Joni 7
7
Sa bese ko Jisu ni muria na nodratou vosa na tacina, 1-9. Sa lako cake e Kalili ki na solevu ni vale vakacevaceva, 10-13; a sa vakatavuvuli e na vale ni soro, 14-39. Era sa veiletitaki Jisu na tamata, 40-44. Era cudru na Farisi ni sa sega ni tauri Jisu ko ira na tamata; a ra sa vunauci Nikotimo ni sa totaki Jisu, 45-53.
1IA ni sa oti na veika o qo, sa lako voli ko Jisu e Kalili: ni sa sega ni via lako voli e Jutia, e na vuku ni ra sa via vakamatei koya ko ira na kai Jutia.
2A sa voleka na nodra solevu ni vale vakacevaceva na kai Jutia. 3Sa qai kaya vua ko iratou na tacina, Lako tani eke, ka lako ki Jutia, me ra raica talega na nomu tisaipeli na nomu cakacaka ko sa kitaka. 4Ni sa sega e dua sa vinakata me kilai, ka kitaka vuni e dua na ka. Kevaka ko sa kitaka na veika o qo, vakaraitaki iko kivei ira na kai vuravura. 5Ni sa sega talega ni vakabauti koya ko iratou na tacina.
6Sa qai kaya vei iratou ko Jisu, Sa sega ni yaco mai na noqu gauna: ia ka tu vakailoa walega na nomudou gauna. 7Sa sega ni cati kemudou rawa ko ira na kai vuravura: ia era sa cati au, e na vuku ni kaʼu sa vakatakila ni sa ca na nodrai valavala. 8Dou lako cake ki na solevu o qo; au sa bera ni lako cake ki na solevu o qo; ni sa sega ni yaco mai na noqu gauna.
9Ia ni sa kaya oti na vosa o qo vei iratou, sa tiko ko koya e Kalili.
10Ia ni ratou sa lako cake na tacina, sa qai lako cake ko koya talega ki na solevu, e sega ni vakarairai, ka vuni ga. 11Era sa qai vakasaqarai koya na kai Jutia e na solevu, ka kaya, Sa tiko maivei ko koya? 12A sa vosataki koya lo vakalevu ko ira na tamata: sa kaya e so, A tamata vinaka ko koya: ka kaya e so tani, E segai; sa lawakitaki ira ga na tamata, 13A sa sega e dua sa vosataki koya votu, ni ra sa rerevaki ira na kai Jutia.
14Ia e na veimama ni solevu, sa lako cake ko Jisu ki na vale ni soro, ka vakatavuvuli. 15A ra sa kurabui ko ira na kai Jutia, ka kaya, E kila vakaevei nai vola na tamata o qo, ni sa sega ni vakatavulici?
16Sa vosa vei ira ko Jisu, ka kaya, Sa sega ni noqu na noqui vakavuvuli, sa nona ga ka talai au mai. 17Kevaka e dua na tamata e via cakava na loma i koya, ena kila se mai vua na Kalou nai vakavuvuli, seʼu vosa vakai au ga. 18O koya sa vosa vakai koya ga, sa vinakata me dokai; ia ko koya sa vinakata me dokai ko koya sa talai koya mai, sa dina, a sa sega na cala vei koya. 19Sa sega li ni solia vei kemudou na vunau ko Mosese, a sa sega e dua vei kemudou sa cakacaka me vaka na vunau? Dou sa via vakamatei au e na vuku ni cava?
20Era sa vosa na lewe vuqa, ka kaya, Sa curumi iko e dua na tevoro: o cei sa via vakamatei iko?
21Sa vosa ko Jisu, ka kaya vei ira, E dua bauga na cakacaka kaʼu a cakava, ia dou sa kurabui kecega kina. 22Sa solia vei kemudou na veicili ko Mosese; (ia ka sa sega vei Mosese, a ya ga maivei ira na qase;) ia dou sa ciliva na tamata e na siga ni vakacecegu: 23kevaka sa cilivi na tamata e na siga ni vakacecegu, me kakua ni vakacacani na vunau i Mosese; dou sa cudruvi au beka, niʼu sa vakabula e dua na tamata taucoko e na siga ni vakacecegu? 24Kakua ni lewa me vaka na ka sa rairai, ia dou lewa vakadodonu.
25Sa qai kaya e so vei ira mai Jerusalemi, Sa sega li ni koya o qo era sa via vakamatea? 26Ia ka raica, sa vosa doudou, ka ra sa sega ni kaya vua e dua na ka. Era sa kila dina na turaga ni sai koya dina o qo na Karisito, se segai? 27Ia na tamata o qo, eda sa kila ga na vanua sa lako maikina; ia na Karisito, ni sa lako mai, sa sega e dua sa kila se lako maivei ko koya.
28Sa qai kaci ko Jisu, ni sa vakatavuvuli tiko e na vale ni soro, ka kaya, Dou sa kilai au, dou sa kila na vanua talega kaʼu sa lako maikina; ia kaʼu sa sega ni lako mai vakai au ga, ia sa dina ko koya sa talai au mai, o koya dou sa sega ni kila: 29ia kaʼu sa kilai koya koi au; niʼu sa lako maivei koya, a sa talai au mai ko koya.
30Era sa qai via tauri koya: a sa sega e dua sa tarai koya, ni sa sega ni yaco na nona gauna.
31A sa lewe vuqa vei ira na tamata era sa vakabauti koya, ka kaya, Ni sa lako mai na Karisito, ena kitaka li na caka-mana e vuqa cake e na veika o qo sa kitaka ko koya o qo?
32O ira na Farisi era sa rogoca ni ra sa vosataki koya lo vakaoqo ko ira na lewe vuqa; ia ko ira na Farisi kei ira na bete levu era sa tala e so na tamata me ra tauri koya. 33Sa qai kaya vei ira ko Jisu, Au sa tiko vakalailai ga kei kemudou, au na qai lako vua ka talai au mai: 34dou na vakasaqarai au, ia dou na sega ni kunea: ia na yasana kaʼu sa tiko kina, dou sa sega ni lako rawa kina.
35Sa qai veikayaka ko ira na kai Jutia, Ena lako beka kivei ko koya, me da sega kina ni kunei koya? ena lako beka vei ira na duiveiseyaki vei ira na veimatanitu kisau, ka vakavulici ira na veimatanitu kisau? 36A vosa cava beka o qo sa kaya ko koya, Dou na vakasaqarai au, ka sega ni kunea; ia na yasana kaʼu sa tiko kina, dou sa sega ni lako rawa kina?
37E na siga maimuri, a ya sa levu e na solevu, sa tu ko Jisu ka kaci, ka kaya, Kevaka e dua sa viagunu, me lako mai vei au ka gunu. 38O koya sa vakabauti au, me vaka sa tukuna nai Vola, ena dave mai na ketena e so na uciwai ni wai bula. ( 39Ia na ka sa vosataka vakaoqo ko koya, sai koya na Yalo, o koya era na rawata ko ira sa vakabauti koya; ni sa bera ni yaco na Yalo Tabu; e na vuku ni sa bera ni vakarokorokotaki ko Jisu.)
40E le vuqa vei ira na tamata ni ra sa rogoca na vosa o qo, era sa kaya, Sa dina ni sai koya o qo na Parofita ko ya. 41Sa kaya e so tani, Sai koya o qo na Karisito. A sa kaya e so tani, Oi, ena lako mai Kalili na Karisito? 42sa sega li ni tukuna nai Vola, ni sa lako mai na Karisito mai na kawa i Tavita, ka mai na koro ko Pecileema, sa mai tiko kina ko Tavita? 43A ra sa veiletitaki koya na lewe vuqa. 44A ra sa via kauti koya e so; a sa sega e dua sa tauri koya.
45Era sa qai lako mai nai talatala vei ira na bete levu kei ira na Farisi; a ra sa kaya vei ira, Dou sa sega ni kauti koya mai e na vuku ni cava? 46Sa kaya ko ira nai talatala, E sega e dua na tamata sa vosa me vaka na tamata o qo. 47Era sa qai kaya na Farisi vei ira, Dou sa vakacalai beka koi kemudou talega? 48sa vakabauti koya e dua vei ira na turaga se vei ira na Farisi, se segai? 49ia era sa rusa na tamata o qo era sa sega ni kila na vunau.
50Sa kaya vei ira ko Nikotimo, (o koya ka lako mai vei koya e na bogi, ka sa dua vei ira,) 51Sa cudruva beka na tamata na noda vunau, ni sa sega ni rogoci koya mada eliu, ka kila na ka sa cakava? 52Era sa vosa, ka kaya vua, O iko talega na kai Kalili, ne? mo vakasaqara ka kila: ni sa sega e dua na parofita sa tubu mai Kalili.
53A ra sa lako kecega ki na nodra veivale.
Currently Selected:
Joni 7: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
