Luke 15
15
A vosa vakatautauvata e na sipi sa yali ka kune tale, 1-7; kei na tiki ni siliva sa yali ka qai kune tale, 8-10; kei na gone sa biuti tamana ka qai lesu tale mai, 11-32.
1SA qai toro voleka mai vei koya ko ira kecega na kumuna nai vakacavacava, kei ira na tamatai valavala ca, me ra rogoca. 2A sa vosakudrukudru ko ira na Farisi kei ira na vu-ni-vola, ka kaya, Ko koya o qo sa veitau kei ira na tamata ca, ka kana vata kei ira.
3A sa tukuna vei ira ko koya na vosa vakatautauvata o qo, ka kaya, 4O cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa e na veico, ka laʼki vakasaqarai koya sa yali, me kunea mada? 5Ia ni sa kunea, sa viribale ki domona, ka reki. 6Ia ni sa yaco ki vale, sa kacivi ira vata na wekana kei na lewe ni koro, ka kaya vei ira, Tou mai reki vata, niʼu sa kunea na noqu sipi ka yali. 7Au sa kaya vei kemudou, ni na levu vakakina na reki mai lomalagi e na vuku ni tamatai valavala ca e le dua bauga sa qai veivutuni, ia ka lailai ga e na vukudra na tamata yalododonu e ciwasagavulu ka ciwa, sa sega ni yaga vei ira na veivutuni.
8Se ko cei na yalewa sa tini na nona tiki ni siliva, kevaka sa vakayalia e dua na tikina, sa sega beka ni vakacaudreva na cina, ka taviraka na vale, ka vakasaqara matua, me kunea mada? 9Ia ni sa kunea, sa kacivi ira vata na wekana kei na lewe ni koro, ka kaya, Tou mai reki vata, niʼu sa kunea na tikina kaʼu a vakayalia. 10Au sa kaya vei kemudou, Sa tubu vakakina na reki e na matadra na agilose ni Kalou, e na vuku ni tamatai valavala ca e le dua bauga sa qai veivutuni.
11Sa kaya tale ko koya, E dua na tamata sa lewe rua na luvena-tagane: 12a sa kaya vei tamana ko koya sa gone vei rau, Tamaqu, solia mai vei au nai votavota ni yau sa vota me noqu. A sa vota vei rau nai yau. 13A sa tawa vuqa na bogi sa muri, sa soqona vata na ka kecega ko na luvena sa gone, ka lako tani ki na dua na vanua vakayawa, ka sa vakayalia kina na nonai yau e nai valavala sa vinakata. 14Ia ni sa vakaotia kece, sa qai tubu na dausiga levu e na vanua ko ya; a sa qai dravudravua mai ko koya. 15A sa laʼki tiko kei na dua na lewe ni vanua ko ya; a sa talai koya ki na nona veiwere me vakani ira na vuaka. 16A sa garova na qana era daukania na vuaka, me mamau kina na ketena; a sa sega e dua sa vakani koya.
17Ia ni sa kila yalona tale, sa kaya, Sa vuqa na tamata i tamaqu sa voli na nodra cakacaka, era sa mamau e na madrai ka vo tu yani, ia koi au kaʼu sa mate e na viakana! 18au na ia, ka lako vei tamaqu, kaʼu na kaya vua, Tamaqu, au a valavala ca ki lomalagi, e na matamu talega, 19kaʼu sa sega kina ni yaga meʼu vakatokai tale me luvemu: qisi au meʼu vakataka e dua na nomu tamata sa voli na nona cakacaka. 20A sa ia, ka lako vei tamana. Ia ni sa yawa sara, sa raici koya ko tamana, a sa lomana, ka cici, ka bale ki domona, ka reguca. 21A sa kaya na gone vei koya, Tamaqu, au a valavala ca ki lomalagi, e na matamu talega, kaʼu sa sega kina ni yaga meʼu vakatokai tale me luvemu. 22A sa kaya na tamana vei ira na nona tamata, Dou kauta mai nai sulu vinaka sara, ka vakasulumi koya; tokara talega e dua na mama ki na ligana, kei nai vava ki na yavana; 23ia dou kauta mai na luve ni karavau sa uro, ka vakamatea; ka me datou kana, ka marau; 24ni ka mate na luvequ o qo, a sa qai bula tale; a sa yali, a sa qai kune tale. A ra sa vakatekivu me ra marau.
25A sa tiko e na veiwere ko na luvena ka qase vei rau; ia ni sa tale mai ka toro kabi ki vale, sa rogoca na bitu-ni-vakatagi kei na meke. 26A sa kaciva e dua vei ira na tamata, ka taroga se cava beka na veika o qo. 27A sa kaya vua ko koya, Sa lako tale mai na tacimu; a sa vakamatea ko tamamu na luve ni karavau sa uro, e na vuku ni rau sa veikidavaki tale kaya ka sa bula vinaka. 28A sa cudru ko koya, ka bese ni curu; sa qai lako mai kina ki tautuba ko tamana, ka vakamasuta. 29Sa qai vosa ko koya, ka kaya vei tamana, Raica, e vuqa na yabaki o qo kaʼu sa qaravi iko kina, ia kaʼu sa sega sara ni talaidredre ki na nomu vosa: ia ko sa sega sara ni solia vei au e dua na luve ni koti, me keitou marau vata kina kei ira na wekaqu: 30ia ni sa lako mai na luvemu o qo, o koya sa Otiva na nomui yau kei ira na yalewa dautagane, o sa vakamatea me kena na luve ni karavau sa uro. 31A sa kaya vua ko koya, Luvequ, edaru sa tiko vata vakadua, ia na ka kecega sa tu vei au sa nomu. 32A sa dodonu ga me da reki, ka marau; ni ka mate na tacimu o qo, a sa qai bula tale; a sa yali, a sa qai kune tale.
Currently Selected:
Luke 15: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
