Lukasa 20

O Yerusaleemoka manga hohidimono iwileha o Yesusika ma titi ai kuaha o kiaino iboa

Matiusu 21:23-27; Maruku 11:27-33

1De o wange moiukuoli Ma Jou ai Tauoka de o Yesusu naga wadotoko o nyawaika de o Abari ma Rorahai wahingahu-ngahu. De naga genangoka to ona manga hidemo ma nyawa yokokurutiye Ma Jouika, de ona abe yotobadotoko o Musa ai Paretaino, de utuoli o Yahudi ma nyawa manga hohihira. 2De ona yoboa o Yesusino de iwitemo Unangika ato, “O kiaino ani kuaha la hiadono kanugono o nyawa naduhu abe yotobafuku-fukunu Ma Jou ai Tauoka? De onagona honanga inihidoaka manga kuaha Ngonaika la gea ka idadi nodiai?”

3Masara o Yesusu ko womafetongua onangika ho watemo wato, “Iya, marai gea ko tinipaluhuahi. Masara naga moi Ngohioli tato tinilehahi nginika. Ho hokonaa ahi leleha. 4Nako nengokadau abe o Yohanese Wotobaohi-ohiki, to una ai kuaha o kiaino iboa la hiadono o nyawa waohi-ohiki, Ma Jouoka de aino eko o nyawaka de aino dika ai kuaha? Abeika nipaluhu!”

5Ho ona duru yomakoketemo ma titi ai leleha gea, ho yotemo ato, “Ou, ai leleha naa done sarakia de hopaluhu? Nako hipaluhu Unangika hato, ‘Ma Jouoka de aino o Yohanese ai kuaha,’ gea de ahao kiani Una wonaleha wato, ‘Ho gea adodoa ho ko niwingakua unangika?’ 6De masara nako hipaluhu hato, ‘O nyawaka de aino dika ai kuaha,’ de done sarakia, angamoi nanga kokawaaha ona ko manga ngoe iwingaku o Yohanese una Ma Jou ai uru ma dodofanga womatengo. Ho nako hipaluhu hokogea ahao ma kokawaaha duru inangamo ngoneino de marai inahakaru la ato inahohonenge! Ho ngone done sarakia?” 7Ho ma bahauku de manga hohidimono gea iwitemo o Yesusika ato, “Marai gea ko mihiorikua.”

8De ahao o Yesusu wotemo wato, “Angamoi gea ngini ko nipaluhua, Ngohioo toluku topaluhu nia leleha. Ho ko tinihingahua abe ma titi ahi kuaha o kiaino la ka idadi o nyawa gea taduhu Ma Jou ai Tauoka de aino.” Hokogea idadi abe o Yesusu de o Yahudi ma nyawa manga hohidimono yomakoketemo, de manga demo o Yesusu wahikala abe to ona manga hininga wohikawalimi.

Abe yotobaredi-redi o angguru ma redioka ma hiketero

Matiusu 21:33-46; Maruku 12:1-12

9De ahao o Yesusu wotemo o nyawa yowoe-woeika de o hiketero ma ade-ade moioli wato, “De naga womatengo o angguru ma redi wodato-datomo. Ho wodatomo ibooto de o nyawa yamuruono naga ahao wahewa la wato ona yoogoana to una ai redi gea. De o redi ma dutu de yogoa-goana yomahiketehibehehongo la nako adonoka ma oraha abe ahao amake o redi ma hasili, de ahao ma hasili gea yaregu la ma hononga iwihidoaka o redi ma dutuika. De yomahiketehibehehongo ibooto de ahao o redi ma dutu wosoboka de wotagi-tagi o tonaka utuikali la ai dekana womanoa genangoka.”

10“De ipahaino adonoka ma oraha ai redi naga de ma hasiloka, de o redi ma dutu ai huhuloko womatengo wihidingoto yogoa-goanika la wato wale ma hasili ma hononga o angguru ma redino. Masara ma gogoana gea ahao iwitaokino ma huhuloko de iwipoha-poha, de iwipoha ibooto de ahao iwihuloko la wolio ma dutuika abe ka womagiawawe dika. 11De ahao ma redi ma dutu wihidingoto womatengoli ona yogoa-goanika, masara idadi imaketero abe hoka wohira-hiraikali, abe iwipoha-poha de iwihikokangela unangika de ahao una wolio ka womahomoa dika. 12De ipahaino de womatengoli ma dutu wihidingoto, masara ka imakadaene dika abe idadi unangika, angamoi iwihiodiri unangika de iwikiniiki ho wolio ka womagiawawe dika ai dutuika.”

13“De ma angguru ma redi ma dutu womatemo wato, ‘Naa done hokokiali todiai la ahi redi ma hasili tamake?’ De ahao naga moioli ai hininga ipuda ai hiningaiye wato, ‘Hokonaa ma ngekomo. Ka idadi ahi ngofaka abe duru tidora unangika tihidingoto onangika, angamoi kiani naga manga horomati ahi ngofakika.’”

14“Ho ai ngofaka wihidingoto de ipaha una ngade-ngade womahiadono onangika de ona iwimakeoka. Masara ka de iwimake de iwihioriki abe ma redi ma dutu ai ngofaka woboaino. Ho ona yomahikagaro ato, ‘Una gea o redi ma dutu ai ngofaka. Abeika hitomaka dika la naa ai oara mata-mata homahitongoneoka dika!’ 15De iwihidee hokogea ho iwitaokino ma dutu ai ngofaka gea de iwiao o redioka de aino ma hoanika de genangoka iwitomaka. Marai hokogea dika aika ahi hiketero.”

De o Yesusu ka wotemohi o Yahudi ma nyawa manga hohidimonika wato, “Masara naa moi tinileha. Nako ngini, o angguru ma redi ma dutu gea ahao woboali ai redino de o kia ahao wodiai onangika abe yotobagoa-goana to una ai redi?” 16De o Yesusu Una ma hirete wopaluhu wato, “Una ahao woboaino de ona abe ai redi yogoa-goana, ona gea wahibinaaha onangika. Wahibinaaha ibooto de ahao o nyawa utuoli wairiki la onangoli ahao yogoa-goana ai angguru ma redi gea.”

De o Yahudi ma nyawa manga hohidimono ona ihiorikoka abe ma hiketero ma dumutu onangika de duru ko yoigoua la Ma Jou waoluku onangika, ho ona yotemo ato, “Koua! Ufa hiadono hokogea idadi!”

17De ahao o Yesusu womalega onangika de wotemo wato, “Nako hokogenangua ma titi ma hiketero ma ade-ade ma timiuku, de ahao o kiali ma titi genangino? Ho koaho ngini nihidifikiri ma ade-ade gea de ma titi moi naa Ma Jou ai Demo-demoka abe ma dodihiraino de itulihukuokau. De gea itemo hokonaa ato,

‘Naga moi o hakaru abe aolukoka o tau yotobadodiai, de duru ma hakaru gea ahao idadioka o tau ma lifunu.’”

18“De abe ma hakaru ifetongoka Ma Jou ai Demo-demoino ma dodihiraino, ma hakaru gea tomahiketero hoka Ngohi naa. De gea Ngohi tato, onagona dika yopeleke ma hakaruika gea de ona manga hininga itefu-tefuruku. De nako ma hakaru gea yahitapalu o nyawauku, ona gea manga hininga duru yahiwede-wederuku. Ho gea ma titi onagona dika ihioluku Ngohi, ona ahao manga hohowono yamake o bobinaahaika.”

19Ho ka de o Yesusu wotemo ibooto de ona abe yotobadotoko o Musa ai Paretaino de o Yahudi ma nyawa manga hidemo yokokurutiye ona gea duru ihiorikoka abe o Yesusu ai hiketero gea tanu wahiketero ona, abe ona hoka o nyawa gea yotobagoa-goana o angguru ma redi, de ona abe iwioluku Unangika. De ona ato ma oraha gea dika de o Yesusu iwitaokino, masara ko idadiua angamoi yohawana abe o nyawa yowoe-woeika, ato done ahao o huruhara idadi nako iwitaoko o Yesusu. Ho ka iwikokinoaika dika de ko iwitaokuali.

O Yesusu iwileha ma titi o pajaka ma tiwi

Matiusu 22:15-22; Maruku 12:13-17

20De o Yahudi ma nyawa manga hohidimono gea yogoa-goana la ma ngekomo yamake hokokia iwitaoko. Ho ona iwileha-leha o Yesusika la ato wahowono ai bobaluhino. De ihititi genangino la ka idadi iwikalaki o Roma manga popareta ma hidimonika la hiadono iwitaokino o Yesusu.

De ipahaino de yahidingoto o Yesusika o nyawa abe yomaaduru hoka o totiai ma nyawa abe ko iwa manga hininga ma dumutu ma dorouika. 21Ho ona yoiki iwitutumu o Yesusu de yotemo Unangika ato, “Mia Guru, abe Ngona minihiorikoka Ngona natobagou-goungu ani demoino de ani dodotokino. De minihiorikoo abe Ngona duru ko nairikua o nyawa, ho ngaro onagona dika naga yoihene ani demoino masara Ngona duru nadotoko onangika abe hokokia howango itiai Ma Jou ai himangoka. 22Ho mangale ma titi gea ho miato Ngonaika dika minileha, de hokonaa mia leleha. Sarakia, abe naga o pajaka ma tiwi abe o Roma ma nyawa manga koano wogaho-gahoko ngone homoi-homoiino, gea itiai Ma Jou ai himangoka nako hohidoaka to ona manga koanoika, eko koaho ngaro ufa dika hohidoaka unangika? Sarakia Ngona?”

23Masara o Yesusu ka de woihene manga leleha de wahiorikoka ma titi to ona manga hininga ma dorou ho watemo onangika wato, 24“Abeika niaoino moi o tiwi ise-senge abe biaha o nyawa yapake la yofangu ma pajaka, la gea ka idadi tolegahi.” De ahao gea moi iwihidoaka de Una waleha onangika wato, “Ma tiwioka naa to onaguna ai hapa naga de to onaguna ai romanga?”

De gea iwipaluhu ato, “De gea to o Roma ma nyawa manga koano.”

25De ahao watemo onangika wato, “Ho gea tato o kia dika naga abe hohiromanga hato to ma koano, gea itiai niwihidoaka ma koanoika. Masara nagali o kia dika abe hato to Ma Jou, ena gea kiani niwihidoakoli Ma Jouika.” 26Hokogea o Yesusu ai babaluhu onangika o nyawa manga hima-himangoka, ho duru ko iwa ai demoino abe ona ka idadi ihititi genangino la iwitaoko. De gea duru yoheranga ma titi ai sosawaro ma demoino, ho hiadono ka yomarii-riidoka dika.

O Yesusu iwileha ma titi o momomiki

Matiusu 22:23-33; Maruku 12:18-27

27De ahao o nyawa yowoe-woeino de nagali o Saduki manga doomuino ma nyawa yoaguru yoboa o Yesusu ai himangino. De nako o Saduki ma nyawa ona o Yahudi ma nyawa o doomu moi abe yotobadotoko nako o nyawa yohonengoka de duru ko idadiua de yomomiki manga honengino gea. 28Ho onangoo yoboa o Yesusino de ato iwileha moi Unangika. De ona iwitemo Unangika ato, “Mia Guru, naga moi mia leleha. Ma dodihiraka nanga tofora o Musa wohitulihuku Ma Jou ai Pareta moi abe itemo hokonaa, ato,

‘Masara nako womatengo woilakoka masara ko wamakeuahi ai ngofaka de gea wohonenge, kiani ai dodotoli woilaka abe de ai riaka ngoi fao gea. De ahao o ngofaka yamake yamuruono naga de o ngofaka gea hahiromanga to ai riaka ai ngofa-ngofaka.’ # 20:28 Higalioli 25:5-6

Hokogea itemo o Musa ai Paretaka. 29Ho naa miniade-ade moi la minileha Ngona ani hininga sarakia. Abe naga ma moiuku naga o nauru yatumidi, de gea ona o roria-dodoto ma dutu mata-mata. De ma riaka gea una woilaka masara ko wamakeuahi ai ngofaka de una wohonengoka. 30De ipaha de ai riaka widatekuku ai riaka ngoi fao unangoli womile, masara unangoli ko iwa ai ngofaka de wohonengoka. 31De ka hokogea mata-mata idadi abe yatumidika ko iwa manga ngofaka. Ho ona gea ko moiua yamake o ngofaka ma ngofeka momatengoino gea. 32Ho de ma bahaika de ma ngofekali mohonengoka. 33Ho naa minileha, ahao abe ma oraha yohone-honengoka yokokimomikiye, ahao ma oraha gea de ma ngofeka gea to onaguna ngoi fekata, abe ma dihira o duniakahi de ona yatumidi yokokiilaka munangika? Hokogea mia leleha Ngonaika.”

34De o Yesusu wapaluhu onangika wato, “Iya, marai naga abe duru niataoko ihowono! Angamoi nako o gogilaka gea ka o duniakahi dika ma hiaturu abe ka ilakuohi o nyawa manga wowangoka ma oraha naa naga. 35Masara ahao dokengika de hokogenangokaua idadi. Angamoi ma oraha gea de o nyawa onagona dika Ma Jou waetongo wato ka idadi wahimomikino manga honengino, ona yomomikoka gea ko yoilakokaua. 36De igoungu abe ma oraha gea ona ko yoilakokaua, de hongoli ko idadiokaua yohonenge. De abe ko yohonengokaua, gea yomaketero dika hoka o momalaekata abe onangoo ko yohone-honengua. De mangale ma titi ko yohone-honengokaua ho ka idadi hahiromanga onangika hato Ma Jou ai ngofa-ngofaka de abe o momomiki ma nyawa yodadioka.”

37“De abe ma titi ona yohonengoka de yomomiki, naga o Musa ai demo ma dodihiraino abe duru inahitararono ma titi o momomikino. Abe ma oraha o Musa naga o gota ma eteteke itoka-tokara ma himangoka de witemo Ma Jouika de wihiromanga Unangika wato,

‘Ahi Baluhu idodutu abe ahi tofora o Abarahaama ai Jou, de o Isaka ai Jou, de o Yakubu to unangoli ai Jou, abe ona ka inihigiriiriohi Ngonaika.’

Hokogea o Musa wotemo. 38De to una ai demoino de ka idadi hohioriki abe Ma Jou Una ko yohone-honenge ma nyawaua manga Jou, masara abe ona yowango-wango to ona manga Jou. Ho ka idadi hohiorikoo abe ngaro o nyawa manga badanga ihonengoka masara manga jiwa ka iwangohi. Angamoi o Abarahaama de ona utu yohone-honengoka, ona mata-mata ka yowangohi Ma Jou ai himangoka.”

39De o Yesusu o momomiki wahitararono ibootino de naga o nyawa utu genangoka abe yotobadotoko o Musa ai Paretaino, de ona iwitemo Unangika ato, “Mia Guru, ani demoino gea de duru nagoungu!” 40De hokogea yopaluhu Unangika de ahao ona mata-mata ko yamoroinokaua iwileha-leha Unangika.

O Yesusu ai leleha ma titi o Dautu de o Mesia

Matiusu 22:41-46; Maruku 12:35-37

41De ahao o Yesusu Unangoli waleha moi onangika wato, “De naa Ngohi tinileha moi nginika la ti ngini nia hininga sarakia ma titi Ma Jou ai Mesia eko ai Koano abe ma dodihiraino de Una wonahibehehongoka. De hokonaa ahi leleha. Ho ma titi o kia hiadono iwihiromanga o Mesia gea ato Una o Dautu ai totoforaukuino? Angamoi nako hokogea iwihiromanga, sarakia, bote gea imaketero hoka iwihiromanga abe Una o nyawa biaha dika? 42Ma nako hoka Una o nyawa biaha dika, gea done sarakia hiadono o Dautu ma dodihiraino de wihiromanga nanga Koanoika gea wato ‘Ahi Baluhu’? Angamoi gea igoungu abe o Dautu una ma hirete ma dodihiraino de wohitulihuku ai demo o Higiriiri ma Nyanyianga ma bukuoka gea abe wotulihi wato,

‘Ma Jou wotemo ahi Baluhu idodutuika wato,

“Naino nogogere ahi nirakoka la Ngone hohikoano mata-mataika

43 ka hiadono ani musu gea duru yahitipokouku ani himangoka de abe duru manga hingounu naga Ngonaika.”’” # 20:43 Higiriiri 110:1

44De ahao o Yesusu wogila-gila wotemo wato, “Abeika o Dautu wihiromanga nanga Mesia gea wato, ‘Ahi Baluhu idodutu.’ Ho nako igoungu nanga Mesia gea to Dautu ai Baluhu idodutu, sarakia, ka idadiohi Una wodadi to Dautu ai toforauku womatengo abe o nyawa biaha dika? Koua! O Dautu ai demoino gea de duru itararono abe to una ai toforauku gea duru ko o nyawa biahaua!”

O Yesusu wahitiari o nyawaika ma titi ona yotobadotoko o Musa ai Paretaino

Matiusu 23:5-7; Maruku 12:38-40

45De ahao abe ma oraha o nyawa yowoe-woe nagahi yototoihenohi o Yesusu ai demoika, de Una watemo ona iwinii-niikika wato, 46“Nimahidodiai abe ona yotobadoto-dotoko o Musa ai Paretaino! Ona gea duru yomatobasade abe yoigo manga baju ma rorahai yomahinoauku de yotagi-tagi la ato yomahimatoko manga kuaha ikurutiye o nyawaika. De duru yoigoo o nyawa yahayanga onangika o kiaka naga abe o nyawa yowoe-woe. De naga moioli yoigo, nako nanga dodotoko ma tau-tauoka de duru yoigo o nyawa manga himangoka de yogogeruku. De nako o ngolo-ngolomokaoo de duru yoigo yogogere o kiaka naga yokokurutiye manga gogogeroka. 47De ona gea o ngo-ngofeka abe yofao yarusi abe yaora onangino manga tau de manga kiahonangoo. De gea barikua yodiaioka yofao-faoika de ipahaino ahao o nyawa manga hima-himangoka de yomaniata ma dekanoka la ato manga totiai yahimatoko o nyawa utuika. Ho gea Ngohi tato ona abe yotobadoto-dotoko o Musa ai Paretaino ahao ka to onangohi manga hohowono duru ikiria.” Hokogea o Yesusu wahitiari ona mata-mataika.

Currently Selected:

Lukasa 20: MJDD

Highlight

Copy