

Jisasol a'mwo wonawiyo nobollo bwotonyokwe pwollu sukuloka tovinokwono

(Matyuu 8:1-4; Mak 1:40-45)

12Toruda'ai Jisasol wagwolago puvi amwalokaikono. Toro mwaloduke toga a'mwo wonawiyo nobollo bwotonyokwe pwol Jisasollomno bo'no abwonokaikono. Toro bwonyuno sumaiyokwe Jisasollu wobo toru suduko bwinuguto'no'no aro wuudoganyuno wuudoganyuno sokaikono. “Agutoloo, mi nyukullo'mo nokwo'mekugono. Toro tooku nonyukullo'mo ilaiyo dogujunadopiyo?” Kuudoganokaikono. 13Toro kuudoganoka toollu Jisasol gamoro ato tov ruuguusapiyo'no uubogai'nyuno sumaiyokwe aro kuudokaikono. “Nuu gumi kuvinono gujukullo'mo ilaiyo anyunadopiyo. Toro te gumi agujukulmono.” Kuudokaikono. Jisasol toro kuudoka kuga'gwo kuuno a'mwo su toolluro wonawiyo nobollo bwotonyo tov yiuno'no sukulnokaikono.

14Jisasol a'mwo su toollu toro ikulno sumaiyokwe duudapi guureji puruv aro aduuwiyokaikono. “Guu a'mwo pworai muudubinono. Toro kweku kuruv moro agujukulmo tovino wuuduuwallo'mo tooku aro neya ibinekugono. Guvu Moosesolluro puukwollo puruv aro sakwolloka tovi neya uumjunbinekugono. A'mwo wonawiyo nobollokwe pwol me'no sukulno'ji su tool pris toollomno plavowo'ji neya wuuduuwallunonekono. Toro wuuduuwallunowo'ji toga Gooti toollu wiyo'moneyokwe neya romiroudapiyonekono. Moosesolluro yogalo toro sakwollungiko kuvinono guu neya uumjunbinekugono. Toro uumjuno'bi toga pris tool gwonowo'ji aro kuudo yaguuronekono. Oo a'mwo akal wonawiyo nobollo maiyo tooldeyo. Kuudo yaguuronekono. Guu su toro ibino'moneyokwe dovlavono.” Jisasol a'mwo wonawiyo nobollokwe me'no sukuloka toollu duudapi toro aduuwiyokaikono.

15Toro kuvi kuruv Jisasolluno kuuguudo to'gwowi yiuwi'nokai tomuu me'no abomje'nugoulokakwono. Toro bomje'nugouloduke tovida'ai a'mwo abolo kwolallo bwotonyago ton gamoro yogalo tovi wuu'nyo'moneyokwe abi'bwo'nyajopogano. Aki kwolallo su tonyuro nobollokwe tonyu Jisasol ikulono'moneyokwe abomollubwo'nyajupogano. 16Toro bomollubwo'nodopure kuvi kuruv puga'no puga'no Jisasol Gooti toollu subusu'nyogalo wuujo'moneyokwe kwako a'mwomaiyo kuu'maiyo tomuuno avlaiyajukekono.

Jisasol a'mwo suvlato abolopingikokwe pwollu sukuloka tovinokwono

(Matyuu 9:1-8; Mak 2:1-12)

17Toruda'ai Jisasol iruko pullugwoji kuuguudo yodubwasoduke toga a'mwo Farasi pworogai'aro Moosesolluro loowo tovino ibwasokwe pworogai'aro tooro abomwaloporogano. A'mwo su tooro kwako Galilike'aro Juudiyake'aro tovalluda'ai yiuwi'nokai wagwolago tonyuda'ai aboporogano. Aki pworo wagwolago Jeruusalemda'ai kworo kuruv bo'mno abomwaloporogano. Toro bomwalodopure toru Jisasol kuuguudo sodubwasajukekono. Aki toro yodubwasodowo Aguto toolluro jurogudo tokwe Jisasol a'mwo abolo nobollokwe tonyu sukullajukekono.

18Toro ikuloduke toga a'mwo pworo a'mwo suvlato abolopingiko pwollu i'buronyuko tovi wo'duke toollu amollukwovomokaboporogano. Toro tooro a'mwo suvlato abolopingiko su toollu Jisasolluro sumdollu kuulomwaloduke toru'no mokaullo'mo kwinoporogano. 19Toro kuvi kuruv Jisasolluro amwaloka su toru a'mwo abolo bwotonyago ton me'no amwollutowopiyopo tovino tov ku'nono mamokaulaporogano. Toro tooro Jisasol ago kuulomwaloduke tovi muunyu tomuu mokailno sumaveyokwe ajulmdo tovida'ai kula'nyo pwekwo amouropiyoporogano. Toro mouropino sumaveyokwe a'mwo suvlato abolopingikokwe tool i'buronyuko tovi wo'duke toollu wuulo tovi'aro Jisasol kuulomwaloduke akuuto toru'no kwolomollukwo'bworopiyaporogano.

20A'mwo amokabopo su tooro Jisasolluno kuudo kuubweyoporogano. Toro uubweyodopure tovi Jisasol me'no wonyuno sumaiyokwe a'mwo suvlato abolopingikokwe toollu aro kuudokaikono. “Mi a'mwoloo, nuu gumoro ma'no ma'no pasudo tovuro kirumwallo tovi amagudukwopimono.” Kuudokaikono. 21Toro kuudoka tovi a'mwo loowo tovino pi'mwo kuudokwe toorogai'aro Farasi toorogai'aro tooro wuu'nyuno sumaveyokwe aro sajunoporogano. “Awi, a'mwo akal buro'nyo'mo aro dukodadopiyo? Nuu gumoro ma'no ma'no pasudo tovuro kirumwallo tovi amagudukwopimono. A'mwo su toolluro toro kuudumoka su tov Gooti toolluno kaiya'no yogalo adumokaikono. Yiuno Gooti toolno ma'no ma'no pasudo tovuro kirumwallo tonyu nokwo modukwopiyonekono.” Sajunoporogano.

22Toro yajunodopure tooravuro kuudo tovi Jisasol me'no souroonokaikono. Toro youroonyuno sumaiyokwe aro kuudokaikono. “Kevu kemi poowokalago tonyu buro'nyo'mo su toro kuudo jourukwapimwakovo? 23Nuu a'mwo suvlato abolopingikokwe toollu yere nokwo ikulmonyugono. Aki gamoro ma'no ma'no pasudo tovuro kirumwallo kuruv yere nokwo modukwopimonyugono. Yiuwi'nokai su tovallu kuvinono yo'mo tov mi jurogudo manyumo'nodubulonyugono. Toro toonyu aro nokwo wuudumonyugono. “Guu ilodavo'bi kado dovlavono.” Nokwo wuudumonyugono.” Kuudokaikono. 24Toro wuujuno sumaiyokwe aki aro kuudokaikono. “A'mwo Kwolaiyo Kuunodo toonyu kwako akavi mwalo'mi toga kemoro ma'no ma'nodo tovuro kirumwallo tovi moro jurogudo tokwe nokwo modukwopimonyugono. Su toro tovino kuu'maiyo toru ikuduuwallo'moneyokwe tov nuu a'mwo suvlato abolopingikokwe toollu aro kuudumono. “Guu ilodavo'bi gumi i'buronyuko tov momworaro'bi ago tomuuno domokwanono.” Kuudumono.” Kuudokaikono.

25Toro kuudoka kuga'gwo kuuno a'mwo suvlato abolopingikokwe tool iloda'mno sumaiyokwe gami i'buronyuko tov momworaro'no gami ago tomuuno amokavlavokaikono. Toro amokavlavoka toga Gooti toolluno yovo tovi sulomoropimovlavokaikono. 26Toro yoduke toollu a'mwo abolo ton wonyuno sumaveyokwe luko morumoukuropiyo'mno aro adopogano. “Awi, nevu mwonodowado akav buro'nyovo to'mdukono?” Toro juno sumaveyokwe yiuwi'nokai ton kuudo bwotonyo yourukwapiyo'mno Gooti toolluno sulomoropiyapogano.

Jisasol Livaiyollu adomaroka tovinokwono

(Matyuu 9:9-13; Mak 2:13-17)

27Lukomgu Jisasol plaino sumaiyokwe a'mwo takis nuugwiyo ma'dowodo pwollu kwonokaikono. A'mwo su toolluno yovo tov Livaiyolekono. Toro tool takis nuugwiyo ma'dupudo adaiyo tekwoji mwaloduke toollu kwonokaikono. Toro toollu Jisasol wonyuno sumaiyokwe aro kuudokaikono. “Guu donumjunono.” 28Toro kuudoka tool gami yiuwi'nokai tonyu yogallu'mo'mno sumaiyokwe ilodavo'no Jisasollu kuumjunokaikono.

29Toro uumjunyuno sumaiyokwe Livaiyol gamoro ago tovi wosamujuko kuulonomwallo'moneyokwe lubullu doto bwotonyo tov sokaikono. Toro ino sumaiyokwe a'mwo takis nuugwiyo mallokwe bwotonyago pworogai'aro a'mwo go'no go'nodo pworogai'aro Jisaseke'aro tooro Livaiyolluro ago tovi wosamujuko aulonomwaloporogano. 30#Lk. 15:1,2Toro kuulonomwalodopure toga Farasi toorogai'aro loowo tovino pi'mwo kuudokwe toorogai'aro tooro wono'mno Jisasolluro uumjunyokwe toorai burolyogalo aro aduu'mwojoporogano. “Kevu a'mwo takis nuugwiyo mallokwe toorogai'aro a'mwo ma'no ma'nodokwe toorogai'aro su toorogai buro'nyo'mo doulonomwakovo?” Aduu'mwojoporogano.

31Toro aduu'mwojopo su toorai Jisasol yovekurajo puruv aro kuudokaikono. “Nobollomaiyokweyonoldeyo, adupi tooro dookta toollomno mavla'mdupudorogano. Toro kuvi kuruv, Nobollokweyonoldeyo, adupi toorono'gwowi dookta toollomno pla'mdupudorogano. 32Su toro to'busuko kubalno nuu a'mwo pworo, Sugudonoldeyo, adupi tooraiyomno abonyumaiyo. Toro kwonyu kuruv a'mwo, Ma'no ma'nodokweyonoldeyo, adupi toorono'gwowi Gooti toollomno kuudo youragunyumo'nupureyokwe de'nomallo'mo abonyugono.” Kuudokaikono.

Wosamujuko kumako tovino yovekurajokwono

(Matyuu 9:14-17; Mak 2:18-22)

33Aki a'mwo mido mollomwalokwe tooro Jisasollu aro abuudoporogano. “Joonolluro uumjunyokwe tooro yiuwi'nokai toga wosamujuko tonyuno kumako mwalopi subusu'nyogalo wuudodupudorogano. Aki Farasi tooravuro uumjunyokwe kworo kuruv aval'no yodupudorogano. Toro kuvi kuruv gumi gumjunyokwe toorono'gwowi wosamujuko tokwe wonyo tokwe kuuno nugovla'mdupudorogano.” Abuudoporogano. 34Toro abuudopo toorai Jisasol yovekurajo puruv aro kuudokaikono. “A'mwo pwol abolo mallo'mo tool kuuno mwalodowo'jure toga gami ibwoto'nyo tooro gavuge ilaiyo yopi wosamujuko tonyuno kumako ku'nono mamwalpinorogano. 35Toro kuvi kuruv iruko pullugwoji abolo mallo'mo su toollu nomokavlapinekono. Su toro me'no amokavlapi toga'no'gwowi abolo mallo'mo su tool mamwalodowo'jure tovino tov gami ibwoto'nyo tooro wosamujuko tonyuno kumako nokwo mwalpinorogano.” Kuudokaikono.

36Toro wuujuno sumaiyokwe aki yovekurajo puruv aro kuudokaikono. “A'mwo pwol youro uumdo arojopiyo'ji puvi youro aiyo tokwe madokuuragiwolonekono. Youro uumnorojo su tovi kuvinono adokuuragiwolo'ji tov youro aiyo nodokuullo tov youro uumdo tovi guureji ki'nomarowo'ji bwotonyo rojonokwono. Aki youro aiyo nodokuullo su tov youro uumdo tokwe aval'no mimo'nonokwono. Toro tovino tov youro uumdo tokwe aiyo tokwe toval amolla'mo'bi tov kaiya'no imo'nonokwono.” Kuudokaikono.

37Toro wuujuno sumaiyokwe aki yovekurajo puruv aro kuudokaikono. “A'mwo pwol meme kulako tovida'ai sakwollungiko guumiyo uumdo tovi wain wonyo aiyo tokwe suroso'ji tov wain wonyo su tov munowo'ji nobwolowikuropiyawonokwono. Toro abwolowikuropiyawo'ji tov meme kulako tovida'ai sakwollungiko guumiyo uumdo tokwe'aro wain wonyo aiyo tokwe'aro yiuwi'nokai toval kaiyako i'nubullunovakono. 38Toro tovino tov wain wonyo aiyo tov meme kulako tovida'ai sakwollungiko guumiyo yiuno aiyo tovino to'no iroso'mokwono. 39Aki a'mwo pwol wain wonyo uumdo tovi me'no ano'ji tool wain wonyo aiyo tovi nonyo'mo mwinonekono. Toro kwol kuruv aro donekono. “Oo wain wonyo uumdo tov wain wonyo aiyo tovi kuuwolo'mwallo,” su toro dowo'ji wain wonyo aiyo tovi nyo'mo mwinonekono.” Jisasol yovekurajo ton toro kuudokaikono.

Currently Selected:

Luuk 5: SMB

Highlight

Copy