Matiusu 8
8
Womatengo iwipado de o Yesusu wihitogumu unangika
Maruku 1:40-45; Lukasa 5:12-16
1De o Yesusu o nyawaika wadotoko ibooto de ahao Una wouti o loku ma geleforuku de o nyawa ko manga ngoe iwinii-niiki Unangika. 2De abe wouti ai gogiriaka de ka itodokanino womatengo iwipado woboa o Yesusino de watilabukuku ai himangoka la wihoromati Unangika. De iwipado gea womagahoko wato, “Ahi Baluhu, nako Ngona nomodeke, ngohi tohioriki Ngona ka idadi nohiduhunu la hiadono ka idadi totogumu.”
3De o Yesusu wisoika unangika de witemo wato, “Ngohi ka idadi tomodeke toniduhunu, ho naa ngona notogumoka!” De ka de wotemoka de ka itodokanino to una ai pado iaikoka ho wotogumoka. 4De o Yesusu wihibehehongo unangika wato, “Naa idadioka ngonaika ufa nahingahu-ngahu o nyawa utuika, masara kiani noiki unangika abe ti ngini nia hidemo ma nyawa Ma Jouiye. De ma hidemo gea ai himangoka de nomahimatoko unangika la nomahitaana abe ma oraha naa de ngona notogumoka. De ahao ma hidemo ma nyawa Ma Jouiye gea ka idadi o hingahu moi wodiai la nanga gogianongoru mata-mataika ka idadi ihioriki de iningaku abe nagoungu notogumoka ani kangelaino. De ahao kiani nomahihuba o huhuba moi abe duru imakiniiki hoka o Musa ma dodihiraino wohiparetaka la gea nomahitunguu abe duru notogumoka.” Hokogea o Yesusu wihibehehongo unangika de gea una wosoboka.
O Yesusu wihitogumu o tentara manga haeke ai duduhunu
Lukasa 7:1-10
5De ipahaino abe ma oraha o Yesusu woboa o Kapenaumu ma kapongino de naga womatengo o Roma ma tentara manga haeke woboa o Yesusino de duru womagahoko o duduhunu Unangika. 6De una wato, “Ahi Baluhu, ahi tauoka naga ahi duduhunu womatengo ka o goohi abe duru iwigogama. De una gea ka womaiduoka dika ma koioka angamoi ko womagakunokaua de ai badanga duru ihakara.”
7De o Yesusu wipaluhu wato, “Ngohi ka idadi toniniiki dokaika la tihitogumu unangika.”
8Masara ma tentara manga haeke wotemo wato, “Masara ahi Baluhu, Ngona duru nokokurutiye de ngohi naa ahi gogere ko imakadaenua de to Ngona, ho koaho ufa Ngona noboa de nowohama ahi tau ma goronaika angamoi ka nokurutiyeholi. Masara koaho nenangoka dika de nohuloko ma panyakeika de duru tohioriki de tonganono abe ahi duduhunu doka wotogumoka. 9Abe ngohi duru tohioriki Ngona nohuloko dika de kiani idadioka. De gea tohioriki angamoi ma titi naga o tentara ma nyawa utu abe ka onangohi yokokurutiye nako de ngohi. Ho nako ona gea o kia dika ihihuloko ngohino gea ngohi kiani todiai. De nagali to ngohi ahi kuaha abe o tentara ma nyawaika ahi timiuku, de abe tahuloko onangika gea kiani duru yaniiki ahi huhuloko ma demoika. Ho nako ngohi tahuloko tato, ‘Nisobo!’ ona gea yosoboka, eko nako ngohi tahoko tato, ‘Niaino!’ de gea ona yoboainoka. Eko nako ahi tauoka de tahuloko ahi gogilaongika abe hokonaa de hokonaa yokarajaanga, gea kiani yodiai. Ho gea ngohi ka idadi tohioriki abe nako Ngona nohuloko dika ma panyakeika abe imanoa ahi duduhunu ai badangoka, gea ahao kiani wotogumoka.”
10Ka de o Yesusu woihenino ma tentara manga haeke ai demo gea de Una duru woheranga ma titi ma haeke gea ai ngongaku. De o Yesusu wotemo onangika abe iwinii-niiki wato, “Naa tagou-goungu tinihingahu abe nako to una naa ai ngongaku de o Isiraele ma nyawa manga ngongaku masara ka to unangohi iputurungu ai ngongaku. De abe naa ahi dekanino o Isiraele ma tonakoka ma ko tamakeuahi abe o nyawa manga ngongaku iputurungu abe imaketero hoka o homoaino ma nyawa naa to una ai ngongaku! 11De abeika, una naa barikua ko o Yahudi ma nyawaua ma to una ai ngongaku atilakuroka abe ti ngini o Yahudi ma nyawa nia ngongaku. Masara gea tanu ngaro ufa hoheranga ma titi ena gea. Angamoi naa moioli tinihingahu nginika, abe ahao ma oraha dokengika Ma Jou wahikoano ai nyawaika de naga genangoka o nyawa ko manga ngoe abe ona ko o Yahudi ma nyawaua. De ona manga ngoe o dunia ma amokino yokokiboaino la yomakokutuono ihirame-rame de yolomo de nanga totofora o Abarahaama de o Isaka de o Yakubu abe Ma Jou ai rame-rameoka. 12De igoungu abe ma rame-rameoka gea de naga ko manga ngoe abe ona ko o Yahudi ma nyawaua abe yolo-olomo de to ngone o Yahudi ma nyawa nanga totofora gea. Masara marai hoheranga ma oraha gea angamoi ngone o Yahudi ma nyawa ko howoeua abe haniiki. De igoungu abe ma dodihiraino de Ma Jou wonairikoka la wato ngone hinii-niiki de hiadono Una ka idadi wonahikoano, masara naga nanga ngoe abe hiolukoka Unangika ho ko idadiua wonadafongo. De abe iwioluku Unangika, ona gea ahao yaumoka manga hohowono ma ngiika abe duru kohamofufutu genangoka. De onagona dika genangoka ahao duru yoari-ari de manga ingiri ka ihikaika ihidokagoli ma titi ma odiri ko apoaua. De hokogea ahao dokengika idadi.”
13De o Yesusu witemoli o Roma ma tentara manga haekika wato, “Ngona ka idadi nolio dika, angamoi naa idadioka abe duru imakiniiki de ani ngongaku ma demoino.” De duru ma oraha gea dika de to una ai duduhunu abe ka o goohi una wotogumoka.
O Peturusu ngoi toroa de o nyawa utu manga ngoe o Yesusu wahikokitogumu
Maruku 1:29-34; Lukasa 4:38-41
14De ipahaino de o Yesusu woboa o Peturusu ai tauino. De genangoka womimake o Peturusu ngoi toroa abe muna duru imigogama, ho muna momaidu-idu dika ami koioka. 15De gea o Yesusu womimake de woiki munangika de womiso ami giamika. Ka de womiso de muna motogumoka angamoi ko imigogamokaua. De gea womihitogumoka ho muna momomiki de male o inomo la mileleani Unangika.
16Ho ka de ihohomuku de o nyawa manga ngoe yoboa o Yesusino abe yakokitokata de yopopanyake. De ona gea manga gogianongoru yomakiniiki de ona la yakokiaoino o Yesusino. De o Yesusu o tokata ma dorouika wakokihuloko ho wohititokoka onangika de gea mata-mata ma tokata ikokiloaroka. De abe onangoo yopopanyake gea mata-mataika wahikokitogumoka. 17De o Yesusu ai datoro gea idadi duru imaketero abe hoka ma dodihiraino Ma Jou ai uru ma dodofanga o Yesaya wonahingahuoka abe wato gea ahao ma Mesia wodiai. De gea ma dodihiraino de o Yesaya wohitulihuku ai demo wato,
“To ngone nanga badanga ma kangela Una wagorakoka ngoneino, de to ngone nanga popanyake wonahitogumoka.” #8:17 Yesaya 53:4
Hokogea o Yesaya ai demo ma dodihiraino.
Abe ma titi o nyawa manga wowango ma kangela hokokia nako o Yesusu iwinii-niiki
Lukasa 9:57-62
18De ahao naga o nyawa ko manga ngoe yoboa de yomatoomuino o Yesusoka. De Una wamake abe o nyawa duru yowoeoka ho wahuloko iwinii-niikika yomahidiai ma ngotiri moi la ka idadi Una de ona dika yomahihora doka o akere ma ngooto ma honongaika. 19Masara ko yosobouahi de naga womatengo woboaino abe wotobadoto-dotoko o Musa ai Paretaino de wotemo o Yesusika wato, “Ahi Guru, ngohi naa toigo toniniiki. Ho ngona o kiaika dika noiki, ma gea mata-mata ka toniniiki.”
20Ma o Yesusu wipaluhu unangika wato, “Sarakia, gea ani demoino nagou-goungu la nato ka ihikaika nohinii-niiki Ngohi? Angamoi nako o fuhuku ma kaho ena gea naga ma ngingidu abe imatobaidu-idu genangoka, de o totaleo to ena naga homoi-homoi ma dididu, masara Ngohi naa ko iwa ahi ngi abe biaha ka idadi tomaidu-idu genangoka. Abe ngaro Ngohi o Nyawa ma Ngofaka abe o Horogaka de tauku toboa masara o nyawaino tomaboa, masara duru ko iwa ahi ngingidu la tomatobaidu-idu genangoka. Ho sarakia, ngaro hokogea masara ngona ka idadiohi nohinii-niiki Ngohi?” Hokogea o Yesusu ai babaluhu abe unangika wotobadotoko o Musa ai Paretaino.
21De ahao naga womatengoli iwinii-niikino gea woboa o Yesusino de wotemo wato, “Ahi Baluhu, ngohioo toigo ka ihikaika toninii-niiki Ngona. Masara naa moi tonihingahuohi abe nako Ngona ka nomodeke de ngohi naa toliohi ahi tauika de tihiainohi ka hiadono ahi baba gea wohonengokahi. De gea hiadono wiwilungunokahi de ahao ngohi toboali naangino la ka ihikaika toninii-niiki Ngona.”
22Masara o Yesusu wipaluhu unangika wato, “Gea irahai ani hininga itagi ani babaika. Masara koaho Ngohi nohihitihira ani wowangoka. Ho ngona koaho ma oraha naa de nohiniiki dika Ngohi. De nako ona abe manga wowango ko iwa Ma Jouino, ona gea yohonengoka Ma Jou ai himangoka. Ho irahai la ona gea nanoaika dika angamoi onangoo yomahikokoona ka idadi yomakulungunu manga honenge gea. Ho ngona naino nohiniiki Ngohino.” Hokogea o Yesusu ai demo unangika.
O rato o Yesusu wohitogumu
Maruku 4:35-41; Lukasa 8:22-25
23De ahao o Yesusu de iwinii-niiki ona yofarenokoka manga ngotiroko de yosobo yomahihora doka o akere ma ngooto ma honongaika. 24De manga dodagi ma goronaka de ka itodokanino yadarato ho italoko kohabuturungu. De ma lulu naga ma ago-agomo hiadono ifarene manga ngotiruku de ngade-ngade iwooro. De ngaro yadarato hokogea masara o Yesusu iwikiookokahi. 25Ho ona iwinii-niiki yoiki Unangika de iwitumomiki ma titi iwiboa-boaka ato, “Mia Baluhu, Ngona kiani nomiduhunohi done inalutu!”
26De o Yesusu wapaluhu onangika wato, “Done ma titi o kia ho nihawana? De nia hawanino gea duru nimahitaanoka abe ti ngini nia ngongaku Ngohino ka ihutulohi.” Ho ka de gea wotemo ipaha de womaokoiye de ahao wataere o hidalokika de o akere ma ngootika gea wato, “Nomatogumoka de noriidoka!” Ka de wotemo ipaha de ma hidaloko itogumoka de ma ngooto duru iriidoka. 27Ho ona iwinii-niiki duru yokokiheranga de yomakokeleha ato, “Adoo! Abeika Una gea ai buturungu! Ei! Ai kuaha gea o kiaino hiadono o rato de o akere ma ngooto iwihingounu hokogea?”
O nauru yahinooto yakokitokata de o Yesusu wahititoko onangino ma tokata gea
Maruku 5:1-20; Lukasa 8:26-39
28Ho ka de ipahaino de o Yesusu de iwinii-niiki ona yomahiadonoka o Galilea ma akere ma ngooto ma honongaika, abe genangoka o Gadara ma nyawa yogogere.#8:28 Ma tonaka gea naga utu ihiromanga o Gadara, de utu ihiromanga o Gerasa, de utuoli ato o Geregesa. De naga genangoka yahinooto o nauru yakokitokata abe yomanoa o aruku ma goronaka. De ma aruku gea o nyawa manga honenge ihitobangoha-ngohama genangika. De ona gea yahinooto duru yotualono ho hiadono o nyawa ko idadiua yatilakuru o aruku ma himangino gea done yahikangela onangika. Ho ona yahinooto yakokitokata gea duru ka iwibuhukika o Yesusika. 29Ho ona duru iwiboa-boaka Unangika ato, “Adodoa ho hiadono Ngona Ma Jou ai Ngofaka noboa nenangino la nomiruwae ngomi naa? Angamoi to ngomi mia hohowono ma oraha abe ma dihiraino de Ma Jou wogelengaka, gea ma oraha ko adonuahi. Ho tanu ko itiaiua Ngona noboaino la ngomi nomihikangela!” 30De ahao naga dokea abe ko ikurutikaua o ode duru idoduduono kohangoe abe itimiono genangoka. 31De ma tokata abe yabare-barene ma nauru yahinooto gea duru imagahoko o Yesusika ato, “Nako Ngona nomihititoko o nyawaino naa, duru mimagahoko la nomihidingoto doka o odeika gea la ngomi mimahipooteke genangika!”
32De o Yesusu wahuloko wato, “Nako gea nihupuoka!” Ho ma tokata ihupuoka o nyawa yahinootoino gea de iloiki la yokokibarene o odeikali. Masara ka de o toka-tokata yokokibarenoka o odeika de o ode imapopaata o bakoruku de imakokingumo o akere ma ngootuku hiadono akokilutuoka.
33De gea ipahaino de ona abe o ode ma gogoana, ona gea yokokisoboka yoara manga kapongika. De genangoka ona yoade-ade onangika abe ma titi idadioka ona yahinooto yakokitokatika. 34Ho o kapongo ma nyawa ona mata-mata yokokiboaino la ato iwimake o Yesusu. Masara gea iwimake de ona duru yogaho-gahoko Unangika ato, “Ngomi migahoko la Ngona nohupuoka mia tonakino naa!”
Currently Selected:
Matiusu 8: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
