Nai Vakatekivu 35
35
Sa lako ki Peceli ko Jekope me soro, 1-7. Sa mate ko Tipora, 8. Sa vosavakalougatataki Jekope tale ko Jiova, 9-15. Sa mate ko Repeka, 16-20. O ira na luve i Jekope, 23-26. Sa mate ko Aisake, 27-29.
1A SA kaya na Kalou vei Jekope, Tu cake, mo lako cake ki Peceli, ka tiko maikea: ka cakava maikea e dua nai cabocabo-ni-soro vua na Kalou, o koya ka rairai vei iko ni ko a drotaka na mata i Iso na tuakamu. 2A sa kaya ko Jekope vei ira na nona lewe-ni-vale, kei ira kecega era tiko kaya, Dou biuta tani na kalou ni kai tani sa tiko kei kemudou, dou savasava talega, ka vakaisulu e nai sulu tani: 3ia tou yavala mada, tou lako cake ki Peceli; kaʼu na cakava maikea e dua nai cabocabo-ni-soro vua na Kalou, o koya ka rogoci au e na siga kaʼu a rarawa kina, ka tiko kei au e na sala kaʼu a lako kina. 4A ra sa solia vei Jekope na kalou kecega ni kai tani sa tu e ligadra, kei na sau sa tu e daligadra; a sa vunia ko Jekope e ruku ni oki a ya sa tu mai Sikemi. 5A ra sa lako voli yani: a sa tauva na veikoro sa voliti ira na rere vua na Kalou, a ra sega kina ni vakasavi ira na luve i Jekope.
6A sa lako mai ko Jekope ki Lusa, mai na vanua ko Kenani, ko ya ko Peceli, o koya kei ira kece na tamata era tiko kaya. 7A sa cakava maikina e dua nai cabocabo-ni-soro, ka vakayacana na yasana ko ya ko Eli-Peceli: e na vuku ni sa rairai vua maikea na Kalou, ni sa drotaka ko koya na mata i tuakana.
8A sa ciba ko Tipora na vada i Repeka, a sa buluti mai na ruku i Peceli, e na ruku ni dua na oki: a sa vakatokai na yacana ko Aloni-pakuci [A oki ni tagi].
9A sa rairai tale na Kalou kivei Jekope, ni sa lako mai Petani-erama, a sa vosavakalougatataki koya. 10A sa kaya vua na Kalou, Sai ko Jekope na yacamu; ia ena sega ni kacivi tiko na yacamu ko Jekope, ena ko Isireli ga na yacamu: a sa vakatoka na yacana ko Isireli. 11Sa kaya vua talega na Kalou, Oi au na Kalou Kaukauwa: mo luvea, ka lewe vuqa mai; a matanitu, ia na matanitu e vuqa, ena tubu maivei iko, ka na lako mai na tolomu na turaga lelevu; 12a vanua talega kaʼu a solia vei Eparaama kei Aisake, au na solia vei iko; vei ira talega na nomu kawa era muri iko, kaʼu na solia na vanua ko ya.
13A sa lako cake tani vua na Kalou, mai na yasana ka vosa kina vua. 14A sa vakaduria na duru ko Jekope e na tikina ka vosa kina vua ko koya, io na duru vata: a sa livia ki delana nai madrali liviraki, sa livia talega ki delana na waiwai: 15a sa vakatoka ko Jekope na yaca ni yasana ka vosa kina vua na Kalou ko Peceli.
16A ra sa lako voli yani mai Peceli; a sa lekaleka na sala me yaco ki Efiraca: a sa vakasucu ko Rejeli, a sa rarawa vakalevu ni vakasucu. 17Ia ni sa taratara rarawa vakalevu, sa kaya vua ko koya na tina-ni-gone, Kakua ni rere; ena dua tale vei iko na goneatagane o qo. 18A sa yaco ni sa lako na yalona, (ka ni sa ciba,) sa vakatoka na yacana ko Peni-oni [A gone kaʼu rarawa kina]: ia ko tamana sa vakatoka ko Penijamini [A gone ni liga i matau]. 19A sa ciba ko Rejeli, a sa buluti e na sala sa lako ki Efiraca, ko ya ko Pecileema. 20A sa vakaduria e dua na duru ko Jekope, e na dela ni nonai bulubulu: ko ya na duru ni bulubulu i Rejeli, ka yacova kaya na gauna o qo.
21A sa lako voli yani ko Isireli, ka sa birika na nona vale gatu me sivia na vale cecere mai Eteri.
22A sa yaco ni sa tiko ko Isireli e na vanua ko ya, sa lako ko Rupeni ka koto kei Pila na wati lailai i tamana: a sa rogoca ko Isireli.
Ia ko ira na luvena tagane ko Jekope sa tinikarua: 23Na luve i Lia; ko Rupeni, na ulumatua i Jekope, kei Simioni, kei Levi, kei Juta, kei Isakari, kei Sepuloni: 24na luve i Rejeli; ko Josefa, kei Penijamini: 25kei na luve i Pila, na vada i Rejeli; ko Tani, kei Nafitali: 26kei na luve i Silipa, na vada i Lia; ko Kata, kei Aseri: o ira o qo na luve i Jekope sa sucu vua mai Petani-erama.
27A sa lako mai ko Jekope kivei Aisake na tamana mai Mamire, ki na koro i Aripa, ko ya ko Hepironi, ka dautiko vulagi kina ko Eparaama kei Aisake. 28Ia na siga i Aisake e dua na drau ka walusagavulu na yabaki. 29A sa ciba ko Aisake, ka mate yani, a sa kumuni vata vei ira na kai nona, ni sa qase ka mamau e na siga: a rau sa buluti koya na luvena ko Iso kei Jekope.
Currently Selected:
Nai Vakatekivu 35: FIJ1864
Highlight
Share
Compare
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
