Luke 8

Sa lako ki na veikoro ko Jisu me vunau, 1-3. A vosa vakatautauvata ni sila, 4-15. Sa yaga na vuku ni da vakavulici ira na lialia, 16-18. Sa tukuna ko Jisu se ko cei sa wekana dina, 19-21. Sa vakabulai iratou na nona tisaipeli mai na cava e loma ni wai, 22-25. Sa vakasava na tevoro e so, 26-40. Sa Vakabula na turidrabalavu, kei na gonealewa sa ciba, 41-56.

1A SA oti, sa qai lako voli emuri ko koya e na veikoro kecega kei na Veikoro lalai kecega, ka vunau, ka tukuna nai tukutuku-vinaka ni matanitu ni Kalou; kei iratou vata kaya na lewe tinikarua, 2kei na yalewa talega e so, sa vakabulai oti mai na yalo ca e so ka curumi iratou kei na malumalumu, ko Meri sa vakatokai na kai Makitala, sa lako tani oti vua na tevoro e vitu, 3kei Joana na wati i Kusa na matanivanua nei Eroti, kei Susana, kei ira tale era lewe vuqa, era sa qaravi koya e na nodrai yau.

4Ia ni sa lewe vuqa sara sa soqoni vata, ka sa lako mai vei koya mai na veikoro, sa vosataka na vosa vakatautauvata ko koya: 5Sa dua na daukabukaburaki sa laʼki kaburaka na nona sore ni sila; ia ni sa kaburaka lako, sa lutu e so e na tutu ni sala; a sa buturaki sobu, a ra sa mai kania na manumanu ni lagi. 6A sa lutu e so e na vatu; a sa tubu cake, ka qai raqosa sara, ni sa sega ni suasua. 7A sa lutu e so ki na loma ni veiwa-vakavotona; a sa tubu cake kaya na veiwa-vakavotona, ka vakaruguta. 8A sa lutu e so e na vanua vinaka, a sa tubu cake ka vuataka e drau na vuana. Ni sa vosataka oti ko koya na veika o qo, sa kacivaka, O koya sa vakadaligana me rogoca, me mai rogoca sara.

9A sa tarogi koya ko iratou na nona tisaipeli, ka kaya, A cava beka nai balebale ni vosa vakatautauvata o qo? 10A sa kaya ko koya, Sa; soli vei kemudou me kila na veika vuni ni matanitu ni Kalou; ia sa nodra na tani na vosa vakatautauvata ga; me ra raica ka sega ni raica, ka rogoca ka sega ni kila. 11Ia na vosa vakatautauvata sa vakaoqo: A sila, na vosa ni Kalou. 12Ia ko ira era vaka na tutu ni sala, ko ira era sa rogoca; sa qai lako mai na tevoro, a sa kauta tani na vosa mai na yalodra, de ra vakadinata ka bula kina. 13Ia ko ira era vaka na vatu, sai ira sa rogoca, ka vakabauta na vosa e na reki; a sa sega na wakadra, a ra sa vakadinata vakadede vakalailai ga, ia ni sa yaco na gauna ni dauveretaki era sa bale tale. 14Ia ko koya sa lutu ki na veiwa-vakavotona, sai ira era sa rogoca, a ra sa toko yani, a ra sa vakaruguti e na lomaocaoca kei nai yau kei na marau ni bula, a sa sega kina ni vua dina. 15Ia ko koya e na vanua vinaka, sa vakai ira era sa yalodina ka vinaka, a ra sa rogoca na vosa, ka vakabauta, ka vakavuana tikoga.

16Sa sega na tamata sa vakacaudreva na cina, ka laʼki ubia e na rubu, se virikotora e ruku ni mocemoce; sa virikotora ga e na kenai tutu, me ra raica na kena rarama ko ira sa curu mai. 17Ni sa sega na ka sa tabogo, me kakua ni vakaraitaki; se tabonaki, me kakua ni kilai se kau votu mai. 18O koya mo dou qai qarauni kemudou, e na nomudou rogoca; ni sa dua na ka ke sa tu vua na tamata, ena qai soli vua; ia na tamata ke sa sega ni tu vua e dua na ka, ena qai kau tani mai vua na ka sa nanuma sa tu vua.

19Sa qai lako mai vua na tinana kei iratou na tacina, a ratou sa sega ni toro rawa vua e na vukudra na lewe vuqa. 20A sa tukuna vua ko iratou e so, ka kaya, Sa tu etautuba na tinamu kei iratou na tacimu, eratou sa via raici iko. 21A sa vosa ko koya, ka kaya vei ira, A tinaqu kei na taciqu ko ira o qo era sa rogoca na vosa ni Kalou, ka cakava.

22A sa yaco e na dua na siga, sa vodoka ko koya e dua na waqa, kei iratou talega na nona tisaipeli; a sa kaya vei iratou ko koya, Tou lako ki tai kadua ni drano. A ra sa lako yani. 23Ia ni ra sa soko, sa moce ko koya; a sa lako sobu mai na cagi cava e na drano; a ra sa luvu tiko, ka voleka ni mate. 24A ratou sa lako mai ka vakayadrati koya, ka kaya, Turaga, Turaga, edatou sa mate. Sa qai tu cake ko koya, ka vunauca na cagi kei na wai cudrucudru; ka rau sa cegu kina, a sa maravu. 25A sa kaya vei iratou ko koya, Evei na nomudou vakabauta? A ratou sa rere ka kidacala, ka veikayaki vakai iratou, O cei beka o qo; ni sa vosa ki na cagi kei na wai, a rau sa talairawarawa vua?

26A ratou sa udu ki na nodra vanua na kai Katara, sa donui Kalili. 27Ia ni sa sobu yani ki vanua ko koya, sa sota kaya e dua na tamata mai na koro, sa tiko vakadede vua e so na tevoro, a sa dau sega ni vakaisulu, se tiko e vale, e na veibulubulu ga. 28Ia ni sa raici Jisu, sa qoqolou cake, ka bale sobu e matana, ka kaya e na domo levu, A cava vei kedaru, i Jisu na Luve ni Kalou cecere sara? au sa vakamasuti iko, mo kakua ni vakararawataki au. ( 29Ni sa kaya oti ko koya vua na yalo tawa-savasava me lako tani vua na tamata: ni sa tauvi koya wasoma; a sa vauci ko koya e na sinucodo kei nai vesu me tauri kina; a sa drutilaka nai vesu, a sa vakauti koya na tevoro ki na veikau.) 30A sa tarogi koya ko Jisu, ka kaya, O cei na yacamu? A sa kaya ko koya, O Vavakoso; ni ra sa lewe vuqa ko ira na tevoro ka curuma. 31A ra sa masuti koya me kakua ni kaya vei ira me ra lako yani ki bulu.

32A sa dua na qele ni vuaka e le vuqa sa vakani e na ulu-ni-vanua: a ra sa masuti koya me biuti ira me curumi ira. A sa biuti ira ko koya. 33A ra sa qai lako tani e na tamata ko ira na tevoro, a ra sa curumi ira na vuaka; a ra sa cici sara na qele e na baba ki na drano, a ra sa ora. 34Ia ko ira sa vakania, ni ra sa raica na ka sa caka, era sa dro, ka laʼki tukuna e na koro kei na veiyasana kisau. 35A ra sa qai lako yani me ra raica na ka sa caka; a ra sa yaco vei Jisu, a ra sa kunea na tamata, sa lako tani vua ko ira na tevoro, ni sa tiko e na yava i Jisu, sa vakaisulutaki, ka yalomatua; a ra sa rere. 36Ko ira talega era raica, era sa tukuna vei ira na ka sa bula kina ko koya ka curuma eliu ko ira na tevoro.

37Sa qai masuti koya me lako tani vei ira ko ira kecega na lewe ni yasayasa vakatataro: ni sa tauvi iro na rere levu; a sa vodoka na waqa ko koya, ka lesu tale yani.

38Ia na tamata sa lako tani vua ko ira na tevoro sa masuti koya me laivi koya me mai tiko kaya: a sa vakatalai koya tani ko Jisu, ka kaya, 39Mo lesu ki na nomu vale, ka tukuna na kena levu ni veika sa cakava vei iko na Kalou. A sa lako ko koya, ka tukuna ki na koro taucoko ko ya na kena levu ni veika sa cakava vua ko Jisu.

40A sa yaco, ni sa lesu tale ko Jisu, era sa vakacegui koya ko ira na tamata: ni sa waraki koya ko ira kecega.

41Ka raica, sa dua na tamata ko Jairo na yacana, e dua na turaga ni vale ni lotu, sa lako mai ka bale sobu ki na yava i Jisu, ka masuta me lako ki na nona vale: 42ni sa dua bauga na luvena-yalewa, e tinikarua na nona yabaki, a sa voleka ni mate. Ia ni sa lako ko koya, era sa drigiti koya na lewe vuqa.

43A sa dua na yalewa, sa turidrabalavu ka yabaki tinikarua, a sa volitaka vei ira na vu-ni-wai na nona ka kecega sa tu vua me bula kina, a sa sega ni bula vua e dua, 44a sa lako mai ki dakuna, ka tara na tutu ni nonai sulu; a sa tirimudu vakasauri kina nai davedave ni nona dra. 45A sa kaya ko Jisu, O cei sa tarai au? Ia ni ra sa cakitaka kecega, sa kaya ko Petero kei iratou sa tiko vata kaya, Turaga, sa vakaosoosoi iko na lewe vuqa era sa veidrigidrigiti, ia ko sa taroga, O cei sa tarai au? 46A sa kaya ko Jisu, Sa dua sa tarai au: niʼu sa kila ni sa lako tani vei au na kaukauwa. 47Ia ni sa kila na yalewa ni sa sega ni vuni, sa lako mai ka sautaninini, ka bale sobu e matana, ka tukuna vua e na matadra kecega na lewe vuqa na ka sa tarai koya kina, kei na nona bula vakasauri kina. 48A sa kaya vua ko koya, Na luvequ-yalewa, mo vakacegu; sa vakabulai iko na nomu vakabauta; mo lako e na vakacegu.

49Ni sa vosa tiko ko koya, sa lako mai e dua mai na turaga ni vale ni lotu, ka kaya vua, Sa mate na luvemu-yalewa; kakua ni vakaoca nai Vakavuvuli. 50Ia ni sa rogoca ko Jisu, sa vosa vua, ka kaya, Kakua ni rere; vakadinata ga, ena qai vakabulai ga ko koya.

51Ia ni sa curu ki vale ko koya, sa sega ni laiva e dua me curu kina, o iratou ga ko Petero, kei Jemesi, kei Joni, kei na tama ni gonealewa kei na tinana. 52A ra sa tagi kecega, ka tagicaka: a sa kaya ko koya, Kakua ni tagi; sa sega ni ciba ko koya, sa moce ga. 53A ra sa dredrevaki koya, ni ra sa kila sa ciba ko koya. 54A sa vakatalai ira kece ki tautuba, ka taura na ligana, ka kaci, ka kaya, Gonealewa, tu cake. 55A sa lesu tale mai na yalona, a sa tu cake sara; a sa kaya ko koya me soli vua e so na kena. 56A rau sa kidacala sara na nona qase; a sa vakarota vei rau ko koya me rau kakua ni tukuna vua e dua na ka sa caka.

Currently Selected:

Luke 8: FIJ1864

Highlight

Copy